Sunday (5/31) Sifac: Lungse El Tiana Wanginla

Kunokon

By Rev. Takeo Likiaksa

Kunokon – May 31, 2015
Sifac: “Lungse El Tiana Wanginla”
Mwe Read: 1 Corinth 13

Rev. Takeo Likiaksa

     Mwe sang se ma yok sripac pa mwe sang ma ac musaeak monin Christ. Paul el akkalemye lah mwe sang, kunokon ac talent nukewa oana sie, sie tia yok sripa liki sie, ngunin God oasr ke ma inge nukewa. Na ma nu sin mwet Christian ac mwet lulalfongi pa in suk in orekmakin mwe sang lalos ma Christ el sang nu selos. Kut in tia orekmakin mwe sang lasr nu sesr sifacna, a ma in kulansupu God ac mwet ngia.
 
     Mwe read se inge akkalemye lah mea lungse paye. Lungse el yok sripa likina in oasr lulalfongi, orekma in kasru ku kisac, orek menmen, ku, ac wal. Lungse el oru mwe sang lasr in oasr sripa. Finne mwe sang lun kais sie mwet tia oana sie, tu oasr lungse lun mwet nukewa. Na enenu uh pa kut in orekmakin nuke sripa lun God.

     Paul el fahk lah lungse el mongfisrasr. Oasr na pacl kut semutwengyak, foloyak ke oru lun mwet ke wangin pacna sripa. Kutu pacl uh kut ke program se, meeting se ku finne toeni se in wo ma nukewa, tu ke kutu sripa tia oana ke lasr uh. Pacl ouinge uh, kut in esam la ma nukewa ac tia fahla oana ke lasr u, mweyen kut wi pac mwet saye orekma.

     Lungse lun God som pac nu sin mwet nukewa, tia nu sesr mukena. El tia nunku kacl sifacna. Kut ku in orekmakin kain lungse se inge kut fin lela God elan kasre kut esla nunak in nunku kac sifacna lasr, na kut in oru lungse lasr tia motko in folok nu sesr. Ouinge, kut fin srike orekmakin lungse in oana Christ el oru uh, na kut ku in oru lungse lasr uh nu sin mwet saye.

     Paul el tafwela in fahk ke pacl se mwet Christian ac fah osun nu sin Christ, lah ma su tia kalem fin faclu ac fah akkalemyeyuk. Tu ke mwet lulalfongi muta fin faclu, Leum God el sang mwe sang lun Ngun elos in orekmakin in karelos, in kulansap ac akkeye mwet Chiristian wiaclos. Ke ma inge lela kut in oru wo nu sin sie sin sie ke lungse pwacye ma kut kewa fa eis ke pacl se tok.

     Paul el fahk lah lungse el mutweng nu ke safla. Yok fos ke Church Corinth, ke sripen srikla ku fos orekmakinyen lungse. Finne misenge pacna, oasr pacna nikanla ke orekmakinyen lungse. Tu lungse el tia nunku kac sifacna a el kulansupu mwet saye. Lulalfongi pa pwelung ac mwe luti lun God; finsrak pa ouiya ac ngetla suiya ma ac sikyak; lungse pa in oru ma wo tia in kaskas mukena. Na ac oru fal nuke soakas se ma fahk mu “Action speaks louder than word”. Lulalfongi ac finsrak fin oasr, na kom sukosok in lungse mweyen kom etu lah mea lungse lun God.

Saturday (5/30) Sifac: Sessesla Ke Ouiya Lun God

Kunokon

By Surleigh Y. Tara

Saturday May 30 2015
Sifac: Sessesla Ke Ouiya Lun God
Mwe Read:Ephesus 3:14-21

Surleigh Y. Tara

Mwet Sap Paul el sim akkalemye nusin mwet lulafongi fin acn Ephesus nuke prue lal nuselos.  Ke sripen elos enenu in etuh lah kuh ac etac-ack nukewa ma tuhkuh sin God Papa me. In puhlan pacl se inge, oreyacn prue lalos pa in tu ac prue. Tuhsruk Paul el ke elos in kahlem kac lah enenu in oasr inse puhsisacl lalos suc ma el akkalemye in letter se inge lac el sikukmutuntei lac ye mutun God Papa. Sikukmutunte se lal inge akkalemye lac, elos enenu in efahllah ye muhtuhn God met liki ma nukewa.

Letter se lal Paul inge, akkelemye enenu lalos in prue ac siyuck sin God ke kasrpen wolana Lal. Elos oacyacpac in kalem lac ke sripen lulalfongi lalos oruh e tufwa oasr akilenyen kuh luhn Ngun Mutal in elos ac elos in wi pac puhla ke lungse lun God suc elos tia kuh in kalem kac. Ke sripen yohklacnaiyen Lungse se inge, elos tiac kuh in srikeyac. Pa oru elos enenu in prue siyuck sin God, Elan ikacslah elos in kuh pac in kahlem lukmac iyen Lungse se inge ac elos in wi pac sesselsa ke Wolana Lun God.

Nusesr misenge in wi pac eis mwe lutlut se inge in akacsmakinye kuht lac prue uh pa sie ma yohk ke ip lun mwet lulalfongi se.  Ma nukewa weacng etac-ack ma tuhkuh sin God me ac kuht in prue sang nusin God enenu lasr uh.  Tukin ma nukewa, kuht in esam in prue ac sang kulo ke lung kulang yohk lun God, suc ma El long prue lun sie sin sie. Kuht fin oruh oinge, mukuikui lasr uh e fwakak ouiyac Lun God in moul luhn sie sin sie.

Kulo ke Lung Kulang Lun God nu sesr kewa.

Friday (5/31) Sifac: Lungse ac Muteng

Kunokon

By Lipan Welly

Friday May 29 2015
Sifac: Lungse ac Muteng
Mwe Read: 2 Thessalonica 3:1-5

Lipan Welly

In wi kowos kewa pac misenge, in sang kulo kaksak yohk lasr nusin God, ke moul wowo lasr kewa. Paing mwet nukewa.

In kaiyesr nufon mwet lulalfongi sasu, oasr na kisensiyuk ma oasr sesr, su kut srack nikin top nuke. Paul el etu enenu se inge oru el tu sifil supacllah Timothy, nu Thessalonica pacl na fototo se tukun elos tuh oakia Church we. Motkeyuk muh Timothy el tuh folok wi kisensiyuk lalos. Paul el simusla leta sie met (1 Thessalonica) orekmakin mongfisrasr ac kulang lal in akkeye ac akpulaikye mwet Christian we.

Church fin acn Thessalonica aokwuki tukun church Philippi ac pa capital lun province Macedonia, oru Paul el tuh orekmakin muh in main hub se in sang fahkak ke Pweng Wo, nu yen nukewa (1 Thess 1:8). Leta akluo lal Paul (2 Thessalonica) tuh simlac in aksuwosye kutu fohsak lun mwet lulalfongi ke tupanyen foloko lun Christ. El fahk elos in tu na ku ke lulalfongi lalos finne oasr mwe lokoloak ku mwe keok nuselos, elos in lungse ac muteng.

Mwe read se inge mutwaek ke Paul el siyuk selos in tia tui ke pray tu Pweng Wo ku kas lun Leum fah sa in pwengelik na ke mwet uh elos ac eis, in oasr srui ac kaksak lalos oana ke kowos oru. Efin yohk srui ac kaksak lasr ke Pweng Wo se inge e arulana yohk pacl lasr kut in suk in sang nuselos su tia moul kin. Mutawaek e in loom sesr sifacna kut e arulana suk kut in fahkak ke kas Lun God met liki ma nukewa. Efin kut readi ac fahkak kas Lal ke len nukewa e arulana yohkelik lungse lasr ac muteng lasr uh. Lulafongi lasr uh e kofla in mokleyuk ke sramsram lun mwet uh, fohs lun pacl uh ac kafofo sutuu ma sang esla pacl lasr kut in eis ke kas Lal.

Lungse oana ke simlac in 1 Corinthian 13:4-8, el mongfisrasr ac kulang; lungse el tia sok, lungse el tia sifacna konkin, el tia inse fulat; lungse el tia oru ma sufal, el tia nunku kacl sifacna, el tia sa in mulat, el tia oakla ma koluk orek nu sel. Lungse el tia engan ke ma koluk, a el engan ke ma pwaye. Lungse el tiana fuhleak; el lulalfongi ac finsrak ac muteng in pacl nukewa.

Leta akluo lal Paul nu Thessalonica oana ke srumunyuk tari lah el tuh simuslah in aksuwosye fohsak lun mwet Christian ke tupanyen foloko lun Christ. El fahk lah meet liki Christ el ac foloko, kain ma koluk nukewa ac fah arulana yokelik su e kolyuk sin “El Su Koluklana,” su ac fah alein nu sin Christ. Paul el topuk nuselos ke verse ak limekosr: Lela Leum elan kol kowos ac akyokye kalem lowos ke lungse lun God, ac tuh kowos in ku in muteng oana Christ. Yohk mongfisrasr ac sriklac foloksak ke lungse se su tuku mukena yurin God. Paul el fahk nuselos efin elos moul kin lungse se inge elos e muteng oana ke Jesus El kutangla ke kailyeiyuk El ke moul Lal. Jesus El sackunla tari inek lun mwet lulalfongi nukewa in uke. Mwet lulalfongi nukewa enenu na in muta ke lungse ac muteng in pacl nukewa. Sifil kafwe nusesr nukewa in tia tui in pray kesr kewa ac suk God met liki ma nukewa.

Thursday (5/28) Sifac: Akyokye Lungse Nu Sin Sie Sin Sie

Kunokon

By Victor Melander

Thursday May 28 2015
Sigac: Akyokye Lungse Nu Sin Sie Sin Sie
Mwe Read: 2 Thessalonica 1:1-5

Victor Melander

Nga lungse sifwil pac pain kowos mesengi ke kut ku in sifwil pa oasun ac aetui la pa ke mwe luti lasr u. Sifac ac mwe read lasr u pa Macret el srukak arulana na kalem pa nge. Kulo ma lulap Macret ac met sropo lasr kewa.

Yokiyan leta se aklou lal Paul nu sin mwet Thessalonica inge, Ma in sang aksuwosye fohsak lalos ke foloko lun Leum Christ Jesus. Ke sripen oasr mwet luti kikiap sikyak in pal sa aktafongyelos la ke len se inge. Mwet luti kikap fwak mu Leum El tuku tari. Ke sripah sacn Paul el sim in akkeyellos in tu na ku ke lulalfongi lallos ac ellos in tia fukeak ke pray pac lallos u.

Oayapac oasr mwe keok ac me lokoalok sikyak na sellos. Paul el sikaleni in kafwellos in tu na ku ke lulalfongi lallos. El akkeyelos in pray; fus 3: "Mwet wiasr in lullafongi, kut enenu is sang kulo nu sin GOD keiwos pacl nukewa. Fal nu sesr in oru ouinge ke sripen lulalfongi lowos arlana kapkapak, ac lungse lun kais sie suwos nusin mwet ngia oayapa yokyokelik." Yok lulalfongi ac lungse lalos. Ke sripe se inge apkaran in acn nukewa Paul el fufasryusr na we el tia tui ke kaksak ac konkin ellos na sin kutu pana mwet Christian u.

Ke ma sikyak in pal sac Paul el akkeyellos in tia munas la ke orekma wowo lalos nu ke lungse ac lulalfongi lalos. Ma na sesr messengi, kut in sifwil pa loang akwoya ke lulalfongi lasr ac in akyok ye pac eteak lasr ke KAS LUN GOD. Kut in ku in liye luti paye ac tu na ku ka. Porongo mwet Kol lowos an Lay Ministers ac Pastor lowos an. Tia kof la liki luti lalos na suwos an.

Pa inge ma nga ku in sruk in kasre kut kewa ke mwe read lasr na mesengi u. kulo GOD EL lungse kom.

Len ke Week (Malem/Len): Sifac pa "Format ke Post"

Kunokon (center, use largest font)

By Sang Inem (center, use italic)

Len ke Week, Date (MM Day, Year)

Sifac: Format ke Post

Mwe Read: Book Chapter: Verse

Kahs In Kol

Na kom mutawaak type akkuteyac lom uh inse.  Kom kuh pa in orekmakin "copy/paste feature' in mu sa pa.  Shortcut keys nuke copy pa, "ctrl+C' na nuke paste pa "ctrl+V". 

Tukin kom tari an na esam kom in toanya "Publish" in muh save sim lom an.

Wednesday (5/27) Sifac: Fufwasryusr In Ngun

Kunokon

By LM Skipper Ittu

Wednesday May 27 2015
Sifac: Fufwasryusr In Ngun
Mwe Read: Galatia 5:19-26

LM Skipper Ittu

Sifwil paing kowos nukewa ke inen Leum Fulat lasr Jesus Christ. Sifac se nuke Wednesday se inge fahk muh "Fufwasryusr In Ngun," oasr in Galatia 5: 19-26. Paul el kwacfe Gentile Christians ke Church Galatia in moul kuh fufwasryusr in Ngun, a tia ikwac. Ke sripen elos nutyang tari nusin God ke misac lal Christ, panang elos enenu na in moul in Ngun, suc enenu in oasr lungse, misla, mongfisrasr, kulang, oru wo nusin mwet, ac sifana leum fac; tuh pa inge fahko lun Ngun ma akkoelosla nuke moul se tok ah, moul in Ngun yurin God. Elos in tia moul in ikwac, suc wangin moul se tok ah kac, pa kalem ke moul in kosro, alu nuke god sutuhuh, intunut, so,k kakusrak, nunku kac sifana, orac lik inmasrlon m wet, ac nihm mwe sruhi. 

Ma inge kewa sikyak ke sripen Mwet Luti kikiap lun Mwet Jew, suc fasrelik inmasrlon Gentile Christians Galatia; elos tia kiapwela Gentile Christians inge mukena, a elos oayapa fahk muh Paul el tia Mwet Sap pwaye se. Luti kut misenge in kafwekut nuke moul in Ngun, tuh fin wangin srike lasr nuke moul in Ngun, ac fah wangin pac ipeis lasr ke moul in Ngun yurin God tok!

Tuesday (5/26) Sifac: Sessesla Ke Lungse Kawil

Kunokon

By Driskell Jack

Tuesday May 26 2015
Sifac: Sessesla Ke Lungse Kawil
Mwe Read: Jonah 3:10-4:11

LM Driskell Jack

Ma se meet, ngan aholkutla in sang kulo nu sin GOD Papa Tumasr ke moul lasr, ke kut kuh pac in moul wi sun len se misenge inge. Ak luo in wi kowos ke sie mwe lutlut ma fal in luti kut ke sripen yok nukacnla lasr misenge ke yohkwelik lun ma sik in sang fuhngul lulalfongi lasr nu sin GOD Papa Tumasr. Ak tolu, in akkalemye ke mwe lutlut se inge la, wangin sie wuhlela lun GOD Papa, eh tia sik; ma nukewa ma El wohlela kac, ac sikyak. Fahk in Isaiah 55:11, “Ac fah oapana inge ke kas ma nga fahk uh—Ac fah tia tafongla liki ma nga sapkin uh, A ac fah orekla ma nukewa fal nu ke lungse luk.”

Lungse lun GOD Papa pa kut tulik natul in kuhpacsryang nuke luhlin karingyuk kawil lal; ac elos nukewa ma tahfehla, in long ke kas in luti lal ma Mwet sap lal akkalemye kac, suh pa kut lutlut kac ke BIBLE Mutal natusr uh. Pa tuku misenge ke sie mwe lutlut na mwowo ke moul lal Jonah ac tulik nutin God fihn an Nineveh. Efuh, kuh tu in an Nineveh pa Jonah el sapkinyuk in som nu weh? Meyen pa ingan capital se lun an Assyria ma tulik nutin GOD Papa muta in nukacnla la. In oana ke fahk se lal nu sin Mwet Pahlu Jonah, “El fahk, “Fahla nu Nineveh, siti lulap sac, ac fahkak nu sin mwet we lah nga arulana etu lupan koluk lalos”(Jonah 1:2). Ma koluk lalos inge, kohlohlos nuke tuhlac ac misa ma patpat; su tia pa inge finsrak lun GOD Papa nu sin tulik natul. El GOD moul se fanna, suh sessesla ke lungse kawil nu sesr in pacl nukewa.

Mwe luti nu sesr Mwet Kulansap in kuh in ahkuhlen lupan ‘sessesla ke lungse kawil’ lun GOD Papa Tumasr nu sesr nukewa. Ouiyac se inge pa kut read ac lutlut ke ouiyen ‘tulwuhsrik lal Jonah’ ke el srike in fohlokin kononkon kuh sap lun GOD Papa nu sel ke, El panglol Jonah elan som nu Nineveh in fahkak ke lupan lungse kawil lal nu sin tulik natul fihn an weh. Ke sripen lungse kawil lal, El tia ke kuhnwaosla an weh; ah El ke mohlehlosla. “God El liye ma elos oru, ‘El liye lah elos sisla ouiya koluk lalos. Ouinge El ekulla nunak lal ac tia sang kai nu selos, oana El tuh fahk mu El ac oru”(Jonah 3:10).

Lungse kawil lun GOD Papa Tumasr nu sesr pa kut ahkulen pac ke El tia uniyac ac kuhnwaosla an Nineveh su ma Simusla akkalemye ke puhsen mwet 175,000 in an se inge. Kut eis pac ke ma Simusla la tukin tulik nutin GOD tuhfokla liki kos lun an Egypt; inge elos sifwil puhtatyang nu in kos ac sro lun an Assyria. Ac kut etu la inkanek sefanna in aksuhkohsok yehlosla pa in folok nu yurin GOD Papa. Pa inge sripac se oru pang uh som nu yorol Mwet Sap Jonah elan kacsru(Jonah 2:10).

Ke Jonah el asmakla in ahkuhlen la El tia kuh in kacingkuhnla pang lun GOD Papa nu sel ke ma kuhnacl. Inge El luti nu sin Mwet fihn an Nineveh, ac tuhkin luti lal, 120,000 selos forla in sifwil suk ke inkanek lun GOD Papa, (Jonah 4:11).

Ke ouiyac sik, yok engan lun GOD Papa Tumasr, ke sripen El ahkuclen la fihn an Israel, arulana loes pacl se Mwet Pahlu fihn an weh luti, ah arulana kehke inkacwacn mwet weh; elos ngosrngosrla na in alu nu sin ma srohlacla; ac tia nu sin GOD moul sefanna ma kut alu nu se. Ac El ahkuclen la in kihtin pacl se na ma Mwet Sap Jonah el oracla luti lal, elos forla na in kihtin pacl ac. Ouiyac se inge, akkalemye la kuh ihtuhkyang nu sel Jonah, meyen ma GOD Papa el sapkin in sikyak. Ma inge sik pac in ak keyekut mwet kulansap in tia wentehisri ma sapkinyuk nu sesr; yok ke kulansap ma kut oasr kac. Ouiyac ma sik ke puhsen mwet forla in suk ke lungse kawil lun GOD Papa, sang pac mwe luti na yok se nu sel Jonah; su kut mwet kulansap lutlut pac kac in akkohs sap lun GOD Papa ac ke pang fulat lal nu sesr in wi sacfuhnsuliyac orekma kawil lal.

Kulo ke mwe lutlut mwowo in luti kut kewa,

LM Driskell J. Jack
Kosrae-Seattle Congregational Church
23254 25th Avenue South
Des Moines, WA 98198
alukosraeseattle@gmail.com

Monday (5/25) Sifac: Lungse ac Etauk Ke God

Kunokon

By Robert Kilafwasru

Monday May 25 2015
Sifac: Lungse ac Etauk Ke God
Mwe Read: Hosea 6:1-6

Robert Kilafwasru

Ke sripen yohkelik ma koluk, ac wacngin auliyak paye lun tulik nutin Israel ke pacl lal mwet palu Hosea, Leum God el akkalemye nuselos lah elac fah sang nununku nuselos ac El ac fah oyacpa kanaosla mutun facl selos. Ke elos lie kaiyuck ma God el sang nuselos inge, na elos srike in folokyang nu yurin God in suk molela. Tusruktu God el akkalemye lah met liki elos ac tufah kuh in sifil lie wolacna Lal, elos enenu in auliuyak paye. Leum el fahk nuselos muh, lungse lallos uh oacna ohk ma tuku ke kusren len uh, ac oacna pac aunfong ma san a in wacnginla ke lotutang uh.

Pa inge oiyacn lungse sakawil ac auliyak sutuu uh. Auliyak paye tuku ke lungse ac etacuk lasr ke God. Sie mwet el fin auliyak paye, el enenu in ahk nasnasyacl sifacna, sislah oiyac koluk nukewa lal. Tukun el ahk nasnaslac tari, na el enenu in ahk mutahlyacl yurin God,( auliyak paye nusin God ke lungse paye), na leac fah kuh in eis mwe insewowo ke moul ma patpat. Payelah yohk lungse ac pakomuta yurin God pacnang elac fah nunakmunas nusesr kut fin auliyak ke insiacsr paye. Oacna ke mwet palu Hosea el nunakmunas nusin mutacn kiacl ke orekma koluk lal ac sifil akkalemye lungse lal nusel. Pa inge oiyac se ma God el kena tu kut kais sie in kalem kac.

Leum el oyacpa akkalemye in mwe read se inge lah ma se ma el enenu yorosr mwet uh pa lungse kawil lasr nusel. Kut in lungse El ke insiacsr kewa, ke ngunasr kewa, ac nunkacsr kewa oacna ke fack ke Matthew 22:37 ingen. Fin asr lungse se inge yorosr na ac yohk etauck lasr ke God.

RKilafwasru

Sunday (5/24) Sifac: Musaeak Mwet Ngiac

Kunokon

By Rev. Takeo Likiaka

Sunday, May 24, 2015
Sifac: “Musaeak Mwet Ngiac”
Mwe Read: Orekma 2: 1-7, 12; 1 Corinth 14: 13-19

Rev. Takeo Likiaksa

Nga finsrak kom fin ac esam mwe lutlut ke Sanri luo somla ah, May len 10 fahk mu Ngun sefanna, Mwe sang puspus, ac May 17 fahk mu Lah Puspus Mano Sefanna. Tu ma yok kac uh pa sramsramkin mwe sang tia oana sie, kain in kulansap tia oana sie ac talent tia oana sie. tu finne ouinge, Ngunin God oasr in ma inge nukewa, na pa mwe nunak ke May 24, ma inge ma in Musaeack Mwet Ngiac.

Luke el srumun ke tuku lun Ngun Mutal ke len in Pentecost. Mwet puspus ke mutan facl saye tukeni Jerusalem in wi akfulatye ac akilen sie kuhfa lulap lun mwet Hebrews. Na koanon mwe read uh sikyak tukin len 50 ma akmoulyeyukyak Jesus. Ke akwuk in pacl sac ke len in Jubilee, mwet kos elos sukosokla, misac lun mwet u iyukla, ac acn lun mwet ma kukackinyukla folokla nu sin mwet la ah.
Tu ke len sac, Mwet sap elos tukeni ke Upper Room in oru tukeni in prey lalos. Pulan pacl se inge sahp ao 9:00 ke lututang an. Pa inge pacl se ma sie pusra lulap ke pusren eng na upa sikyak ac nwackla lom se elos muta loa.

Liyeyuk sin mwet 120 ma muta in lohm sac oana loh firir fin kais sie selos. Tu pa inge tuku lun Ngun Mutal su orala fos lulap in akilenyuk ke ma sikyak inge. Mwe sang lun God nu sin kais sie selos, ma ac sang ku nu selos in oru loho lalos. John el srumun lah Jesus el ac fah baptais ke Ngun ac eh. Pa inge me sang lun God nu selos, oru elos ku in sramsram ke kahs lun mwet in acn pus. Usrnguk, tu pa inge ma Ngun Mutal oru uh. Ngun sang nu sin mwet Galilee inge in sramsram ke kahs lun kutu mwet saye. Ac Ngun Mutal ac kasre kom pa in oru kasru lom in musaek mwet enenu in long ke kahs lun God.

Paul el srumun ke mwe read se akluo an ke mwe sang ke kain in kahs.Tu ma yok sripa kac uh pa fin orekmakinyuk kutena kas ma tia eteyuk kalme uh nu sin mwet uh, ac wangin pacna sripa. Ouinge, Paul el fahkkin lah elos su sramsram, ku finne on ku pray, enenu in oasr pa lungasyac nu sin mwet uh in etu kalme. Kut kuh pacA in nunku mu kut fin tia ngisre Ngun lun God in kasru luti ku sramsram lasr uh, kuh fin wangin nunkweyac sesr na ac ku pacna in wangin sripa.

Kalmen ma Paul el fahk uh pa luti lasr, pray lasr ac on lasr enenu in oasr kalmeya nu sin mwet saye, tu pa inge ouiya ma ac “ Musaeak Mwet Ngiac” uh..

Saturday (5/23) Sifac: Akyokye Orekmakinyen Mwe Sang Lom

Kunokon

By Surleigh Tara

Saturday May 23 2015
Sifac: Akyokye Orekmakinyen Mwe Sang Lom
Mwe Read: 1 Corinth 14:6-12

Surleigh Tara

Mwe lutlut se inge ahkkahlemye fwahk lal Mwet Sap Paul nuhke ip lun Kahskahs in Ngun. Kuht in sifwil pa loacng nu mwe lutlut se ke Saturday ke week tari ac su ma sramsram kin Kahskash in Ngun. Na in sifwil pac akkuhteya pac la mwe sang se inge, Kahskahs in Ngun, enenu in orekmakinyuk fal nuke sripac la uh.

Mwet Sap Paul el fwak lac mwe meah sripac in orekmakinyuk ye mutun mwet uh efin elos tia kuh in kalem kac kahs ma orekmakin yuck inge. El fwak nuke ip luhn mwe ukuk kuh rappa uh la efin tia orekmakinyuk fwal nuke sripac la uh in oralla pusra na wowo, ac mwe meah in orekmakin yuck. Sie pac sripac lun mwe ukuk uh pa in akkalemye pacl ma mwet meun in ahkolah nuke ma kunalos. Efin elos koflah in kalem sripen ukuk se na wangin pac sripac in orekmakin yuck.

Nuke pac na Kahskahs in Ngun uh, enenu in orekmakin yuck in sang akfwasryella mwe fwakak tuhkuh sin God me nusin sie sin sie. Mwe sramsram ma orekmakinyuk inge efin tia tahfwelah enenu in fwakak uh, na tari in tia pac orekmakin yuck. Oasr kain in kahs kuh lumah in sramsram pucspucs ma mwet uh ac orekmakin, tusruk elos in suk oiyac ma in sang kasrpeyack mwet sayac in oru wo nusin sie sin sie.

Nusesr misenge uh pa, mwet lulalfongi uh in oru mukuikui lalos ma in sang kasrpeyack sie sin sie. Ac kuht in orekmakin mwe sang lun Ngun suc ma utukuh nusesr in fwal nuke sripac la uh. Ma se yohk met uh pa in fwahkahk ke Lung Kulang lun God su ma use insewowo nusin sie sin sie. Kulo.

Friday (5/22) Sifac: Elos ac Fah Sulkakin Kahs

Kunokon

By Lipan Welly

Friday May 22 2015
Sifac: Elos ac Fah Sulkakin Kahs
Mwe Read: Orekma 2:14-21

Lipan Welly

In wi kowos kewa pac in sifil kaksakin God fulatlana lasr ke moul wowo lasr kewa. Paing mwet nukewa.

Sie sripac pac oru Luke el simislah buk in Orekma: pa in sang akpacyei ma Jesus El fwak ke Matt 16:18, Ke ma inge nga fahk nu sum, kom pa Peter, su kalmac uh pa ‘eot’, ac fin eot se inge nga ac fah musai church luk; na finne misa tia pac ku in kunausla. Motkeyuk mu fototo liki na year 35, Pweng Wo som liki acn Jerusalem nu Rome. Ku lun Ngun Mutal, sie pac ip yohk ke buk se inge, pa sang us mwet lulalfongi inge in fahkak ke Pweng Wo.

Oasr munas ac sangeng lal Peter fwakyuk kewa ke Gospel akosr ke el lafwekunul Jesus. El fahk nusel Jesus, nga ac fah tiana som liki kom, elos inge nukewa finne som liki kom. Jesus El fahk, pwayena nga fahk nu sum, meet liki won uh ac kahkla ofong, kom ac lafwekinyu pacl tolu. Ma inge sikyak ke sripen sangen lal Peter ke el liye ma orek ac fwack nusel Jesus ke El nununkeyuk.

Ke tukun Jesus El sifil moul yak ac sikyang nusin mwet tamalutlut, John 21:15-18, El tuh siyuk sel Peter lah el lungse El ac elan karinganang sheep natul pacl tolu. In Luke 22:31-32, filfilla Satan elan srikal Peter ac mwet wial, akkalemyeyuk kalem lah ma Peter el oasr kac inge ma in sang akyokye lulalfongi lal ac akkeye mwet wial.

Peter el tia akkeye mukena mwet wial uh el tuyak fahkak ke Kahs lun God ke len in Pentecost. El fahkak ke kahs tuku sel, mwet palu Joel, akkalemye lah God El ac fah oru tuh Ngun Mutal in tuku nu fin mwet nukewa.

Buk lun Orekma srakna akfahsryeyuk sin mwet lulafongi nukewa misenge oana ke sapta 1:8 akkalemye, tusruktu kowos ac fah eis ku ke Ngun Mutal ac tuku nu fowos, ac kowos ac fah mwet loh keik in acn Jerusalem, ac in acn Judea nufon, oayapa Samaria, ac nu in acn nukewa fin faclu.

Kut tia ku in us Pweng Wo se inge efin kut tia lela Ngun Mutal in wi kut. Orekma se inge pa yohk sripa emeet sin God. God ella equipped i mwet nukewa in fahkak ke Pweng Wo se inge. Nga kuh in fahk yu sifana lah ke sripen lung kulang Lal nusik nga ku in moul kin ac wi fahkak ke Kahs wolana Lal. Akkalemyeyuk ke verse safla se inge lah kutena mwet su pang in suk kasru sin Leum elos fah moul.

Sifil pac sang kulo kaksak lasr nusin God ke osun wowo ac ke kut ku in sifil aetui ke Kahs lal.

Thursday (5/21) Sifac: Kut Lohng Ke Kahs Lasr Sifanna

Kunokon

By Victor L. Melander

Thursday May 21 2015
Sifac: Kut Lohng Ke Kahs Lasr Sifanna
Mwe Read: Orekma 2:8-13

Victor L. Melander

Mea kalmen pulu kahs ekasr nge “kut lohng ke kahs lasr sifanna.” Mea na uhsrnguk se. Ku su sramsram kuhn yuk nge. Mwet liki nga fwa akfusye komyak u, nga lungse sifwilpac sang sifah srisrik se ke sapta se nge in kasre kut liye mwe sramsram lasr na mesengi u, “Tuku Lun Ngun Mutal”.
 

Oasr kittin sram sram matu se nga lungse srumun na suwos ke ma sikyak ke pahl se nge. Kut lohng ac lulalfongi tari la Jesus El tuku misac ac moul yak ac, inge na El wangin fwin falu. El som na yurin PAPA tumel, El muta oasr ke Lepo leyot yorin GOD PAPA Mutal tumel.
 

Ke Jesus El misac moul yak El muta kitin pal fwin fwalu len 40 (sapta 1 fus 3). El fwak sap soko… (Fus 4 ke sapta 1), “Nemet som liki acn Jerusalem …sano na mwe kite se su Nga tuh fahk nu suwos, su PAPA EL wulela kac, (fus 5): John el tuh baptais ke kof, a in len ekasrna (len 10) fahsru, kowos ac fah baptais ke Ngun mutal.” Kut kalem ke la ke len 40 ma El muta fwalu El fwak ma inge na sin mwet tuma lutlut lal, (sapta 1 fus 2) “Nwe ke na sun len se ma tuh utukyak El nu inkusrao.” Oasr len 10 tukin ma sikyak ke sapta 1 fus 2.
 

O.k. mayac len 10 inge? Ke tuku lun ngun mutal su eteyuk mu len seinge len in Pentecost se. Len 50 na Greek. Christian ngusrellac kas se inge orekma kin in akkalemye “Tuku Lun Ngun Mutal.” Yea nukewa Israel akfulatye len se inge, “len 50 tukin Passover”
Mwe luti lasr u (fus 8-13) uhn mwet se oru ma na sakuruk se inge ellos ma Galilee eltal sram sram ke kahs eltal matula ke Galilee. Mea sakuruk ellos oru? Ellos sram sram ke kas su ma eltal tia orekma kin pa kahs (fus 9-11). Kowos fwin oasr ke pahl se inge mea kowos ac fwak ke? Aksruksruk ye ku akfulatye GOD.
 

Pa inge ma nga ku in fwak ke mwe konukon lasr na mesengi u. Kulom ma lulap. GOD EL lungse kom.

Wednesday (5/20) Sifac: Kain In Kahs Nukewa, Sie Pusra Lulap

Kunokon

By LM Skipper Ittu

Wednesday May 20 2015
Sifac: Kain In Kahs Nukewa, Sie Pusra Lulap
Mwe Read: Fwackyuk 7:9-12

LM Skipper Ittu

Kaksakin Leum God ke moul lasr kewa.Sifac se lasr ke Wednesday se inge pa "Kain In Kahs Nukewa, Sie Pusra Lulap," oasr in Fwackyuk 7: 9-12. Sifac se inge sikyak tukin Lamb el kunaosla Sil Se Akonkosr tukin Rapture, in oana ke aruruma John el liye Patmos. Fahk lah oasr Un Mwet na lulap se el liye, wangin mwet kuh in oaklah.

Elos ma ke kain in mwet, sruf, mutunfacl, ac kas nukewa. Elos nuknukyang ke nuknuk fasrfasr, sruok lesahk palm se, ac tu ye mutun tron ac Lamb. Ac lupufan nukewa wi Mwet Elder 24, ac ma moul 4 ah, raunela tron uh, fa ksufi, ac alu nusin God . Elos kaksakunul ac fahkak lah wolana, lalmwetmet, sunak, wal fulat, ac kuh nukew a oasr yorol. Sifac se inge kasrekut in wi kafwe kut in etu ke aruruma lal John uh, yohk in etu ke pwayelana, kulana, wolana, ac falana lun Leum God tuh fal E lan akfulatyeyuk ac sunakinyuk. sin mwet ac ma nukewa inkusrao, faclu, meoa, ac acn nukewa.

Lela kut wi akilen kuh ac fallana in in sunakinyuk ac akfulatyeyuk lun Leum God ke fahkak lasr, yohkna ke orekma lasr. Tuh pa inge ma nusesr kais sie mwet tukin misa lasr, kut ac wi pac witnessi vision se John el liye inge; lela nusesr in akola wo tuh kuht in wi eis kutangla ac wi kaksakunul ke lusen moul in Ngun lasr yorol inkusrao.

Tuesday (5/19) Sifac: Ma Na Srisrik Se, A Konkin Ke Ma Lulap

Kunokon

By LM Driskell Jack

Tuesday May 19 2015
Sifac:  Ma Na Srisrik Se, A Konkin Ke Ma Lulap
Mwe Read: James 3:1-5

LM Driskell Jack

Mwet sap wiyen Jesus, Tamulel James el luti kut ke mwe lutlut se inge, kut in etu la lohosr (our tongue) nwe srik, tusruktu, pacl se orekmakinyuk in kas la uh; kuh in muhsacehack mwet se, ac kuh pac in kuhnwaohsla pac nunak lun sie pac mwet wiyesr. Kut in arulana nunkehack ac nunkehla ke pacl se kut orekmakin lohosr uh.

Mwet sap James el ke kut in esam la ma kut fahkla ac ma kut tia fahkla, tukeni na yok sripa. El sifwil pac akasmakinye kut la arulana yok sripa kut in tahkunla akwoyac mwe fahkak lasr uh, ac kut in orella fahkak lasr uh in kalem, oasr kaclmeh, ac in tehsisr nuke ma oasr ye mutacsr uh. Kut in arulana sensekin luhkin pihsacsr in tia rehlac nuke lehsrik, sramsram suhfal ke mwet wiyesr, konkin, akmel, kucnehak, ehyense koluk, luti koluk, lacesla, tohrkaskas, wentehisr i ma konacsr ac kas kikiap. Ma inge kewa ku in sik, ac fihn kut tia karingin orekmakinyen lohosr. Na mwe fahk se inge som yok nu sin mwet ma orekmakin loho na yok, pa kut ahkuhlen selos ma pang nuke orekma lun mwet luti uh.
Sie orekma ma Mwet uh orekmakin lohosr yok nukac pa luti (teaching) uh. In pacl nukewa ma Mwet sap James ac Mwet tuma lutlut elos oru luti lalos, arulana oasr pac saya ma srike pac in wi fahkak. Arulana yok ahkulenyen Mwet luti uh pac yurin Mwet Jew, pwenang elos ahsro pac kainin kunokon inge.

Kainin konokon ke luti inge pa Mwet sap James ac Mwet tama lutlut wiyel elos akfahsrye in oana ke Wen nutin GOD Papa el lohtelos kac ke el luti pac ke El srack mol muta yorolos. Paye la oasr pac selos ma tia lungse ke elos luti uh, tusruktu kunokon in luti uh arulana suhsackinyuk pac sin Mwet Jew kuh yoros pac misenge. Nga kuh pac in fahk muh, kut mwet uh lungse luti, ah oana kut in srunga pac mwet u in luti kut. Tusruktu, kut fihn nu nu srihnenyack in mwet luti se, lela kut in prue ac siyuk ke kacsru lun GOD Papa in kol kut ac in lohang in lohtehla pac ke ma Mwet sap James el sensenkin nu sin Mwet luti nukewa ke Kahs mutal lun GOD Papa.

Mwet sap James, el akasmakinyelos ma wi luti, ku elos pac saya ma ahkoho in wi luti la; orekma na uhtuftuf se inge arulana yok pac mwetahlos ma ac tia karingin fahkak la. Sripac yok san pa, ma nukewa ma fahkyukla ac tuhtafla sin sie mwet luti el sang kas in muhsacehack ac kas ma mwet uh enenu in long ac orekmakin. Kalmweyac pa el kacpsra nuke “Kut kapriya mwe kuhf se nu in oalin horse uh in sang kifasul elan akos kut ac fahsr nu yen kut lungse fahsr nu we” (James 3:3). Kaclmeyen mwe kuhf se nu in oalin horse soko ingan pa kas ma kut mwet luti fahkla ma ac tu sang nunak in kuhfacla inkanek lun kais sie mwet ma lipsre luti lasr.

In ouiyac se pa na ingan, Mwet sap James El akulen sie kitin mwe ikwik na srisrik ke soko oak nes lulap ma captain se kac kuh in orekmakin nuke an ma el lungse kifasla oak soko an nu we. Ouiyac se ingan pa akkalemye la loun mwet se nwe srik, tusruktu ma ohtuhla ke ahlul ku in kifasla inkanek lun kais sie mwet.

Pa ingan sripa yok lal Mwet sap James, tamulel lun Christ in orella kas na ah lal in karingin kut Mwet ma puhtatyang nuke konokon se inge misenge. Pwenang, ac fihn pa nuke fahkak ke Kahs lun GOD Papa, kut enenu in arulana kalem ke mwe luti lasr, mwetah ma ac ku in sik nu sesr kac; fah kut wi lacskackin nu sin mwet lilu ac lulu ke Kahs Mutal lun GOD Papa. Ke nga tahfuh ouinge, ngan sismouk pac la nga sie suwos ma wi pacr in fahkak ke Kahs In Kol (site) se inge, ke sripen nga suk ac ngosrngosrla in luti Kas kawil lal in BIBLE Mutal natusr, wi prue ac siyuk ke kasru lal pwe nga na len in ahse nu sik mwe fahkak lal, meet liki nga orella mwe fahk luk, oana ke nga lacsrkackin nu suwos inge. Ac fihn kut puhla mu ngun mutal lun GOD Papa Tumasr pacngon kut in wi tahfehla ke Kahs Mutal lal, lela nu sesr in tia ahlohlo. Luti ke Kahs Mutal lun GOD el ma nu yok sripa se. Ma Simusla fahk, “Kas lom lam nuke niuk Ac kalem nuke inkanek luk”(Psalm 119:105).

Ac Kas lun GOD Papa ac lam nuke niyesr fuhkac, ah fihn wangin Mwet ahkuteyac nu sesr. Pa akkalemyeyuk pac ke ma Simusla uh “Na mwet fulat sac fahk, “Nga ac kalem fuka fin wangin mwet aketeya nu sik?

Kulo ma lulap ke mwe lutlut mwo in luti kut kewa,


LM Driskell J. Jack
Kosrae-Seattle Congregational Church
23254 25th Avenue South
Des Moines, WA 98198
alukosraeseattle@gmail.com

Monday (5/18) Sifac: Oru Tu Kowos In Lohng Pusren God

Kunokon

By Deaconese Tulpe Dizon

Monday May 18 2015
Sifac: Oru Tu Kowos In Lohng Pusren God
Mwe Read: Deuter. 4:32-40

Deaconese Tulpe Dizon

Kaksakin God sefana lasr ma karingin moul lasr. Ac oayapa sikaleni in ikasla mwe luti lal tu in lutiyuk nu fin falu nofon. Ke oana sie oiyac ma ac fakak paye ke wen saoklana natul suc kalem ke Jesus Christ.

Mwe read se inge srumun ke kas lal Moses nusin tulik nutin israel. Moses el srike in akasmakinye tulik nutin Israel tu elos in sifana sensenkakunolos liki alu nuke ma sruhlaclah. Ac Moses el oayapa akasmakinyelos in esam ma sap lun God ke elos e ilyak nu in acn Canaan (the promise land ).ke Moses el tu kol tulik nutin Israel ac fasr liki facl Egypt. Elos tu liye lupan ku lulap lun Leum God ke lupan usrnguck ac menmen ma el orekmakin. El oayapa orekmakin mwe aksahngeng puspus. Ma inge kewa el oru tu in kalem sin tulik Israel lah el mukena pa God ac wangin sie sahyacl.in oana ke sifa se lasr inge fwak uh, verse 36 el fwak oinge; el oru tu kowos in long pusral in kusrao mwe, tuh elan kuin luti kowos.

In oiya se pana inge ma nusesr mwet lulalfongi nukewa tu in, " long pusren God " pa in akos Ma Sap Lal nukewa. Ac oayapa kut in tia sang ma lun falu in losraclah kulansap lasr suc ma in akfasryala Ma Sap lun God. Ahkkeyeyucklac in Kulansap (The Great Commission) se inge ma in sang sulkackin wulelah lun God suc ma El fihliye Ma Sap in karihngihn tulik natul tupan tuku lun Leum Jesus.

Sunday (5/17) Sifac: Lah Puspus, Mano Sefanna

Kunokon

By Pastor Takeo Likiaksa

Sunday – May 17, 2015
Sifac: Lah Puspus, Mano Sefanna
Mwe Read: 1 Corinth 12: 12-31

Pastor Takeo Likiaksa

Paul el srike in fahk kutu ouiya ma akkalemye kalmen sifac se inge. El fahkkin lah mwet Christians pa orala Church (monin Christ), ac Christ pa sifac. Ac Christ pa monin sahk soko ac mwet Christian nukewa kupasryang nuke monin sahk soko. Ac oayapa Jesus pa Vine ac kut pa lesahk uh. El pac pa eot in sroasrik. Tu kalmen fahk uh pa kut tia ku in oru kutena ma sayen Christ. Kut eis ku lasr sin God, ke kut oru orekma lasr ke inen Christ. Oana Paul el fahk ke Galatia 2: 20 – “Nga wi Christ misa tari fin sakseng lal, ouinge ke pacl sac me tia nga pa moul, a Chriat su moul in nga. Moul se nga moulkin inge, nga moul ke lulalfongi ke Wen nutin God, su lungse nga ac sifacna acsang moul lal keik.” Kut nukewa oasr ip kunasr nuke monin Christ.

“Ouinge wangin ekla inmasrlon mwet Jew ac mwet pagan, ku inmasrlon mwet kos ku mwet sukosok, ku inmasrlon mukul ku mutan – kowos ma sefannalac yurin Christ Jesus.”(Galatia 3: 28) Oasr inkanek soko fanna nu yurin Papa, ac Christ pa inkanek soko an. Kut nukewa nutlah nutin Papa. Ac nutlah lasr ma ke sran Jesus Christ. Ac ma inge kewa ma ke Ngun lun Christ oru kut in ma sefanna.

Oapana ke monin mwet se. Finne oasr ip puspus ke monin mwet se, ac ip ke mwet se tia oana sie kulansap la. Ac ip inge nukewa yok sripa, ac eneneyuk nuke monin mwet fon se.

Oasr kain in kunokon tia oana sie ke Chruch. Kunokon nukewa yok sripa. Tia enenu in oasr srela. Oana ke soakas se ma fahk mu – “Together we stand, divided we fall”. Fin ac oasr elya lun sie met, na enenu mwet nukewa in suk kasru nuka. Fin ac oasr wo ouiya, mwet nukewa enenu in wi engankin.

Pang lun God nu sesr tia oana sie. Ac finne oasr wal pupus, tusruktu, eneneyuk in akfasryeyuk kunokon inge fal ma kunokonuh nu kac uh. Fin ouinge, fal kut kais sie in sifacna lohacng nuke ma kunasr ac kut in tia elya ke ma kunen mwet saye. Tu ma pac lasr in akkweye sie sin sie in tukeni orekmakin ku su Leum God El ase nu sesr. Tu kut lahn sie sin sie. Ac fukah woiyac mwet lun God in tukeni nunak se ac oru orekma lasr nuke wolana lun Leum God.

Saturday (5/16) Sifac: Masefanna Yurin Christ Jesus

Kunokon

By Surleigh Tara

Saturday May 16 2015
Sifac: Masefanna Yurin Christ Jesus
Mwe Read: Galatia 3:23-29

Surleigh Y. Tara

Galatia pa sie book ma Paul el simis nusin mwet Christians yohkiyac na fin acn Galatia. Letter se inge ma in sang ak suwosye mukuikui lun mwet Christians fin acn se inge. Na mwe read se inge akkalemye nuselos ke Ma Sap ma itukyang nusel Moses, ma in sang karangunulos liki ma koluk tupan tuhkuh lun Leum. Elos oacyacpacna in muhta in mwe kohs ac kapihr ke sripen Ma Sap. Wangin kuhlang kuh lungse ke Ma Sap uh. Ke sripen yohk lacna ma koluk lun mwet uh, pacnang Ma Sap utuckuh in sraclihk mwet uh liki wolana lun God.

Leum Jesus El tuhkuh misac in akpayeyelah wuhleacng lun God.  Misac lun Leum orallah akwuhk se in oasr lulalfongi ke tuhkuh lun Christ. Lulalfongi se inge pa kuh in aksuwosyeloslac ye mutun God. Ke na sripen lulalfongi ke Christ oru mwet nukewa kuh in wi pangpang muh tuhlik nuhtin God. Ma inge use sukosok se nusin oacna sie mwet suc ma lulalfongi ke Wen nuhtin God.

Nusesr misenge kuht in wi puhlakin pac sukohsohk se inge ke sripen wolacna ac luhng kuhlacng lun God. Misac lun Leum oruh kut ma sefanna yurin God Fulatlana in wi ilyak nuke akwuk wolana su ma kuht kuh pa in wi ipeis kac. Lulalfongi ke inen Leum Jesus use moul in kutanglah nuke ma upe fin faluc.  Ma inge oru kuht enenu in lungse sie sin sie ac in wi pac insewowo ke ma suc God el akiye nusin tulik natul in moul kin.

Friday (5/15) Sifac: Ngun Sefanna, Nunak Sefanna

Kunokon

By Lipan Welly

Friday May 15 2015
Sifac: Ngun Sefanna, Nunak Sefanna
Mwe Read:Philippi 1:21-30

Lipan Welly

In oana pacl nukewa, kaksakin God fulatlana lasr ke moul wowo lasr kewa. Paing kowos mwet nukewa.

Ke sapta 16: 8-10 in buk lun Orekma akkalemyeyuk ke sie aruruma lal Paul fin acn Troas. El liye sie mwet Macedonia (present day Greece) kwafe sel ac fahk, “Fahsru nu Macedonia ac kasrekut!”.Troas el sie region srisrik oan northwest fin acn Asia Minor (part of present-day Turkey). Pa inge sie ip yohk ma sikyak ke fufahsryuk akluo lal Paul. El tuh lohng pang ku ngusr se inge ac usla Pweng Wo nu fin acn Europe ke pacl se oemeet. Welul aokia church se oemeet fin acn Europe, ke city se pangpang Philippi, in province Macedonia pa Luke, Silas ac Timothy.

Pacl na loeles se tukoh Paul el tuh simis leta se inge nusin church Philippi ke el tuh muta in presin. Motkeyuk muh presin fin acn Rome. El arulana ke sang srui kaksak lal nusin mwet Christian fin acn Philippi, ke kasru na yohk elos sang nusel ke pacl el muta in enenu lal. El fwak pa nuselos lah moul in ma sefanna ke Christ, pa sie mwe kite ke kulang lun God, su elos eis ke sripen lulalfongi.

Kut mwet lulalfongi nofon, enenu in moul kin mutawaek in me read se lasr inge. Tuh mea kalmen moul uh? Nu sik, kalmac pa in kulansupu Christ (Philippi 1:21). Pa inge sie verse ma eteyuk Paul ke, lah el tia sifil moul ke lungse lal, uh lungse lun Christ. Ma nukewa el oru ke moul lal ma nusin Christ. El mulkunlah enenu lal sifana, ac sulala tuh fahkak ke Pweng Wo,in pa moul lal.

Ke buk lun Rome 12: 1-2 Paul el tuh kwafe nuselos elos in eisselosyang nusin God oana sie mwe kisa moul ac mutal. Elos in tia etai luman moul lun mwet faclu, a elos in ekla ke sripen God El arulana aksasuye nunak lalos. Kitin verse se inge akkalemye lah efin yohk pacl kut lohng kuh readi ke Kahs Lal, e arulana yohk ekla in nunak lasr uh, e srikeni nunak lasr nuke ma faclu uh e yohkelik nunak lasr na inkasrao.

Paul el akkalemye nusin mwet Philippi lah God el etu lungse suwos lal nuselos su tuku liki insien Christ Jesus sifacna. Enenu in pa inge acn se ma Ngun Sefanna, Nunak Sefanna in tuku we uh. Efin tia tuku yurin Jesus e tia ku in tukeni ma sefanna. Ac kowos in sang lungse in kapreni ma inge nukewa in ma sefanna lac, mweyen lungse pa yohk sripa oemeet (Col 3:14). God mukena pa ku in use Ngun sefanna ac nunak sefanna nusesr kewa.


Paul el fahk ke me read se inge elos in tu na ku ke nunak sefanna, ac insese in tukeni kwafeang in orekma ke sripen lulalfongi fal nu ke Wosasu. Kut mwet lulalfongi nukewa enenu in tia tui in fahkak ke Wosasu se in pacl e nukewa. Ma Sap se ma e use nofon mwet lulalfongi in Ngun Sefanna ac Nunak Sefanna pa akkalemyeyuk ke Mathew 22: 37-39 fahk muh, Kom fah lungse Leum God lom ke insiom kewa, ke ngunum kewa, ac ke nunkom kewa. Pa inge ma sap se ma yohk oemeet ac yohk sripa oemeet. Ma sap se akluo yohk sripa oapana ma se meet an: Kom fah lungse mwet tulan lom oana kom lungse kom sifacna.

Pa inge ma Paul el akkalemye ke mutawaek in mwe read se inge, Tuh mac kalmen moul uh? Pa nu sik in kulansupu Christ. Kut kulansupu God ke kut akos ma sap. Ngun Mutal pa use ku lasr in lungse God ac mwet tulan lasr. Lungse se inge pa kapsreni ma nukewa in ma sefanna. Lungse se inge pa usellah Jesus nu fin saksin in mouli kut lac nofon mwet uh. Mwet Christian nukewa enenu in moul kin Lungse.

Thursday (5/14) Sifac: Moul Ke Inse Sefanna

Kunokon

By Victor Melander

Thursday, May 14, 2015

Sifac: Moul Ke Inse Sefanna

Mwe Read:  Romans 15: 1-7

Victor Melander

Ma se met kut (majestic plural) sang kulo na sin GOD ke moul lasr kewa ke kulang a pakoten LAL na sesr kewa. Ke kut ku in sifwil pa long ke Kahs LAL in kohl kut pa ke len sasu se pa EL eseh na sesr tu kut in muta ke, in insewowo ac in alulul pa ke. Kulo na suwos kewa mwet lili ac lulu.

Sifacn konokon lasr na mesengi u: Moul Ke Inse Sefanna. Ac Sifac srisrik lasr u, “Akinsewowoye Mwet Ngia Ac Tia kowos Sifacna.” Nga mu fwal pana kut in liye in akkonye mwe luti lasr u. Mweyen mwe luti lasru sramsramkinyuk ke kain in Christian lou. Sie lulalfongi ku ac sie Christian sasu su lulalfongi la srak munas. Ke mwe read lasr u akkalemy na sesr u. Kut liye tu ma kunellos su ku ke lulalfongi in “kasrelos su munas” pulu kahs se inge lumlumweyuk na ke sie ninac su srukak sie tulig srisrik in oakaki, in akkeye.

Sie Christian su ku ke lulalfongi enenu in akkeye ellos su srakna munas ke lulalfongi tusruk tu oru ma inge in tia akinsewowoye kowos sifacna tu in akinsewowoye ellos su munas ke lulalfongi.

Finne Christ, El tuh tia moul in akinsewowoyal sifacna. Ma kut in oru, in fwasr tukin Jesus. In etaelul ke El kisac kuhn La sifacna ke sripen lungse Lal na sesr. Mwe luti na sesr mesengi u akkeye kut la ma nukewa ma orek na sesr putati nu fwal Jesus. Kalme pa ac oasr muta ke ma orek na sesr fwin falu.  Nga lungse pa we akkeyekowos in mongfusr akaranguni sie sin sie akkesrui in nunak sefanna ac inse sefanna. Tupan tuku Lun Leum lasr Jesus Christ. Tu ku ke lulalfongi lowowos an ac kasru ellos su srak munas ke lulalfongi.

Kulo ma lualap GOD EL lungse kom.

Wednesday (5/13) Sifac: Moniuk ac Inse Pwaye

Kunokon

By LM Skipper Ittu

Wednesday May13 2015
Sifac:  Moniuk ac Inse Pwaye
Mwe Read: Corinth 11:1-5

LM Skipper Ittu

Sifwil paing kowos nukewa. Sifac se nuke Wednesday inge fahk muh "Moniuk ac Inse Pwaye," oasr in II Corinth 11: 1-5. Paul el sensenkakin Mwet Christian ke Church lal Corinth ke Mwet Sap Suhtuhuh kuh Mwet Palu Kikiap ma ac tuku nu yorolos ke el wangin yorolos. El kena elos in etu lah el lungse elos ac lemtai elos oana ke Christ el lemtai Mwet Christian nukewa. Oinge, elos in oan sie mutan wowo ac payuk sin mokul sefanna, suc pa Christ.

Elos in moniuk ac inse pwaye nusin Christ, a elos in tia oana Eve, fisrasr in kiapweyukla. Sifac se inge lutikut in arulana moniuk ac pwaye nusin Christ tuh kut in tia pac kiapweyukla sin Mwet Sap suhtuhuh oasr yorosr misenge inge.

Tuesday (5/12): Kut Ac Fah Akos

Kunokon

By Nipastu Marylou P. Charley

Tuesday, May 12, 2005

Sifac: Kut Ac Fah Akos

Mwe Read:  Exodus 24: 1-7

Nipastu Marylou P. Charley

Leum God El fwak nu sel Moses el, Aaron, mwen luo natul Aaron ine Nadab ac Abihu ac wi itngoul sin met kol lun met Israel in fwanyak nu fwin eol uh (eol Sinai).   Elos in pasrla alu tu God El Mutal. Elos in tia fototo sayal Moses nu yurin God. God El sramsram nu sel Moses ac sang ma elan fwak nu sin metu. Ma nukewa El sapkin nu sin metu in oru ke elos a ilyak nu in fwulan Mwuleang. 

In len tok a toang Moses el etoaak loang se Ke eot 12 kais sie ke sruf lun Israel. El esukak me kisac firir nu sin Leum God. El kisakin kutu cowin me kisa in akinsewowo. El esla kutu sran cow nu kutu basin ac tafu el sang osraclik fwin loang uh. Toko el readi nu sin met u ke pusra lulap ma simisla ke Mwuleang lu Leum God. Na metu fwak "Kut fwa akos Leum God ac oru ma nukewa ma El sapkin."

Monday (5/11) Sifac: Sramsram Ke Pusra Sefanna

Kunokon

By Robert Kilafwasru

Monday May 11 2015
Sifac: Sramsram Ke Pusra Sefanna
Mwe Read: Exodus 19:1-8

Robert Kilafwasru

Kulo kaksakin God ke kulang Lal nusesr nukewa, ke kut kuh in sifil osun ke kahs wolacna ma el ahkolah nusesr misenge.
 
God el kolma tulik nutin Israel liki moul keok ac upac lalos in acn Egypt. Ke elos tuku liki acn Egypt ac sun finol Sinai, Leum God el pahnglol Moses nu yorol in sang wulelah ma el ahko nu selos (Israelites). Ke Moses el foloko yurin Leum God me, el tahfelah nuselos oacna ke Leum God el wulelah. God el fahk nuselos muh, Elos fin ahkos ac liacng Wulela lal, elos ac fah ma Lal (lun God) sifacna. Elos ac oyacpac mwet sriyucklac nusin Leum mukena in kulansapacl oacna mwet tol uh. Ke Moses el sang tari kahs inge nuselos, na pa inge pacl se ma elos tukeni oraclac Pusra Sefanna, “Kut fah oru ma nukewa ma Leum God El fahk.” Kahs lalos inge ak-kalemye insese lalos in tufah ahkos ac oru ma lungse lun God.
 
Ke verse 5 ke mwe read se inge, “ Kowos fin ahkosyu ac liyaung wulela luk,” tahfu se met ke verse se inge ak-kalmeye lah tulik nutin Israel enenu in ahkos ac sruokyac wuleang lun God, elos in muh ku in eis sukosok liki mwe kohs lalos. Elos in muh kuh in moliyucklac liki keok. Fal nusesr in luti ke oiyac inge lah kut fin ahkos God ac liyaung wulela Lal nusesr, kut ac fah wipac moliyucklac liki mwe keok lasr.
 
Ke tahfu se tok ke pacna verse 5 ingen, “Kowos ac fah Mwet luk sifacna”, Leum God el ak-kalemye ke wulela in molela mwet lal. Kalem in Isaiah 43 verse sie nuke ahkosr. Israel el moliyucklac ac karinginyuckyang sin God. Elos wekyucklac in mutunfacl lun God, ac kais sie selos nukewa yohk sripac nusin God. Oacna kut nukewa misenge, God el supacma Mwen sefanna natul in molikutlac. Kut in pahngpang mwet lal, ac kut in kuh in akihlen yohk sripac lasr kais sie nuke orekma lun God. El ahkola moul lasr kais sie tari in ahkyokye orekma wo lal. Ma kunasr in suk ac konac-ack sripac lasr nuke orekma wolacna Lal.
 
Ma inge nukewa asr ke wulela lun Leum tari, tu kut nukewa in tukeni kahsru sie sin sie ke kahs lun God ac fahsreni in Pusra Sefanna, suc pusra se inge pa “Kut fah oru ma nukewa ma Leum God el fahk.”