Monday (8/31) Sifac: Pre Ke Inse Puhsisacl

Kunokon

By Deaconese Sepe Kilafwasru

Monday August 31 2015
Sifac: Pre Ke Inse Puhsisacl
Mwe Read:Matthew 6:9-15

Deaconese Sepe Kilafwasru

Inmasrlon me luti puspus ma Jesus El luti nusin mwet tumal lutlut ac mwet puspus sahye ma ukual in long luti lal, El lotelos ke ohiyen prue, su El pahngon preu lun Leum.

Leum Jesus El oakiac tu in pa inge ohiyen prue lasr mwet uh. Ke kut oru prue se inge, kut enenu in kaksakin God meet tufah siuk ke orekma Lal fin falu,enenu lasr ke kais sie len, oayapa siyukke kuh Lal in kasre kut ke me sruf  ku ma upac ma tuku in srike kut ke lulalfongi lasr.

Ke kut prue fwak , “Papa tumasr su  Inkosrao” kut kakssakin kuh lulap Lal ac mutahllacna Lal. Ke kut fwak “Tokosrai Lom Tuku”, El akkalemye Tokosra Inkosrao suc God El tu wulela nusel
Abraham. Tokosrai lun God a fah fonlah le pacl se kosrao sasu ac falu sasu tuku.

“Ma Lungse Lom in orek’’  Pa ma lungse lun God in orek fal nuke sripac wo Lal fin falu se inge ac falu se tok ah.

“Kite kut len se inge ma kut mongo misenge” akkalemye la Leum God pa ase me enenu lasr nukewa a tia ma sesr sifana. Lulalfongi God El a fwa ase mwe enenu lasr fal nuke lungse lal.

“Tiac kol kut in mel , Eiskutlac liki ma koluk” Leum God El tiac srife kut tusruk kutu pacl uh el lela in srikeyuck lulalfongi lasr uh. God El wulela muh El ac fwa tiac lela in srikeyuck kut yohk liki ma kut ku kac.

“ Nunak munas nu sesr oacna kut nunakmunas nusin mwet suc orekma koluk nu sesr” Jesus El fahk muh kut fin tiac nunakmunas nusin mwet ke ma koluk lalos, God El ac fah tiac pac
nunakmunas nusesr. Fisrasr nu sesr in siuk nunakmunas yurin Leum, a upac kut in nunak munas nu selos suc orekma koluk lain kut.

Jesus El luti mwet uh in prue ohinge, ac in tiac oru oacna mwet wosonkas  kuh mwet Pagan elos oru. Elos lungse oru prue lalos mwet uh in lie ac kaksakunulos, a elos oru prue loeleswacngin
kalmac. God papa El etu tari mwe enenu lasr meet liki pacna kut siuk.

Sie mwet suc etu in ahkfulactye God, kaksakunul ac tupan kolyuck Lal nuke mwe enenu nukewa, ac etu in lulalfongi lal in God in pacl mwer sruf upac nusel, ac pusisal in nunakmunas nusin mwet ke ma koluk lalos, El sie mwet pusisal. Pa inge ohiyac God el kut in moulkin. Pusisal pacl nukewa ke kut prue nusel.

Deaconese Sepe Kilafwasru

Sanri (8/30) Sifac: Kut ac Folok Fuka?

Kunokon

By Rev. Takeo Likiaksa

Sunday August 30 2015
Sifac: Kut ac Folok Fuka?
Mwe Read: Malachi 3:1-10

Rev. Takeo Likiaksa

Mutweng lun God arulana yok, ac El tiana sa in sang mwetin ma koluk lun mwetu. Ke moul lun mwet lal ku finne kut in pacl inge kut seakos, ku finne tia akilen akwuk ac masap lun Leum God. Finne ouinge, Leum God el ase pacl lasr in ekulla ouiyen moul lasr ac suk akwuk lal.
 
Ke mwe lutlut se inge, wangin na nunak lun mwet in pacl sac mu ma elos oru kufla liki akwuk lun God. Pa oru elos in kusen siyuk ke sifac se inge, “Ku Kut Ac Folok Fukah? Ku mea oasr ma koluk lasr, Mea oasr ma kut kunaosla ke akwuk lun God?

Tu ke pacl lal Malachi, mwet uh tui tila sang mwe sang lalos nu sin God. Elos motko mu ma oasr yorlos ma lalos sifacna. Wangin na motkweya selos mu Ma nukewa ma elos insewowokin ma Leum God el sang nu selos.
 
Ke fus 1 ke mwe read se inge, fahk lah oasr mwet tuku in akoo inkanek lun Leum God. Kut esam kacl John Baptais (Matthew 11:10, Luke 7:27). Mwet se akluo an pa Jesus sifacna, su kewana Malachi ac John Baptist tu tuku in akoela inkanek lal. John el fahk mwetu in auliyak liki ma koluk lalos sano tuku lun sie su fulat lukwel. Ac Malachi el kwacfwe mwetu in folok ac akfalye ma fwack in Ma Sumusla.

Saturday (8/29) Sifac: Elos Su Auliyak ac Pusisal In Ngun

Kunokon
By Deaconess Niokong Yukiwo

Saturday August 29 2015
Sifac: Elos Su Auliyak ac Pusisal In Ngun
Mwe Read: Isaiah 57:10-21

Deaconess Niokong Yukiwo

Leum God el fwak nu sel Isaiah mwet palu elan fwaknu sin mwet Israel, ya kowos tiana fwuleak ku totola in suk in alu nu ke God lowos ma kowos sifana orala; kowos pangon mu ma srolala fokfok lowos ingan ku in sot ku nu suwos, suh, God se ma oru kowos kikiap ku sangeng panang kowos tila esamyu. Ya kowos tila akfulatyeyu? Meyen nga misla tia kaskas nu suwos ke pacl na loes,
Nga a fwa akkalemye ma koluk lowos in eteyuk. Ma srolala lowos inge tia ku in kasre kowos, pal kowos suk kasru lela God lowos kuh ma srolala fokfok lowos inge in molikowosla,

Mwet luk kowos auliyak foloko nu yurin God, na pal kowos pang nu sik nga fwa topuk kowos a nga God fulat a mutal su moul ma patpat, tusruktu nga oayapa muta yurin mwet pusisal a auliyak tuh nga fah aksasuye lulalfongi lalos a finsrak lalos, nga sang moul lalos, nga fwa tia kolla mulat luk yorolos ne tok.

Deaconess Niokong Yukiwo

Thursday (8/27) Sifac: Infahlfal Lun Sulala

Kunokon 

By Victor Melander

Thursday August 27 2015
Sifac: Infahlfal Lun Sulala
Mwe Read: Joel 3:9-16

Victor Melander

Nga lungse pac sang kulo ma lulap na sin GOD ke moul lasr kewa. Ac ke KAS wolana lun GOD.  Ke Book matu u oasr lulalfongi se ma fwak mu Mwet fwakak lun GOD Joel mukena pa fwakak ke Len Lun Leum. Mwe sim u Akkalemye la GOD EL sang KAHS LAL nu sel Joel élan akkalemye nu sun mwet nukewa la eh oasr nununku saflac nu sin mwet ac mutun fal nukewa. Pa ku kalem ke Revelation. Kutesrik ke 2 Thessalonians 2:2 ac 2 Peter 3:10. 

Wangin sie mwet ac ku in kaengunlac. Kutu keok kutu insiwowo,
Ngan akkalemye la Len Lun Leum sie liki na Len Saflac. Ngan srike akuteye kut in kalem ke sielana lun Len Lou inge.
Len Saflac; Tu mutkweyuk mu pa ke tuku se aklou Lun Leum ac Mwet Lango lasr. Rapture ku tribulations.

Len Lun Leum; kut long pa ke Armageddon ac Jerusalem. Jesus El kutanglac mweun san mutkweyuk muh pah ingan pahl se Jesus El ac Leumi falu ke yea 1000 se.

Ma na sesr kut in tu ku ke lulalfongi ac fwakelik KAHS Wosasu.
Kulo ma lulap. Jesus Christ ac GOD lungse kom.

Wednesday (8/26) Sifac: Mea Kut Fahk Keim?

Kunokon

By LM Skipper Ittu

Wednesday August 26 2015
Sifac: Mea Kut Fahk Keim?
Mwe Read: Malachi 3:11-18

LM Skipper Ittu

Sifil paing kowos nukewa ke inen Leum lasr Jesus Christ. Sifac se lasr nuke Wednesday se inge fahk muh "Mea Kut Fahk Keim?"; oasr in Malachi 3:11-18; Kuhsahl Mwet Pahluh Malachi ke Mwet Jew Jerusalem pa inge. Ke nunak tafonglac kuh fihlacng lalos, elos muh wangin sripac elos in orekma nusin God. Oinge, elos kisensiyuki lah mwe meah elos in oru ma God El fahk uh meyen elos keok ke orekma lalos nusel uh, a Mwet Koluk uh insewowo na. Elos kisensiyuk oinge ke sripen ke liye lalos, Mwet Fihlacng uh insewowo na ac Mwet Koluk uh kapkapak ac wangin na ma sikyak nuh selos. Tusruktu, Leum God el fahk lah El esamulos suc inse pwaye nusel. A elos suc seakos, ac fah sun ongaiyac. Mwe luti se inge kasrekut in sikalani in akos God ac tia kisensiyuki pakoten lal nusin Mwet Koluk uh. Tuh ke pacl fal, elos ac eis mwactacn seakos kuh orekma koluk lalos.

Ngacn leumtuhlwacack ke pal se inge lupan srui kaksak luk kuh lasr nusin God ke koko wowo lal pwacnwacng kut sun week saflah lun Kahs In Kol ke yac 2014-2015; Kaksakin God keimwos kewa members ke Kahs In Kol Group; mwe finsrak luk tuh Leum God Elan insewowo ke oraclah lasr kais sie, ac Elan sifwil wi kut ke kut mukwiyang in ohruh pac fahkwack lasr ke Kas In Kol 2015-2016; kulo nuh sum yok pac Surleigh ke initiation wowo lom ac lela tuh Leum God Elan akinsewowoyekom ac kut nukewa ke lusen moul lasr kais sie fin facl se inge!!!

Tuesday (8/25) Sifac: Kut ac Oru Fuka Nu Sin Mwet Saya?

Kunokon

By LM Driskell Jack

Tuesday August 25 2015
Sifac: Kut ac Oru Fuka Nu Sin Mwet Saya?
Mwe Read:Matthew 7:7-14

LM Driskell Jack

Nga sifwil sang kulo ac kaksak lasr nu sin GOD Papa Tumasr ke sie mwe lutlut na mwowo in kacsrekut misenge. In oana ke kut puhlah ke uhpaclah lun pacl uh; apkuran na kut in kofla ahkuhlen enenu lun mwet wiyesr misenge. Na pa mwe lutlut se inge tuku nu sesr in sifwil kacsrekut ke oru lasr nu sin mwet wiyesr ac elos nukewa saya.

Akkalemyeyuk in Matthew 7:12, muh kut in “Oru nu sin mwet saya ma kowos lungse elos in oru nu suwos; pa inge kalmen Ma Sap lal Moses ac mwe luti lun Mwet palu. Ma sap inge pa GOD Papa el panglol Moses, Mwet Kol lun tulik Israel, el eis Yorol ke finol Sinai. Ma sap inge, kut etuh muh, ke pacl se na ma GOD Papa el sang nu sel Moses, tulik Israel (tulik nutin GOD), elos muhtahwehak in ahkulen ma koluk elos moulkin.

Ke ma sap se omeet ma GOD Papa El ahsang nu selos pa in tia eis sie-na god saya. In pacl se na ma ihtukyang ma sap inge nu sel Moses; Aaron (Priest lun tulik Israel), ac tulik Israel elos srolacla calf soko, ac alu nu se. Pa inge pac kutu sripac pwenang, GOD Papa El suhpacma Mwet Palu lal kel (Isaiah, Jeremiah, Ezikiel, Daniel, Hosea, Joel, Amos, Obadaiah, Jonah, Micah, Nahum, Habakuk, Zaphaniah, Haggai, Zacharaiah ac Malachi.

Ke wik misenge uh, kut long sap lun GOD Papa nu sin tulik nutin Israel, su el sang nu sel Malachi in tafwela tukin elos folok ke sro fin an Babylon in sifwil muhsahak Temple fin an Jerusalem. Pacl se inge, oasr yeac angfohko kutu meet liki isusla lun Wen kulo soak se fanna nutin GOD Papa, suh pa Jesus Christ. In puhlun pacl se inge, Mwet kol lun an Israel, ke pacl se ma elos fohlok liki sro; arulana koluk oru lalos nu sin Mwet wiyaclos. Mwet Kol in pacl sac, elos tu suk na ma ac mwo nu selos, ac elos oru nununku na kuhtahsrik nu sin mwet wiyaclos.

Mwet wiyaclos arulana uhpac nu se ke sripen koluk kol lun Mwet ehkin kol fin an Judah. Ma inge pa kut long ke mwe lutlut ke wik ekacsr somla ma akkalemye sel Jeremiah, Ezekiel, Daniel, Zacharaiah na pa sel Malachi. Tukin Mwet Palu Malachi, na GOD Papa el tia sifwil sang kas lal in tuhtaf sin mwet palu ke lusen yeac 400 BC. Sripac yok sen, pah El ahkoho in supema wen soak se fanna natul in tuku, isusla, luti ouiyac lal nu sesr.

Ke Wuleang sasu, suh buk lal Matthew pa buk in mwosasu se omeet simla, Matthew el ihkacsla buk se lal inge ke sie tak sucu (ehlaksrahonak). El kohnwahak tu paye, JESUS CHRIST el Wen soak sefanna nutin GOD(Matthew 1:1-16). Ke fus ak singaul-onkosr, fahk ouinge, “ac Jacob papa tumal Joseph, mukul tumal Mary su oswella Jesus, su pangpang Messiah.

Messiah se inge, moul fin faclu, forfor luti, onwehla mwet mas puspus ac oru kainin mwenmen puspus suh arulana pwenpeng. El ouyacpac oru luti na ku lal, su luti kut misenge in ihkus insiesr in ku in long nuke enenu lun Mwet wiyesr. El tia ke kut in oru koluk oana ke akkalemyeyuk ke ouiyac sik fin an Juda. Jesus, Wen nutin GOD El luti kut tu in arulana yok lungse in kut. El ouyapac luti kut ke orekma in kacsru lasr in paye ac suwos. El ouyapac fah kut in “Liyaung tuh kowos in tia oru orekma wo lowos ye mutun mwet uh tuh elos in liye ma kowos oru”(Matthew 6:1). El ouyapac akasmakinye kut in fahk mu, “Kowos finne koluk, kowos etu in sang ma wo nu sin tulik nutuwos uh…”(Matthew 7:11). Kacpun mwe luti se inge pa, kut in sang nu selos mwe enenu ma elos ngusre ku siyuk ke kacsru kac. Pwenang, yok lulalfongi lal nu sesr Mwet lulalfongi mu, fin mwet siyuk ke kacsru; ac itukyang. Oana ke el fahk, “Siyuk, na kowos fah eis. El ouyapac akkeyekut ma sun inkanek in enenu, in eis pac pacl mwo la in suk mwe enenu. Yok lulalfongi lal pac sesr mwet kulansap mu, kut fin suk, kut ac konauk. Oana ke buk in mwosasu lal Matthew akkalemye, “suk na kowos fah konauk…” Jesus el lulalfongi mu mwe enenu lasr kut ac konauk, fin kut siyuk, suk, ac in sang kuhiacsr in towolak. El fahk la, kut fin oru ouinge, in towolak, na srungul nuke mwe enenu lasr ac ikakla.

Srungul uh ac ikakla, oana ke ikak srungul lun GOD Papa Tumasr nu sesr ke pacl se inge. Kut fin ahsang mwe eneu lasr nu Sel ke prue; El ah kacsre kut. El arulana ke kut in inse puhsisel in siyuk sel ke kacsru. El arulana ke kut in konaok ouiyac mwo ma El insewowo kac in BIBLE MUTAL natusr uh. Ah el arulana ke kut in sang insiacsr in soko in kohnwalak, oana ke pacl ma kut arulana ngosrngosr in suk ke kacsru ke mwe enenu yok lasr uh.

Misenge, kut fin siyuk ke prue lasr nu sel Elan eskut, ke sripen kut Mwet koluk (Rome 3:23); ela eis kut (Psalm 51:1). Fahk ouinge, “Pakotn nu sik, O God, Ke sripen lungse kawil lom! Ke pakoten lulap lom, Eela ma koluk luk!” Ac ke nga suk ngan fohlok nu yurum, lela kom in esyu (15:11-18);… “Ke el srakna fahsr loesla liki lohm sel uh, papa tual ah liyalak ac arulana pakomutal, ac el kasrusr nu yurin wen natul, kafiselma inpaol ac ngok mutal”(Luke15:20).

Mwe lutlut se inge, luti ngan sokol in pacl nukewa in moul luk. Luti yu pac la wangin kuh ku etu luk sifacna. Pwenang, lela nga inse puhsisal in sokol ac siyuk ke kacsru Sel pwenga na len.

Kulo ke mwe lutlut mwowo in luti kut kewa ke ouiyac lun JESUS CHRIST wen nutin GOD in kacsre kut ke moul in kulansap lasr fihn facl se inge.

LM Driskell J. Jack
Kosrae-Seattle Congregational Church
alukosraeseattle@gmail.com
(206)946-0937

Monday (8/24) Sifac: Luti Nu Sik Innek Lom, O Leum God

Kunokon

By Deaconess Tulpe Dizon

Monday August 24 2015
Sifac: Luti Nu Sik Innek Lom, O Leum God
Mwe Read: Psalm 25

Deaconess Tulpe Dizon

Falana ngacn wi sang kulo nusin Leum God Kulana lasr ke lungse Lal na nusesr ne ke pal se inge ac kulo pac Nusel ke me lutlut wolana Lal na sesr. Sifa nuke Monday(August 24 2015) su fwak oinge, " Luti Nusik Innek Lom, Oh Leum God". Su akuteyucki nusesr ke book in Psalm: Chapter 25 nofona.
 
Psalm soko inge ma lal Togosra David. Kusahn Psalm soko inge akalemye ke sie pray in siyuk ke kolyuk a karinginyuk lun Leum God nu sel Togosra David. In oana ke sifa lasr uh fahk uh David el pang nu sin Leum God tuh elan luti nu sel ke inkanek ma el enenu in fasr kac. Akkalemyeyuk in Psalm soko inge lah ke sripen Leum God el suwos ac wo. El luti met koluk ke inkanek elos in fasr kac ac EL kol met inse pusisel nu ke inkanek paye ac lotelos ke ma lungse Lal. David el arulana kalem kac lah pusla ma koluk lal sifana panang el pang nu sin Leum God tuh elan nunak munas nu sel ke ma koluk lal kewa. El fwak lah elos nukewa su sunakin Leum God el a fwa luti nu selos inkanek su fal elos in fasr kac.
 
Mwe lutlut se inge tuku in luti kut lah kut fin pang nu sin God a siyuck elan luti kut ke inkanek Lal. El ac tufwa oru oapana nu selos su sokol.

Sunday (8/23) Sifac: Ma Sikyak Ke Tia Porongo

Kunokon 

By LM Quartus Esau

Sunday August 23 2015
Sifac: Ma Sikyak Ke Tia Porongo
Mwe Read: Zechariah 7:8-14

LM Quartus Esau

Zechariah el sie sin mwet palu ma Leum God El tuh orekmakin in tafwelah kahs Lal nusin tulig natul (mwet Israel). El inmasrlon mwet ma tuh foloklac nu Jerusalem liki sruho lalos in acn Babylon in tuh sifil musaeak temple Jerusalem. Pulan pacl se ma Zechariah el oruh palu lal inge motweyuck mu oasr ke pulan pacl se ma musah se inge tuh tui ne sifil mutwawaak fwalac neke aksafyeyucklac.

Ke sripen oasr na kisen siyuk inmarlon mwet u, lah srakna enenu elos in oru lalo ac asor lalos ke malem aklimekosr, in akilen ac akesmakinyelos ke musallah lun city Jerusalem ac temple Jerusalem? Mwet inge akilen kuiyen musah uh ac akilen la ac fwafwala in tari, pwanang oasr na nunak lalos mu ac fal pacna in tari tui oreyen lalo lalos u.

In me read lasr u, Leum God El akkalemye top lal nuke me siyuck se inge. El fwak mu, lalo ac asor ma mwet Israel elos oru ke yac puspus somla ah, elos oruh na ke oiyac lalos sifana. Elos tiana akilen ku akfulatye Leum God ke pacl elos lalo.

El akyokye in fwak la, pa inge sripac ma pwanwang elos tuh putatyang nu in sruoh sac. Ma ke sripen elos tiana sang insielos in porongo ma Leum God El sapkin nuselos. Elos likkeke ac tiana akos masap lun God nuselos. Elos oru nununku sesuwohs, elos tiana kulang nusin sie sin sie, elos akkemkatuye katin mas, mwet mukaimtal, mwet sac inmasrlolos, ku kutena mwet enenu.

Sap inge ne srumunyuck sin mwet palu lun God, a mwet Israel elos tiacna porongo. Elos kosrala nunak lalos ac akupaye insielos ac tiac long kahs ma mwet palu inge lotwelos kac. Oinge Leum God El kasrkusrakack selos ac ngetlac lukelos. Ke elos pang nusel, El tiana topkolos. El lelah tuh mutunfwal sayac in tuku kunaosla acn selos, ac usacleloselik nu yen loes liki acn selos.

Me lutlut u sikyak ke pacl se inge in akesmakinye kut nukewa. Kut fin tiac porongo pusren Leum God nusesr, El ac tiac pac porongwe kut ke pacl se ma kut pang nusel. Kut fin tiac akos masap Lal, El ac lwelah moul lasr u in upac. Lelah mwe lutlut se inge in akesmakinye kut in oru ma lungse lun God ac in oru alu ac akfulat lasr nu Sel ke inse paye.

Saturday (8/22) Sifwa: Saturday: Leum God El Soano in Fahkak Kulang.

Kunokon 

By Surleigh Y. Tara

Saturday, August 22, 2015

Sifwa: Saturday: Leum God El Soano in Fahkak Kulang. 

Mwe Read: Isaiah 30: 18-26 

Surleigh Y. Tara

Nga arulana engan pac in wi fahkak ke mwe lutlut se inge. Kut in wi pac kalem ke lac yohk ma wo suc ma soane kut, kut fin akos sap lun God.  Paye lah efin tia akos, pa kuht wi pac luti ke week ekasr tari ac ke ma upac sikyak yohk ke sripen se akosten lun tulik nutin Israel suc kut in wi pac luti kac. Na mwe luti se nuh misenge inge arulana use akkeye yok kut in wi akilen lac God El tupan in akinsewowye mwet Lal. 

Tukin mwet Lal sun acn Zion, elos ac tufwa tia sifil pulakin asor ac tung. Zion pa acn Jerusalem kuh acn ma God El oasr we. Ke elos ai fin acn suc ma God El wulela nu selos, elos ac tufwa sun mwe inswowo ke sripen akosten lalos ac faskac elos fin prue in yok.  Ma inge kuh in sikyak wo liki.  Kao ke mwe mongo lalos tia apkuran nuke se akosten in uke Kahs lun God. Elos ac tufwa pula tafongla efin elos kuhflah nu lacsac kuh lacyot ma ke sripen mwe sruf nuselos.  Paye lah mwe insewowo suc elos ac fwa pulakin ma ke sripen lulalfongi lalos, kaiyuck paye, srike in fwasr ke akwuk lun God, suk kalem sin God ke pacl in alohloh, ac kihfucsyelos in tiac puhtat nuke ma tafonglac.  Ma inge e tufwa esaclos lac liki alu lun ma srolaclah. Ac elos ac tufwa koase ma koluk uh. Ma inge use kalem nuselos in ekuhlah lun nunak lalos in uke ma suwoswos ke sripen kolyuck lun Ngun Mutal. Paye lah sikyak lun ma inge akkalemye akwuck kuh lun God nusin mwet Lal. Kalem uh akkapye etac-ack nusin sie sin sie suc ma ke sripen lung kulang suc filiyucki nufin fwalu in akkeyela ac aksuwosye ma sufal suc sikyak. 

Pa inge akkalemye yacn Lungse lun God uh. Kut fin fasr ke akwuk ac kolyuck Lal, ma wo mukena pa ac oan sane kuht.  Paye la tia fisrasr kuht fin loang nuke mukuikui lun faclu ac ma mwet sahyac oru. Tusruk mwe lutlut se inge akasmakinyekut in esam lac God El soano in sang kosrani nuselos fasr ke moul suwos.  

Kulo,

Surleigh

Friday (8/21) Sifac: Suk Nununku Suwohs ac Nununku Suwohs Mukena

Kunokon

By: Lipan A Welly

Friday August 21 2015
Sifac: Suk Nununku Suwohs ac
Nununku Suwohs Mukena
Mwe Read: Deuter 16:16-20

Lipan Welly

In oana pacl nukewa, ngacn wi mwet nukewa in kaksakin LEUM GOD fulatlacna lasr ke oiyac wowo El use nusesr kais sie, yohk nuke inkacnek soko mukena El oralla ke Wen Sefanna Natul tuh kut mwet uh nofon in eis moul ma patpat. Paing mwet nukewa ac kaksak yohk lasr Nusel in tia tui in pacl nukewa. 

Kowos in oru ma fal ac suwohs pacl nukewa, tuh kowos fah ku in oakwuki in facl se su LEUM GOD lowos El sot nu suwos (Dueter 16:20). Book se inge elan karingin in oanna siskal, ac elan riti in moul lal nufon tuh elan lutlut in arulana akfulatye LEUM GOD, ac in oaru in akos ma nukewa ma sapkinyuk loac (Dueter 17:19). 

In book se inge Moses el oru sramsram saflah lal in sifil akkesmakinye tulik nutin Israel ke akwuk suwohs lun God in facl Moab, ke pacl elos apkuran in utyak ac eisla facl Canaan (ca. 1406 B.C.). Suk nununku suwohs ac nununku suwohs mukena! Elos in tia sesuwos ku fahkak srisri in nununku lalos uh; ac elos in tia eis molin eyeinse, meyen molin eyeinse uh ku in aklosrye mutun mwet lalmwetmet ac mwet suwohs, pwanang elos orala nunuku tia suwohs (v19). 

Wangin sie mukul ac fah oru inkanek in kosro nu sin sie pah mukul-God El kwase ouiya sacn (Levi 18:22). Oasr ke inmasrlon year tousin tolu angfoko longoul sie (3,421) nu misenge ke Moses el oru sramsram lal akkesmakin tulik nutin Israel inge in oru ma suwohs lun God. Ma suwohs ku Mwosasu sun acn Kosrae in sie oalfoko lamngaul luo (1852), oasr year siofok ongoul tolu (163) mwet Kosrae nofon etu ke Mwosasu. 

Bible kuh Kas lun God in oanna siskacsr, kut in riti in moul lasr nofon tuh kut in lutlut in arulacna akfulatye LEUM GOD, ac in oaru in akos ma nukewa ma sapkinyuk loac. Efin paye kut akos sahp lal Moses inge e wangin fohs lasr meyen kut e akkolla na in utyak nu in acn Canaan. Wangin nununku suwohs ku in tuku sin sie mwet ma tia lulalfongi ke Jesus. Misenge kut liye lah akfasryeyuk sin mwet nununku (U.S. supreme court) ma God El kwase (Levi 18:22). Mwet akfasrye ma sahp inge tia na liye ma Moses el fahk nusin tulik nutin Israel inge; elos liye muh oasr suwohs sayen Bible uh. Lela year 163 inge in sie me akkesmakin nusesr nofon mwet Kosrae tuh kut nofon in akkesrui forlah suk LEUM GOD inge na. Pa inge nunak suwohs uh! Forla moul kin Kas Lal ac akkolla nu ke tuku Lal. 

Kut nofon etu lah wangin ma e an ne tok ma patpat sayen Kas Lun God. Efin Kas Lal kut tia sang in us moul lasr na e wangin suwohs ke orekma lasr. Kas Lal enenu na in tuku meet liki ma nukewa oana Moses el akkalemye nusin tulik nutin Israel inge. Nunku suwohs tuku ke lungkulacng Lun LEUM GOD nusesr nukewa. Abortion, same sex marriage, kut tia ku in pray in public school, pa inge ma mwet uh oralla in sang kol kut misenge uh, meyen kut ke akinsewowo ye mwet uh liki na kut in akfulatye LEUM GOD. Tu ku ke Kas Lun God tia ma mwet uh fahk. Sifil paing mwet nukewa arulacna srui kaksakin LEUM GOD ke moul lasr kewa. God bless you.

Thursday (8/20) Sifac:Fahsr Tukun Leum God

Kunokon
By Deaconess Havelyn Tosie

Thursday August 20 2015
Sifac:Fahsr Tukun Leum God
Mwe Read: Mwet Nununku 2:16-23

Deaconess Havelyn Tosie

Sifwil Paing kowos nukewa, a sang kulo kaksakin God Fulat lasr ke pal wowo ma EL sifwil ase nu sesr a moul wowo ma EL tia tui in akinsewowoye kut ka...
 
Book lun Met Nununku orekla ke kais sie sramsram ma sikyak ke pal se met Israel elos mweuni acn Canaan ne ke pal se mutawaak akwuki tokosra nu fin an Israel...Mwe luti yok su kut eis in book se inge pa ke pal met Israel elos oaru a paye nu sin God, na wangin mwe sensen yok sikyak nu selos...tu pal nu kewa elos soaru a sesuwos ke oru lalos na ongaiya lulap sikyak nu selos...tusruktu elos finne soaru nu sin God, God el akola pal nukewa in molelosla elos fin auliyak a sifil forla nu sel...
Life Application Bible akkalemye la life history lun Israelites, oasr ke life cycle ak 7, ke moul in aktuktuk lalos tukin elos illa liki Egypt.
 
Mwe rid lasr u akkalemye la God, EL pakiya mwet nununku in molela met Israel liki mwet lokoalok lalos, tusruktu, met Israel elos tiana porongo met kol ku met nununku ma God el sulala in kololos inge. Kalmeya pa elos pilersru Leum God a alu nu sin god saya...akkalemye in mwe rid u la met matu lalos in pal so akos ma sap lun God, tusruk nuke fil sasu se inge, elos tia oru oana.. Book lun met nununku akkalemye la pal ma God el sang in asr met kol lalos u, EL a welulos a molelosla liki met lokoalok nuke lusen pal ma elos moul...tusruktu;
 
Mwe Rid u akkalemye la yok pakomuta lun Leum God nu selos tulik nutin Israel ke sasao a ongaiya ma elos putatyang nuka, tusruktu, el liye akilen oru lalos la pal met kol inge misa ku wanginla lukelos, elos sana in forla a sifiwil oru moul matu lalos meet....oana ke Verse 1 ke mwe rid u akkalemye u, Leum God el tu supama lupufan lal in akkalemye nu selos in Bochim, la ke sripen seakos a koluk yoklana lalos panang kaiyuk lun Leum God a fwa putatyang nu fwalos, kalem ke El esalosyang nu poun met lokalok inge...verses 21 nuke 23 akkalemye kaiyuk lun God nu selos...Life application bible akkalemye ke ktu kisen siyuk ka fwak oinge: Efu ku Israel elos sana in forla/ngetla liki Leum God? ma ingan sikyak ke sripen elos suk na ma elos liye mu a wo nu selos, a oayapa elos adopt kain fasin ma oan ye mutalos pa panang elos in sa forla liki God...
 
Mwe lutlut wo kut it tukeni lutlut kin a in kafweang na in orekmakin lalalfongi a akyokye ke orekma lasr nu sin Leum God, finne fuka situation yorosr kais sie, suk God a fototo nu yorol in ma nukewa...a in oiya nukewa...oana ke sifwa lasr an akkalemye u...

Wednesday (8/19) Sifac:Finsrak Ke Lungse Kawil Lun God

Kunokon

By LM Skipper Ittu

Wednesday August 19 2015
Sifac:Finsrak Ke Lungse Kawil Lun God
Mwe Read: Psalm 147:1-11

LM Skipper Ittu

Sifwil paing kowos nukewa. Sifac se lasr nuke Wednesday se inge fahk muh "Finsrak Ke Lungse Kawil Lun God," oasr in Psalm 147:1-11. Psalm 147, finne tia kahlem mwet se simuslah uh, simlac ke pacl se Tulik Nutin Judah foloko liki sruhuh lalos Babylon nuh Jerusalem. Verses 1-11 akkalemye lah ke God el sang sukosok nusin Mwet Judah inge, El kena elos in akfulatyal ac lulalfongel mukena. Elos in yuck on nusel ac arulana insewowo in kaksakunul tuh El sifwil muhsaheak Temple lalos Jerusalem. Ac ke El karingin wo itu, puhkuhnyeng, af, ma orakrak ac won uh, El oru yokliki nuh selos ke sripen mwet uh pa El lungse emeet uh. Elos in etu lah El tulokuhnwack mwet wo ac itucngyac mwet koluk. El tia pac insewowo ke horse kuh mwet mweun puhlaik lalos ke sripen ma inge oru elos lulalfongi ke kuh lalos sifacna, a tia El. Elos in finsrak ke lungse kawil Lal mukena, suc asang sukosok nuh selos. Scripture se inge kasrekut in sang nusin God meet mwe elyac nukewa lasr, tuh pa inge kena Lal. Ac kuht in akfulatyal ac lulalfongel mukena na tuhfah oasr finsrak lasr nuke lungse kawil lal.

Monday (8/17) Sifac: Kowos Koluk Yok Liki Mwet Matu Lowos

Kunokon

By Robert Kilafwasru

Monday Aug 17, 2015
Sifac: Kowos Koluk Yok Liki Mwet Matu Lowos
Book: Jeremiah 16:9-13

Robert Kilafwasru

Sifil sang kulo nusin Leum God ke wolacna lal nusesr nukewa, ac in pain kowos pac nukewa. Sifac se nuke Monday, Aug 17, 2015, el fahk muh , Kowos Koluk Yohk Liki Mwet Matu Lowos. Kisen sapkin lun Leum God nusel mwet palu Jeremiah pa inge. Leum God el oraclah oakwuck lal ac sang nusel mwet palu Jeremiah elin ahk-kalemye nusin Judah lah elos ac fah kalyeyuck sin God ke sripen ma koluk lalos. Judah tiacna forla liki oiyac lun mwet matuh lalos a elos oru na ma koluk uh yohk liki pacna mwet matu lalos. Oinge God el sapkin nusel mwet palu Jeremiah in tiac payuck ku in suk in asr tulik natul nusin facl Judah. El oyacpac sapkin tu Jeremiah el in fah tiac inmasrlolos. God El oakiyac oinge nusel Jeremiah in fahkack nusin facl Judah lah fwacl selos ac tufah kalyyeyuck . God Elac tufah nget lukelos ac esaclosyang nusin kutena god sayac.

Mwe luti se inge tuku in kahsre kut in sifiil lie moul lasr misenge. Kut in kuh in forlah liki ohiyac matu lasr, ac suk in akfulactye God in moul lasr nofon. God Elac long prue lasr in pacl nukewa ac use pacl nusesr in auliyak, tusruhk kut fin tiac forlah liki ma koluk lasr uh, na kut ac sun ongaiyac ac asor lulap. Kutu mwe asor inge pa kut sang ahk-pacrye moul tafonglac lasr misenge uh. Mwe pacr su ma ac use moul sakawil. Moul sakawil ke mwe insewowo lun faclu se inge ac tufwa wanginlac; tia wanginlac mukena uh e tufwa use mwe asor nuser ke sripen kut sang ma inge in esla akfulat lasr nusin God Fulatlana. Kain in mukuikui inge pa oasr ke ip lun alu nuke ma srolaclah, ac ma lungse lasr sifacna.

Ma kunasr misenge pa in forla ac siyuck nunak munas ke oru sufal lasr inge ac in sifil folok suk ma paye suc ma simlac ke Kahs Lun God. God Fulatlana El e tufwa akilen auliyak lasr ac El ac tufwa use mwe insewowo in akfasryelah wulela lal nusin tulik natul suc ma kut wi oacwac nuke.

RKILAFWASRU

Saturday (8/15) Sifac: Fahsr Ke Inkanek Lun Leum God

Kunokon 
By Deaconess Niokong Yukiwo

Saturday August 15 2015
Sifac: Fahsr Ke Inkanek Lun Leum God
Mwe Read: Hosea 14

Deaconess Niokong Yukiwo

Nga lungse fwak kulo luk nu sin luem God ke moul lasr kewa, in fwak oana Sam 150:6.

Kas lun God nuh sel Hosea, Leum God el fwak luti nu mwet Israel in forla liki ma koluk lalos, ac tia sifwil alu nuh ke ma srolala, ma elos orala, tiana god paye se, ma srolala ma elos orala ingan, tia kuh in sang mwe enenu lalos, ku in molelosla ke pacl ma ongaiya sikyak nu selos. Oinge Hosea el kafwe nuh selos, mwet Israel foloko nuh yurin Leum lowos forlah liki ma koluk lowos auliyak nuhsel, ah pray oinge, oh Leum God nunak munas nusesr sisla ma koluk lasr, ac porongo pray lasr nusum, kut a folok nu yurum ac alu nusum muh, kut mwet lok, Leum God kom etu na paye lac wangin na paye mutunfwal ku in molikut lac, fwinne mwet meun tia sifwil alu nuke ma srolala. Oh Leum God nunak munas fwakak pusren pakoten nu sin mwet lom. Oinge Leum God el fwak, nga fwa lungse elos ke insiuk nofon Hosea 11:18.

Nga fwa oru tuh af in kakla a aksroksrok an selos. Elos fwa kapkapack oana sie rose kahto, ac kuh lalos arlana kuhi, elso fwa muta ye karungin yuhk luk, elos fwa taknelik fitac, a kosracni arlana yok pengpeng lalos yokyokelik, elos tia sifil alu nuke ma srolaclac, nga fwa welulos a mwe insewowo lalos tuku yuruk mwe.
Lela elos in kalem ke ma simusla inge in an insialos meyen inkanek lun Leum God suwos, mwet suwoswos mwet orekma koluk elos tikuhkuhl a ikori meyen elos tia fwasr ka.

Deaconess Niokong Yukiwo

Friday (8-14) Sifac: Leum God El Tuni Nunak Lun Inse

Kunokon 

By: Lipan A Welly

Friday August 14 2015

Sifac: Leum God El Tuni Nunak Lun Inse

Mwe Read: Soakas 21:2-8

Lipan Welly

In oana pacl nukewa, in wi mwet nukewa in oru kaksak yohk lasr nu sin LEUM GOD fulatlacna ke moul wowo lasr kewa kais sie. Paing mwet nukewa ac lela tuh Ngun Mutal Elan wi kut nofon ke pacl se inge. 

LEUM GOD El etu nunak ku ma oasr in insiasr in pacl nukewa. God El tia ku in kiapeyuklac pa sifwe lulap lasr ke June len 14 (Amos 5:14,15,18-27 pa mwe read sac). Suk in oru ma suwohs ac tia ma koluk, tuh kowos in ku in moul (Amos 5:14). LEUM GOD El arulacna lungse mwet nukewa in eis moul ma patpat. Sulaclah lun kais sie sesr nu ke lungse yohk se Lal inge pa LEUM GOD El tuni. El kenna kut nofon in lulalfongi in El ac eis moul. 

Soakas soko inge akkalemye lah: sahp kom nunku mu ma nukewa kom oru uh suwohs, tuh esam lah LEUM GOD El tuni nunak lun insiom (v2). Wangin mwet suwos, mwet nukewa orekma koluk, ac elos nukewa tia sun lupan wolana se ma God El akoo nu selos (Rome 3:23). God El etu fototo lac se inge su oasr sin mwet nukewa. Kut nofon etu tari innek soko fanna God El oralla nuke ke fototo lac se inge: Jesus El topkol ac fahk, “Nga pa inkanek, ac pwaye, ac moul; wangin mwet som nu yurin Papa fin tia ke nga (John 14:6).” 

Mwet koluk uh kolyuk ke nunak filacng ac inse fulat. Ma inge koluk (v4). El etu nunak lasr ac lungse lasr nukewa. Kom fin sokol, El ac fah liyekomyang, a kom fin forla lukel, El ac fah siskomla nwe tok (1 Chr 28:9), kas lal tokosra David nu sel Soloman. Ke LEUM GOD El liye lupan koluk lun mwet nukewa fin faclu, ac lupan nunak koluk lalos ke pacl nukewa, (Gen 6:5); God El etu kut ac wangin ma ku in wiklac yurol. Tuh liki insien sie mwet nunak koluk uh sikyak ma kolol in kosro, pisrapasr, akmas, kosro inmasrlon mwet payuk, rapku, oru ouiya koluk; kutasrik, elah koluk, ngetnget in mwel, lesrik, inse fulat, ac supoklot. Ma koluk inge nukewa tuku luin sie mwet ac akfohkfokyalla (Luk 7:21-23). LEUM GOD El etu fototo lasr ac El akola in pacl nukewa in aksuwosye.

LEUM GOD El kwase inse fulat su kut lutlut pac ke tari ke book lal Amos. Fototo lac lun tulik nutin Israel inge sang elyah na yohk nu selos. Kut e putatyang pac nuke elyah yohk efin kut tia inse paye nusin LEUM GOD lasr. LEUM GOD El tuni Nunak Lun Inse. Efin kut tia eis ac lulalfongi in Jesus Christ e wangin finsrak lasr nuke lungse yohk se lun LEUM GOD inge: kut nofon in eis moul ma papat. Wangin inkanek saye ku in use moul ma patpat se inge. 

Arulacna kalem tari lah wangin ma kut ku in wikin nu sin God, El arulacna etu kut nofon ke nunak ac ma nukewa an insieacsr. Finne yohk koluk lasr El tuku in moli kut lac nofon ke sripen lungse yohk Lal nu sesr. Sulala uh ma lasr kais sie kut in oralla. Sifil kalweni in akkasmakinye kut nofon lah oasr acn luo i yacna ma LEUM GOD El tuni in nunak ac moul lasr. El ac akinsewowo ye mwet nukewa su lulalfongi in Wen Sefanna Natul ac El e kwase mwet insefulat su tia lulalfongi in El. Sifil paing mwet nukewa ac kaksakin LEUM GOD lasr ke moul lasr. Finne kut misa misenge kut e eis moul ma patpat ke sripen lulalfongi lasr in El. God Bless.

Wednesday (8/12) Sifac: Fahsr Liki Ouiya Koluk Lun Mwet Tuma

Kunokon

By LM Skipper Ittu

Wednesday August 12 2015
Sifac: Fahsr Liki Ouiya Koluk Lun Mwet Tuma
Mwe Read: Ezekiel 18:14-19

LM Skipper Ittu

Sifwil kaksakin God Fulatlana lasr ac kowos nukewa. Mwe kasru se lasr ke Wednesday se inge pa "Fahsr Liki Ouiya Koluk Lun Mwet Tuma," Ezekiel 18:14-19. Pusren Leum God nu sel Mwet Pahluh Ezekiel pa inge--Ezekiel elan tafweang nu sin tulik nutin Judah elos in fahsr liki ouiya koluk lun Pahpah Tumaclos, suc pwen sruhuh lalos Babylon. Elos in tia sifwil lulalfongi ke soakas se ma fahk muh "Papa kanglah grape mukol, ac inwalin tulik uh muhkuhllac kac." Kuh tulik nutin Judah inge in tia sifwil oru oana Pahpah tumaclos. Papa se finne alu nu ke ma sruloaclah, mongo ke ma kisaclah nu ke ma sruloaclah inge, kuh pihsre ma lun kutena mwet, tulik natul uh ac tia misa, a Pahpah sac na. Leum God el fahk oinge in akkalemye pakoten yohk lal, suc kalem ke tuku lun Wen natul Jesus Christ. Mwe kasru se inge lutikut in etu lah kut tia sifwil eis mwactacn ma koluk lun mwet tumasr, a mwet se na mwet se; kom fin tahknelik wo, kom ac kosrani pac wo; tuh lulalfongi lom ke Christ suc kalem ke orekma lom pa asot moul ma patpat lom!

Monday (8/10) Sifac: Nununku Suwohs, Suwoswoslana, ac Auliyak

Kunokon

By Deacon Danny Dizon

Monday August 10 2015
Sifac: Nununku Suwohs, Suwoswoslana, ac Auliyak
Mwe Read:Isaiah 1:24-28

Deacon Danny & Deaconess Tulpe

Kulo ke ma wolana kut sifil pac eis sin Leum God ne ke pal se inge. Sifwa: " Nununku Suwos, Suwoslana, Ac Auliyak"
Me Read: Isaiah : 1 : 24 - 28
 
Mwe read se inge akkalemye pusren Leum God nu sel met palu Isaiah nu sin tulik nutin Israel. Ke pal se inge Leum God el kunaosla city nukewa sayen city Jerusalem. Ke sripen Jerusalem el tia karingin nununku suwos in orek nu sin tulik mukaimtal ac katinmas, ac elos tiana moulkin moul suwos, a ke sripen likeke lalos in akos ma sap lun Leum God, panang Isaiah el srike in tafu elos in lipsre ma Leum God kulacna lun Israel el fahk mu el a fwa oru. Ke sripen likeke lun Jerusalem Leum God el fwak mu el fwa sang mwet nunuku a mwet kasru in kololos oana pal met ah, na a fwa pangpang Jerusalem sie city suwoswos a paye nu sik. In oana ke Leum God el fwak el fwa molelah acn Jerusalem ac met nukewa we su auliyak. Tiana ekla nu sesr kut in oru nununku lasr in suwos kut in moulkin moul suwos oana ke Leum God el suwoswos, ac kut in suk in auliyak ke tafongla ku orekma koluk lasr, na Leum God el fwa ku in molikutla oana el oru nu sin city Jerusalem.

Saturday (8/8) Sifac: God El Som Liki Acn Shiloh

Kunokon

By Deaconess Niokong Yukiwo

Saturday August 8 2015
Sifac: God El Som Liki Acn Shiloh
Mwe Read: Psalm 78:56-62

Deaconess Niokong Yukiwo

Kulo ma lulap nusin Leum God key moul lasr kewa a key me lutlut Lal nusesr.

Met se sumusla Psalm sko inge el srike in fahk ke kutu ma koluk lun Met Israel; elos oru ke fufasryesr lalos in an mesas. Elos torkaskas lain Leum God ke mwe mngo nalos a me nim nimalos. Elos tia na lulalfongi la Leum God El kuin oru ma nkewa. Elos tiana folok nu yurin Leum God ac aksruksrukyel kena sifilpa srikel, meyen elos tiana liyeang ma sap Lal. Usack ma srulalah lalos nuin an alu mutal lun Leum God. God El liye ma inge, El arulana mulat selos a Leum El som liki loom alu sel su pangpang Shiloh. Loom se Leum El muta loa inmasrlon met Lal. El lela tu met lokoalok in srukya tuptup in wuleang su akilen ku a wolana lun Leum God. Leum God El arulana toasr sin met Lal lela tu elos in anwuki sin met lokoalok. Met fusr elos misa ke meun a Met Tol anwuki pa ke sripen orekma koluk lalos. Elos ngetla liki God lalos panang elos sun kasrkusrak lun Leum God.

Deaconess Niokong Yukiwo

Wednesday (8/5) Sifac: Nununku Nu selos Su Seakosten

Kunokon

By LM Skipper Ittu

Wednesday August 5 2015

Sifac: Nununku Nu selos Su Seakosten

Mwe Read: Ezra 7:21-28

LM Skipper Ittu

Sifwil paing kowos ke en Leum lasr Jesus Christ. Mwe kasru se ke Wednesday inge fahk muh "Nununku Nu Selos Suc Seakosten," oasr in Ezra 7:21-28. Kuhsahl Tokosra Artaxerxes nu sel Ezra elan kaelos ac nununkaclos mwet ma tia akos masap lun God kuh tokosra pa inge. Ke Tokosra Artaxerxes el supallah Ezra nu Jerusalem, el supwaclik pac sie lwacta in sapkin Mwet Kol Judah nofon in kasru tulik nutin Judah inge ke ma nukewa elos enenu, yok nu ke orekma lalos nu sin God. Elos in oayapa tia eis tahkma sin mwet inge. Oayapa Ezra elan sulala Mwet Nununku wowo nu sin mwet uh ac elan luti masap uh nu selos. Ac Ezra elan orek nununku nu selos suc seakos. Mwe kasru se inge lutikut in esam lah nununku oasr nu sesr mwet seakosten, lah fin facluh, kuh yokna inkusrao. Kut in sa in auliyak ac forlah tuh kut in wi pulakin lacnen akosten lasr ke Nununku Saflah nu sesr!

Sanri (8/2) Sifac: Leum God El ac Fah Tuku

Kunokon

By Rev. Takeo Likiaksa

Sunday August 2 2015
Sifac: Leum God El ac Fah Tuku
Oana Sie Mwet In Molela
Mwe Read: Isaiah 59:15-21

Rev. Takeo Likiaksa

Ke sripen Mwet Israel sikalweni na in oru ma koluk lain Leum God pa kalem ke chapter (56-59) oracle in wanginla lungse ku ma paye lun God in oasr insiasr. Na Leum God mukena pa ku in kutangla ma koluk.

Ke sripa se inge Leum God el akola in molela mwet lal liki poun mwet lokwalok lalos pa nuke an Assyria ac Babylon. El oayapa akola in sang kai nu sin mwet Israel pac. El akola in kasrelos liki ouiya koluk ma elos oru. Leum God mukwena pa ku in oru orekma in iwaclah se inge. “Na pa inge luman inkanek in molela nu sin mwet Israel nukewa. Oana Ma Sumusla uh fahk, “Mwet Lango ac fah tuku Zion me ac elah ma koluk nukewa liki filin tulik natul Jacob. Nga fah oru wuleang ku se inge yorolos ke pacl se nga eisla ma koluk lalos.” (Romans 11: 26-27) Kalme pa, lah pacl se ku pacl ekasr kut oru ma koluk, ac lah kut oru ke ninikin, ma koluk uh srikutlac liki God nwe kena Leum God el nunak munas nu sesr ac elah ma koluk lasr liki kut.

Ke Ngun Mutal lal muta in mwet lal, ac kalem ekla lalos. Lungse ac moul mauhtu lalos wanginla lukwelos; moul sasu lalos ac som yok in akinsewowoye Leum God. Mwet Christian in pacl inge pa mwet ipeis ke wuleang ku pahlu se inge; kut inge ku in akilen ac in oru ma lungse lun God ac ku pac in akilen inmasrlon ma wo ac ma koluk meyen Ngun Lal oasr in kut, oana Ngun Mutal el fah tuku ac kasre kowos, meyen Papa el fah supama inek, el fah luti kowos ma nukewa, ac oru kowos in esamak ma nga fahk tari nu suwos”. (John 14:26). Ku in Philippi 2:13,”Mweyen God el orekma in kowos pacl nukewa, tuh kowos fah ku in engan in akos ma lungse lal.”

Kalem lungse kawil lun Leum God nu sin mwet nukewa. Ma koluk lasr finne srikutlac lukwel, tusruktu, ke sripen lungse lal, el supwacma Wen natul ke sripasr mwet uh. Wo kut in wi suk God ac lela Ngun Mutal lal in nwacklah insiasr ac nunak lasr ackut in srui oru lal in tuku moli kutla kut finne met koluk.

Saturday (8/1) Sifac: Moliyukla Ke Po Kulana

Kunokon

By Surleigh Tara

Saturday August 1 2015
Sifac: Moliyukla Ke Po Kulana
Mwe Read: Exodus 6:2-8

Surleigh Tara

Sifac Nuke Saturday, August 1, 2015
Moliyukla Ke Po Kulana
Mwe Read: Exodus 6: 2-8

Nga in wi pac sang kulo nusin God ke moul lasr kewa. Yohk lulalfongi luk la mwe lutlut inge tuku nu sesr fwal nuke pacl uh ac nuke ma kuht oasr kac in len inge.

Chapter 6 ke Exodus use nu sesr kuht in readi sramsram se Lun God nusel Moses.  Chapter se ing oacyacpac ikacklah kuht in kalem ke tahkihnyen kuh kupasr lal Moses and Aaron nusel Abraham, Isaac ac Jacob. Kuht kalem kac pac lah God El ekuhlah inel Jacob pa pahngpahng Israel nu misenge uh.

Yohk iyacn chapter 6 uh sramsram kihn wulelah luhn God nusin, yohk na, tulik nutin israel. Kuht efin loacn nuke mwe read se inge tuh na oasr wulelah 7 na weang sie pac ke verse se met (suc ma tukeni oasr ke wulelah 8) nusin tulik nutin Israel suc ma kuht kuh in lotellah ke mwe read se inge ac in kuhpasreyacng pac nuke moul lun mwet Etawi kuh Christian misenge uh.   Wulelah 8 inge pa tahkinyuck ten inge:
1. God El fwa oru tokosra elan fulelah mwet Lal in som (v.1).
2. God El fwa akfahsryellah wulelah se nusin papa matu tuman Israel ac in oraclla akwuck se nuselos (vv.2-5).
3. God El ac fwa tuhlekowos lac (v. 6).
4. God El ac fwa aksukosokyekowos liki moul in kohs yurin mwet Egypt (v.6).
5. God El ac fwa asroela po kulana in use kaiyuck nusin mwet Egypt (v.6).
6. God El ac fwa molikowoslac (v. 7).
7. God El ac fwa God lowos (v. 7).
8. God El ac fwa sang facl lowos (v. 8).

God Fulatlana El tia eklac pa nusesr misenge. Panacng wulelac suc ma oreklac nusin tulik nutin Israel inge tia pac eklac nusesr misenge. Kuht kuh pa in wi moul kin ac in wi eis insewowo pac kac.  Ke sripen Wen Sefanna Nuhtin God, Leum Jesus Christ, suc tuku ac misac in ellah ma koluk lasr suc ma use kuht mwet lulalfongi uh in wi ilyak nu in Tokosrai lun God ac in pahngpahng muh Mwet Kulansap Lun God.  Ke sripac se inge, oasr lemlem na wolana se sin God Fulatlana me kuht in wi ipeis ke wulelah Lun God inge ac in tu kuh ke Kahs Lal ac akwuck lun God nusin mwet Lal in fasr ke kolyuck ac kohkoh wowo lun God.

Mwe engan na yohk pa inge kuht in esam ke pacl ma kuht pulakin ma upac.  Kuht in esam la Wulelah Lun God inge, kuht fin wi lulalfongi kac in fungyang nusin God ke pacl kuht puhlakin ma upac inge. Kulo!