Saturday (4/16) Sifac: Sukohsohk Luhn Mwet Christian

Kunokon

By Surleigh Tara

Saturday April 16 2016
Sifac: Sukohsohk Luhn Mwet Christian
Mwe Read: Philippi 2:1-11

Ke mwe read se inge, Paul el sim ke el muta in presin in akkeye mwet Philippi inge ke moul in Christian lalos. Yohk elyah lal Paul kaclos ke sripen alein inmasrlolos ac oacyacpac ke luti stuh-uh ma sikyak in pacl se inge. Pacnacng el kafwelos in moulkin lungse sie sin sie in akyohkye lulalfongi lalos. Elos efin oru ouinge, ac tufwak oasr inse mislac ac engan inmasrlolos. Leta se inge akkalemye lah Paul el etu lac oasr moul in Christian yohrohlos. El kena akkeyelos ac kafwelos in akfahsrye ma oasr yohrohlos.

Elyah se lal Paul nuselos inge pa, enenu in oasr sie sin sie inmasrlolos. Efin elos ekin mwet lulalfongi ac in wangin mislac inmasrlolos, na saap e kuh pacna in wangin yohrohlos ke wolana lun Gospel. Ke ma inge, mwet sahyac efin liyaclos, elos e fwa pangon pac na muh wangin lac sripen lulalfongi lalos ke Leum Jesus.  Meyen tiana kalem ke moul lalos uh. Mwet sahyac akilen ke wolana in lulalfongi ke Leum Jesus tia ke ma elos fwak uh, uh pa kalem ke moul lalos.

Elos suc ma oasr lulalfongi in el, ac tufwa wangin konkin in lusrohngonten yohroh. Elos oacpac in tia mukuikui ke nunak lalos sifacnna, a elos in loacng nusin sie sin sie. Sie sin sie uh pa akkalemye lungse inmasrlon mwet lulalfongi uh. Elos in suk pac in wo nusin mwet ngiac, a in tia wo nuselos sifacna. Oana ke Leum Jesus El aokiayac aten moul lun mwet Christian se. Elos in mong fisracsr in oana Leum Jesus suc El kisackuhnuhlyang in misac ke ma koluk lun mwet ngiac. Ke sripac se inge, elos enenu na in akfasrye oana Leum Jesus ac in tia tohrkahskahs ke elos putatyang nuke ma upac. Na Paul akkeyelos in fwak lac, sie pacl suc ma e fwa tuku, mutun facl nukewa e tufwa epahsrlah nusin El Suc Fulatlana in sang akfulat lalos nusel. Elos ac tufwa fwak lac inen Leum enenu mwet nukewa in akfulatye.

Kut fin loacng nuke moul lasr mwet Christian misenge uh tu kut fwal na paye in ngesyuck mwe lutlut se inge nusesr.  Kut kuh in fwakak ke Kahs lun God, tusruk ma se ma puhs sesr tiana fwasr fal nuke uh pa in moul kin. Ma Paul el fwak nuselos inge tia eklac nusesr misenge ke moul lasr uh. Kut lungse us nunak lasr sifacna ac kupohtulei sie sin sie. Kut enenu in loacng nuke moul lasr sifwana in suk in aksuwosye moul lasr nusin God meet. Meyen Ma Sap sasu se Leum Jesus El fwak pa John el sumusla ke John 13:34 "Inge nga so nu suwos sie ma sap sasu: kowos in lungse sie sin sie.   Oana ke nga lungse kowos, kowos in oayapa lungse sie sin sie." Kut fin oru oinge, kut e tufwa wi pulakin "Sukohsohk Luhn Mwet Christian."

Wednesday (4/13) Sifac: Luhngse Okak

Kunokon

LM Skipper Ittu

Wednesday April 13 2016
Sifac: Luhngse Okak
Mwe Read: Psalm 119:41-48

LM Skipper Ittu

Kulo nuh sin Leum God ke moul ac pacl wowo lasr nuhkewa! Sifac se lasr nuh ke Wednesday se inge fahk muh "Luhngse Okak," oasr in Psalm 119:41-48. Mwe kahsruh se inge sruhmuhn ke luhngse okak luhn God finne tuhlihk nahtuhl tuhnyena lahenuhl pwacnacng elos muhta in kapihr lalos Babylon. Ohinge, El fahk lah Elac fohlohkuhnlosmwe ac sang ma sap lal in ahksukohsohkyeloslac, a in tiac ahkkohyelos. Elac fah tohpohkuhlos suc kahskahs kohu kacl, ac fahk lal uh pwaye pacl se nuhkewa. Ke elos ac tohkohsra lalos liyacacng ma sap Lal, elos ac fah muhta in sukohsohk pwaye nwe tok. Leum God Elac fah tiac ahkmekinyaclos, a Elac fah ahkinsewowoyaclos. Luti kuht in oayacpac orekmakin luhngse okak kuh pwaye luhn Leum God, suc acse sukohsohklah lasr in tiac sifil muh kuht moullac ke karinginyen ma sap, a ke luhlahlfongi muhkena lasr ke Wen nahtuhl Jesus Christ.

Tuesay (4/12) Sifac: Ahksasucyeyucklac Akuhpahsri

Kunokon

By Joyleen Stephen

Tuesday April 12 2016
Sifac: Ahksasucyeyucklac Akuhpahsri
Mwe Read: Jeremiah 31:21, 31-35

Joyleen Steven

Kulo kaksakin el su fulatlana ke moul lasr a akwuk lal su el akiya nusesr kut ku in sifil PA ilyak nuke sie PA Len sasu in eis me luti lal in kol kut ke Len SE inge.

Me read SE lasr nu misenge inge akkalemyeyuk ke sie wuleang sasu su ma Leam God ela tufa akiya nusin mwet lun God tukun pal lal mwet palu Jeremiah, in akasmakinyelos finne wangin mwet luti, meyen a tufa simla insialos.

In oana ma akkalemyeyuk ke me read SE inge, ke sripen lungse a pakoten luhn Leam God nusin mwet Israel, el folokonolos me nu yen selos a akkalemye nuselos mu elantufwa orala sie luhma sasuc suc a sienna liki ma meet ah,suc eklac SE inge ela oana ke sie muhtan fin loango sie mukul. Ke pal SE Leam God ela fah oakiyac sie wuleang nusin mwet Israel AC mwet Judah a fa Tia oana wuleang matuh suc el oralah nusin mwet matu lalos su el sruokyac paolos a kohlolosme liki Egypt. Wuleang sasuc SE ma ela oruh inge, PA ela tufwa likiyac masap lal nu inelos a simusla insialos, a el tufwa God lalos a elos fa mwet lal a tufwa wangin selos fa luti ke el Leam God meyen ela tufah oru tuh mwet nukewa in etal a ela tufwa oayapa nunak munas nuselos ke ma koluk lalos a Tia sifil esam ma stuu lalos, meyen el PA Leam God SE suc Leam fin ma nukewa

Sanri (4/10) Sifac: Sie Muhtacwacack Sasuc

Kunokon

By Rev. Takeo Likiaksa

Sunday April 10 2016
Sifac: Sie Muhtacwacack Sasuc
Mwe Read: Luke 7:36-50

Rev. Takeo Likiaksa

Kalem lah oasr ouiya ac moul mahtu se enenu in ikilyukla nuke sie ouiyen moul sasu pa kalem ke sifac se inge. Wi ke mwe read se inge Jesus el kapsra ouiyen oru lal Simon, sie mwet Pharisee ma solacl Jesus nuke mongo se inge, ac mutwacn se ma tiana suliyuk, a ke na sripa lal utyak nuke mongo se inge. Mwe read uh fahk lah el sie mutwacn koluk.

Na oana ke kalem uh, oru lun mutwacn se inge, akkalemye srui lal in oru ouiya nukewa ma fal elan oru nu sin mwet solsol nu in sie lohm. Mutwacn se inge, sang sronin mutal sroksrokinyac nien Jesus, ac sang aunsifal ela. Paye, kut tia moulla ke ma kut oru, a lulalfongi lasr pa ku in ase moul nu sesr uh. Ma inge akkalemye srui lun mutwacn se inge, el finne sie mutacn koluk, tu oru lal, Jesus el akilen ac nunak munas ke ma koluk lal.

Mwet Pharisee ac guests ke mongo se inge, etu mu God mukwena pa ku in nunak munas ke ma koluk uh, oru elos suk ac nunku lah fukah tu Jesus elan ku in fahk la ma koluk lun mutwacn se inge nunak munas nu sel. (Liye pa nuke Luke 5: 20)

Yac kom wi pac engankin sralacpiyen kulang ac pakotwen lun God nu sum? Ya kom srui nunak munas lal nu sum finne lupahka lupan sesuwos ke moul lom? Lela nu sesr kewa in wi pa oru “Sie Mutwacwacack Sasu” ke moul in lulalfongi lasr.

Saturday (4/9) Sifac: Luhlahlfongi Wacngin Mwekin

Kunokon

By Dcns. Niokong Yukiwo

Saturday April 9 2016
Sifac: Luhlahlfongi Wacngin Mwekin
Mwe Read: 2 Timothy 1:8-14

Dcns. Niokong Yukiwo

Paul sie mwet kulansap oru lun christ Jesus, el akkeyel Timothy sie mwet fusr yohk lulalfongi lal ke christ Jesus. Nimet kom mwekin in fahkak ke ma kom etu ke Leum lasr, uh kom in wi keok ke sripen peng wo, fal nuke ma God el soht nusum, peng wo se inge pa Jesus Christ.

God el molikutlac, pangon kut, tuh kut in mwet lal sifana, tiac ke wo lasr, ac ke lung kulang lal sifacna. Christ Jesus el aksafyelah ku lun misac, ac el akkalemye nusesr ke sie moul suc wangin safla iyac. Yohk ma upac ac tuku in akkeye sie mwet lulalfongi ke Christ Jesus, tusruktu, sruokya na ku ma kom etu ke kas lun God. Nikkom mwekin lah ma inge sikyak nusum, God el etu, el ac fah akkeye kom, kom fihn lulalfongi in el. 

Niokong Yukiwo

Friday (4/8) Sifac: Luhlahlfongi Kuhtanglah

Kunokon

By LM Wilson Kephas

Friday April 8 2016
Sifac: Luhlahlfongi Kuhtanglah
Mwe Read: Psalm 54

LM Wilson Kephas

Sifac nuhke Friday an fahk mu, “Luhlahfongi Kuhtanglah”; ac mwe read an oasr in Psalm 54. Psalm soko inge ma lal David, suc pang nuhsin Leum God in kahsrel kuhtanglah mwet lokoalok lal, mweyen el akihlen lah Leum God el mwe kahsruh se nuhsel ke moul lal nohfohn. Ke Saul el suk in unilyac David, David el tuh kahinglac nuh Ziph ac wihkwihk we.  Kuht long lah kuhtuh sin mwet fin acn se inge som ac tuhkahkuhnuhlwac nuh sel Saul.  Pwacnacng in mwe siyuck lal David el siyuck kahsruh ke En Leum wi kalma kuh wolana nuhkwewa ma tuhkuh ke kalmacn EN Leum in kahsrel ke mwe elyah lal.  Sie ma kahlwem ke En Leum pa El sang kahsruh lal nuh sin mwet kuhlansap lal nuhkwewa. Suc kahlwem ke  verse 1-3 ke David el siyuck ke kasruh ke En Leum ac el eis kahsruh ke En Leum ke verse 4-7 pwacnacng el oruh kaksak lal nuh sin Leum God wi kihsac lal in kaksakihn En Leum God meyen El wo. Tuh En Leum God el molwellah liki mwe lokoalok la.  Ma inge kuh pac in sikyak nuh sesr, kuht fin fihliyac kwewa luhlahfongi lasr yurin Leum God.

Thursday (4/7) Sifac: Luhlahlfongi Ahkpacyeyucklac

Kunokon

By Victor Melander

Thursday April 7 2016
Sifac: Luhlahlfongi Ahkpacyeyucklac
Mwe Read: 2 Samuel 7:8-12

Victor Melander

Nga lungse pac kulo ma lulap na Sihn GOD ke moul lasr kewa ke mwe luti na wowo se kut sifwil pac putatyang nu ke mesengi u. Sifwil pac akesmakinye kut ke fufwasryusr lasr messengi u. Mwe read lasr u fwakak yok ke sie Olelac Luhn GOD nu sel David su akpayeyuklac ke Solomon el akmusraiyuklac elan togosra fwin an Israel.

Messengi akpayeyuk Olelac se LUHN GOD nu sel David inge ke ke isuslac Lal Jesus nu fwalu, su kut kalem kac la tuku se met Lal, El tuku in misac ke sripen ma koluk lasr ac moli kut lac ac oakeyac moul ku lumac kut in ukwe ac tupan ul ke folok ak lou Lal. Ke paclse El tuku in Leum lun leum ac Togosra lun togosra. Ac Togosrai Lal fwa wangin ku ku in kutanglac nac tok ma patpat.

Wednesday (4/6) Sifac: Luhlahlfongi Oan Na

Kunokon

By LM Skipper Ittu

Wednesday April 6 2016
Sifac: Luhlahlfongi Oan Na
Mwe Read: Psalm 13

LM Skipper Ittu

Paing kowos mwet wiasr ke luhlahlfongi Kosrae ac sahyen acn Kosrae! Sifac se lasr nuh ke Wednesday se inge fahk muh "Luhlahlfongi Oan Na," oasr in Psalm 13. Kuhsahl Tohkohsrah David pa inge. Motkweyuck muh el simuhlah psalm soko inge ke pacl se el tahfonglac sel Bathseba kuh ke pacl se Absalom, wen nahtuhl, tuyak in lahenuhl. Ohinge, David el pruhe siyuck sin Leum God, "Kom ac muhlkinyuclac nwe ngac? Puhtahkah ngac muhtweng toasr luhn insiuk ac mwet lokoalok luhk?" Leum God Elan tohpuhkuhl ac fohlohkkuhnacng kuh lal, elan tiac misac. Ac mwet lokoalok lal in tiac kuhtanguhllah ac isruhnuhl. Finne upa nuh sel David, luhlahlfongi lal sin Leum God oan na, lah El ac fah molellah. Ac el ac fah on nuh sin God meyen El wo nuh sel pacl nuhkewa. Mwe kahsruh se inge luti kuht in tu na kuh ke luhlahlfongi lasr ke Christ finne oasr ma upa nuh sesr. Tuh El etuh lah kuht kuh in kuhtanglah ma inge meet liki sikyak nuh sesr. Oacyacpac, kuht fin ikori ke moul in luhlahlfongi lasr, kuht in suhlahklahk auliyak ac fohlohk nuh yohrohl, tuh El inse pahkoten in eis kuht pacl e nuhkewa!

Tuesday (4/5) Sifac: Molelah Nuh Sel David

Kunokon

By LM Tolenoa Kilafwakun

Tuesday April 5 2016
Sifac: Molelah Nuh Sel David
Mwe Read: 2 Samuel 22:2-7, 17-20

LM Tolenoa Kilafwakun

Kulo ac kaksakin God Fulat lasr ke moul wowo kut pulakin ke moul asr. oayapa ke insewowo lasr sel me kut eis ke len nkewa. Kulo ke El srack na nekkut ke kahs in Moul Lal in karungin inkanek lasr ke len nukewa. Payena lah God El Wo ac Lung Kulang Lal nu sesr yoklana lela kut in kaksakin E Mutal Lal ke lusen na moul lasr.. Kunokon se inge, Kalem muh soko On in kaksak lal David nu sin God Fulat ke God El tu molellah liki inpacol Saul ac mwet lokoalok pac lal sayac. Kusen On soko inge sikyak pac ke Psalm 18. Yok kalmen kahs ke On in kaksak soko lal David inge ke sripen El Pulakin na Paye Kasru, karunginyuk ac molela lun God nu sel in pacl se el enenu na paye kasru sin God inge. Su El akilen Leum God ke kapin nunak lal in onkakin fahk muh,, Leum God El Yot Ku Luk, El Nien Wuhklac Luk, El Mwet Lango Luk,El Mwe Loang Luk ke pal el liye Fosrngah ac moul lal mwet lokoalok lal suk in esla. Ke el akilen lah misac apunullah inge el pang nu sin Leum God suk molela lun God. Oinge molela lun God tuku nu facl molella liki inpoun mwet lokoalok kulanna lal. Leum God El kasrel in loangoel,karungunul liki mwe fosrngac nukewa nu sel men Leum God El insewowo sel David men tafun moul lal David inge, David el suwoswos ye mutun God ac el oayapa akos Ma Sap lun God ac oru ma lunges Lal. Wacngin ma koluk sruokol ke moul lal. Mwe nunak se nge luti kut in Moulkin Suwoswos ac lulalfongi, Kut in esam lah Leum God El apkuran in pacl nukewa nu yurin mwet suwoswos in pacl wo ac in pacl koluk. Kut in sang kewa mwe elyac nukewa lasr nu Sel tu El fah kasrekut in ase Misla nu sesr. Kulo ke mwe lutlut wowo kut eis ke pacl se nge. ac oayapa kulo nu suwos kewa su ac wi kut alutluti ke kahs lun God ke pacl se inge... 1 Thessalonica 5: 19,20 fahk muh,''Nik Kowos Kutongyac Ngun Mutal Ku Pulesru Mwet Su Luti Ke En God."........kulo ma lahp..tk

Monday (4/4) Sifac: Lahngo Nuh Sin Israel

Kunokon

By Dcns. Tulpe Danny

Monday April 4 2016
Sifac: Lahngo Nuh Sin Israel
Mwe Read: Exodus 14:30-15:3

Dcns. Tulpe Danny

Kaksakin God Fulatlana ke moul lasr suc kut pulakin ac tarilakin ne ke pal se inge.Ac oayapa in Kulo ke Kas Lal suc El acse nusesr in muh sifil luti kut,in karingin kut ke moul lasr.Oayapa in Painkowos ke pal se inge. Kas in Lahngo Nu Sin Israel suc pa kas Lal nusesr ke Lwen se omeet in week uh.Ac kanon book lun Exodus pa lihksreni na akuteyac nusesr ke me lutlut uh.

Chapter 14 verse 30 ac chapter 15 verse 3 pa me read lasr u ku me lutlut u tuku kac uh.Sikyak kalem ke pal se Leum God El tu sapkin nu sel Moses elan kolla tulik nutin Israel liki kolyuk lun acn Egypt.Na ke len se ma sikyak molela se inge nu sin tulik nutin Israel.Suc fwak kalem kac lah elos fasr sahslah in meoa uh ac mwet Egypt elos tu ukaclos in folokonoloslac nu Egypt.Fak pac lah ke Koh ac Usrnguck lun Leum God el tu sang koh na sel Moses elan sraclihk kof meoa nuke siskac siskac.Na Leum God El sapkin nusel Moses elan us tulik nutin Israel fasr sahslah infulwen meoa uh.Ac ke usrnguck lun Leum God ac elos arulana lie ac sangeng ke Koh usrnguck Lal inge.Na elos okacl Moses saslah liki meoa uh.Na mwet Egypt uh elos okaclos in tu folokunolosla na yen selos.Na ke Koh lun Leum God El sifil sapkin Moses elan asrelah pahol nu in meoa uh na kof uh folokeni ac onelah mwet Egypt nofon wi chariot ac horse natulos nofon. Fwakla tulik nutin Israel inge liye luman Koh ac Usrnguck lun Leum God in kuin langeloslac liki in poun mwet Egypt.Elos arulana on ac engan in kaksakin Leum God ke El kutanglah mwet Egypt suc ukaclos inge. In oana ke Leum God El Lango Nu Sin Israel ac El fwa oayapa Lahngo nu selos nukewa suc aksol ac kulansupacl. Kulo ke me lutlut wowo.

Sanri (4/3) Sifac: Aksasucyeyucklac Moul Kuh

Kunokon 

By LM Quardus Esau

Sunday, April 3, 2016
Sifac: Aksasucyeyucklac Moul Kuh
Book: Luke 7:1-10

LM Quardus Esau

Lulalfongi lun sie solse (centurion) ke Jesus Christ panang mwet kulansap se lal kwela liki mas ac keok lal. In oana ke akkalemyeyuk in me read se inge, mwet kulansap se inge mas ac apkuran in misac. Ke sripen yok lungse lun solse se inge kacl, el tiac tui in suk inkanek in akkeyella. Ke el long la Jesus El oasr in city sac (Caperneum), el sapla ngisre Jesus elan som ac akkeyela mwet kulansap sac. Oinge Jesus El som. Ke El apkuranyang nu lohm sin solse sac, solse sac sifilpana supala sap soko. Jesus Elan tu tiac akelyayel elan som nu yorol. Meyen el kupansuwol Jesus lan utyak nu in lohm sel ku finne elan sifana som nu yorol Jesus. Oinge el ngisre sin Leum, “Tari kom fwaklana ke kas lom ac mwet kulansap luk el fwa kwela.” 

Jesus El lut la in solse se lun acn Rome a in oasr lupan lulalfongi se inge sel meyen El soenna liye lupan lulafongi se inge sin mwet Jew. Oinge El akkeyla mwet kulansap sac in oana ke ngusr lun mwet leum sac. 

Mwet kulansap sac kwela ac pulakin moul sasuc ke sripen lulalfongi yok lun mwet kol se lal ah. Luti kut misenge in esam la, lulalfongi lasr kais sie ke Jesus Christ ac ku pac in aksasuye, akkeye, ku finne molela moul lun sie mwet.

Friday (4/3) Sifac: Puhlakinyen Moul Kuh

Kunokon

By Kenye T Belcourt

Friday April 1 2016
Sifac: Puhlakinyen Moul Kuh
Mwe Read: Matthew 6:16-27

Kenye T. Belcourt

Kaksakin Leum God ke ma nukewa meet liki nga fwa tafela ke kas in luti lal nu sesr kewa.

Me read se inge akkalemye ke ke pal se Jesus el oru luti lal Finol in acn Galilee ke Peng Wo ke Tokosrai Lun God. El luti nu sin met tumal lutlut lal ac un met puspis in an nukewa su tukeni nu yorol in Lon me luti lalmetmet ac menmen usrnguk su God el asang nu sel. El akuteya ke moul suwos lun sie met in kutangla Ku lun God nuke moul ma patpat. Kutu oiyac el akasmakinye metu pa Inge. Kowos in oru Lalo u in lukma, tu God el etu ma nukewa ac ela fwa sot mwe moul nu suwos. Sang lalmetmet ku me kasrup lowos kasru Orekma lun God ku met su enenu. Ac fwin kowos oru oinge lungse lowos oasr yurin God. Ac Lela kalem lun atronmuta u in kol kom nu yurin God ac Tia nuke ma losr Lun fwalu. Kowos in sulala in kulansupu Leum God mukefanna ac tia me kasrup lun fwalu. Tu paye wangin sie met ku in kulansapu leum luo. Ac oayapac kowos in tia fosrnga ke ma lun fwalu, a kowos in fosrngakin moul lowos in suwos ac payena yurin God. 

Me lutlut u kasrekut in oaru in akos ma lungse Lun God tu kut fwa ku in pulaikin Ku Usrnguk lun God nu sesr. Ac el fwa wi kut in kutangla ma upa nukewa ke moul in Lulalfongi lasr u. 

Kulo.

Thursday (3/31) Sifac:Moul Kuh Nuhkewa

Kunokon
By Kavika Abraham

Thursday:03/31/2016
Sifac:Moul Kuh Nuhkewa
Mwe Read:Matthew 4:23-25;5:3-11

Kavika Abraham

Kulo kaksakin God ke wolana lun God kut sifil pula af lal kahklah sun tuhka srisrik se lasr kosrae inge.Fal kut nukewa in akilen lah God el wo Kulang pal nukewa,lela tuh kut in akilen wolana lal lah tia tui in wikut.

Mwe read se inge sikyak ke luti lun lun Leum kuh fahkack lun Leum wi ahkeyelah lun Leum ke fuhfahsryusr lal nu Galilee.In pal se inge Jesus el mutwack in oru luti lal nu in acn se inge wi in orekmakihn pweng wo ke tokosrai lal in sang ahkkeyelah kain in mwet mas puspus in acn se inge.Ke pacl se pweng kacl inge fasrelihk mwet in acn syria nofon elos mutwack in use kain in mwet mas puspus suc ma oasr demon yoroh,wi mwet pulkoa,ac mwet ul na Jesus el ahkeyeloslac kewa.In pacl sac na el muhtwack in luti nuselos ac fahk,Insewowo elos suc sukasrup in ngun;Tuh tokosrai lun inkusrao ma lalos!Insewowo elos su asor,Tuh elos fah pwarak!Insewowo elos su fakpap,Tuh falu fah ma lalos!Insewowo elos suc masrinsracl ac malukin ma suwoswos,Tuh elos fah kihp!Insewowo elos su pakomuta,Tuh elos fah eis pakomuta!Insewowo elos su nasnas insialos,Tuh elos fah liye God!Insewowo elos suc akiwe mwet u,Tuh pangpang elos tulik nutin God!Insewowo elos suc kalyeiyuk ke ma suwoswos;Tuh Tokosrai lun kusrao ma lalos.Insewowo kowos ke mwet akangonye kowos,ac kalyei kowos,ac fahk kain koluk nukewa lain kowos in kikiap keik.Kowos enganak ac arulana insewowo,tuh yohk ma lacne lowos inkusrao;tuh ouinge elos su kalyei mwet palu su muta meet liki kowos.

Fal nga kom in orekmakihn moul in luti lun Jesus paye lah kut ac fin moulkihn ac yohk finsrak lasr nu ke tokosrai lal ma patpat.Tuh ma kuh Tahknelihk kuht ac fah oacyacpac kosracni ke len safla.Paye lah wangin sie kuh oana Leum,paye lah el pa God Papa,God Wen ac God Ngun Mutal.

Wednesday (3/30) Sifac: Kahs in Ahkkeyelah

Kunokon

By Dcns. Havely Tosie

Wednesday March 30 2016
Sifac: Kahs in Ahkkeyelah
Mwe Read: Soakas 12:1, 2;13:16,17;16:22-24

Dcns. Havelyn Tosie

Kulo a sifwil kaksakin akwuk wolana a kulang yoklana ma God Papa El kolkut me kac nu misenge, kut akilen ke Wen saoklana natul tuku a molikutla mwet fwalu panang oasr sifwil moul. Sifwa se lasr inge oana ke kalem an - "Kahs in Ahkkeyelah" su book in Soakas, Kutu kahs lalmetmet lal Soloman ma el onkakin a srumun nu selos in pal soh, a falme nu sesr kut in moulkin. Su fwakak kalem ke Soakas 12:1- fwak ouinge, kutena mwet su lungse etaak, el engan in eis kas in kai pal tafongla, ma lalfon se mwet su fin srunga, in aksuwosyeyuk el, oayapa akkalemye la, sie met ma oasr nunak la, elos nunkala ma u in wo meet liki elos oru ku fwakla, ma inge kewa fwakak ke sie met oaru, el suk misla, a sie met soaru, utuk kas el sripaak lokalok. Soakas 16:22-24 akkalemye la Etaak u el sie unon lun moul nu selos su lalmetmet. Sie mwet su eis kalem lal in ngun, el engan in eis etaak lal ke oiya lun kai, tafun verse tok ke Soakas 16:22 akkalemye oinge, kom fin srike in luti met lalfon, kom sisla pal lom ke wangin, su kalem ke Saokas 12:1 - ma lalfon se met se fin srunga in aksuwosyeyuk el. Mwe luti se inge kafwekut a akkeyekut in orekmakin kalem lun God in us kut ke etaak ma oasr yorosr, oana ke Saokas 1:7 fwak - Sangeng sin Leum God pa mutaweyen etaak. Mwet lalfon u pilesru lalmetmet a srunga suk etaak. Mwe luti wowo su fallana nu sik a in orekmakin in akkeyeyu a sifiwl akkkeyela orekmakin yan etaak ma asr in nga. kulo ke mwe luti wowo...

Tuesday (3/29) Sifac: Po Sohksohk in Ahkkeyelah

Kunokon
By LM Tolenoa Kilafwakun

Tuesday March 29
Sifac: Po Sohksohk in Ahkkeyelah
Mwe Read: Malachi 3:16-4:2

LM Tolenoa Kilafwakun

Kulo Kaksakin God Fulatlana ke ke moul wowo kut pulakin, Paing kowos nkewa su ac wi kut alutluti ke kahs in Moul kahs Mutal lun God, Su El ase in Ahkasmakye kut in karungin kut ke inkanek lasr ke len nukewa, ke moul in lulalfongi lasr kais sie. Subtopic lun mwe Read se inge fahk oinge;"Wulela Lun God Ke Pakoten" Ke mwe nunak ke me read u, paye lah Pakoten lun God El sang nu sin kewana mwet suwoswos ac mwet koluk,ne oinge mwe insewowo lun mwet koluk uh God El sang insewowo lalos elos finne tia oru lunges lun God Papa. Tusruk tu oasr pac ahkoo lun God nu sin mwet nukewa ke sie Len in Nununku. Fus 16b ke na mwe Read se inge, fahk lah Simmlah innen mwet nukewa su sangeng sin God ac ahkfulatyacl ke sie Book in Acsmakin yurin God. Su pusren God Sifanna El fahk oinge,"Elos inge Ac fah mwet luk ke len in Nununku, elos ac fah ma luk sifacna. Nga ac fah pahkomutalos oana ke sie Papa el pakomuta sie Wen su akosl ac oru ma lunges lal. Mwet luk elos ac fah liye ma su nga ac fah oru inmasrlon mwet suwoswos ac mwet koluk ac nuselos su kulansap nu sik ac nu selos su tia kulansap nu sik. Ke Len sac Mwet Koluk elos ac fah Fururyak oacna mah Paholah Ac elos su ahkfulatyeyu ac oru ma lunges luk, Ku lun Molelah Luk fah tuku nu Faclos oana Kalmen Faht uh in Ahkkeyelos. Elos ac fah sukosoklah ke Engan lulap men elos ac fah moulkin sie moul in insewowo ke Lung Kulang lun God Papa. Isaiah 35:6 fahk oinge,"Mwet uh fah srosro ac tacn,elos su tia ku in kahskahs fah Sasa ke engan. Isaiah 60:20 fahk pac oinge,"Len in Ahsor lom ac fah safla,Nga Leum God Lom ac fah kalem lom ne tok su ac oan path liki Faht ac Malem. Mwet Suwoswos ac fah wi ipeisi Moul Engan ac Misla yurin God in City Mutal sel, Jerusalem Sasu. kulo ke mwe lutlut wowo kut wi lutlut kac ke pacl se inge, ....kulo ma lulap...tk

Monday (3/28) Sifac: Sifil Muhsaheack Moul Kuh

Kunokon
By Lucilla S. Talley

Monday March 28 2016
Sifac: Sifil Muhsaheack Moul Kuh
Mwe Read: Isaiah 58:6-12

Lucilla Talley

Pusren Leum God nusin mwet Israel, su El liksreni na akkalwemye nu selos, ke oiyan lalo ma El kena elos in oru. El fwak oinge, Nga kena kowos in tulwelosla suc kapir ke nununku sesuwos. Sang mongo nwacn mwet masrinsral, a usack mwet wangin lohm se nu in lohm suwos, ac engan in kasru mwet in sou lowos sifana.

Kowos fin oru oinge, na kulang luk a fwa wi kowos, oana kalmen faht in lotutang. Ac nga e wikowos ac molikowos pal nukewa, oayapa nga ac fwa topuk prue lowos in pal nukewa kowos pahng nusik.

Sanri (3/27) Sifac: Sripac Luhn Luhlahlfongi

Kunokon

By Rev. Takeo Likiaksa

Sunday March 27 2016
Sifac: Sripac Luhn Luhlahlfongi
Mwe Read: Mark 16:1-8

Rev. Takeo Likiaksa

Outline:

Introduction:
1. Lut ku tuninfongla lun mutacn ke elos tia motko muh Jesus el moulyak
- Elos som in mosrwela monin Jesus
- Meyen elos liye ke el misac ah
- Elos oayapa liye ke Joseph lun Arimethia el fililya ke kulyuk lal ah
- Elos lut ke el wangin liki kulyuk sa

I Mutacn ah som in liye monin mwet misac se (Mark 16:1-3)
- Elos us ono in mosrela manol
- Elos sa na som ke srak losr in oru ma kunalos elos finne asor
- Tu fosak lalos elos mulkunla lah eot se sang kosrala kulyuk sa-
- Oru elos asiyuki la su ac epusla eot sac ah
- Elos motko pa la elos koflah pa in tulokinya Jesus elan tia anwuki

II. Elos Osun Nu Sin Sie Mwet (Mark 16: 4-6)
- Elos liyacack la eot sac ipiplac
- Yok lut lalos ke elos liye lah eot sac ipipla
- Elos liye sie mwet nuknuk fasrfasr we
- Mwet sac fahk lah Jesus el moulyak

III Elos Eis Sie Sap (Mark 16: 7-8)
- Som ac fahk nu sin mwet tumal lutlut a Peter lah el som ac sanelos in Galilee
- Mutacn ah elos sangeng ac rarrar ke ma elos liye ac long
- Sangeng lalos oru elos kahengelik ac tia sramsram nu sin sie sin sie
- Tu toko elos fah ami ac fah fahk ma elos liye a long ke kulyuk ah

Conclusion:
- Moulyak lun Jesus Permanent
- Mwet ma El akmoulyeak ah, elos sifil pa misa
- Ke kut long ac wi readi ma sikyak ke misa ac moulyak lun Jesus – pa inge sripa lun lulalfongi uh. Tu el tuku ke sripasr mwet uh, ac el su lulalfongi ke Wen el fah eis moul ma patpat

Saturday (3/26) Sifac: Moulkin Sifil Moulyak

Kunkon

By Shanty Ron Asher

Saturday March 26 2016
Sifac: Moulkin Sifil Moulyak
Mwe Read: 1 Peter 3:14-22

Shanty Ron Asher

Me read se inge ma simla sel Peter, sie met sap kuh lun Jesus ke el forfor oru luti lal. Sifac u fak mu, “Moulkin sifil Moulyak.” “Moulyak” nuke moulyak lun Christ ac “Moulkin” nuke moulkinyen lulalfongi ke moulyak lun Christ. Peter el elakin kalem kutu moul suc fal met lulalfongi se in moulkin. Peter el fak oinge, Tusruktu kowos finne keok ke kowos oru ma wo, kowos insewowo na! A kowos in akfulatye Christ ke insiowos ac aklemyacl in moul lowos. Karingin nunak lun insiowos in nasnas na. Ac lela kowos in keok ke sripen orekma wo lowos, fin pa inge lungse lun God, liki keok ke sripen oru ma koluk. El tafela in fak, sie met suwos el misac in aolla met sesuwos, tu elan pwen kowos nu yurin God. Sulacla paye in lulalfongi ke moulyak lun Christ pa in moulkin. Moulkin pa ac acse molela se inge. 

Nusesr misenge, me luti u tuku fal nuke upa ien pal u. Lela tu moul lasr ac oru lasr in fakak kuiyen lulalfongi lasr ke moulyak lun Christ. In oana ke me read u fak, Kutena met fin kas koluk ke orekma wo lowos, lela tu kowos finne keok, kowos oru na ma wo.”

Friday (3/25) Sifac: Sifil Moul

Kunokon

By Dorothy Rhine William

Friday March 25 2016
Sifac: Sifil Moul
Mwe Read: 1 Peter 1:21-25

Dorothy R. William

Tukin mwet u orala wulela nuke moul mutal yurin God, oasr na allolo inmasrlolos in pal so. Peter el srike in akyokye nu selos ke moul mutal. Elos in asang nukewa nunak lalos nu sin God. Mwe rid se inge srumun ke lungse kawul, su pa ikasla nunak in allolo lasr in sang kewa insiasr nu sin God. Kut mwet u, sifana akkeye kut ke oru lasr u, ke kut “excuse” kin mu kut moul in mwet, kut tia ku in oru… meyen srakna oasr allolo sesr kais sie. God Papa, El akkalemye lungse kawul Lal nu sesr kais sie, a kut na in sulala in tafwela nu sin mwet wiyasr oana ke El lungse kut. Peter el akasmakinye mwet lalafongi la ma nukewa fin falu tia kawul, a fa wanginla sie pal, a kas lun God pa kawul a fa on nu tok ma patpat, na kut in sulala Kas Lal, kut in wi eis moul ma patpat.

Thursday (3/24) Sifac: Moul Sesseslah Ke Kuhlacng

Kunokon 

By Kavika Abraham

Thursday March 24 2016
Sifac: Moul Sesseslah Ke Kuhlacng
Mwe Aread: Rome 1:1-7

Kavika Abraham

Kahs lal Paul nu sin mwet Rome pa inge suc el srike in wi kulansapu kuh wi fahkack pweng wo ke Christ Jesus.In mwe nunak se inge pweng wo se ma el srike in fahkelihk inge wulela se lun God nu sin mwet palu lal in pa loes somlah.Pweng wo se inge srumun yohk ke wen se fana natul suc ma misa ac ahkmoulyeyukyak ke kuh
lulap lal.El oru kahs lal inge tuh in kuh in pacnma mwet in acn Rome inge in tuku nu ke moul in Lulalfongi ac Akos na elos fah oaoala muh elos mwet lun Christ.

Lela kut in nunku misenge lah moul se ma sesseslah ke kulang inge pa kalem ke wen se fana nutin God suc ma misa ac molikutlac ke ma koluk lasr kais sie sie.Ke sripen Moul in kulang lun Jesus Christ el pihlacsraclah keok,waiyok ac misac kacsr mwet u.Ma nu sik kom misenge u pa "Ac Funu Jesus El Tia Kulang Nu Sesr Lukun Fuka Moul Lasr u???"Oinge lela kut in kuh in aksol ac oru ma lungse lal na kut ac fah oaoala muh kut mwet lun God.

Wednesday (3/23) Sifac: Oaru Ac Tiac Sahngeng

Kunokon

By LM Skipper Ittua

Wednesday March 23 2016
Sifac: Oaru Ac Tiac Sahngeng
Mwe Read: Psalm 23

LM Skipper Ittua

Leum God Fulatlana ac kuhlanglacna Elan kaksakinyuck ke lusen moul lasr; kaksakunul ke orekma ac fuhfasryucsr lasr misenge, lutu, ac nuh tok ma pahtpaht! Sifac se lasr ke Wednesday se inge fahk muh "Oaru Ac Tiac Sahngeng," oasr in Psalm 23. Kuhsahl Tokosra David ke Leum God, suc oacna sie Mwet Shepherd oaru. Ohinge, tuhlihk nuhtin Israel inge in tiac sahngeng ke fuhfahsryucsr lalos. David el sie Mwet Shepherd luhn pahpah tuhmal Jesse. El fahk lah sheep uh arulacna epacl nuh sin Mwet Shepherd lalos, yohk ke mwe mongo naclos, forfor lalos, ac karinginyaclos. Jesus sifacna El oacyacpac pahngpahng sie Mwet Shepherd wo. Ohinge, kuht sheep nahtuhl kuh mwet kuhlacnsap lal in tiac sahngeng, a kuht in ahksol ac lahlmwetmet in fahsr tohkohl pacl e nuhkewa. Ke kuht fahsr tohkol, kuht ac fah insewowo. Tuh El muhkena etuh acn ma oasr mah kuh infacl in ahkkiphyekuht we. Mwe kahsruh se inge luti kuht in fahsr tukin Jesus, Mwet Shepherd oaru sefana lasr, ac kuht in tiac sahngeng ke kuhtena ma. Moul lasr finne tuhlac ke sripen orekma Lal, kuht etuh kuht eis moul ma pahtpaht yorol!

Tuesday (3/22) Sifac: Sahngeng Ac Kuhlacnsuhpuh Leum God

Kunokon

By Joyleen Steven

Tuesday March 22 2016
Sifac: Sahngeng Ac Kuhlacnsuhpuh Leum God
Mwe Read: 1 Samuel 12:19-24

Joyleen Steven

Kulo kaksakin God ke moul lasr a ke sie pa len sasu ma El sifil a se nusesr in eis kas lal in kol kut a karingin kut ke moul lasr u.

Me read se inge akalemye sramsram lal Samuel nusin mwet Israel ke elos forla in oru ma koluk a suk pa in alu nusin kutena God saya. Oinge, tukun mwet Israel inge liye a akilen ma sikyak tukun Samuel El pray nusin Leam God, elos arulana Sangeng ac siyuck tu Lan ku pa in nunak munas pray nusin Leam God kalos tu elos in tia misa, ke sripen elos oru ma koluk, a siyuk pa in asr pa sie togosra lalos sayen Leam God. Oinge Samuel El akalemye nuselos mu elos in tia Sangeng, elos fine oru ma koluk yohk tu elos in tia forla liki Leam God a elos in kulansupal ke insielos kewa, a tia fasr tukin God lusrongten meyen tia ku in molelosla elos tia paye. Leam God El na Sulelosla mu elos sie mutunfal nusel sifana, panang elos enenu in oaru in kulansupal ke insielos kewa, a kowos fin sifil folok la in oru ma koluk, El a fa kunausulosla.

Ma nusesr ke me luti se inge, pa kut in tia fuleak ke lulalfongi lasr u in suk kutena God saya tu El mukena pa God se fana kut enenu in kulansupu in moul lasr. Lela kut in tia munasla a tu na ku in kulansupal .

Monday (3/21) Sifac: Moulkin Ma Sap

Kunokon

By Dcns Tulpe Dizon

Monday March 21 2016
Sifac: Moulkin Ma Sap
Mwe Read: Deuteronomy 6:1-9

Dcns Tulpe Dizon

Kulo Kaksakin Kulang ac Pakoten Lun Leum God nu sesr ne ke pal se inge.In pain kowos mwet nukewa pac ke pal se inge. "Moulkin Ma Sap" pa me luti na sesr ke Monday se inge ac akuteyucki kalem ke book lun Deuteronomy 6 : 1-9 an. Pal se inge tulik nutin Israel apkuran in utyak nu in fal se suc Leum God El wuleang ku nu sin mwet matu lalos.Fal se ma wo ac kasrup fok we.Moses el luti nu selos fwak mu elos in akos Leum God lalos ac akfulatyacl ke lusenna pal elos moul a muta fwin fwal se suc El sang nu selos , elos ac fihlin tulik natulos nukewa. Elos fin akos ma El sapkin nu selos ac muta in misla ac wangin kutena ma kuin akkulokyalos ke lusen na moul lalos. El oayapa luti nuselos ac fwak Ma Sap se yok emeet uh.Suc fwak oinge, Kom Fwa Lungse Leum God Lom Ke Insiom Kewa ,Ke Nunkom Kewa Ac Ke Ku Lom Kewa. In esamla El mukena pa God paye moul, suc ku in kasre kut ke ma nukewa.Ma inge nukewa nga ac kom in esam na, ke pal kut fuhfasryucsr ,pal kut monglac,ac ke pal kut orekma.Tu kut in kapriyac kas inge ke pahosr ac ke motonsrosr tu in me akasmakinye kut pal nukewa. Kulo ke Kas Mutal Lun Leum God nusesr....

Sanri (3/20) Sifac: Tiana Oraclah ac Auli

Kunokon

By LM Quardus Esau

Sunday, March 20, 2016
Sifac: Tiana Oraclah ac Auli
Book: Mark 14:26-31, 66-72

LM Quardus Esau

Eku safla lun Jesus yurin mwet tuma lutlut lal pa inge. El welulos ke Kufwa safla Lal yorolos ac welulos yuck on in kaksak (motkweyuk mu saap Psalm 115-118 pa elos yuck inge). 

Ke eku se inge, Jesus El palye ma ac tufwa sikyak nuselos. El fwak la elos nukewa ac kaingelik in akpayeye ma simla ke Ma Sumusla u, suc fwak mu, “sheep u kaingelik, ke mwet shepherd lalos srouh’. Peter el topuk Leum mu el ac fwa tiana som lukel. Mwet wiacl finne kaingelik, el ac fwa tiana som. 

Jesus El fwak nusel Peter la, meet liki won u kakla pacl ak luo, el ac lafukunul pacl tolu. Oinge ke srouh Jesus, mwet tuma lutlut elos kaingelik oana ke El palye nuselos ah. Ke mwet u liacl Peter, elos siyuk la tiac el pa welul Jesus forfor ah. Top lal pa el tiac etacl. Ke sun pacl ak tolu Peter el lafwekin Leum, won u kakla, na el esamaak nofon fwak lun Jesus. Peter el tung mweyen el etu la el lafwekin Leum ac tiana oraclah fwak lal.

Pus pacl lulalfongi lasr u arulana ku ke pacl mwet pus wi kut in akkeye nunak lasr, tusruktu ke pacl kut mukena, oasr na nukanla ac tafu luo. Lela me lutlut se inge in akkeye kut in tuna ku ke lulalfongi lasr ke Jesus Christ. In wangin alolo, tafu luo, ac yokna, kut in tiac laflafu lulalfongi lasr ke Jesus Christ.

Saturday (3/19) Sifac: Akucl Luhn Luhlahlfongi

Kunokon

Surleigh Y. Tara

Saturday March 19 2016
Sifac: Akucl Luhn Luhlahlfongi
Mwe Read: Galatia 5:22-26

Surleigh Y. Tara

Meac kalmeyacn Luhlahlfongi? Hebrew 11:1 akkuteya in fwak lac “Kalmen lulalfongi pa kut etu suwohs ke ma su kut finsrak nu kac, ac oasr mwe akpwayeye lasr ke ma su kut tia ku in liye.” Na mwe 'Akucl Luhn Luhlahfongi' uh pa akkalemyeyuck ke vv. 22 ac 23 lah fahko lun Ngun pa Lungse. Paye lah Lungse uh tia kuh in liyeyuck tusruk ma sikyak ke lungse pa akihlenyuck ke orekma lun kais sie mwet (Mat. 7:16). Ke sripen kut mwet lun God ac El nuna sulekutla meet liki faclu oreklac tu kut in ma sefanna yurin Christ (Ephesus 1:4). El lungse kut kewa ac sulekutla tu in mwet lal pacnanang kut enenu in mongfisrasr ac in etu in nunak munas nusin sie sin sie (Col.3:12-15).

Kahs se ma kuh in sang ahollah koanon Bible uh nofon na uh pa, Lungse. Bible uh sramsramkin na yohk ke Lungse mutawauk ke Genesis ne kac Fwakyuck na pa kut kalem kac Wen nutin God El kihsackihnyuckla in molelah ma koluk lun mwet nukewa. Yac puspus meet liki na misa lun Leum Jesus, Bible uh akkalemye pac lac God El sang Ma Sap Singucul ac nusel Moses (Exodus 20). Ip yohk luo ke an pa, in lungse God ke insiom, ngunum, ac nunkom nukewa. Na ma se ak luo an pa in lungse mwet tulan lom (Mat. 22:37). Leum God El etu la wangin sie mwet wo, sayen Leum Jesus, in ku in lungse God ke insiacl, ngunal, ac nunkacl kewa pacnacng El sang Ma Sap Sasu se pa in lungse sie sin sie, oana ke El lungse kut meet (John 13:34). Pa inge mwe sang in akul nusin mwet lulalfongi suc ma oacwac mu tulik nutin God. 

Nusesr misenge in wi pac sang kulo ke mwe 'Akucl Luhn Lulalfongi' se inge lac mwe sang se sin God me. Akucl se inge pa akkalemye ke fahko lun Ngun ke moul lun sie sin sie. Kut fin moulkin Lungse, pa e kalem ke oiyac in engan, misla, mongfisracsr, kulang, orekma wo, oaru, pusisel, ac sifacna leum fac ke moul lun mwet se.  Kut fin oru oinge, e tufwa wangin sie ma sap ku in lain kain in moul se inge. Kisen siyuck se uh pa, "Kuh oasr Akul Lun Lulalfongi in kut?"

Friday (3/18) Sifac: Luhlahlfongi Ma Kuhtanglah

Kunokon

By Lipan Welly

Friday March 18 2016 
Sifac: Luhlahlfongi Ma Kuhtanglah
Mwe Read: Rome 12:14-21

Lipan Welly

Mwe read se inge el putatyang nuke tukakinyen oiyen moul lun sie mwet Christian. Tuh kuht fin ac pangon kut sie mwet christian enenu kuht in oruh lulalfongi lasr uh in fal nuke kena lun God.

Kena lun God nu sesr kais sie tuh kuht in sang kewa kuiyacsr nofon in kuh in moul mislac yurin mwet nukewa. El fahk muh kuht in sang nusel kuh siyuck tuh elan kuh in akinsewowoyelos suc oru koluk nusesr in tiac selngawielos uh elan akinsewowoyelos. Tuh kuht in esam lah ma lun God in nununkelos suc oru koluk nusesr. Tuh kutena mwet fin oru koluk nu sesr kuht in tiac folokin ke ma koluk. Ma simuslah fahk, "mwet lokalok lom fin masrinsral, sang ma nacl; el fin malu, sang kof nimacl; tuh ke kom oru oinge kom arulana akmekinyellah".

Leum God El oacyacpac kena tuh kuht in nunku ke mwet nukewa oacna sie a kuht in tiac sifana nunku muh kuht lalmwetmwet.

Moul lun sie mwet Christian tiacna fisrasr tusruktuh lulalfongi lasr fin paye ac suwos wangin ma kuh in tilokin kuht a kuht ac tuyak ac kutanglah mwe sruf nukewa tuhkuh in fungulkut. Kuht in esam in tiac lela ma koluk in kutangkutlac, a kuht in kutanglah ma koluk ke ma wo ke sripen lulalfongi lasr ke Leum God lasr.

Thursday (3/12) Sifac: Fohlohkinyuckyak Luhlahlfongi

Kunokon 

By Kavika Abraham

Thursday March 17 2016
Sifac: Fohlohkinyuckyak Luhlahlfongi
Mwe Read: Psalm 85:4-13

Kavika Abraham

Psalm soko inge ma lun tulik natul korah suc liksreni prue kwacfe yohk sin God tuh elan sifil fohlohkohnack lulalfongi lun mwet israel inge ac eslah kain oiyac koluk nukewa ac oru tuh elos in sifil acsmaklac ke lulalfongi lalos u.Ke sripac se inge tulik natul korah inge prue kwacfe yohk tuh Leum God elan tuhfah nunakmunas furohkohloslac liki inkanek tia paye ma elos fasr kac inge.

Nga kom misenge tuku in ahkasmakihnyekut in etuh in Prue kaclos suc ma srack fasr sayacn lulalfongi, kuh srack oru ma lungse la sifana.Fal nga kom in tiana munaslah ke lulalfongi lasr u tuh kut in wi fohlohkohnack oiyacn lulalfongi paye ac suwohs kuh fine in pacnma kewa suc srack suk lungse la sifana in tuku nu ke kulansap lun God.Oana ke fwack in mwe read se inge Fohlohkihnyuckyak Lulahlfongi.

Wednesday (3/16) Sifac: Keokkin Luhlahlfongi

Kunokon

By Dcns. Havelyn Tosie

Wednesday March 16 2016
Sifac: Keokkin Luhlahlfongi
Mwe Read: 1 Peter 4:10-19

Dcn Bell & Dcns. Havelyn Tosie

Kulo a Sifwil wi kowos in kaksakin kulang a akwuk wolana ma El ase nu sesr kais sie...Mwe luti lasr u oana ke kalem ke sifwa u " Keokkin Lulalfongi" Sie mwet lalalfongi enenu in keok ke kulansap lal oana ke Christ El keok ac misa in mano. Ke lungse lun God nu sesr mwet u, El ase me sang saok nu sesr kais sie, a kut in orekmakin in akwoye mwet ngiac, oana sie mwet tutafpo wo. Kut fin ekin mwet tutafpo wo, kut enenu in ku in luti ku fwakak ke Kas Lal. Kutena mwet su kulansap, elos enenu in oru ke kuh suc ma Leum God El sang nu selos. Kowos fin mwet lalalfongi ke Christ, kowos in tia lut ke mwe srike a mwe keok ma a sik nu suwos. A kowos in engankin mwe keok inge, ke sripen kowos ipeis ke keok lun Christ. Kutena suwos fin keok, lela in tia ma ke oiya koluk lun fwalu, a in ma ke kowos ekin mwet christian. Kowos in sang kulo nu sin God la kowos ekin Christ. Pal in nununku mutwaak tari, elos su ekin mwet lun God, elos a nununkweyuk elos meet. Ma sumusla u fwak, " upa na mwet wo se in moliyukla na a fuka nu sin met koluk se in moliyukla" 1 Pet 4:18 - Kut fin ekin mwet Christin se, kut in keok meyen pa inge ma lungse lun God, oana sikyak tari ke wen natul. " In Keokin lalalfongi - su pa inge kena lun God nu sesr, liki na in keok kin koluk lun fwalu...

Tuesday (3/15) Sifac: Kalmeack Luhlahlfongi

Kunokon

By LM Tolenoa Kilafwakun

Tuesday March 15 2016
Sifac: Kalmeack Luhlahlfongi
Mwe Read: Isaiah 2:1-6

LM Tolenoa Kilafwakun

Kulo kaksakin God Fulat ke moul wowo kut pulakin ac ke mwe lutlut wowo ke kahs in moul Lal El sifwil ase in karungin moul lasr.in kol kut ac aksuwosye kut ke moul in lulalfongi lasr kais sie.Kas lun God , Isaiah wen natul Amos el tafwela nu sin mwet ke An Judah ac Jerusalem ke pacl fasru u. Fahk lah Temple mutal sin God musalla Fineol Moriah, Su pa pangpang Fineol Zion. Leum God El ikasla nu sel mwet Palu Isaiah lan ku in liye a fahkqk ma su ac fah sik in An Jerusalem, su akkalemyeyuk kalem in Revelation Chapter 21,akpayeyuk Palu Lal Isaiah ke sie Jerusalem sasu. Fus luo ac tolu ke mwe read se nge srumun ke sie Tokosra Tokosra su ac fah tuku Jerusalem me, Su pa ke Christ Tokosrai Lal ac Wal lal ac fah fulat liki kain in Wal Fulat nukewa Falu. Mwet u ac fah Alu nu sel ac akfulatyacl men El pa God Kulana, El Leum fin Faclu ac Inkusrawolana lun God Papa ac fah akiyac Misla nu fwin Faclu su ac fah wangin sifil amei ke meun ku wangin ma koluk ku moul kupatol ac ma nukewa ac fah eklac sasu ke sripen sie Jerulaem sasu City mutal sin God oatui Inkusrao me nu yurin mwet u, ac elos na su simmla tari inne in Book lun Lamb pa ac wi ilyak nu in City u ac eis moul in insewowo urin God Papa. Lela kut in fasr in kalem, lun Ngun Lun God ac moulkin Lulalfongi wi akosten ke kas lun God ku Akwuk Lal. kut in mu ku in wi ipeisi Wolana Lal ke sripen Lulalfongi lasr in God Papa. Kulo ke mwe lutlut wo tuku in karungin kut ke moul in lulalfongi lasr. sifil kaweni in fahk kulo kaksakin God Papa......tk

Monday (3/14) Sifac: Tuhkeni In Luhlahlfongi

Kunokon
By LM Robert Kilafwasru

Monday March 14 2016
Sifac: Tuhkeni In Luhlahlfongi
Mwe Read: Jeremiah 3:12-18

LM Robert Kilafwasru

Kulo kaksakin God fulatlacna ke moul wowo lasr nukewa. Mwe kasru se inge sikyak ke mwet palu Jeremiah el tafwelah pusren God nusin Israel ac Juda in auliyak ke ohiyac koluk lalos. Elos muta in sruhu ke lusen pacl na loes ac pulakin ma upac puspus ke sripen ma koluk lalos. Yurin God, elos oacna sie tamtael ma tiac paye nusin mukul tumalos ac sikaleni in moulkin moul in kosro.
 
Ne ohinge, lungse lun Leum God yohklacna pacl nukewa pacnang El tiac tui in karingin mwet Lal. Jeremiah el tafwelah pusren God nusin tulik natul nukewa in auliyak. Elos fin auliyak ke paye, Leum God El fah pakoten nuselos ac tiac kasrkasrak selos. God El pahngon Israel ac Juda in folokyang nu yorol na elac fah sifil ahkolah nuselos acn El wuleacng nusin mwet matu lallos. Elac fah sang mwet kol lalmetmet in kololos ke elos ac folokoh liki sruhu lalos.
 
Mwe kasru se inge lumahlah fasreni lun Israel ac Juda in oacna fasreni lun mutunfacl nukewa in suk in Tukeni In Lulalfongi. Lulalfongi in God tu El supacma Wen se fanna natul in tuku molelah ma koluk lasr mwet uh ke sripen lungse yohk Lal.

RKILAFWASRU

Sanri (3/13) Sifac: “Lulalfongi Fohnlah"

Kunokon
By Rev. Takeo Likiaksa

March 13, 2016
Sifac: “Lulalfongi Fohnlah"
Mwe Read: Mark 10: 17-31

Rev. Takeo Likiaksa

Jesus el sramsram nu sin sie met su nu fuhsr a el sulpa kasrup. Mwet fusr se inge ku in motko ke nunak lal mu God pa akinsewowoyacl uh. Tu el ke konacack na paye lah el ac eis fukah moul ma patpat pa oru el siyuk kusen siyuk se inge sel Jesus uh. El etu mu el akos nukewa ma fwack ke Ma Sumusla ac akos pac akwuk sahye ma mwet Pharisee elos oakiya.

Tu Jesus el akilen nunak lun mwet fusr se inge in motko mu el sumat, wo, ac ku pac in fulat nunak la. Oru Jesus el fahk nu sel mu in orala in fonlah moul lal – el enenu in som kukakunla mwe kasrup nukewa lal ac sang kasru mwet sukasrup.

Mwet fusr se inge, tuku fahrengreng atacl, pusrkweack nunak lal ac lumahl ke el tuku nu yurin Jesus. Mwe kasrup lal oru fulatwack nunak lal, ku pac elan tia lohacng nuke enenu lun mwet ac fungfungla nuke mwe kasrup lal. Na oru tukun Jesus el fahk elan som kukakunla mwe kasrup lal, el tohtuluklac, likinsacela ma ac ku in sang mwe insewowo ac moul ma patpat el ke in eis ac.

Kut orekmakin fukah mwe insewowo ma kut eis sin God uh? Ku kut ku in fulweack mwe kasrup lasr pa nuke stosa soko, lohm se, acn se sesr ku orekma lasr nuke sripac lal, mea kut ac oru? Fisracsr kut in motko ku in fahklah tu in oraclah pa ac elyah uh. Kapin mwe nunak uh pa in tia nunak ku sramsram mukewena a in ahkfasrye ma kut srumun uh, na ac ku in fohnla lulalfongi lasr uh. Oana ke James el fahk uh, “Oapana lulalfongi uh: el fin mukena ac wangin orekma wi, na lualfongi sac misa.” (James 2:17)

Saturday (3/12) Sifac: Ma Yohk Sripac Ke Luhlahlfongi

Kunokon

By Surleigh Y. Tara

Saturday March 12 2016
Sifac: Ma Yohk Sripac Ke Luhlahlfongi
Mwe Read: Luke 16:10-14

Surleigh Y. Tara

Pa inge sie mwe luti lun Leum Jesus ke yohk sripac ke lulalfongi.  Mwe read se inge ma tafeyacn akkuteyac se kac mwet tutafpo usrnguck se. Mwet tutafpo se inge el oaru in luhmahlah in oracllah in puhs kawuk lal in use ma wo ma e tufwa sikyak nusel tukin mwet kasrup se inge tilac orekma kuhnuhl. Oaru se lal inge pa Leum Jesus El sulkakin nusin Mwet Tuma Lutlut inge in loacng nuke. Paye la sopoklot lun mwet tutafpo se inge tia wo tusruk oaru in lumahllah in orani mwet kawuk pa akilenyuck ke fwak se inge uh.

Na pa Leum El sifwil pac tafwela in fwak lac mwet uh enenu se na in oaru nuke ma srisrik uh meet. Meyen wangin sripac in suk ma yohk uh koflah in liacung ma srisrik.  Elos fin tia ku in lulalfongiyuck in karingin mwe kasrup na e fuka nuke mwe kasrup paye uh?  Mwet uh tia kuh in kulansapuh leum luo. Nunak lalos uh tia ku in paye nuselos kewa. Elos e epacl nusin sie ac kuh pacna in srangesr long kahs nusin ma se ngiac. 

Elos tia kuh in kulansapu God ac mwe kasrup lun faclu. Elos fin kulansapu God, na elos enenu in etu lah ma nukewa, God pa in tuku meet uh.  Elos in tia filiyac in oasr ma tuku meet liki kulansap lalos nusin God uh. Elos suk in loacng nukac tuh na, God pa oracllah mwe kasrup lun faclu.  God El God lemta se ac El tia lela in oana sie ma tuku meet Lukel.  Mwe kasrup lun faclu uh tia apkuran nusin God, tusruk ke sripen sriklac lulalfongi lalos pacnacn elos ku pacna in epacl nusin ma sayen God. Ma inge pa use kasrkuhsrak nusin God uh. 

Nusesr misenge, kut in kalem kac la enenu kut in oaru nuke ma God El pangon kut in kulansap nukac uh. Kut in oaru nukac ma srisrik in pa sang tuhfwekutlac in akola nuke ma yohk suc e fwa tuku. Pacl puspus kut srike in orekmakin kulansap lasr nusin God in oakiyac kasrpacsr in ma wo nusesr suc ma tia fasr fwal nuke akwuck ac kolyuck lun God. Pus mwet kulansap orekmakin kulansap lalos in sang use enenu lalos sifacna in sruhkuhlos nu lung suc ma tiana akfasrye akwuk suc ma God El oakiyac kut in fwasr kac. Pa oru kut enenu in sulaclah in kulansapu God meet liki ma nukewa ac in tia lela mwe kasrup lun faclu ku enenu lasr sifacna uh pa in yohk ke kulansap lasr uh. Kut enenu in kahingkin lungse lasr sifacna ac in suk meet God ac in fasr tukin akwuck ac kolyuck Lal. 

Friday (3/11) Sifac: Luhlahlfongi ac Sukohsohk

Kunokon
By Kenye Belcourt

Friday March11 2016
Sifac: Luhlahlfongi ac Sukohsohk
Mwe Read: Galatia 5:1-13

Kenye Belcourt

Kulo ac Kaksakin Leum God Fulatlana lasr meet liki pa Nga tufwa fwakak ke kas wolana nu sesr in Lon ac orekmakin nuke moul in Lulalfongi lasr u.

Me read se inge pusren letter lal Paul nu sin met Galatia su el simis in akkeyaclos ke nikanla lalos ke Lulalfongi paye ac oiyen moul paye lun sie met Christian. Paul el akkalemye la, Ke sripen Christ kut met sukosokla, ac nikmet Lela kowos in sifilpa folokla nuke moul lun met kos. Ac Lela kowos su nunku mu Akos Ma Sap uh pa me aksuwosye kowos nu sin God u, a tu kowos sefanna srikowosla liki Christ. God el aksuwosye kut nu yorol ke Lulalfongi lasr u, ac kut fwa eis Ku ke Ngun lun God in kasrekut. Ke kut kupasryang nu sin Christ Jesus, wangin sripen ma sap ke kosraclah lun sie met Christian, a ma yok sripac u pa Lulalfongi na, su Orekma ke lungse. Ke sripen Christ, pangonyuk kowos nuke Sukosok, tusruktu nimet oru Sukosok lowos in Lela lung lun ikwac in leum fowos, a ke Lungse, kowos in kulansupu sie sin sie.

Kena sripen Lulalfongi, kowos nukewa tulig nutin God ke kowos ma sefanna yurin Christ Jesus.
Kulo.

Thursday (3/10) Sifac: Luhlahlfongi Yohk Kuh Kac

Kunokon

By Kavika Abraham

Thursday March 10 2016
Sifac: Luhlahlfongi Yohk Kuh Kac
Mwe Read: Matthew 7:24-29

Kavika Abraham

Mwe read se inge sramsramkihn yohk ke oiyacn orekma lun luo mwet suc muhsahi lohm u..Fahk muh el suc ma long kas lal ac akos el oana sie mwet lalmwetmwet suc muhsahi lohm sel fin yot u suc ma af,eng,kuh fine sronot upa tia kuh in kuhnahoslah ac el suc ma long kas lal inge ac tia akos el oana sie mwet lalfon suc muhsahi lohm sel fin puhk u suc ma af,eng ac sronot fisrasr in kuhnahoslah.

Lela nu sik in sifana etuh lah kut oasr oyac ke moul in lulalfongi lasr u,lela nga ac kom in tuna kuh in long kas lun God inge ac etuh in akos,kut in tiana munas in sruhflah ke mwe sruhf nukewa suc ma tuku in fungul kuht ke moul in srike lasr..Lah pia sulala lom misenge u lah ko oana mwet muhsah lalmwetmwet se inge in long ac akos kuh ko oana mwet muhsahi lohm se ma lalfon panang lohm sel fisrasr in kuhnanuclac..Lela tuh kowos in tu kuh ke lulalfongi yohk lowos an.

K.Abraham

Wednesday (3/9) Sifac: Luhlahlfongi Yohklacna

Kunokon
By LM Skipper Ittu

Wednesday March 9 2016
Sifac: Luhlahlfongi Yohklacna
Mwe Read: Isaiah 55:1-6

LM Skipper Ittu

Sifwil paing kowos nuhkewa! Sifac se lasr nuh ke Wednesday se inge pa "Luhlahlfongi Yohklacna," oasr in Isaiah 55:1-6. Isaiah el sruhmuhn ke pahkoten yohklana luhn Leum God nuh sin tuhlik nahtuhl Israel, elos finne tiac fahsr fal nuh ke ma luhngse lal. Elos in sa auliyak ac arulacna luhlahlfongi yohklacna ke Leum God lah El ac fah kitaclos, sang molin orekma lalos, ac oruh sie wuhleacng kawihl nuh selos. El ac oruh tuh elos in leum fin muhtuhnfacl sahyac oacna ke El tuh wuhlelah nuh sel David, pahpah mahtuh tuhmalos. Oacyacpac muhtuhnfacl ma tiac etaclos meet ac fah weluhloslac. Ac Leum God El ac fah sang suhnak ac wolacna nuh selos. Ohinge, elos in sokol ac pruhe nuh sel ke elos srackna kuh in konaclack. Mwe luti se inge kahsre kuht in suhlaklak auliyak ke tahfonglac lasr ac sokol ke kuht srackna kuh in konaclack; tuh pahkoten luhn God ac ma uh tui ke Nguhn Muhtahl ac utucklac liki facluh; ohinge, ma koluk muhkena pa oasr facluh. Kuht in arulacna luhlahlfongi yohk ke pahkoten luhn Leum God ac suhnakuhnuhl pal e nuhkewa. Ke kuht oruh ohinge El ac fah oacyacpac akinsewowowye kuht.

Tuesday (3/8) Sifac:Orekmakinyen Luhlahlfongi

Kunokon

By Joyleen Steven

Tuesday March 8 2016
Sifac:Orekmakinyen Luhlahlfongi
Mwe Read: Soakas 22:1-4; 23:3-5

Joyleen Steven

Ngan wi PA kaksakin God fulatlana lasr ke moul luk ku lasr nukewa ne ke pal SE Inge , a ke pang lal nusik in ku in tafela kas lal ke Len SE Inge.

Kas in luti, akkeye, a akasmakinye kut ke moul in lulalfongi lasr pal nukewa pa inge. In oana ke me read se lasr inge akkalemye u, Leum God El lungse kut in sulala Ela se ma wo a liki kasrup, pa ingan ma el ke kut in asr ka pal nukewa, kut in sokol met liki ma nukewa na Ella fa akinsewowo ye kut ke moul lasr. El oayapa akkalemye ke me read se inge mu asr mase mwet kasrup a mwet sukasrup u oana sie ka, pa elos kewa orekla sin Leam God, panang El ke kut in tia kemkatu la in suk me kasrup lasr u mulkunla la El pa orala ma nukewa nusesr u. Fwin yok lulalfongi in kut Ela fa akinsewowoye kut kais sie ke inkanek lasr u, a kut a tia kemkatu la in suk me kasrup lasr u. Kom fin akfulatye Leum God a inse pusisal na kom a fa kasrup. Pa ingan ma El ase nusesr in kasre kut ke moul in lulalfongi lasr u, kut in sokol meet in ma nukewa tu El pa inkanek sefana nuke enenu lasr pal nukewa.

Me luti se inge tuku nusesr in sifil akasmakinye kut la kut nukewa masefana in El, a lela kut in sang nusel me elya lasr u nusel pal nukewa a etu la El mukena pa inkanek lasr u, me insewowo nukewa ma asr yorosr kais sie lela kut in etu la ma ingan nukewa masel mwe tia masesr kais sie. Akfulatye Leam God na Ela fa akinsewowoye kom ke moul lom falu. 

Monday (3/7) Sifac: Luhlahlfongi Ke Mwe Kahsruhp?

Kunokon

By Decns Tulpe Danny

Monday March 7 2016
Sifac: Luhlahlfongi Ke Mwe Kahsruhp?
Mwe Read: Psalm 49:1-6, 16-19

Dcns Tulpe Danny

Ngac wi mwet nukewa in sang kulo nusin God Fulatlana lasr ke karinginyuck Lal na sesr ne ke pal se Inge. Oayapa in pain kowos nukewa. Mwe lutlut lasr na ke Monday (03-07-16) suc fwak muh,"Lulalfongi Ke Mwe Kasruhp?"Ac book lun Psalm 49:1-6 ac tafelah neke 16-19 an pa akuteyac ke mwe lutlut se nu sesr inge. Sifa se inge el sruhluhkihn kisen siyuk se na sum ac nga lah oana kut lulalfongi ke mwe kahsruhp?Top ma fal nuke siyuk se inge pa tuku ke Psalm soko inge.Suc ma lun tulik natul Korah,suc akkalemyeyuck kalem nu sesr nukewa in tia lulalfongi ke mwe kasruhp.Lela tu mwet nukewa faluh na wiyucyang ac kom in porongo mwe luti inge. Na ip se meet ke me read uh srike in akkalemye lah oana sie mwet kasruhp ku mwet suhkahsruhp ku mwet fuhlact ku mwet srihsrihk in tia sangeng ke pal in ongaiyac.Ke ip se ahkluo ke mwe read uh el srike in luti mwet uh in tia suhpacrlac sie mwet el fin kasruhpi ku mwe kahsruhp lal yokelik.El fwa tia ku in us ma inge el fin misa.Elac tufwa weang pana mwet mahtuh lal somlah met ac som nu in losr ma patpat.Ke sripa inge kut in tia nunku mu mwe kasruhp lasr fin faluh kuin sang molela moul lasr uh.Kut ac nana misa na liki moul lasr fin faluh uh. Lela ngan sifil Kaksakin God Fulatlana lasr ke lungse yoklana Lal nasesr.Ac oayapa ke mwe lutlut wowo Lal na sesr ac kut mwet uh in esam na Kas Kuhlacna Lal inge.

Sanri (3/6) Sifac: God Kuhlacna

Kunokon
By LM Quardus Esau

Sunday March 6 2016
Sifac: God Kuhlacna
Mwe Read: Mark 9:14-29

LM Quardus Esau

Nga lungse sifil eis pacl se inge in sang kulo kaksakin God Fulatlana lasr ke moul wowo ac ku lun mano ma oasr yorosr. Paing kowos nukewa!

Nga lulalfongi la kowos ac akilen la kut inge sroang nuke sie Quarter sasuc ac Unit sasuc.

God Kulana! Pa inge sie pacl ke moul lun Jesus ma El akkalemye ku lulap Lal ac pa pac inge sie pacl ma kalem sriklac lun lulalfongi lun mwet tuma lutlut lal.

In oana ke me read se inge akkalemye u, oasr papa se ma oasr tulik mukul se natul ma oasr ngun fokfok in el. Orekma lun ngun fokfok inge akkolukye moul lun tulig se inge. Pus pacl moul lun tulik se inge apkuran in misac ke sripen el atuyang nu in ee u, ku finne nu inkof u. Oinge papa se inge srike in suk kasru lal yurin Jesus.

Ke el us tulik se inge som sokol Jesus, Jesus El wangin. Kalem mu pa inge pacl se Jesus, Peter, James, ac John som nu fineol u te Jesus El eklac ah. Na oru ke Jesus El srakna wangin, papa sac asang tulik sac nusin mwet tuma lutlut lula u. Mwet tuma lutlut inge srike in sisla ngun fokfok ke tulik sac tu tiac ku. Oinge sramteak akukuin inmasrlolos ac met luti masap. Tusruktu ke Jesus El foloko ac akilen akukuin inge, El siyuk sin mwet tuma lutlut Lal sripen akukuin se inge.

Ke Jesus El konaack la ma ke sripen mwet tuma lutlut Lal inge kofla sisla ngun fokfok ke tulik sac, El fwak la ma ke sripen srikla lulalfongi lalos. Oinge El eis tulik sac, kai ngun fokfok kacl u, na ngun fokfok u tifoklac lukwel.

Mwet tuma lutlut lun Jesus siyuk sel la efu elos kofla in sisla ngun fokfok inge. Jesus El akkalemye nu selos la, wangin ma ku in sisla ngun fokfok sayen pray mukena.

God El kulana! El ku fin ma nukewa. Kutena oiyac ma akkolukye moul lasr, kut enenu in pray nusel ke lulalfongi lasr. Fin wangin lulalfongi lasr ke God, me siyuk lasr ac tiac pac ku in topukyuklac.

Kuloh nusin God ke me lutlut se inge suc liksreni na akkeyeyu ke lulalfongi luk nu Sel.