Wednesday (9/30) Sifac:Tu Kuh

Kunokon

By LM Skipper Ittu

Wednesday September 30 2015

Sifac:Tu Kuh

Mwe Read: Ephesus 6:14-18

LM Skipper Ittu

Lela Leum God Elan sifwil kaksakinyuk ke moul ac fahkak lasr ke kahs moul ac mutal lal. Paing kowos nukewa; Sifa se lasr ke Wednesday se inge fahk muh "Tu Kuh," oasr in Ephesus 6:14-18. Kuhsahl Paul nuh sin Mwet Christian ke Church Ephesus, suc Timothy el sropoi pa inge. Paul el muhta Rome suhmuhslah letter se inge, wi letter lal nuh Colosse ac nuh sel Philemon ke yac 64 AD ac sang Tychicus elan tahfwellah. Ke fuhs ekasr inge, Paul el kena Mwet Christian Ephesus in tu kuh ac ahkolah in mweuni mweun wo luhn luhlahlfongi. Elos in nokomang mwe loeyuck luhn luhlahlfongi. Elos in losyac infulwaclos ke pwaye, nokomwacng suwohswohs, ac falkeacng mislac. Oayacpac, elos in us mwe loang luhn luhlahlfongi, sonacng helmet luhn Kahs luhn God, ac pruhe pacl nuhkewa, yohk ke mwet luhn God. Scripture se inge lutikut in tu kuh pac ke moul in luhlahlfongi lasr uh, suc pa in nokomacng mwe loeyuck luhn luhlahlfongi ac pruhe pal e nuhkewa. Ke kuht ouh ohinge, kuht ahkolah in kihsrucng el such koluklana (Satan), mwet lal, ac mwe sruhf lal.

Monday (9/28) Sifac: Tiacna Mukuiki

Kunokon

By Robert Kilafwasru

Monday September 28 2015
Sifac: Tiacna Mukuiki
Mwe Read: Psalm 15

Robert Kilafwasru

Psalm soko inge kalem muh ma lal Togosra David. Kisen Psalm soko el fwakack yohk ke oiyac suwos ma sie mwet enenu in moulkin elin kuh in wi ilyak nu yurin Leum God. Leum God el kena tuh kut mwet uh in mutal meyen El pa God sefana lasr ac El mutal in pacl nukewa (Leviticus 19:2). Moul lasr in suwos ac paye in pacl e nukewa. Na pa Psalm soko lal Togosra David inge sifil ahkyokye nusesr lah piac oiyac ma God El kena kut kais sie in oasr kac uh.
 
Kut fin oru oacna ke Jesus sifacna El akkalemye nusin mwet Pharisee ac, suc pa in lungse God ke insiom kewa, ke ngunum kewa, ke nunkom kewa. Ac oayacpa lungse mwet tulan lom oacna ke kom lungse kom sifacna (Matthew 22: 37-39), na moul lasr ac tufah suwos, oacna ke David el fahk ke Psalm soko lal inge. Moul lasr in ku in karingin sie sin sie. Kut in tiac kaskas kikiacp ak-kolukye mwet ngiac. Kut in kasru mwet nukewa suc ma enenu kasru. Ac kut in ku in akfalye wulela lasr nusin God in pacl nukewa. Pa inge kutu oiyac ma ac use lela nusesr kut in kuh in wi ilyak nu in wolacna Lal.
 
Misenge in walil lasr uh, kut losrlah ke ma lun fwalu. Kut sislah pacl lasr in suk mwe kasrup lun fwalu, kut sislah pacl lasr in suk in akwoye inesr sifacna, ac in suk lungse lasr sifacna. Ma inge pacnang kut akkolukyelah mwet wiacsr, kut fwaklah kas tiac paye ke mwet wiacsr, ac pilesraclah in kasru mwet wiacsr suc ma enenu kasru. Fin pa inge oiyac lasr uh, na lulalfongi lasr uh ac fisracsr in mukuilac liki lulalfongi paye yurin God. Tusruktu, kut fin akos God ac moulkin moul suwos ac paye, lulalfongi lasr uh ac arulacna ku, ac “Tiacna Mukuikui.”

RKilafwasru

Sanri (9/27) Sifac: “Esam Na Oaru Luhn God”

Kunokon

By Rev. Takeo Likiaksa

Kunokon: September 27, 2015
Sifac: “Esam Na Oaru Luhn God”
Mwe Read: Orekma 7: 2-4, 8-10, 17,
31, 34,45-47,53

Rev. Takeo Likiaksa

Mwe read uh fahkak ke sramsram lal Stephen nu sin mwet ke Sanhedrin. El srike elan akesmakyaclos ke sie sin sie lalos nu sin Leum God. Finne ouinge, mwet Israel elos sikalenina in Pilesru akwuk lun God, tia akos ma lungse, ac mwet kol lalos tia akilen ma lungse lun God ac tia akilen mwet palu, ac council se inge tia akilen Messiah ne ke elos in unilya.

El akesmakyaclos lah 1. Sramsram mahtu ke Israel fahkak ke orekma lun God fin faclu. 2. Mwetu alu nu sin God met liki na orekla temple, meyen God el tia muta in temple. 3. Misa lun Christ pa sie pac example ke mwet Israel elos lain God.

Stephen el eis pacl wowo lal in laenulos ke elos tia akos ma sap lun God, ma sap su elos srike in akilen ac akfulatye. Finne ouinge, Leum God El nu welulos na. Kalem ke wulela lal nu sel Abraham ac akul ke kosracla. El sikayng pac nu sel Moses ke kupo sac in akkalemye lal el srak esam mwet lal. El long keok lalos in Egypt ac supwaclla Moses in kasrelos.

Fahk uh pa, finne mwetu som liki akwuk lun Leum God, tu Leum God El oaru ac wi mwet lal in kasrelos ke pacl ma upa sikyak nu selos. Ke sripa inge fal kut in wi pa Esam Na Oaru Lun Lerum God nu sesr in pacl e nukewa.

Saturday (9/26) Sifac: Topukyen Oaru Luhn God

Kunokon

By Deaconese Niokong Yukiwo

Saturday September 26 2015
Sifac: Topukyen Oaru Luhn God
Mwe Read: Orekma 6:7-15

Deaconese Niokong Yukiwo

Mwe lutlut u fwak ke luti lun mwet sap lun Jesus in acn Jerusalem. Oasr kutu fohs sikyak, ke mwet Jew elos fwak tia na wo karungin yen katinmas lalos, mwet sap elos fwak mu elos in sulala 7 sin mwet ma yok lulalfongi lalos, elos in karungin elyah se ing, funu elos, elos a sisla pal yok lalos in fwakak ke kas lun God.

Stephin el sie mwet ma solla inmasrlon mwet 7 ac, su arlana sessesla ke ngun mutahl a yok lulalfongi lal, el oru menmen puspis inmasrlon mwetu, oasr mwet puspis lain nul wi pac mwet Jew, elos srike in konoak kutu ma koluk in ku in sang muhaetu nusel, tusruk elos tia ku, meyen God el sang kuh nu sel ac nākulla ke ngun mutal a lalmetmet wangin mwet ku in topkolla.

Oinge elos moleang nu sin kutu mwet koluk elos in orek loh kikiap, fwak el tuh kaskas lainul Moses a oayapa lain God, a kutu pac fwak, mwet dr inge kaskas lain temple mutal lasr, kut long pa el feak muh Jesus lun Nazareth el a fwa kunaosla tenple a kunaosla oiya matu nukewa su ma e tuku nu sesr sel Moses, kas inge nukewa purakak insien mwet luti a mwet luti ke masap. Ke mwet nukewa ngetang a lie mutal, elos lie la Stephin el arlana sessesla ke ngun mutal, fwak pac muh mutal oacna sie mutun lupufan.

Deaconese Niokong Yukiwo

Friday (9/25) Sifac: Esam Na Ma Luhngse Luhn God

Kunokon

By Lipan Welly

Friday September 25 2015
Sifac: Esam Na Ma Luhngse Luhn God
Mwe Read: 1 Thessalonica 5:16-25

Lipan Welly

Kulo kaksakin LEUM GOD lasr ke moul wowo ac lung kulacng yohk Lal nu sesr kewa. Lela tuh God Ngun Mutal Elan wi kut akesmakinye kut nofon in esam na ma lungse Lal in pacl nukewa. Paing mwet nukewa.

Kas in akku lal Paul nu sin mwet Thessalonica; capitol lun Macedonia: tuh kut fahkak Pweng Wo nu suwos, tia ke kas mukena, a ke ku ac ke Ngun Mutal, ac oayapa ke etu na pwaye lasr lah ma inge kas pwaye 1Thes 1:5. Paul, Silas, Timothy, ac Luke elos tuh oakiya church Thessalonica ke fahsr ak luo lalos; ca. 50-52 A.D.

Kut readi ke Orekma 15:36-18:22 ke mutawaek iyacn fahsr akluo lal Paul lah el Barnabas tuh fasrelik. Barnabas ac John Mark tuh som na Cyprus. Paul ac Silas tuh mutwaek Antioch (Syria) ac Cilicia, akkeye mwet in church we (Orekma 15:41). Timothy el tuh welulosyang fin acn Lystra ac Luke fin acn Troas. Elos kewa pa tuh tuhkeni us Pweng Wo emeet nu fin acn Europe.

Tok kutu, ke Paul el sun acn Corinth, oasr kas tuku sel Timothy ma fahkak ke ma sikyak in Church Thessalonica. Ouinge Paul el simusla leta se meet lal nu sin mwet Thessalonica in akkeye ac akpulaikye mwet Christian we. Elos in esam na ma lungse Luhn God:

Kowos in engan pacl nukewa v16, pre pacl nukewa v17, ac sang kulo in ma nukewa. Pa inge ma God El luhngse kowos in oru ke moul in asruoki lowos in Christ Jesus v18. Nik kowos kutongya Ngun Mutal v19; nikmet pilesru kas lun mwet su luti ke Inen God v20.

Kowos in arulacna tuni ac srike ma nukewa; sruokya ma wo v21, ac fahsr liki kutena ma koluk v22. God, su ase misla nu sesr, Elan akmutalye kowos in ma nukewa, ac karinganang moul lowos---ngunuwos ac monuwos---tuh in wangin mwatuwos ke sikme lun Leum lasr Jesus Christ v23. El su pangon kowos El ac fah oru ma inge, mweyen El oaru v24. Mwet wiasr in lulalfongi, kowos in pre pac kacsr v25.

Paul el etu ac moulkin lungse yohk Luhn God ke kolyuk lun Ngun Mutal mukena. El etu lah ma nukewa oasr yorul uh tuku mukena yurin LEUM GOD. El ke mwet nukewa wial su lulalfongi in LEUM GOD in esam lungse lun God in pacl nukewa su el takunlah arulacna kalem ke mwe read se inge.

Finsrak kuh lungse yohk se Lun LEUM GOD lasr uh pa kut nukewa in eis moul ma patpat. El oakiyac tari inkanek soko fanna su kut nofon etu tari lah tuku mukena yurin Wen Sefanna Natul. Pa inge Pweng Wo se Paul ac mwet wial nukewa suk na in fahkelik in pacl nukewa.

Kut e kofla in esam Lungse Lun God efin kut tia oru ma Paul el oru; el sang Ngun Mutal in usacl ke luti lal ac el moul kin Kas in Kol lun LEUM GOD in moul lal. Wangin ku lasr sifacna kut in etu Lungse Lun God ne kena kut tuku na yorol ac sang moul lasr uh na in kokoh Lal ac forlah liki ma koluk lasr nukewa. Pa inge Lungse Yohk Lun LEUM GOD kut in forlah ac eis moul patpat inge na. Sifil wi kowos kewa in akkeye kais sie sesr nukewa tuh kut nofon in akolla ke sikme lun Leum lasr Jesus Christ. Paing mwet nukewa.

Thursday (9/24) Sifac: Esam Na Luhng Kuhlacng Luhn God

Kunokon 

by Victor Melander

Thursday September 24 2015
Sifac: Esam Na Luhng Kuhlacng Luhn God
Mwe Read: 1 Corinth 1:1-9

Victor Melander

Esam Na Luhng Kuhlacng Luhn GOD: Pweng mwo pac nuh suwos kewa mweyen kowos kuh pac in liye kowos ke mwe read lasr uh. Fwackack kalem ke fus lou an; ip tok an “… nu selos nukewa su Pahngonyuck tuh elos in mwet mutal lun GOD, su ma LAL ke elos kupasryang nu sin Christ Jesus, weang mwet yen nukewa su alu nu sin Leum lasr Jesus Christ, su Leum lalos ac oayapac lasr:” Pah inge kutu luhng kuhlacng luhn GOD na sesr uh. El oru kom mwet MUTAL su saap, kom tia palakin kom pangon kom tia fwahl na keh. Kas lun GOD. Kom lulalfongi? EL sri kut lac liki falu seing tu in mah LAL in oru mah EL luhngse. Fus tohlu “Luhng kulang ac Misla” su luhngse lohkwalok ac keok? Ke sripen Luhngse LAL na sum EL srikom la liki falu tu kom in we pah pulakin luhng kulang ac misla LAL.

Pa inge kutu Luhng Kuhlacng Luhn GOD. Yok ma kut kuh in ais ke mwe read na fototo se inge tusruktu paing ma nga fwal in sang kasru ke mwe read lasr u. Esam lac GOD PAPA tomom ac Jesus Christ luhngse kom.

Wednesday (9/23) Sifac: Esam Na Kahs Luhn God

Kunokon 

By LM Skipper Ittu

Wednesday, September 23 2015
Sifac: Esam Na Kahs Luhn God
Mwe Read: Psalm 119:89-94

LM Skipper Ittu

Sifwil kulo kaksakin Leum God Fulatlana ke oaru lom Magret ac sou lom an; God Elan wi komwos! Sifac se lasr nuke Wednesday se inge fahk muh "Esam Na Kahs Lun God," oasr in Psalm 119:89-94. Sahyen psalm (kuh on) mahtuh puhs simlac sel David, Moses, ac Isaiah, psalm 119 el pangpang soko sin psalm sasuc simlah sin Mwet Jew tukin elos foloko liki sruhuh lalos Babylon. Mwet se simulah psalm soko inge, suc motkweyuk muh Ezra, finne tia kahlem na pwaye, el kacfwe ke fuhs 89-94 tuh tulik nutin God inge in esam na Kahs luhn God. Tuh kahs luhn God oan ma patpat, ac oaru Lal oan nuke fwil nukewa. Ke mutawacack facluh nuh misenge, ma nukewa oan na in kulansupu Leum God. Kahs luhn God asang insewoowo ac moullac liki keok lalos. Oinge, kahs Lal in tia pihlesreyuck! Scripture se inge luti kuht in esam pac Kahs pwaye, moul, ac wolana luhn God. Tuh Kahs Lal mukena, suc pwaye ekeah, misenge, ac nuh tok pwenkut nuh ke moul ma patpat!

Tuesday (9/22) Siface: Esam Na Luhngse Luhn God

Kunokon

By LM Driskell Jack

Tuesday, September 22 2015
Siface: Esam Na Luhngse Luhn God
Mwe Read: Psalm 31:1-5, 19-24

LM Driskell Jack

Sie wik sasu ac sie len sasu! Ac pang nuke sie moul sasu yurin GOD Papa Tumasr; tu kut nukewa in sifwil lohang nuke lupan lungse kawil lal nu sesr nukewa. The key word is (nu sesr nukewa!) Tiana srehla muh mwet lun Church muhkena, kuh etawi mukena, kuh mwet Kosrae muhkena, kuh la Protestant mukena. Tu lungse kawil lal lacsrkackinyuk sin Mwet sesesla ke ngun mutal yurin Jesus Christ nu sin Mwet nukewa ma oana David (The greatest King in Israel, recorded in 2 Samuel 7:13) kuh Jeremiah (The reluctant prophet that the Lord has called in 627 B.C., at the age of 12 to be a mouth piece to the kingdom of Judah(Jeremiah 1:9). BIBLE natusr an fahk ouinge, “Na LEUM GOD El asroema paol pusralla ngoasrok, ac fahk nu sik, “Porongo, nga ac sot nu sum kas kom in fahk.”

Ke pacl se ma nga kom muta ke ouiyac uhpac, kut arulana ke in oasr Mwet kut sramsram nu se; su kut fihnsrakin muh elos in kuh in poronogo ma kut fahk ke nunak yok lasr ku ke tung lun insiasr. Pa kalem ke Psalm se lal David inge. El fahk, “Nga tuku nu yurum, LEUM God, in wikla yurum; Tia lela in kutangyukla nga. Kom sie God suwoswos; Nga pre nu sum tuh kom in moliyula!(Psalm 31:1) Mwe read se inge akkalemye la sripen tuku lal David nu yurin GOD Papa; ma ke lupan lulalfongi lal la El suwos ac paye. Kut Mwet uh, ke moulin mwet lasr (flesh); kut (On-and-off). Kut wiwi mwet, kut wiwi kawuk, sucu ac mwet ma kut kuhpacsr nu se. Pa kalmeyen kas se inge, conditional love. Kalmeye pa akkalemyeyuk ke fus se inge, “Na kut fah tia sifil moul in tulik, ikwot ikme ke noa ac eng uh, oana elos su srifeyuk ke mwe luti lun mwet kutasrik su kiapwelos ac kololos nu ke moul tafongla”(Ephesus 4:14). Ma kuhnacsr in eis Leum GOD Papa tumasr ke lungse paye lal.

Tu yurin Leum GOD Papa, El suwos ac paye ac El arulana sesesla ke lungse paye (unconditional love) nu sesr nukewa. Pa akkalemyeyuk in gospel lal John, “…Kut liye Wolana lal, Wolana su el eis ke sripen el Wen Sefanna nutin Papa”(John 1:14).

Ke sripen El, Jesus Christ pa Wen kulo sefanna nutin GOD Papa, lela nu sesr in ehsamul in ahsang elyac nukewa lasr nu sel. Paul, Mwet sap el akkalemye in lacta lal nu sin Mwet Ephesus, “Oru ma inge nukewa ke pre, ac siyuk kasru sin God. In kutena ma kowos oru kowos in pre fal nu ke kolyuk lun Ngun. Ke sripa se inge, kowos in oaru in tupan ac tia fuhleak. Pre pacl nukewa ke mwet lun God nukewa.”(Ephesus 6:19). Key word ke mwe fahk se inge pa (in pre pacl nukewa)!

Kut ac fihn pre pacl eh nukewa, kut ac puhlakin fohtohto lasr nu sin GOD Papa Tumasr suh ahse ku lal nu sesr in esamul ke pacl mwo ac ke pacl koluk. Pa kut lutlut kac ke fahk se lun Leum in gospel lal Luke; su El fahk ouinge, “Ac el fahk nu selos, “Efu kowos ku motul? Ngatalik ac pre tuh kowos in tia putatyang nu ke mwe sruhf”(Luke 23:46). Ac kut ahkulen asmak lal Stephen, Mwet Sap lun GOD su Luke el ouyapac akkalemye nu sesr ke kuiyen lulalfogni lal sin GOD la, el nwe keok ke anwuk el, ah el tia mulkunla la moul paye ac lungse kawil paye oasr yurin GOD Papa Tumasr. Ke sripe se inge, Stephen el nwe ahkohla in misa ke sripen anwuk el, el asmak in fahkak mwolana lun GOD Papa ouinge; “Elos nuna tanglal na Stephen ke el pang nu sin Leum ac fahk, “Leum Jesus, eis ngunik!” El sikuk mutuntei, ac wowoyak ke sie pusra lulap ac fah, “Leum, nimet filiya mwatan ma koluk se inge nu faclos!” Tukun el fahk ma inge, na el misa”(Orekma 7:59-60). Stephen el etu la ela muh akmoulyeyukyak in eis tehfuro lun moul ke sripen kupacsryang lal nu sin Jesus Christ, Wen kulo sefanna nutin GOD Papa.

Ma inge oasr pac yorol David su pa el akkalemye ke Psalm se lal inge: “Fuka yokiyen ma wo su kom elosak Nu selos su sunaki kom! Kuhsac se pac na inge pa Paul el akkalemye in leta lal nu sin Mwet lulalfongi fihn an Rome su fahk muh “Inge kut ku in liye luman kulang ac luman upa lun God. El upa nu selos su oru ma koluk, tusruktu El kulang nu suwos---kowos fin mutana ye kulang lal. A kowos fin tia, kowos ac fah kipatla pac”(Romans 11:22). Pa Jeremiah el luti kut ke pacl in yoksra lalos fihn an Juda. El akkalemye lungse ac kulang lun GOD ouinge; “Nga wowoyak nu sum, O Leum GOD, liki kapin luf sac me, Ac ke nga kwafe sum in lohng tung luk, kom porongeyu. Kom topukyu ac fahk nu sik nga in tia sangeng”(EOKSRA 3:55-57).

Mwe lutlut uh tuku in kacsrekut Mwet lulalfongi su kupacsryang nu sin Jesus Christ in lemtulauk lah Jesus el Leum, ac lulalfongi ku lah God el akmoulyalak liki misa, kom ac fah moulla. Tuh ke lulalfongi lasr kut aksuwosyeyuk yurin God, ac kut eis moul ke sripen fahkak lasr”(Romans 10:9-10). Pa inge lupan lungse se lun GOD Papa nu sesr ke Wen sefanna natul ma tuku in ahse finsrak lasr nuke lungse paye ke moul ma pahtpat. Ke sripe se inge, kut wehlul David ac Jeremiah in fahk, “GOD’S LOVE REMEMBER!”

Kulo ke mwe lutlut mwowo ac ke pacl lasr in sie-sin-sin ke Kahs Mutal lal su luti kut ke lungse paye.

GOD bless you all!

LM Driskell J. Jack
Kosrae-Seattle Congregational Church
alukosraeseattle@gmail.com

Monday (9/21) Sifac: Esam Na Ma Sap Luhn God

Kunokon

By Deaconese Tulpe Dizon

Monday, September 21 2015
Sifac: Esam Na Ma Sap Luhn God
Mwe Read: Deuteronomy 7:1-11

Deaconese Tulpe Dizon

Kaksakin kulang Lun God na sesr ne ke pal se inge. Ac lela kut in eis Kas Lun Leum God, suc pa ac use Moul misla ac paye na sesr kais sie. Mwe lutlut lasr na ke Monday(09/21/15) suc tuku in luti kut ac fwak muh "Esam Na Ma Sap Luhn God", ac mwe read su akuteye na sesr uh oasr in Dueteronomy chapter 7 verse 1 nuke 11. Mwe read se inge akkalemye ke ma Leum God El kena tu mwet Lal in fasr kac,su pa in esam na Masap Lal nukewa in akos.Suc mwet lun Leum God uh? Ke me read se inge fakak tu pa tulik nutin Israel suc Leum God El sulala, tia ke sripen pus pisalos a kalem lah elos pa srik omeet fin fwalu. Yok lungse Lun God nu selos panang El srike in karingin wulelah se su El nuna orala omeet yurun papa matu tumalos somlah.El ac tufa molelosla liki in poun mutunfal itkohsr ma ac lainolos.Ac ke Leum God El sang kutangla se inge nu selos, El sapkin na selos in akos ma nukewa ma elos enenu in oru.Elos in tia kupasr nu sin mwet inge ac elos in oneloslac nukewa. Ac elos in tia alu nu sin ma srolalah lalos ac elos in kunaoslah loang lalos.Elos nukewa su tia akos ma inge El fwa kalyeilos. Ke ma inge kowos in akos ma lutiyuck nu suwos. Mwe read uh tia ekla nusesr misenge in etu lah kut fwin mwet lulalfongi ke Jesus Christ kut wi pangpang mwet lun God.Ac God El kena tu kut in esam masap ac akwuck nukewa ma El oakiyac nu sesr in fasr kac. Kut fin ac seakos ma inge ac tufa kaiyuck kut ke mwe kalyei Lun God nu sesr.

Sanri (9/20) Lohoh Nuke Ma Paye (Witnessing to the Truth)

Kunokon 

By LM Quartus Esau

Sunday, September 20, 2015Sifac: 
Lohoh Nuke Ma Paye (Witnessing to the Truth) 
Book: Orekma 5:27-29, 33-42

LM Quartus Esau

Mwet sap elos mwet lohoh nuke orekma usrnguk ac ku lulap lun Jesus Christ. Elos mwet lohoh nuhke ma paye, suc kalem ke Wen nutin God, suc mwet u uniyac fwin sakseng, tusruktu ke ku lulap lun God, El akmoulyelack liki misac. Pa inge ma paye se ma Mwet Sap elos lohoh kac, ac elos oru fwakak ac luti lalos kac. 

Ke Mwet Tol ac Mwet Pwapa Fulat elos long luti lun Mwet Sap inge, elos arulana kasrkusrak selos. Ke sripen elos luti lemulwacack la Jesus El Wen nutin God, ac El pa Ma Paye se ma elos srunga ac uniyac fwin sakseng. 

Ke mwet inge suk in akwanginyela Mwet Sap inge, oasr mukul se inmasrlolos pangpang Gameliel. El tuyak inmasrlolos ke elos oru meeting lalos, ac akkalemye elos in tari tiac oru kutena oiyac nusin Mwet Sap u. Elos in fulela elos in oru ma elos oru u. Meyen fwin orekma ac luti lalos inge ma na selos sifana a tiac sin God, na elos ac wanginlac oana ke kutu mwet ma oru meet lukelos elos oru ne wanginlac. Fwin orekma lalos ma sin God, na lain lalos ac tu oaoac in na elos amei nusin God, suc saflaiyac elos tiacna ku in kutangla. 

 Mwet Pwapa elos porongo fwak lal Gameliel. Oinge elos fulela Mwet Sap u. Mwet Sap elos arulana insewowo la keok ma elos pulakin inge, sikyak ke sripen fwakak ac luti lalos ke Jesus Christ, suc pa Ma Paye ac Inkanek nu yurin Papa. 

Me read se inge, tuku nusesr misenge in sifil akkeye kut nukewa. Kut mwet lulalfongi ke Jesus in tiac tui in wi srumun ac akyokye lutiyac lah paye Jesus Christ El Wen nutin God. Oasr lulalfongi ma sikyak yorosr fwin acn sesr u ma kisrung lulalfongi lasr ke Jesus Christ. Lela kut in eis me lutlut se inge in akkeye kut la fwin ma inge ma sin God, ac kui. A fin tiac, ac wanginlac.

LM Quartus Esau

Saturday (9/19) Sifac: Ma Pwacye Uh Sikyak Kahlem

Kunokon

By Deaconese Niokong Yukiwo

Saturday September 19 2015
Sifac: Ma Pwacye Uh Sikyak Kahlem
Mwe Read: Orekma 4:5-12

Deaconese Niokong Yukiwo

Nga lungse pac in fwak kulo nu sin God ke moul lasr kewa ac oayapa ke mwe lutlut se inge. Mwe read se inge tukuh tukin pal Peter ac John akkeyela mukul ul nie se, el nuh isusla na ul, elos luti ke misa ac sifwil moulyak lun mwet uh. Mwet Sadducee elos arulana srunga ke elos long.

Oayapa ke mwe luti elos luti nu sin mwet in temple in Jerusalem, a mwet kol lun mwet Jew, a mwet mahtu, a mwet luti ma sap elos osun nu sin mwet tol fulat, elos sap Peter ac John in tuu ye mutalos, na mwet inge siuk seltal, ma yac kuh se lomtal an, ku inen su komtal orekmakin in oru ma inge u? A Peter el topuk nu selos nukewa mwet kol a mwet matu. Kowos fin siuk sesr ke orekma wo suh kut akkeyelah mwet ul se inge fuka, lela kowos nukewa in etu, a mwet Israel pa in etu pac, la ke sripen ku lun inen Jesus Christ lun Nazareth, su kowos tu uniya fin saksing, a God el akmoulyelak liki misa.

Jesus pa ma simislah tu kaskas, kac fwak mu el muken pa ku in molikutlac mwet u fin fwaclu nofon, wangin sie saya God el sang ku nu se jn molikutlac.

Deaconese Niokong Yukiwo

Friday (9/18) Sifac: Luhlahlfongiyuck Ac Pwacye

Kunokon

By Kenye Belcourt

Friday September 18 2015 

Sifac: Luhlahlfongiyuck Ac Pwacye

Mwe Read: Fwackyuck 22:1-7

Kenye Tulensru Belcourt

Sifil wi mwet nukewa in oru kaksak yohk lasr nu sin LEUM GOD ke moul wowo ac pakoten yohk Lal nusesr kewa. Paing mwet nukewa ac lela tuh God Ngun Mutal Elan wi kut kais sie ke Kas In Kol Lal nusesr.

Sripa yohk ke book se inge pa God El ac fah kutanglah mwet lokoalok nukewa lal ac oayapa Satan, kacl Christ, Leum lasr; ac nu selos su oaru nwe ke safla, God El ac fah akinsewowoyalos ke sie kusrao sasu ac sie faclu sasu ke pacl se kutangla se inge aksafyeyukla. Kut nofon enenu in lulalfongi ke kas inge ke sripen wangin ma sutuu ke Kas Lun LEUM GOD uh. Sifwe se inge pah “Lulalfongiyuck ac Pwacye”. 

Me luti se inge simla sel John, su el liye ke aruruma lal ke sie Jerusalem Sasu nu sin met lalalfongi nukewa lun God. Oasr sie lupufan fwakak nusel ke infwal lun kof in moul, su kalem oana crystal ac kof ka u sororme liki tron lun God ac lun Lamb.

Akalemye pa ke Sak Lun Moul kap sisken infwal u ac Sra ke sak soko inge me akkeyela mas lun mutunfwalu. A fwa tia sifil oasr losr ku fong, tia enenu kalem lun lam ku fwat ke sripen Leum God ela fwa kalem lalos ne tok ma patpat. 

Kas fwakyuk inge nukewa Kas Paye ac fwal in Lulalfongiyuk. Tu paye Leum God el sang Ngun lal nu sin met Palu in fwakak ma inge, ac el supama Lupufan lal in fwakak nu sin met kulansap lal ke ma ac fwa sikyak. Ac insewowo nu selos su tupan ke tuku lun Jesus Christ ac akos pusren ma sap lal nukewa.

Meet liki orekla faclu, Kas el nuna oasr yurin God, ac el oapana God. Kas se inge el oasr yurin God meet liki mutaweyen faclu. God El orala ma nukewa kacl. Wangin kutena ma orekla saya, fin tia ke Kas (John 1:1-3). Bible natusr uh pa LEUM GOD. Ma Simusla nukewa ituku ke Ngun lun God, ac oasr sripa in luti ma pwaye, in kai, in aksuwosye, ac in aketeya ouiyen moul suwohs (2 Tim 3:16). 

El ac fah eela sroninmutalos nukewa. Ac fah wangin misa, wangin asor ku tung ku keok, mweyen ma nukewa meet ah wanginla (Fwackyuk 21:4). Pa inge Wuleang lun LEUM GOD nu sesr kais sie: wangin misa, wangin asor, wangin keok. Mwet nukewa ma forla liki ma koluk lalos ac lulalfongi in LEUM GOD e fah wangin: misa, asor, ac keok. Lulalfongi mweyen pwaye Kas lun LEUM GOD. Satan el oru kut in tia liye mwe akinsewowo Lun LEUM GOD nuser. 

Tuh elos su sangengtot, elos su moulkin lumah fohkfok, mwet akmas ac mwet kosro, elos su orek inutnut, elos su alu nu ke ma sruloala, ac mwet kikiap nukewa—acn selos pa lulu su firir ke e ac sulfur, su pa misa akluo (Fwackyuk 21:8). Wangin na pwaye ma sutuu ke verse se inge, enenu kut in forla nu sel inge na ac luhlahlfongi in El. Tuh molin ma koluk pa misa; a mwe kite lun God pa moul ma pahtpat yurin Christ Jesus Leum lasr (Rome 6:23). Satan el ke kut in misa.

Sifil kalweni in fahk lah Kas in Kol ku Kas nukewa kut readi in Bible uh pa LEUM GOD. Ku ac suwohs ke Kas lun God tuku ke Ngun Lal mukena su El ase nusesr nofon in oru kulansap lasr “Fahkelik ke Pweng Wo” nu fin acn faclu nukewa.

Jesus El fahk, “Kowos in lohng! Nga ac sa na tuku! Insewowo elos su akos kas in book se inge su fahkak ke ma sikyak in pacl inge ac ke ma ac fah tuku tok! v7. Kut e tia ku in lulalfongi ac etu ma pwaye efin kut tia tuku na yurin LEUM GOD in pacl nukewa “Ikasla ac readi Kas Lal”. Bible uh pa LEUM GOD: kut ac etahl lah mukena efin kut ikus lah Bible natusr ac sang Ngun Mutal Lal in us kut ke kut readi uh. Mwet uh e liye ku lun LEUM GOD meyen kut e seseslah ke Ngun Mutal oana ke Peter el seseslah kac (Orekma 4:8). 

Wangin mwet e lulalfongi kut ac liye pwaye iyen ku se lun LEUM GOD inge efin kut sang ku lasr sifwacna in us orekma lasr nu sin God. Orekma uh ma lun LEUM GOD ac El mukena pa kut ku in lulalfongi uh. Pwaye ac suwoswos uh tuku mukena yurol. Wangin suwos lasr sifacna kut nofon mwet koluk. 

Paing mwet nukewa ac nunak munas kut nofon enenu na sifil folok nu ke Kas Lal misenge yohk liki na meet ah. Kulo kaksakin LEUM GOD ke kas inge nukewa lal kas pwaye ac fal in Lulalfongiyuk v6.

Thursday (9/17) Sifac: Kahing Liki Ma Lusrongten; Moulkin Ma Pwacye

Kunokon

By Deaconese Havelyn Tosie

Thursday September 17 2015
Sifac: Kahing Liki Ma Lusrongten;
Moulkin Ma Pwacye
Mwe Read: 2Tim 2:14-16, 22-26

Deaconese Havelyn Tosie

Ipin mwe rid se inge, Paul el simis letter ak luo lal nu sel Timothy su fwakak yokna ke kas in kasru, su Timothy, el sie met fusr su kasrel Paul in orekma lal. Mwe nunak yok ka u pa in muteng. Kas in akkeye lal Paul nu sel Timothy tu elan kafweang na in fwakak ke Jesus Christ a sruokyana mwe luti paye ke Wuleang Matu a ke pweng wo...Paul el oayapa sensenkakunul Timothy tu elan tia wela akukuin lalfon ma wangin kalmeya(2:23) su tia ma a orala kutu ma a mwe na akkolukyela met su porongo. Panang ke verse 14, Paul el akasmikyal Timothy tu elan sensenkin met lal ke ma inge a sensenkakunulos ye mutun God tu elos in tia akukuin ke kalmen kas. Paul el oayapa akkalemye nu sel Timothy ke tafun mwe rid meet ke Verse 15 fwak mu " Kom in akkeye kom tu God elan liye kom wo, sie met orekma su tia enenu in mwekin". Kas inge kewa tuku in akkeyel Timothy ke el sie met fusr su pulaik in tuyak a oru orekma lun God...oana ke sifwa an fwak oinge u" Kahing liki ma lusrongtwen ku moulkin ma paye...Paul el oayapa kafwe tu Timothy elan forla liki sramsram lusrongten wangin sripa tu ma inge akloesyelik kupasr lasr nu sin God, su Paul el srike elan kalmekin, mwe luti se inge ke luman ruf aryur su kangla ikwoa, su kalem kal Hymanaeus a Philetus, ke luti stuu lalos su ekulla lalalfongi lun kutu met u. Mwe luti wolana su fwalana nu sesr kut in eis a lutlutkin ke oiyan sie mwet fusr su pulaik in oru fwakak lal ke Jesus Christ a wangin sangeng ku sensen lal in akyokye kas lun God. Kas in asmak a akkeye nu sesr kais sie ke kulansap lasr, tu kut in kaingkin ma kut etu mu a tia musai tokosrai lun God. Oayapa in kaingkin lung koluk lun met fusr ac fwasr tukun ma suwoswos, lalalfongi, lungse a misla a kulang nu sin met nukewa a in ekin sie met luti wo a moul kin mongfusrasr...

Wednesday (9/16) Sifac: Ku Luhn Ma Pwacye

Kunokon

By LM Skipper Ittu

Wednesday September 16 2015
Sifac: Ku Luhn Ma Pwacye
Mwe Read: Luke 4:14-19

LM Skipper Ittu

Kaksakin God kulana ac kulanglana lasr. Sifac se lasr ke Wednesday se inge pa "Ku Luhn Ma Pwaye," oasr in Luke 4:14-19. Luke el srumun ke Jesus El tufana mutawaak in oru orekma (fahkak) lal tukin El kutanglah kewa mwe sruhf Satan el srihfacl kac. Oinge, Jesus el foloklac nuh Galilee ke kuh luhn ma pwaye (Ngun Mutal). Pweng kacl fahsrelik ke El luti in iwen lolngok panang mwet nukewa kaksakunul. Tohkoh, El som nuh Nazareth, acn el isusla we, ac luti pac we. El riti acn se ke sie Book Lihmlihm, suc fahkuhl oinge, "Ngun lun Leum God oan fuk, meyen El mosrweyuclac in fahkak pweng wo nusin mwet sukahsrup ac mwet suc muta in keok; mwet sruhuh fah sokosoklah, ac mwet kun fah liye. Ac pacl sac tuku tari ke Leum God El fah molela mwet lal." Sifac se inge kafwekut in wi eis kuh luhn Ma Pwaye kuh Ngun Mutal, suc akwoye ac akkeye orekma lasr, tuh kuht in tia tahfonglac ke mwe sruhf luhn el suc koluklacna.

Tuesday (9/15) Sifac: Moul Luhn Ma Pwacye

Kunokon 

By LM Driskell Jack

Tuesday September 15 2015
Sifac: Moul Luhn Ma Pwacye
Mwe Read: Soakas 14:22-29

LM Driskell Jack

Ngan wi kowos kaksakin GOD Papa Tumasr ke len misenge uh. Ac in kaksakin GOD Papa Tumasr ke kut moul sun len na kacto se inge. Lela tu kuh lun GOD Papa in wi kut ke sie mwe lutlut mwo; in kacsre kut ke moul in mwet lasr ac akfohtohto ye kut nu sin GOD Fulat lasr. Ac in pain pac Mwet Kol ac Mwet kulansap nukewa ma wi sahfunsuli orekma lun GOD. In akkeyekowos oana ke fahk lun Leum lasr, “…Pwaye kosrani uh yohk, a pu mwet in orekma”(Matthew 9:37).

Kulo ma lulap pac nu sin ETAWI-ALL Kosrae ke orekma mwowo lowos in luhngasla pac mwe lutlut se inge nuke kas lasr mwet Kosrae, su fahk ouinge, ‘Moul Luhn Ma Pwaye’. Oana ke akkalemyeyuk lung inge, oasr in Soakas 14:22-29.

Ke fus se meet an, Soakas 14:22, akkalemye la kut fin oru orekma lasr in wo, na mwet uh ac lulalfongi kut in sunakin kut, a kut fin wi oru orekma koluk, kut a fahsr ke sie inkanek tafongla. Pa inge sripa se ma kut enenu in asmak kac; la fin nwe akkalemyeyuk in Rome 3:23 muh Mwet nukewa orekma koluk ac tia sun lupan mwolana se ma GOD Papa El ahkoho nu sesr, kut enenu in kupasryang nu sin GOD.

Kupasryang lasr nu sin GOD Papa, el inkanek nuke moul paye. Pa inge sripac yok se ma oru Paul, Mwet Sap lun GOD Papa el akkalemye la molin ma koluk pa misa oru kut fin lungse wi eis moul ma pahtpat, kut enenu in kupasryang nu sin Wen kulo se fanna nutul su pa Jesus Christ (Rome 6:23).

In Soakas 14:23, ak asmakinye kut la kut enenu na in orekma. Mwe insewowo nu selos ma alken in orekma. Oana ke ma Simusla akkalemye in Ecclesiastes, “Orekma na yohk nga orala tari. Nga musaela lohm puspis nu sik, ac yukwiya ima in grape sunuk”(Ecclesiastes 2:4-5). Orekma lasr kacsre kut in ahse pac mwe mongo nasr. Ac “Kut nukewa enenu in mongo ac nim ac engankin ma kut orekma nu kac. Ma inge mwe kite lun God”(Ecclesiastes 3:13).

In eis mwe kite lun God, El akkalemye lalmwetmet lun kais sie sesr. Pa akkalemyeyuk ke Soakas 14:24 inge, su fahk muh “Mwet lalmwetmet uh eis mwe kasrup; a mwet lalfon eteyuk ke lalfon lalos.” Isaiah, Mwet Palu el tu akkalemye pac ke ma Simusla muh, “Ouinge kowos ac fah utukla nu in sruoh. Mwet kol lowos ac fah misa ke masrinsral, ac mwet ngia ac fah misa ke malu”(Isaiah 5:13). Fahk se inge oana pac fahk lal Mwet Palu Hosea, su fahk muh “Mwet luk elos ac fah lisyukla mweyen wangin etu lalos keik. Kowos mwet tol, kowos tia pac eteyu, ac kowos pilesru luti luk. Ke ma inge, nga fah pilesrekowos ac nga fah tia akilen wen nutuwos su pangon mu elos mwet tol luk”(Hosea 4:6). Ke kom readi fus se inge, liye news misenge ke an Saberia ke an Europe misenge!

Nunak munas liye akwoyac ke mwe lutlut se inge, yok kef us 26 nuke 29: Pang uh, fuhsasr! Siyuk tu kut in Akfulatye LEUM GOD. Ma ac tuku nu sesr kac pa mwesewowo ke misla paye. “Yak om lungse tuh kom in tia sa misa? Esam ke Hazekiah el siyukyuk nakmunas nu sin GOD in tia esla moul lal. El tung siyukyuk nunakmunas!

Fahk ouinge, “Hezekiah el forang nu pe sinka uh ac pre; :”Leum GOD, esam lah nga kulansupwekom ke inse pwaye ac suwohs, ac pacl nukewa nga srike na nga in oru ma lungse lom.” Na el mutawauk in tung arulana upa…Nga, LEUM GOD lal David, papa matu tomom, lohng pre lom ac liye sroninmotom. Nga ac fah lela nu sum in sifilpa moul key ac singoul limekosr”(Isaiah 38:3-5). Mwe luti nu sesr in asmak la Leum GOD El ahsang akpwaye lal lah El ac liyaung wulela lal.
Soakas se inge tuku in sifwil akasmakinyekut la LEUM GOD lasr El insewowo sin mwet wo uh. Kut etu oana ke ma Simusla akkalemye la “…Kutena ma sie mwet el taknelik, el fah oayapa kosrani”(Galatia 6:7). Ke kut taknelik ma wo ac ma lun Ngun, kut a fah kosrani ke ma wo, yok na nuke moul ma pahtpat su kut kuh in eis ke kupacsryang mwowo lasr nu sin Jesus Christ, Leum ac Mwet Lango lasr.

Ke kut eis Mwet Lango lasr in mwe ihweh kup lasr, kut oana Sie mwet loh oaru su fahkak ma paye pacl nukewa. In fahkak ke ma paye pacl nukewa, kais sie sesr ac puhla moul in misla yurin Jesus Christ, mukehna. Oana ke akkalemyeyuk nu sesr in Soakas 13:14, su fahk ouinge, “Mwe luti lun mwet lalmwetmet uh, sie unon in moul su ac fah kasrekom in kaingkunla mwe sensen nu ke moul lom.”

Sie inkanek in kaingkunla mwe sensen ke moul lasr pa in ‘moulkin moul lun sie mwet mongfisrasr. Oana ke fahk pac in Soakas 19:11, “Kom fin sie mwet etu, kom ac ku in kutong kasrkusrak lom. Mwet fin oru ma koluk nu sum, ac arulana wo kom in tia lohang nu kac.” Ma kom ac lohang nu kac pa LEUM GOD lasr; su oana sie tower na ku su mwet suwoswos ku in som ac wikla we.” Akkalemyeyuk pa ouinge in Isaiah 32:8, “A sie mwet suwoshs el oru ma suwohs, ac el tu na ku ke ma pwaye.”

In sifwil kaksakin GOD Papa Tumasr ke sie mwe lutlut na mwo in pangon kut in kupasryang nu sin GOD Moul sefanna fin facl se inge.

GOD bless you All!

LM Driskell J. Jack
Kosrae-Seattle Congregational Church
alukosraeseattle@gmail.com
(206)946-0937

Monday (9/14) Sifac: Srihpac Luhn Ma Pwacye

Kunokon 

By Deaconese Sepe Kilafwasru

Monday September 14 2015
Sifac: Srihpac Luhn Ma Pwacye
Mwe Read: Psalm 45:1-7

Deaconese Sepe Kilafwasru

Psalm soko inge ma lun tulik natul Kora, mwet kulansap in temple lun God. Psalm soko inge kusen soko on suc fwak ke luman lungse nu sin ise togosra, motkeyuck mu togosra se ingacn pa togosra Soloman ke pacl in marut lal.
Kusen on soko inge akkalemye lah togosra se inge oasr ma nukewa yorol. El wal fulat, yok Ku lal, yohk mwe kasrup lal oayacpa mutan kiacl sie mutan na oasku. Ma inge nukewa tuku nusel ke sripen moul lal akinsewowoye Leum God. El tuna kuh ke ma paye lun God pacl nukewa, insepusisacl, suwoswos. El lungse ma suwos a srunga ma koluk. Ke ma inge nukewa mutunfal puspus insewowo sel ac kaksakunul.
 
Wolacna ac wal fulat lun togosra se inge tia ma ke sripen yunla lun mano nuke ropes ku crown tusruk ma tuku ke inse akosten a paye nu sin God fulatlacna su ase ma wo nukewa nu sin kais sie fal nuke liye Lal.
 
Psalm soko inge pangpang pac Psalm lun Mesiah, meyen el fwakak ke osun ku tukeni lun Christ nu sin Church Lal, un mwet lulalfongi ke pacl safla uh (Rev. 19:8-9) Verse akluo in mwe read se inge ,akkalemye ke me insewowo puspus ma God El sang nu sin togosra se inge. Hebrew 1:8-9 akkalemye kas in palu inge nukewa akpayeyuklac ke Christ El tuku. Su fwak oinge, Togosrai Lal a fwa oan ne tok ma patpat. El fwa leumi mwet Lal ke nunuku suwos. El a fwa lungse ma suwos a srunga ma sesuwos. Pa inge sripac se oru God El sulacllah a sang nu sel insewowo a sunak yohk liki nu sin kutena mwet.

Deaconese Sepe Kilafwasru

Sanri (9/13) Sifac: Akacsrui Ke Ma Nuhkewa

Kunokon

Rev Takeo Likiaksa

Sunday September 13 2015
Sifac: Akacsrui Ke Ma Nuhkewa
Mwe Read: Orekma 4:34-37; 5:1-10

Rev Takeo Likiaksa

Ipin mwe read se met inge ma ke pulan pacl se ma srak sasu akwuki lun Church in pacl sac. Nunak in akilen enenu lun mwet nukewa kalem na pwcnacng mwet Christians in pacl sac anunkui sie sin sie, wangin sie selos motko mu ma lalos, ma oasr yorolos ma lalos sifacna. Kalem orekma lun Ngun Mutal inmasrlolos. Elos fulweack an, mwe kasrup ac ma nukewa lalos fal nuke sifac uh,, “ Akasrui Ke Ma Nukewa.”

Ma Sumusla tia na fahk lah oasr sap ku nu sin mwet uh in fahk lah mea elos in oru ku sang. A elos sang ma lalos ke na sulala lun kais sie. Ac mwet uh sang ke na nunak paye ac akilen lun kais sie ma elos liye mu eneneyuk. Sang lalos tia molin membership fee se in sang suwos se lalos nuke u se

Ipin mwe read se tok an, kalem sie lacna la uh. Ngun Mutal finne oasr tari in pacl sac, tu oana pacl inge, mwet lulalfongi tiana unweyukla ku kosreyukla nuke mwe srife lun Satan. (Ephesus 6: 12; 1 Peter 5:8)

Tu ma koluk ma Ananaias ac Saphphira oracle tia ma ke srowohsr ku srukya kutu molin an se lalos elos kukakunla ah. A ma ke sulala lalos lah elos kukakunla ku tia kukakunla ac lupahkah monin money elos ac sang. Ma koluk se lalos ah pa kikiap lalos nu sin God ac mwet in Chruch in pacl sac. Elos fahk mu elos sang nofon wangin ma elos srela lalos sifacna. Kalem sesuwohs in nunak lalos. Kikiap lalos oru elos in misa na kitin pacl ah, sie fahsr tukin sie,

Akwuk na wowo fal nu sesr kut in wi akilen ac oru ngetnget in akacsrui lasr in akilen ac orekmakin mwe insewowo ma Leum God El akinsewowoye kut kac uh.

Saturday (9/12) Sifac: Akacsrui Ke Ma Yolyak

Kunokon

By Surleigh Y. Tara

Saturday September 12 2015
Sifac: Akacsrui Ke Ma Yolyak
Mwe Read: Luke 3:10-16

Surleigh Y. Tara

Nga wi pac kulo ke oasr pacl in lotelah met liki tahfelah lun kunokon se inge. Paye lac tia fihsrasr in fwahkak mukena ac tia moulkin, yohk na nusik.  Mwe prue lasr uh pa, God Elan wi kut ke mwe lutlut se inge.

Na mwe read se inge akkalemye lac ‘John The Baptist’ el pa tuku met in sackuhnlah tuku lun Leum.  In oana ma Mwet Sap Isaiah el fwak ke Isaiah 40:3, sie pusra ac fwa wowoyak, akolah inkanek ac sakunla innek yen mesis uh nusin God. Pusra se inge lemlem nukacl ‘John The Baptist’. El tuku in mutawaack sekin insian mwet in pacl soh in akoo tuku lun Wosasu.  Akfasryeyacn Wosasuc nusin mwet se enenu in wangin inse fulact, oasr akosten nuke akwuk ma Leum El fwasr kac, ac elos in esla kain in nunak lusrongten ac in akoeloslac nuke ma wolana se ma ke tuku lun Leum.

John in oana ke mwe read uh el fahkack kutu mwe sensen ku kahs in esmakin nuselos. Ke sripen yohk nunak koluk ac mukuikui sufal lalos in srunga sie sin sie suc ma sang kusrkusrak nusin God, elos e tufwa tia kuh in kahingkunlah nununku yurin God sayen elos in auliyak. Auliyak mukena pa kuh in kifucs insiaclos liki ma lusrongten suc ma elos oasr kac.  Elos fin tia moul kin akwuk mutal lun God, pa e kalem kac nunak ac moul ma elos oasr kac, e tufwa wangin sripen fwakak lalos ke lulalfongi suc ma elos oasr kac.  Suwos in mukuikui ke moul lalos pa fahkon auliyak paye se. 

Tukun elos auliyak inge, pa elos siyuk sel ‘John the Baptist,’ lac mea elos enenu in oru?  Mwe read u akkalemye la kain in mwet pa inge. Mwet muta inmasrlolos, mwet eisani tax, ac mwet meun. Elos inge forlah liki moul suhfal lalos na pa ‘John the Baptist’ el fwak nuselos in lungse sie sin sie ac oru in wo in masrlon sie sin sie.  Moul kin Wosasuc uh enenu in oasr kulang nu sin sie sin sie. Akfasryeyacn akwuk se inge pa kalem ke elos kewa in oru in wo nusin mwet nukewa ac in moul kin ma suwos.  Elos in taranulos in tia puhtat nuke rahpkuh ku kutena ma suhfal suc ma e use mwe toasr kuh upac nusin sie sin sie. 

Fwak lal ‘John the Baptist’ inge e fwa tia ekla pac na nusesr misenge. Paye lah fisrasr kut kewa in tuyak luti ke akacsrui ke ma oasr yorosr. Kisen siyuck uh pa, kuh kut moul kin ma kut fwak uh? Kut fin lulalfongi ke Wosasuc se inge, na e tia ma kut fwak uh pa akkalemye lac oasr Wosasuc in kut. Tusruk ma inge akilenyuck ke ma kuht moul kin uh. Loang nuke ma oasr yorosr uh. Kut toeni orek mongo yohk in akfulatye ma lasr sifana, uh arulana pus mwet muta kao ac masrinsral ke sripen wangin ma oasr yorolos.  Kais sie sesr enenu in loang nuke oenacngasr, lac paye lac kut akkacsrui ke ma oasr yorohsr? Moul kin lun Wosasuc uh pa yohk sripac uh. Wangin sripac in fwakak na ac tia moulkin.


~ Ke Kuhlacng Lun God in fwa wi kuht

Friday (9/11) Sifac: Akacsrui Ke Mwe Ongaiyac

Kunokon

By Lipan Welly

Friday September 11 2015
Sifac: Akacsrui Ke Mwe Ongaiyac
Mwe Read: Philippi 4:1-14

Lipan Welly

Sifil wi mwet nukewa in oralla kaksak yohk lasr nu sin LEUM GOD ke moul wowo lasr kewa. Paing mwet nukewa.

Leta lal Paul nu sin mwet Philippi simla nu sin church se ma el oakiya oemeet fin acn Europe, ke sie facl pangpang Macedonia ma oan ye koko lun acn Rome. Sripen leta se inge pa in sang kulo nu sin mwet Christian in acn Philippi ke mwe kite lalos nu sel ke pacl el muta in enenu. Ma srumunyuk yohk in leta se inge pa ke engan, lulalfongi, nunak se, ac kwafeang in moul fal nu ke lulalfongi ac moul in Christian (Tukakinyen Leta Lal Paul).

Akacsrui ke mwe ongaiyac pah kut esam sikyak ke September 11, 2001 fin acn U.S. su eslah moul lun mwet 2,996 wi mwet 19 (hijackers). Mwet u tuweni ac akacsrui ke pray. Year singoul akosr nu misenge kut enenu na in sifil folok nu yurin LEUM GOD yohk liki na meet ah. Kut enenu na in fungyang nusel inge na ac lulalfongi in El, ac in El mukena! Mwe ongaiyac e tuku. Mwet 2,996 elos nikin ma e sikyak nuselos ke len se inge. Wangin mwet etu pacl lah uh. Mwe ongaiyac se efin LEUM GOD El pang nusesr uh kut tia akolla.

Mwe lutlut se inge tuku nusesr ac simlac ke Paul el muta in presin fin acn Rome. El muta in ongaiyac na upac. Ke sripen yohk lulalfongi lal in LEUM GOD oru wangin fosrnga lal. El engan in sim ac akkeye mwet wial fin acn Philippi elos in tu na ku ke Kas Lun LEUM GOD. El arulacna kwacfe nuselos tu elos in tia tui in welul sulkakinelik Pweng Wo uh v3. Nikmet fosrnga ke kutena ma, a in pre lowos nukewa, siyuk sin God ke mwe enenu lowos, a pacl nukewa kowos in siyuk sel ke inse kulo v6.

Paul el arulacna srui kaksakin mwet wial inge la elos tia tui in kasrel ke el muta in kohs ku ongaiyac lal v14. Oasr ku luk in oru ma nukewa ke ku su Christ el ase nu sik v13. Arulacna kalem ke verse se inge lah tia ku lal Paul pa el lulalfongi uh. A ke ku Lun LEUM GOD mukena. Pa inge ku se ma kut nofon enenu in sifil folok nuke inge na uh. Mwe ongaiyac nusesr efin kut lulalfongi kut sifacna muh oasr ku lasr sifacna. Pa inge mwe ongaiyac se ma mwet lulalfongi nukewa enenu in toeni kac a akacsrui ke. Mwe Ongaiyac se inge pa mwet lasr ma srakna muta ke sukosok lalos ke pacl se inge. Kut enenu in pray kac inge na tu LEUM GOD Elan ekullah mwet wiasr inge in suk Wen Sefanna natul inge na a eis moul ma patpat.

Kut fosack liki na meet ah. Efin kut liye ma kut elyah kin misenge uh tuh na ma na e wo nusesr mukena. Srikeni lungse ac yokelik srunga lasr kais sie nu sin sie. Oasr na upac mwe Ongaiyac oasr yorosr inge na. Srikeni pacl in read Bible ku pacl in pray ke sripen kafofo ma kut sang in tuku meet liki LEUM GOD. GOD El etu nofon ma oasr insiasr ac Elac akinsewowo ye kut nofon ke inse paye lasr nusel. Paul el tiana sensen ku fosrgna mweyen el etu lah el fin nwe acnwuki ke muta lal in presin el eis tari moul ma patpat ke sripen el lulalfongi ke LEUM GOD.

Kut mwet lulalfongi Kosrae nukewa enenu in toenni ke kokoh lun GOD Ngun Mutal e pray ke Ongaiyac se ma yohk emeet: Mwet lasr ma sonna eis Jesus nu in moul lalos! tu LEUM GOD Elan folokin nulos mwe nofon nu Yorol misenge. Misenge sie pac len in esmakin luk ac sou luk ke September 11, 2006 LEUM GOD El pangon pac papa tumasr. Mwe ongaiyac nukewa enenu in itukyang nu sin LEUM GOD inge na. Sifil kulo kaksakin LEUM GOD lasr ke mongfisrasr ac lungse yohk Lal nu sesr nofon. Paing mwet nukewa.

Thursday (9/10) Sifac:Akacsrui Yurin Nuhkewa

Kunokon

By Victor Melander

Thursday September 10 2015
Sifac:Akacsrui Yurin Nuhkewa
Mwe Read: Isaiah 1:15-18

Victor Melander

Nga sifwil pac sang kulo na sin GOD ke moul lasr ke kut sifwilpac oasun ke mwe lutlut na wowo seinge. Nga lungse akkeyekowos in tia sang mwe read lasr u in ack tohasrye nunak lowos an. Paye lac pulukas met ke mwe read lasru upac puhsrah. Tusruktu puhlukas tok an, kom kuh in liye lupan lungse lun GOD lac oana sie lungse lun papa se. Kolyac ngan suht na sum, Fus 18 “LEUM GOD EL fahk, ‘Inge fahsru kut in aksuwosyela ma se inge. Kowos tuhn srusrala ke ma koluk lowos, Tusruktu NGA fah oulkowosla in fasrfasr, ac fah nasnasla oana unen sheep,’”
 
Kom kalem ke mah GOD EL fwak nge? EL tia sahp kom in som aknanasye kom lac na kom fwa tuku na YOROL. EL fwak, “Fasru use mah fokfok, mah koluk lom nukewa.” Suh ac oulkowosla? GOD EL ac oru ma kom tia ku in oru. Oh, na EL ac oru fukac? (Oasr on sogo orekla ke fus senge.) Sracl Jesus oulokomla nasnas oana unen sheep. Jesus El som nuke sacksin sogo uslac ma koluk, fohkfohk lom nukewa, aollac ke suwos Lal. Kom mwet na sukohsohk se inge na.
 
Kulo ke pacl lasru esam: Jesus ac PAPA GOD lungse kom.

Wednesday (9/9) Sifac: Akacsrui Ke Inse Kuhlacng

Kunokon

By LM Skipper Ittu

Wednesday September 9 2015
Sifac: Akacsrui Ke Inse Kuhlacng
Mwe Read: 1 Timothy 5:11-19

LM Skipper Ittu

Sifwil kaksakin God Fulatlana ke moul ac pal wo lasr in aetuila ke Kahs In Kol ke Wednesday, Sept. 9th, 2015; Sifac se inge fahk muh "Akacsrui Ke Inse Kulang," oasr in Sie Timothy 5:11-19. Pusral Paul, suc oasr Macedonia pal se inge, nusel Timothy, suc sropoi Church Ephesus pa inge. Ke sripen akwuk wowo lun church Ephesus in kasruh Mwet Christian suc enenu kasru panang Paul el kwacfel Timothy elan liye tuh mwet Christian Ephesus in kasrelos ke inse kulang, a tia ke ma sapkinyuk. Inmasrlon mwet sukasrup puhs, elos in kasruh katinmas, yok katinmas ma sun yac 60 kuh mahtuh liki. Paul el fahk oinge ke sripen katinmas fusr inge kut in sifiwil marutlac panang oasr karinginyaclos. Oayapa members ke church in oarulana sunakin Mwet Kol lalos; oinge, Mwet Kol, suc arulana oaru ac insaneang, in akyokyeyuk mololos. Tuh Ma Simuslah uh fahk, "Nik kom kapriyac oalin soko cow mukul ke kom orekmakunul in longyac wheat" ac "fal sie mwet orekma in eis molin orrekma lal." Timothy elan oayapa tia porongo kahs in akkoluk lain sie Mwet Kol fin tia ma sin mwet loh luo kuh tolu. Sifac se inge kasrekut Mwet Kol in arulana karingin wo member ke church lasr. Ke kut oru wo nu selos ac fah wangin kahs in akkoluk ac sun kut. Ac nu sesr members in engan in sang kasru lasr (lah monin money kuh kutena ohiyac wowo sayac) in kasrelos suc enenu kuh finne Mwet Kol ke church lasr.

Tuesday (9/8) Sifac: Moul Wacngin Mwacta

Kunokon

By LM Driskell Jack

Tuesday September 8 2015
Sifac: Moul Wacngin Mwacta
Mwe Read: Psalm 26

LM Driskell Jack

Ngan wi kowos nukewa ma ngutelik ac orella puhsren kaksak lasr nu sin GOD Papa Tumasr ke kut moul sun len na special se inge, Tuesday, September 8, 2015. Len se inge, len in asmakin nu sesr, su kut lohtela sin Mwet matu lasr la, sie len ma kuh, kulang ac pakoten lun GOD Papa puhtahti nu facsr ke sripen lungse kawil lal nu sesr.

Lungse kawil se inge pa David el Onkackin ke Psalm 26, meyen David el etuh insiyal ac in heart lal uh la GOD Papa muhkehna pa etu na paye kacnon nunak lal ac ma el puhtatyang nukac.

In Psalm 26:1 an, fahk ouinge, “Oh LEUM GOD, akkalemye lah wangin mwetik, Mweyen nga oru ma suwohs Ac nga lulalfongi kom ke insiuk nufon.” Ke fus se inge, David el ngusre sin GOD Papa in akkalemye la wangin ma koluk lal ma ac sang mwacta nu sel. El ke tu GOD Papa elan akkalemye la aok el suwos ac wangin ma koluk lal. Tu ke moul-in-mwet lasr, arulana uhpac, kut in fahk mu wangin ma koluk lasr (Rome 3:23).
Ke David el ahkuhlacnak ouinge la kut tia ku in fahk mu wangin ma koluk lasr, na pa inge, el siyuk ke nunak munas, tu GOD Papa Tumasr in aksuwosyela inel ke ma mwet lokahlok lal nununkacl kac. Sie selos ma kacsel ke el etu mu wangin ma el oru koluk nu se pa Tokosra Saul. Ac Tokosra Saul el suk inkanek in unilya David pa kut lutlut pac ke ma Simusla in (1 Samuel 18:1-30; 19:1-18). Pa kalem ke fahk se lal inge, “Tuh lungse kawil lom atolyulu: Ac oaru lom kolyu pacl e nukewa”Psalm 26:3).

David el konacak na paye lungse kawil se inge la oasr yurin GOD Papa Tumasr muhkehna. Pa akkalemye in Psalm 36:7, “O God, fuka saokiyen lungse kawil lom! Kut konauk nien wikla lasr ye lulin poum.” In lemtuhlahak lal David, el akkalemye la wangin ip lal nu yurin mwet wosounkas, mwet koluk, ku mwet sulallal. Ke fahk se lal David inge, el arulana ke in kalem sin GOD Papa la el loes nukac ma koluk. Tusruktu, ke inen Jesus Christ, kut enenu in akkalemye pac lungse kawil se ma GOD Papa el akkalemye nu sel David; la kut enenu in fohototo in sang kacsru nu selos ma muta in losr. Kut enenu in kacsru mwet wosounkas, mwet koluk, ku mwet sulalal in forla in suk ke lungse ac pakoten lun GOD. Ma lasr kais sie Mwet lulalfongi in kacsrelos su enenu, yok liki in forla nu sin GOD Papa. Kut etu la David el sie Mwet koluk, su tahfongla, ah forla ke inse-ahuhliyak paye nu sin GOD Papa. Ouinge ke akkalemye lal David ke fus ak 4, 5, ah 6, el ke in kalem sin GOD Papa la el etu la ma koluk uh ku in tuku yurin mwet ma el akkalemye lung; pa nuke mwet wosounkas, mwet koluk ac mwet sulalal. Mwet inge pa David el mu el loes nu yoro, pwenang el pang nu sin GOD in fahk la el moul suwos ac nasnas ye mutal.

Ke inse-ahuhliyak paye lal David nu sin GOD Papa la el suwos ac nasnas, el etu pac la GOD Papa pa etu ma nukewa ma el oasr kac. Ac el sang kulo ma lulap nu sel kac. Pa el akkalemye pa ke fus ak 11, “A funu nga, nga oru ma suwoswos. Pakomutuk ac moliyula! Fahk se lal David inge, nga lulalfongi mu oasr sesr nukewa in siyuk sin GOD Papa in nunakmunas ke ma koluk lasr ac in molikutla.

Mwe lutlut se inge luti kut la David el puhla sel mu ‘El moulkin sie moul suwos ma wangin mwacta. Pa kut read ke ma Simusla lung inge la, el pang nu sin GOD ke sripen GOD Papa pa etu ma nukewa. A sie pac mwe read lung inge (Rome 3:23), fahk la “mwet nukewa orekma koluk, ac elos nukewa tia sun lupan Wolana se ma God El akoo nu selos.” Pwenang Paul el sifiwl akkalemye nu sin Mwet lulalfongi in an Rome la, “Tuh molin ma koluk pa misa; a mwe kite lun God pa moul ma pahtpat yurin Christ Jesus Leum lasr”(Rome 6:23). La kut sifacna akkalemye mu wangin ma koluk lasr, ku kut fahk mu kut oasr in moul wangin mwacta, lela kut in kupacsryang nu yurin GOD Papa Tumasr, oana ke David el sifacna ahkulen la nununku paye oasr yurin GOD Papa Tumasr. Pa sripac yok se oru kut enenu in kupacsryang nu sin Leum GOD lasr tu kut in wi ipeis ke suwoswos lun GOD Papa Tumasr in kusrao.
GOD bless you all!

LM Driskell J. Jack
Kosrae-Seattle Congregational Church
alukosraeseattle@gmail.com
(206)946-0937

Monday (9/7) Sifac: Moleloslac Suc Muhnas

Kunokon

By Deaconese Tulpe Dizon

Monday September 7 2015
Sifac: Moleloslac Suc Muhnas
Mwe Read: Psalm 82

Deaconese Tulpe Dizon

Kulo kaksakin kulang yoklana lun God ke moul lasr kewa ac ke kas Mutal Lal na sesr.Mwe lutlut Lal na sesr na ke Monday(september 7 2015) suc tuku in luti kut ac fwak muh,"Moleloslac Suc Muhnas."ac me read na kac suc tuku ke book in Psalm: 82 nofon. Psalm soko inge ma lal Asaph. Kusen Psalm soko inge akkalemye ke oiyen nununku ma Leum God fulatlana El kena tuh in akfasryeyuk fin faluh uh. El fwak mu kut in tia oru nununku sesuwos. Kut in tia insese yurin met koluk a kut in oru nununku suwos nu sin mwet sukasrup ac mwet mukaimtal ac oru suwos nu sin mwet enenu ac mwet munas. Leum God El fahk mu kowos in molelosla liki poun met sulallacl. God el arulana etu lah nununku suwos wanginlac fin faclu panang el kena akasmakinye kut nukewa in etu lah El pa nununku faluh na panang kut fin oru nununku sesuwos lasr fin faluh el fwa nununke kut ke pacl in nununku Lal.

Sanri (9/6) Sifac: Pre Ke Puhlaik

Kunokon

By LM Quartus Esau

Sunday September 6 2015
Sifac: Pre Ke Puhlaik
Mwe Read: Orekma 4: 23-31

LM Quartus Esau

Mwet Sap lun Jesus wi mwet lulalfongi puspus tu arulana sessesla ke Ngun Mutal tukun Lwen in Pentecost. Na pwanwang elos oru orekma usrnguck ac mwenmwen puspus. Luo selos pa Peter ac John. Elos wi pac sessesla ke Ngun Mutal. Oinge ke ku ma oan selos inge, elos akkeyela mwet ul se liki mas lal. Mwet puspus arulana lut ac fwefwela ke orekma usrnguk Peter ac John inge. Tusruktu, elos akkalemye la, ku inge tiac ma selos sifana, a ma Jesus lun Nazareth El sang nuselos.

Oiyac se inge pwanwang sruoh Peter ac John ac nununkeyuck. Mwet Pwapa Fulat lun Mwet Jew siyuk selos la, “ma oyac ku ma elos orekmakin inge ac ke inen suc elos oru ma inge?” Peter ac John topkolos a fwak mu, ku inge nukewa ma sin Jesus. El suc elos tu srunga, uniyac fwin sakseng ac God El akmoulyeak liki misac. Ke mwet inge long top lun mwet sap luo inge, elos kaelos ac fulelosla. Elos fwak nuselos elos in tiac sifil luti ku sramsramkin e se inge Jesus.

Oinge Peter ac John foloklac nu yurin mwet lulalfongi wialos ac srumunang kewa ma mwet inge oru nu selos. Ke mwet lulalfongi wialos elos long oiyac inge nukewa tari, elos tukeni ac pray nusin God.

Elos ikasla pray lalos in akfulatye ac kaksakin fulatlana lun God suc orala kusrao, fwalu, meoa, ac ma nukewa loac. Elos oayacpac srumun lainyen Christ sin mwet u, suc ma inge nuna wotlac sin God in sikyak; ac aksafye in ngisre ku siyukc ke kasru lun God in sang pulaik nuselos in fwakak kas Lal nu fin fwalu.

Tukun safla pray lalos na kusrusr se sikyak ke acn se elos tukeni we ah. Akkalemye la mwet lulalfongi inge nukewa sessesla ke Ngun Mutal ac elos mutwawaak in luti ac fahkak ke kas lun God.

Me lutlut se inge akkalemye ke pulaik lun mwet sap ku mwet lulalfongi inge. La finne oasr pusra ku kas ma srike in tulokin fwakak lalos, ku finne oasr kalyac ma orek nuselos, elos tiacna tui in fwakak ke kas lun God.

Lela me lutlut se inge in luti kut ac akkeye kut nukewa in pulaikna in wi oru fwakak lasr ke kas lun God. Me kutong, me kisrucng finne oasr, kut in siyuk ke pulaik sin God oana mwet sap elos oruh.