Sanri (1/31) Sifac: Sifil Moul

Kunokon

By Rev. Takeo Likiaksa

Sunday January 31 2016
Sifac: Sifil Moul
Mwe Read: John 11:38-44

Rev. Takeo Likiaksa

Ouiyen misa, pukpuki ac tatamas akilenyuk fin faclu in pacl sac finne in pacl inge pac. Kalem ke mwe read se inge. Sou ac mwet kawuk tukeni inkul lun mas uh. Oasr nunak in nikanla, oelah, fosack ac ku pa in kisen siyuk lah efu in ouinge, ac efu in mwet sacn ku sou sacn. 

Pa pacna inge ma sikyak nu sel Mary ac Martha in Bethany. Mwet kawuk se lal Jesus misa. Ac misac lal sikyak tu wangin ono in sang unwaclla. Sap ah som sonol Jesus akkalemye ma sikyak inge, tu el tiana tuku in fal nuke pacl. Misac tiana sanel. In oana fasin lun an we, manol Lazarus piplac ke nunuk ac pukpuki el. Len akosr toko Jesus el tuku.

Mary ac Martha lut lah efu Jesus elan pahtlac in tuku sonolos. Wangin pac Ma Sumusla fahk lah mea nunak lal Lazarus ke pahtlac lal Jesus in sonolos. Tuh mwe read uh fahk lah Lazarus el long ke Jesus el pangnol nu inkulyuk lal. El ilme tu mahnol srak piplac ke nuknuk sang pwela manol ah. Jesus el akmoulyaclack.

Saflaiyen ma nukewa ma fwackla ku orekla, akwuk lun God pa yok sripac uh. El akmoulyaclack Lazarus oana ke sifac uh fahk uh – “Sifil Moul.” Ma sikyak inge akkalemye lah paye oasr ku lun Jesus ke moul lasr mwetu, ke misac lasr mwetu ac oayacpa in nunak munas ke ma koluk lasr uh. Oana ke el fahk, “Nga pa inkanek ac paye ac moul: wangin mwet som nu yurin Papa fin tia ke nga (John 14: 6).

Weang pac lah ke sap ku pweng ke mas lal Lazarus sonol Jesus, el fahk mu mas ku misa se lal Lazarus inge ma in nahwela ku akkalemye ku lun Leum God ke moul lasr mwet uh. Kalme sik in wi kowos nunku ke ma inge lah paye akkwuk ke moul lasr oan in poun Leum God. El etu mea wo ac fal nu sesr. Sang nu sel El fah kasre kom ke enenu nukewa lom.

Saturday (1/30) Sifac: Jesus El Tuhng

Kunokon 

By Surleigh Y. Tara

Saturday January 30 2016
Sifac: Jesus El Tuhng
Mwe Read: John 11:28-37

Surleigh Y. Tara

“Jesus El Tung” pa sie verse ma fototo omeet ke Bible uh. Verse se inge tia fototo mukena, kut in wi kalem kac koanong iyacn verse se pac inge. In pacl lun mwet Greek in pacl soh, oasr luhmahlah lalos lac God El tia God suc ma munas nunak in pakoten la. Na verse se inge pa ase kalem lasr mwet lulalfongi misenge lah, yohk pakoten ac tung insiacl God ke lalfon ac mukuikui in nikin lun mwet lulalfongi uh.

Mwe read se inge akkalemye lac sap soko tuku nusin Leum Jesus lac Lazarus el mas ac keok. Kut kalem kac lac Leum Jesus El akfasrye ma Kunacl su ma God Papa El supaclma nuke ke pulan pacl se in eis pweng se inge. Leum El akfasrye ma kunacl inge saap mile luo kuh tolu liki acn se ma Lazarus weang tamtael luo, Mary ac Martha, muta we. Pweng se sulpac tuku lac Lazarus el misac.

Ke pweng inge tuku nu yurin Leum, El tiana tui in akfasrye kulansap lal nusin God Papa. Tukin Lazarus el misa ac pukpuki lusen len akosr, Leum Jesus El tufwa som in topoklah ngusr se inge ke sripen Mary, Martha, ac Lazarus elos mwet kawuck wowo lun Leum. Ke mwe read se inge, kut kalem kac lac Leum El som te akmoulyelulack Lazarus suc ma mwet suc oasr inmasrlon ma sikyak inge arulana fwefe lac ke mwenmwen sakurik lun Leum inge.

Nusesr misenge in kalem kac lac yohklacna pakomuta lun Leum God nusin mwet uh. Leum El sifwil filiyac akwuck se nusesr in fasr kac lah kut in loang nuke kulansap lasr nusin God Papa meet in oana ke mwe read se inge akkalemye nusesr.  Leum Jesus El sislah acn wolana Sel inkasrao in tuku, misac, ac moulyak in ase moul wolana se nusesr. Kut in tiana fulwelah kain in mukuikui sahyac in sang fungul kulansap lasr nusin God suc ma yohk pakoten Lal nusin mwet uh nukewa.  

Kulo.

Friday (1/29) Sifac: NGA Pa Moul

Kunokon

By  Lipan Welly

Friday January 29 2016
Sifac: NGA Pa Moul
Mwe Read: John 11:17-27

Lipan Welly

In wi mwet nukewa in kaksakin LEUM GOD lasr ke akwuk wolana Lal nu sesr. Sifil eis pacl uh in akilen ac paing mwet nukewa. God bless.

Mwe lutlut se inge arulacna aketeye kalem lah Jesus Christ pa Mwet Lango su God El tuh wulela kac, oayapa lah el Wen nutin God, ac elos fah ku in eis moul fin oasr lulalfongi lalos in El (John 20:31). Mutaweyen book uh fahkak kalem lah Jesus pa Kas kawil lun God. John el srumun yokna ke mwe kite lun moul kawil in Christ, sie mwe kite su mutawaek inge, ac su ma nu selos su akilen tuh pwaye Jesus el inkanek, pwaye, ac moul.

Pa inge tahklac lun chapter singoul sie: ikaklah ke (11:1-4), na fah akketeyuki sramsram ke miracle se Jesus El oru nu sel Lazarus tuh elan sifil moulyak ke ip akosr. Ip se meet an pa Jesus ac mwet tamalutlut lal ah, sramsram inmasrlolos (11:5-16); Jesus pa akmoulyauk mwet ac sang moul (11:17-27); Jesus el sonol Mary ac wi mwet tata mas (11:28-37); Jesus El akmoulyelak Lazarus (11:38-44). Aksafyeyuklac chapter se inge ke pwapa sulallal in uniyac Jesus (11:45-57).

Ip se aktolu inge mutwaek ke Jesus el sun acn we, el lohngak lah Lazarus el pukpuki len akosr tari (v17). Martha el fahk nu sel Jesus, “Leum, kom funu oasr inge, mukul se wiuk inge lukun tia misa!. Tusruktu finne inge pacna, nga etu lah God El ac sot nu sum kutena ma kom siyuk sel.” Jesus el fahk nusel Martha lah Lazarus elac sifil moulyak. Martha el topuk, “Nga etu lah el ac sifil moulyak ke len safla.” Jesus el fahk nu sel “Nga pa akmoulyauk mwet uh liki misa nu ke moul. Kutena mwet su lulalfongi in nga fah moul, el finne misa. Ac kutena mwet su moul ac lulalfongiyu fah tiana misa. Ya kom lulalfongi ma se inge? Martha el topuk, Aok, Leum nga lulalfongi lah kom pa Christ Wen nutin God, el su God El wulela kac mu ac tuku nu faclu (vv21-27).

Jesus El akkalemye na paye ku Lal ke El fahk nu sel Martha “Ma wiom e sifil moul yak”. Oana el supu nuselos in kunausla tempul se inge, ac in len tolu El fah sifilpa musaela (John 2:19). Jesus el akkalemye pac nusel Nicodemus lah sie mwet el fin tia sifil isusla, el koflana liye Tokosrai lun God. Jesus pa inkanek, ac pwaye, ac moul; wangin mwet ku in som na yurin Papa efin tia ke El (John 14:6). Jesus El sifil akkalemye lah el pa kof in moul nu sin mutan Samaria se. Kalem nu sesr kewa lah inkanek in moul soko ma LEUM GOD El wulela kac (Gen 3:15) pa Wen Sefanna natul “Jesus Christ”.

Mwe lutlut se inge akkalemye lah Martha el lulalfongi lah Jesus pa mwet lango LEUM GOD El supacma oana El wulela kac (v27) tusruktu efin kut liye ke Jesus El fahk in ituklac yok se ke kulyuk (v39), Martha el fahk, “Leum, ac arulacna koluk fohlo, meyen el pukpuki len akosr lac!”. Mwe lutlut se inge tuku in akesmakinyekut lah kut kuh in fahklah ma simlac ke Bible uh oana Martha, “Aok Leum nga lulalfongi lah kom pa Christ Wen nutin God”, tusruktu efin kut tia moul kin ma kut fahk inwelusr uh e us kut lac nuke ongaiyac mukena. Arulacna fisrasr kut in fahklah uh upac kut in moul kin mah kut fahk uh.

Kalem ke mwe lutlut se inge lah Martha el tiana liye fahk se lun Leum Christ inge lah “Nga pa akmoulyauk mwet uh liki misa nu ke moul”. Funnu oasr na paye sel fahk se lal Jesus inge lukun wangin fahk lal lah koluk lac folin mas sac. Wangin misa yurin LEUM GOD, “Nga pa Moul”. Mwe lutlut se inge use mwe inswewowo na saflah se ma LEUM GOD El na akoo nu sin mwet nukewa su forlah liki ma koluk lah ac lulalfongi in Wen sefanna natul.

Akwuk kuh miracle ma Jesus El orallah kut lutlut ke inge use nusesr mwet lulalfongi nukewa in tia tui in fahkak Pweng Wo se inge lah wangin na paye misa yurin Leum. Ma kunacsr nukewa mwet ma eis tari mwe insewowo se inge in pray kaclos suh sonna forlah liki ac akkeyalos in forlah suk Jesus ke pacl se inge. Kut nukewa arulacna kalem ke mwe lutlut se inge lah Jesus pa inkanek soko fanna nuke moul ma patpat. Oar moul yorol. Kulo kaksakin LEUM GOD ke mwe lutlut tuku ke pacl se inge in akkeye kut nukewa nuke ma El akolah nusesr kewa. Paing mwet nukewa ac akkeye kowos kewa.

Thursday (1/28) Sifac: Nuhke Wolacna Luhn God

Kunokon

By Victor Melander

ThursdayJanuary 28 2016
Sifac: Nuhke Wolacna Luhn God
Mwe Read: John 11:1-6

Victor Melander

Sifac nah mesengi uh: Nuhke Wolacna Luhn GOD. Mwet liki mah nah kewah nga lungse sang kulo nuh sin GOD ke moul lasr kewah. Ke kut sifilpac oasun ke mwe lutlut lasr uh.

Sie lumac kut tia kalem kac: Mahna kalem se lac Jesus El lungse Mary, Martha, ac Lazarus. Ke pacl se Lazarus el mahs apuran in misac. Arulana kalem lac Mary ac Martha ke Jesus Elan unwelac ke pacl se srackna moul ac.

Jesus El long lac Lazarus el mahs apkuran in misac. Ke tuhptuhpan Lal tukun len lou El tufwa som, Mary ac Martha ke etu lac efu ku El tufwa som ke tulig weal tal misac len akosr tari. Elos tia kalem ke sripe. Plan LUN GOD sie nah. Jesus El akmoul yaclack Lazarus.
 
Sripe uh pah kalem ke Sifac lasr u: Nuhke Wolacna luhn GOD, ac oayacpac in akkeye lulalfongi lun Mwet tumalutlut Lal, oayapac Mary ac Martha, ac Lazarus, ac oayapac na sesr. Jesus El lungse pac in kalem sihn mwet uh lac El pah Moulyak ac Moul.

Ke sripe se pana nge Sanhedrin suk in unilyac. Kulo ke pacl lasr uh. Pah inge mah nga ku in sang kasruh mwe lutlut lasru.

Wednesday (1/27) Sifwa: Lohsr Lisyucklac

Kunokon

By Dcns. Havelyn & LM. Skipper Ittu

Wednesday: January 27, 2016
Sifwa: Lohsr Lisyucklac
Mwe Read: Matthew 4:12-17

Dcns. Havelyn Tosie

Mwe luti u sikyak ke pal se Jesus el som nu yen mwesis u len 40 a fong 40, kalem mu pa inge pal se Ngun kolollla nu yen mesis ac El kutangla mwe sruhf puspus ma setan el srike lan kutangula ka. Jesus, El long pweng ke srohu lal John in presin, panang El som a mutawaak in oru orekma Lal in tafwela na orekma ma John el oru sonna safla. El som nu Galilee, tusruktu, nien muta Lal, El akwuki in an Caperneum, sie siti srisrik siskan luhluh Calilee, ke an lun Zebulun a Naphtali. Fwak mu ma inge sikyak in akpayei kas ma palyeyuk sel Met Palu Isaiah su tu palye meet fwak oinge "Met Zabulun a Naphtali, elos mwet losr a wangin moul yorolos, elos liye takak lun fwaht u." Oinge kalem tuku nu fwelos a sisla losr u lukelos ke pal se Jesus el forfor a oru luti Lal we. Kas lun God pa kalem se inge nu sesr a kut in orekma kin oana ke Met Lango lasr Jesus El kena kut in oru.

*******

LM. Skipper Ittu

Sifac se inge sikyak ke Period Aktolu ke moul luhn Jesus, suc pahngpahng Period In Luti Meet Galilee. Tukin John Baptist el kauli in presin, Jesus el tuh finsrakin Elan mutwacwaeak ke luti Lal in acn Sel sifacna, Nazareth. Tusruktu, mwet we sruhngacl pwacnacng El som nuh Caperneum in oru luti Lal we. Ohinge, ahkpwayelah pahluh lal Isaiah in Isaiah 9:1-2, suc fahk lah Jesus Elac kahlwem se nuh Zebulun ac Naphtali, acn suc Caperneum el oan we. Jesus El fahk lah mwet muta in lohsr ac ngunin misac liye sie kahlwem luhlahp, suc tololosyak tari. In oacna ke John Baptist el oru, Jesus El oacyapa kafwe mwet uh in forlah liki ma koluk lalos tuh Tokosrai luhn Kusrao apkuran mwe. Mwe luti se inge kasrekut in wi sokol Jesus, suc pa kahlwem se inge. Tuh ke Jesus mukena, ma koluk lasr oayacpa lisyucklac pwacnacng kut kuh in wi eis moul ma patpat. Ohinge, moul lasr fin facluh enenu in kalmweak moul lohsr luhn mwet uh, tuh elos in kuh in suk pac Kahlwem se inge. 

Tuesday (1/26) Sifac: Moul NweTok Ma Pahtpaht

Kunokon

By LM Tolenoa Kilafwakun

Tuesday January 26 2016
Sifac: Moul NweTok Ma Pahtpaht
Mwe Read: Isaiah 25:6-10

LM Tolenoa Kilafwakun

Kulo kaksakin God fulat lasr ke moul wowo ac karunginyuk Lal kut pulakin in Len nukewa ke moul lasr,oayapa ke kahs in moul El supama in akasmakinye kut in karungin moul lasr.

Sifac lasr uh fahk muh, "Moul ne tok ma pahtpaht. " Ke MWe read se Inge, fahk lah Leum God El Ahkoo sie Kufa ke mwe mongo na yuyu ac wain na wowo. El ac fah sa pac in moklelah Pukunyeng in ahsor su sunyac mutun Facl nukewa ac El ac fah oayapa kunaoslah misac ne tok. El ac fah eelah sronin mutun mwet uh. Su El inge El God lasr kut filiyac lulalfongi lasr nukewa in El wi engan ac insewowo lasr meyen El ac molikutlac.

Isaiah el fahkak pusren Leum God ke sie Kufa Mutal lun Leum God, (Kufwen Marut lun Lamb). Sie pusren Pahlu na wowo su mwe engan ac insewowo nu sin mwet nukewa, Gentiles ac Jews ke sie mwet Lango su Leum God El ahkoo sie kufa nu sel. Ac oru invitation lal nu sin mwet nukewa in wi nu ke kufwen macrut se inge kufa se Inge ahkfulatyeyen kutangyuklac lun misac ku ma koluk ac ahkfulatyeyen moul misla ac engan yurin God ma pahtpaht. Ke Book lal Matthew sapta 22 ac fus 4 fahk muh--" cow mukul wowo ac cow fusr ma ahkfatyeyuk anwuki tari ac ma nukewa ahkola, Fahsru nu ke Kufwen Macrut uh". Sulpac Matthew 8 fus 11 fahk oinge, "mwet puspus ac fah tuku kutulap me ac roto me, ac muta yorol Abraham, Issac,ac Jacob ke pacl in kufa in Tokosrai lun Kusrao." Ahkalemye lah God El ahkeye pweng wo ke molela in sulkakinyuk nu ke sroasrik nukewa Faclu a in tia sifil nu sin mwet Jew mukena. Men fahk kalem in Isaiah 25:9 " payena El inge El God lasr,kut filiyac lulalfongi lasr in El men El molikutlac.
Mwe read se inge fahkak ke ahkoo lun Leum God nu sin mwet uh lah El ac ikasla mutun mwet uh in Ku in akilen inkanek lalos nu ke moul, akupasri lun mwet uh nu sin Christ ke sripen sakseng in sekin inkanek lalos nuke moul. Elos in wi Christ misa ac welul moulyak ke sie moul sasu ac misla yurin God. Leum God El ac fah eela sronin muta nukewa su ac fah wangin misa, wangin ahsor, tung ku keok men ma nukewa meet ah wanginlac...Fackyuk 21:4.lela kut in arulana engan ac insewowo,lela kut in kaksakin Fulatlana Lal, Tu pacl in Macrut lun Lamb pa inge, Mutan kiacl el ahkola, itukyang nu sin mutan sa nuknuk linen nasnas ac saromrom elan nokomang...Fackyuk19:7,8.,nuknuk linen se inge pa-- orekma wo lun mwet lun God. Na mutan se ac macrut nu sin Lamb inge pa....Jerusalem Sasu,City Mutal Su Oatui Inkusrao me yurin God....Fackyuk 21:9,10.

Mwe lutlut uh ase sie petsa nu sesr in liye ke Len lun mwet lulalfongi yurin God.kut in long akwoyac nu ke len se Inge lah ikaklah invitation nu sin meet nukewa, tusruk tu Elis na su simmla elos oasr in book in moul lun Lamb pa ac ku in wi ilyak nu in City uh....Fackyuk 21:27.Fahk pac muh insewowoelos su ohlla nuknuk lalos in nasnas elos in ku in mongo ke fahko ke sak lun moul ac wi ilyak nu in City uh.....Fackyuk 22:14.
Kulo ma lahp ac lela kut in oru kaksak lasr nu sin Leum God,Sang kulo nu sel,tu. el wo ac Lung Kulacng Lal oan ma pahtpaht..Psalm 106:1

T.Kilafwakun

Monday (1/25) Sifac: Luhlahlfongi Finne Ac Sun Misac

Kunokon 

By Dcns. Tulpe Dizon

Monday January 25 2016
Sifac: Luhlahlfongi Finne Ac Sun Misac
Mwe Read: Psalm 56

Dcns. Tulpe Dizon

Kaksakin God Fulatlana lasr suc kut nukewa pulakin moul wolana suc El acse nusesr ne ke pal se Inge. Lela tu moul lasr in esam Leum God in pal na kewa in moul lasr.
Me luti lasr na ke Monday(January 25 2016)"Lulalfongi Finne Ac Sun Misa"suc tuku ac akuteya na sesr ke book in Psalm 56

Psalm soko inge ma lal David,suc akkalemye ke "Sie Pre In Lulalfongi Ke God." Tu sikyak tukun mwet Philistia sruokol David in acn Gath. David el tu pang nu sin God ke mwet lokalok lal suc elos ukacl in tu unilya. Ke pal se inge David el pula sahngeng tuhsruhk tu ma se el tiana mulkunlah pa el filiya lulalfongi lal in Leum God. El finne ac misa el etu lah moul lal oan in poun Leum God. In folokin lung kulang lun God nu sel David. David el fwak mu el fwa oru kisa in fwakak kulo ke molela lun God nu sel.

Tiana eklac nu sesr kut in filiya lulalfongi lasr in Leum God tu El pa karingin ma nukewa sikyak nu sesr uh.

Ac Kaksakin kas lun Leum God nusesr.

Sanri (1/24) Mwe Read: Kof Nuhke Wain

Kunokon

By LM Quartus Esau

Sunday January 24 2016
Mwe Read: Kof Nuhke Wain
Mwe Read: John 2:1-12

LM Quartus Esau

Kuloh nusin God ke moul wowo lasr kut ku in sifil alutluti ke kahs mutal Lal. Paing kowos nukewa! Sie me lutlut ma arulana yok sripac nusesr mwet lulalfongi in nunku kac ke sripen pa inge pacl se omeet ma wolana lun God akkalemyeyuk ke orekma lun Wen natul fwin fwalu. In oana ke akkalemyeyuck in mwe read se inge, pa inge mwenmwen usrnguk se oemet lun Jesus fwin fwalu. El ekulla kof nuke wain.

Mwe lutlut se inge sikyak ke Period Ak 2 ke moul lun Jesus fwin falu suc pangpang Period in Akmusrala. In pacl se inge, Jesus ac mwet tuma lutlut elos wi marut se orek in Cana lun Galilee. Ninac kiacl Jesus el oayapa muta we. Motkeyuck mu saap oasr kupasr fototo lun ninac kiacl Jesus nusin sie sin mwet ma marut inge. Pwanang ke pacl se ma lihsr wain u, el elyayak. El som nu yorol Jesus ac fwak nusel lah lihsr wain u. Jesus El topkol ac fwak mu elacn tiac isacl nuke elya inge, meyen pacl lal soena tuku. (Jesus El sramsramkin pacl ma fal mwet u in tari etu la El pa Christ).

Ne oinge, Jesus El sap nwekyucklac sufwa onkosr lun loomuh ke kof. Nwekyuck neke ngoasro u. Tukun safla nwekyac, Jesus El sap mwet kulansap lun marut uh utiyac kutu kof inge ac uslac nusin mwet se ma karingin kufen marut sac. Ke mwet sac eis ac ema, el akilen la wain inge wo liki na ma orekmakinyuck tari ah. Wain na wowo! El som nu yurin mukul se ma marut ah siyuk la efu el tiac orekmakin wain wowo inge meet na fin lisr fwa el orekmakin wain tiac arla wo.

Me lutlut se inge tuku nusesr misenge kut in sroukyac ku lulalfongi lasr ke Leum Jesus Christ. Ke sripen El God se, pwanwang El ku in oru mwenmwen usrnguk oinge u.

Saturday (1/23) Sifac: Kunohkohn in Akkeyelah Luhn Leum

Kunokon 

By Lucilla Solomon Talley

Saturday, January 23, 2016
Sifac: Kunohkohn in Akkeyelah Luhn Leum
Mwe Read: Luke 4: 16-24

Lucilla Solomon Talley

Ke Jesus el baptaisla tari infwal Jordon, fwak la El seseslana ke Ngun Mutal, a el som nu yen mesis El muta we len 40 a fong 40 Ke srifeyuk El ke sruf yok tolu El kutangla kewa Ouinge El folok nu yen sel Nazareth an su El matula we A som nu iwen lolngok ke len Sabath in alu, in oana pal nukewa el oru Ouinge itukyang  nu sel book lumlum su book lal Isaiah na El ikusla book sac a konaak an su fwakak sripa yok su El tuku nu fwalu ka in kulasupu met uh ka su fwak ouinge:

·      Ngun lun Leum God oan fwuk meyen  El mosrweyula in fwakak peng wo nu sin mwet sukasrup

·      El supweyume in sulkakin la mwet sruoh a fa sukosokla a mwet kun a fa sifil eis liyaten

·      In aksukosokye mwet su muta in keok a fwakak la pal sa tuku tari, Leum God el fa molela mwet lal

Jesus el lumani book sa a sang nu sin mwet liyaang, mwet nukewa su wi tukeni sa elos arla lut a fwefwela ke kas wo su El fwakak la pa ingan srupa yok su Papa tumal supalma nu fwalu ka Ouinge El aksafyela ma nu kewa a misa ke sripen mwetu a in ela  ma koluk lasr A som ahkoo in folok eis mwet wo su oru ma lungse lal.

Lela nu sesr mwet nukewa su lulalfongi la pwaye Jesus El Wen nutin God. Kut in kafweang in oru kulansap lasr nu Sel in suwos a pwaye ke insiasr kewa, ke nunkasr kewa, ke ku lasr nukewa nusel. Mwe read se inge akkalemye nusesr lah mwet in acn Sel sifwana sruhngacl ke fwahkack suwos Lal suc ma e tia eklac pac nusesr kewa. Kulansap lasr uh fin pwaye ac suwos ye mutun God, mwet lasr sifacna e kohpohtule ac sruhngac kut kac.  Tusruk in oana ke pusren Jesus nu sesr, Leum God El a fwa liyac-acn elos suc akos Ma Sap Lal nuke pacl se El tuku a eis mwet wo nukewa su akola sano tuku lal.

Friday (1/22) Sifac: Mwe Kite Nacsnacs Sac

Kunokon

By Lipan Welly

Friday January 22 2016
Sifac: Mwe Kite Nacsnacs Sac
Mwe Read: Matthew 5:21-26

Lipan Welly

In oana pacl nukewa, srui yohk in wi mwet nukewa, kaksakin LEUM GOD ke akwuk wolacna Lal. Lela lulalfongi, finsrak ac lungse lasr nu sin LEUM GOD in yokaclik in pal nukewa. Paing mwet nukewa ac God bless.

Mwe lutlut se inge mutawaek ke Ma Sap ak onkosr: nik kom akmas (Exo 20:13). Jesus El fahk ke (v17) nimet nunku mu nga tuku in kunausla Ma Sap lal Moses ac mwe luti lun mwet palu uh. Nga tia tuku in kunausla, a in akpwayei mwe luti lalos. Jesus El akkeye Ma Sap lal Moses ke akmas ac El fahk lah kasrkasruk lun sie mwet el oapana ke sie mwet el akmas. Ma koluk luo inge tukeni kuh in us kut lac na ke e in hell. Tuh inge nga fahk nu suwos: Kutena mwet su kaskusrak sin mwet lel, ac fah utukyak el nu ke nununku; el su fahk nu sin mwet wial, ‘Wangin sripom!’ ac fah utukyak nu ye mutun Un Mwet Pwapa Fulat; ac kutena mwet su fahk nu sin mwet wial, ‘Kom lalfon!’ fal elan fosrnga ke e in hell (v22).

Ke Jesus El fahk: tuh inge nga fahk nu suwos (v22); tia kalmac pa El eislah kuh sifacna oru ma sap Lal. Uh El akfonyelah kut in kalem ke Ma Sap God El oakia nu sesr. Ma Sap ak onkosr: fahk muh nik kom akmas; Jesus El luti nu sesr kut in tia kasrkusrak upac lac tuh pwen kut lac kut in akmas. Nunak in kasrkusrak lasr uh akkoluk yelah tari insiesr su lain Ma Sap in lungse Lun God. Lungse el tia oru ma sufal, el tia nunku kacl sifacna, el tia sa in mulat, el tia oakla ma koluk orek nu sel (1 Cor 13:5). Kut in oru kuiyesr nufon tuh kut in moul misla yurin mwet nukewa (Rom 12:18).

Un mwet se pangpang Pharisee elos readi ac etu ke Ma Sap ak onkosr: ke sripen elos tia akmas oru elos pangon muh elos mwet suwos. Mwet inge pacna pah kasrkusrak sel Jesus ac akkeye lah in anwuki El. Kasrkusrak lun sie mwet efin tia tui e kuh in sang kunaoslah akwuk lun sie sou, akwuk lun Church ac yohk na kapasr lasr nu sin LEUM GOD. Sifac se inge pa: Mwe Kite Nacnacs Sac.

Jesus El luti nu sesr ke vv23,24 fin kut akola in oru mwe kisa lasr nu sin God fin loang in kisa uh, ac kut esamak lah oasr ma sufal lasr nu sin mwet lasr, kut in filiya mwe kisa lasr sisken loang uh, ac folokla akwoyela inmasrlosr meet, na kut fah foloko ac oru mwe kisa lasr nu sin God. Ma se ma wo emeet in orek efin oasr elyah kuh koluk inmasrlon mwet luo pa in sa suk in kapsreni inmasrlulos orekmakin lungse kawil lun God. Kut e lungse fuka LEUM GOD efin kut srunga mwet wiasr? Mwet se fin fahk mu el lungse God, a el srunga mwet lulalfongi wial, el sie mwet kikiap. Tuh el tia ku in lungse God, su el tia liye, el fin tia lungse mwet lulalfongi wial, su el liye (1 Jon 4:20).

Nimet sulaklak in utyak nu in nununku in tukakin ma kom liye uh. Sie mwet loh fin utyak tukum in fahkak lah kom tafongla, na mea kom ac oru? Kom, ac mwet tulan lom, fin tia insese ke kutu ma, sifacna aksuwosyela inmasrlomtal, ac nimet sramsramkin nu saya (Pro 25:8-9). Fin oasr mwet akola in us kom nu ke nununku, kom in aksaye akwoyela in masrlomtacl meet liki komtacl sun acn in nununku (Mat 5:25a). God El lungse inse nacsnacs ma akolla in pacl nukewa in nunak munas nu sin mwet su oru koluk nu sesr. Jesus El tuku misa ac moulyak in ela ma koluk lasr nukewa, El nunak munas nusesr ke ma koluk lasr.

Mwe luti se inge sifil tuku in akasmakinyekut nukewa lah kut tia ku in sifacna aknacnacs ye kut lac sifacna, wangin ku lasr. Mwe kite nacsnacs uh tuku yurin LEUM GOD mukena, pa Jesus Christ. Kut enenu in forlah liki ma koluk lasr ac lulalfongi in Jesus Christ. Ngun Mutal El ac utyak ac aksuwosyekut nu yurin God Papa. Kut enenu in lulalfongi LEUM GOD lasr, likiyac finsrak lasr uh in El ac lungse El oana ke Mattew 22:37-40 fahk. Kupasr lasr nu sin God uh tuku ke Wen Sefanna natul su akkalemyeyuk in John 14:6 fahk muh: Nga pa inkanek, ac pwaye, ac moul; wangin mwet som nu yurin Papa fin tia ke nga.

Thursday (1/21) Sifac: Mwe Kite In Ahkkeyelah

Kunokon

By Hanna Alokoa

Thursday January 21 2016
Sifac: Mwe Kite In Ahkkeyelah
Mwe Read: Matthew 15:29-38

Hanna Alokoa

Mwet mas, mwet ul, mwet sukapas, a mwet nikin kaskas elos utuku nu yurin Leum Jesus in akkeyeyuklac. Jesus El akkeyelosla nofon ke ku su oan in El. Mwet u arulana lut a fwefwelac ke ku su Leum El orekmakin in akkeyeloslac.. Fahk mu elos kaksakin God ke ma inge.

Jesus El pangonma mwet tumal lutlut a fahk mu elos in use mwe mongo nacn mwet inge. Yok pakomuta lun Leum nuselos, meyen elos ukacl in liye luti Lal ke lusen len tolu lac ac elos sonna mongo.

Mwet tumal lutlut elos kisen siyuki sin Leum la, elos a konack fukah mongo ke an mesis se inge? Jesus el siyuk la mac oasr yorolos? Elos topuk mu lof itkosr a ik ekasr.

Tukin El eis ma inge a sang kulo nusin God ka. El kunsalik a sang nusin mwet tumal lutlut in kiteyac un mwet sac. Fahk muh asr kuom in mongo itkosr yolyak tukin elos kiteyac mokul 4,000 sayen mutan ac tulik.

Pal pus kut sun ma upac na kut sa na in liye upaciyen ma kut asr ka uh, a tiana liye ma kut lulalfongi God kac. Ke Jesus el siyuk sin mwet tumal lutlut a; el siyuk la mac asr yuruwos? El tena siyuk lah mac wangin yuruwos?

Mac asr yurum misenge? Etu la Leum God El asr yurum kom fin lela Elan muta yurum misenge .

Mwe luti se inge kasrekut in etu la God El kuin use mwe enenu lasr nukewa. Lah meac kut kofla nukac, kut in esam lah, wangin ma upac yorol. Pa inge mwe kite Lal nusesr in akkeyela ma su srak fos in kut.

Wednesday (1/20) Sifac: Mwe Kite Ke Liyacten

Kunokon

By LM Skipper Ittu

Wednesday January 20 2016
Sifac: Mwe Kite Ke Liyacten
Mwe Read: John 9:1-11

LM Skipper Ittu

Sifwil paing kowos mwet tumasr, wiasr, ac natusr, yokliki nukewa, mwet lulalfongi wiasr Kosrae ac sayen acn Kosrae. Sifac se lasr nuke Wednesday se inge fahk muh "Mwe Kite Ke Liyacten," oasr in John 9:1-11. Mwe luti se inge sikyak ke Period Akohnkosr lun Jesus, suc pangpang Period In Luti Judea. Jesus El som Galilee lac nuh Jerusalem nuke Kufwen Lohm Nuknuk. Fahk lah Jesus ac Mwet Tuma Lutlut Lal sun sie mokul sukasrup ac kun e kena el isuslac ah. Ohinge, Mwet Tuma Lutlut siyuk lah mac ma ke koluk lun papa ac nina kuh koluk lun mokul se inge sifana pa oru el kun uh, in oana lulalfongi lalos muh mas lun mwet uh ma tuku ke koluk lalos? Jesus El topuk lah tia ma ke kutena koluk luhn mwet, a God El kena akkalemye kuh Lal in mokul se inge. Jesus el tahfwelah in kafwe Mwet Tumal Lutlut in kafweang in oru ma lungse lun God ke srakna len. Tuh fong ac sa tuku ke wangin mwet kuh in orekma. Jesus El kalmackin len kuh kalem nuh sel sifana, lah ke El oasr yorolos, elos kuh in orekma wo. Tusruk, tok, El ac sruhoh ac anwuki, suc oapana fong uh nuh selos. Tukin Jesus El fahk ma inge, el acnilac nuh infohk uh, arukak, ac sang mosrwelah mutun mokul sac. Toko, El sap elan som ac tacnlah mutal ke Luhluh Siloam. Mokul sac oru oana ac eis liyaten lal. Ke mwet uh liye, elos siyuk lah tia pa inge mwet se ma muta ngusr ah. Mokul sac sifana fahk lah el pa inge, tuh el eis liyacten lal sin Jesus. Mwe luti se inge kafwekut in wi eis liyacten (etu kuh kalem) lasr sin Jesus, suc ekin mwe kite Lal, nuh selos na suc eisal.

Tuesday (1/19) Sifac: Messiah Suc Sifil Moulyak

Kunokon

By LM Tolenoa Kilafwakun

Tuesday January 19 2016
Sifac: Messiah Suc Sifil Moulyak
Mwe Read: Orekma 2:22-28

LM Tolenoa Kilafwakun

Kulo kaksakin God fukat lasr ke moul wowo kut pulakin ac ke mwe lutlut su tuku in karungin moul lasr.Oayapa paing kowos nukewa su ac wi kut pac ke mwe lutlut lasr nu ke len misenge uh.

Sifac lasr nu misenge uh fahk muh, Messiah suc sifil moulyak. Mwe nunak se inge sikyak ke len in Pentecost, pacl se Ngun Muhtal lun God tuku nu fin Mwet Sap lun Christ in acn Jerusalem...Orekma 2:4 fahk lah ""elos nukewa sesesla ke ngun muhtal ac mutaweack in kaskas ke kain in kas, oacna ke ngun sang nu selos in fahk. Kut long lah mwet uh lut ac fosack ke mwet sap uh elos kaskaskin kain in kahs, oinge elos suk lah mac kalmac, efu ku sikyak oinge. Kutu sin mwet uh ahksrusruki mwet sap uh muh elos srui..
Su tu pwacngacngmwet sap uh, ku Peter lan oru Message se omeet ke Gospel su som focus ke Jesus. Peter el fahk mwet uh in long testimony lalos uh, men ke fahkak lalos inge akpayeyuk ma palyeyuk ke wuleacng matu uh keJesus. Lah Jesus pa messiah, moulyak lal ku in ekullah moul lun mwet uh, Peter el sramsram lemtulacyak ke sifil moulyak lun Christ.Ke sripen manukewa ma sikyak ke misa ac moulyak lun Jesus sikyak malem se na luo nu ke pscl se inge. Oayapa elos looh nu ke misa av moulyak lun Christ.
Peter el sap mwey u in porongo ac long kahs lal uh,su el fahk lah Jesus lun Nazareth el akkalemye Ku lulap su God El sang nu sel in oru kain in mwenmwen ac orekma usrnguk inmasrlowos su kowos etu kac.Kut in ku pac in etu lah Leum God el nu planiyac na omeet me lah El ac esaclot Jesus nu in pouwos,kowos in esaclacng nu sin mwet koluk in unilyac fin sakseng soko.Tusruk tu. God el akmoulyalack liki misac ac aksukosokyacl liki Ku lun misac.Men misac tia ku in srukilyac oacna sie mwet kapir....Orekma2:4.
Peter el oayapa fahk ke Psalm 16:10, lah David el palye ke sifil moulyak lun Messiah.Su oacyapa fahk in Orekma 2:27 muh meyen kom ac fah tianna sisyulac in fwacl lun mwet misac, Kom ac fah tia lela mwet kulansap oaru lom in Kulawi Inkulyuk uh a akmoulyeyukyak ac akmutalyeyuklac som muta lapo layot sin God Inkusrao.

Leum God el sang Ku Fulat lun God nu sin Christ in supama Ngun Mutacl nu sin mwet lulalfongi su pa kut long in mwe lutlut se inge.  Lah mac enenu ngan oru,inge!!! Nganku in srukak sakseng luk fahsr tukun Christ.Ngan ku in ekullah moul luk nu ke moul lum sie mwet lulalfongi. Ngan muh ku in wi moulyak in Christ ac sie sin sie yurin mwet lulalfongi ac ngan ku in wi oacoacllah muh nga inmasrlon tamulel ac tahmtahel in sou lun God.
kulo kaksakin God ke kahs moul kut tukeni kac ke pacl se inge.

Kulo malahp
TKilafwakun

Monday (1/18) Sifac: Orekma Kuhlacna Luhn God

Kunokon

By LM Robert Kilafwasru

Monday January 18 2016
Sifac: Orekma Kuhlacna Luhn God
Mwe Read: Psalm 77:11-15

LM Robert Kilafwasru

Nga wi kowos nukewa in kaksakin Leum God ke moul wo lasr ac ke ma wolacna puspus El ase nusesr. Kulang lulap Lal pacnang kut kuh in sifil sie sin sie ke kahs wolacna Lal.

Mwe kasru se inge fahk muh “Orekma Kulang Lun God”, mwe read an asr in Psalm 77: 11-15. Psalm soko inge ma lal Asaph, mwet Levi sie, el mwet On se (1Chr 16:7) ac oacyapac mwet palu se in pacl lal King David (2 Chr 29:30). Kisen Psalm soko inge tuku ke kas in akwoye ke pacl in ongaiyac.
Ke Asaph el pulakin mwe ongaiyac ac ma upac puspus nusel, El apkuran na in fuleak ac lulafongi lal apkuran in wacngilac (Psalm 73:2). Lupan mwe ongaiyac el lie nusel sifacna inge losreyac lulalfongi lal suc pacnang el in tiac lie sripac lun God ma El oakiyac. Oinge ke Asaph el ngetlah in esamack “Orekma Kulang Lun God” el oracllah sulaclah luo: 1) El sulaclah in akilen ma upac sikyak inge in esam ke kasru yohk lun God ke pacl somlah nusin tulik nutin Israel. Ke sripen el nunku oinge pacnacng srikeni fosrnga yorol. (v.11). 2) El oacyacpac sulaclah in inse mulahlah kin ma upac sikyak inge ke sripen kupasr lun God nusin tulik nutin Israel. El lie na paye lah wacngin sie god sahyac ku oacna God sifacna. El lie lah ma nukewa God el oru uh arulacna mutal-lacna. Ke sripac inge, Asaph el sang nukewa mwe fosrngah lal nusin God.

Mwe read se inge tuku in luti kut ke pacl in ongaiyac nusesr. Pus na pacl kut sa in munaslah ke ma upac ma kisrung moul lasr uh. Kut lie ac pulakin ma upac nusesr uh, na kut mulkunlah in sang nusin God. Kut enenu in pray ac tiac fuleak in tupan top lun God. Orekma Kulang Lun God asr in pacl nukewa kut fin filiyac lulafongi lasr in El.

RKILAFWASRU

Sanri (1/17) Sifac: Sie Muhtacn ac Pahyuck Suc Tiac Pwacye

Kunokon 
By Rev. Takeo Likiaksa

Sunday January 17 2016
Sifac: Sie Muhtacn ac Pahyuck Suc Tiac Pwacye
Mwe Read: Hosea 1

Rev. Takeo Likiaksa

Sie sramsram ma akkalemye lupan lungse ac oaru lun Leum God nu sin mwet lal, el finne etu lah mwet lal tia paye ke orekma lalos nu sel. Ac ke sramsram se inge Leum God el fahk nu sel mwet palu Hosea elan som payukyak nu sin oana ke sifac uh fahk uh, “Mutacn ac Payuk Su Tia Pwacye.”

Leum God el fahk lah mutwacn se inge ac ma som lukel Hosea ac ukwe kutwepacna mukul ma el ac orek pwacr nu se. Lah paye ku sutuu sramsram se inge, tu kalme uh lumweyuk nuke tia pwacye ac sesuwos lun mwet ke Northern Kingdom ke wulela lalos nu sin Leum God. Tu elos finne ekin mwet lun God, tusruktu, elos forla lukwel ac alu nuke god sutuu ac ma srolacla.

Hosea el finne akilen tia paye lun mutwacn se kial inge, tu el srike elan kasru mutwacn se kial inge in ekulla ouiya sufal ac koluk el oru. Su pa pacna inge ouiyen lungse lun Leum God nu sin mwet lal. Leum God el kena tu mwet lal in forla, auliyak, suk God ac alu nu sel mukwena. Finne pa inge oru lun mwet lal, tu Leum God el sruokya na pakomuta ac kulang lal nu selos. God el tiana ekulla lungse lal nu selos. El akola in nunak munas nu selos elos fin forla, auliyak ac alu nu sel mukwena.

Saturday (1/16) Sifac: God Oaru

Kunokon
By Dcns. Niokong Yukiwo

Saturday January 16 2016
Sifac: God Oaru
Mwe Read: Hosea 2:18-23

Dcns.Niokong Yukiwo

Tukun God el kaskas nu sel Hosia ke ma koluk lun tulik nutin Israel, oinge God el lielos , el pakomutalos, a nunak munas nuselos ke ma koluk lalos, meyen God el God oaru se, el esam kas lal el fwak nu sin Israel, nga a fulikomlac fuka? nga siskomla fuka? Hosia 11:8.

Leum God el fwak pac, ke pacl se kas luk a ahkpaye iyuhku, nga fwa eisla mwe keokliki kowos, ac oayapa mwet lokoalok ac fwa tia sifil meuni komwos, na kowos a fwa muta in misla tia fosrnga.

Leum God el sifil pac fwak, Israel nga eis kom tuh kom in ma luk ne tok, nga a fwa paye a suwos na nusum, nga fwa ak kalemye lungse kawil luk nu sum, a karungin komyang na kom a fwa akilen la paye nga pa Leum God.

In pacl sacn pac na, nga a fwa topuk pray lowos a suhpacma af nu fwalu, tuh fwalu fwac isus fwacko puspis. nga fwa akia mwet luk elos a muta in misla, tia sifwil sensen, nga fwa God lalos a elos fwa mwet srack.

Friday (1/15) Sifac: Sesuwohs Luhn Israel

Kunokon

By Lipan Welly

Friday January 15 2106
Sifac: Sesuwohs Luhn Israel
Mwe Read: Hosea 4:1-6

Lipan Welly

Sifil pac wi mwet nukewa in kaksakin LEUM GOD ke lung kulacng yohk Lal nu sesr. Paing mwet nukewa.

Ac Jesus El fahk nu sel, “Kom fah lungse LEUM GOD lom ke insiom kewa, ke ngunum kewa, ac ke nunkom kewa. Pa inge ma sap se ma yohk oemeet ac yohk sripa oemeet. Ma sap se akluo yohk sripa oapana ma se meet an; Kom fah lungse mwet tulan lom oana kom lungse kom sifacna. Ma sap nukewa lal Moses ac mwe luti nukewa lun mwet palu oan ye ma sap luo inge (Mt 22:37-40).

Kut e lungse fuka mwet tulan lasr ke kut tia na lungse tulik wiasr sifacna? Fin acn US mainland oasr nina ac papa misenge loslah tulik natulos sifacna liki loom se. Divorce, abortion, murder rate fasr na na luhng. Paye kut lungse LEUM GOD ke insiasr kewa, ngunasr kewa, ac ke nunkesr kewa? Sesuwohs Luhn Israel ke pacl lal Hosea pa kut liye misenge uh. Kulo kaksakin LEUM GOD lah oasr inkanek in moul ma patpat soko El oakiac nu sin mwet nukewa su lulalfongi in wen natul Jesus Christ. Praise God!

Mwe read se inge mutawaek ke, “wangin inse pwaye ku kulacng fin acn uh, ac mwet uh tiana etu ke God (Hos 4:1b)”. Elos kikiap, akmas, pisrapasr, ac kosro. Ma koluk uh yokelik, ac akmas uh fususeni (Hos 4:2b). Hosea el pupulyukkin sesuwos lun tulik Israel inge lah elos oana mutan kial su tia inse pwaye nu sel ac sisella. Oana ke Gomer, mutan kial, tuh aklalfonyal, ouinge mwet lun God elos oru oapana nu sin Leum (Book lal Hosea).

Mwet luk elos ac fah lisyukla mweyen wangin etu lalos keik. Kowos mwet tol, kowos tia pac eteyu, ac kowos pilesru luti luk. Ke ma inge, nga fah pilesrekowos ac nga fah tia akilen wen nutuwos su pangon mu elos mwet tol luk (Hos 4:6). Mwet tol inge tiana oru ma God El sapkin: kowos enenu in luti nu sin mwet Israel ma sap nukewa su nga sang nu sel Moses elan fahk nu suwos (Lev 10:11).

Mwet uh kunanulac ke sripen wangin etu. Ouinge kowos ac fah utukla nu in sruoh. Mwet kol lowos ac fah misa ke masrinsral, ac mwet ngia ac fah misa ke malu (Isa 5:13). Mwet tol pa God El lain uh oana ke (v4) fahk. Ma kulok uh yohkelik ke sripen sriklac etu lun mwet uh ke kas lun God. Mwet kol lun tulik nutin Israel inge elos pilesru luti lun God oru El pilesralos pac.

Mwe ongaiyac mukena pa e sun mwet nukewa ma tia suk God ac forlah liki ma koluk lah. Tuh molin ma koluk pa misa; a mwe kite lun God pa moul ma pahtpat yurin Christ Jesus Leum lasr (Rom 6:23). Mwet nukewa orekma koluk, ac elos nukewa tia sun lupan wolana se ma God El akoo nu selos (Rom 3:23).

Ma koluk lun tulik nutin Israel inge topuk yuk ke lung kulacng yohk lun God ke Hosea 2:23 Nga fah oaki mwet luk fin acn uh, ac oru tuh elos in sun wo ouiya. Nga fah pakoten nu selos su ekin “Tia Pakomuteyuk,” ac nu selos su ekin “Tia Mwet Luk,” Nga fah fahk, “Kowos mwet luk,” Ac elos fah topuk, “Kom God lasr. God El akkalemye pakoten yohk lal in pacl nukewa. Sie pacl lung kulacng Lal e tui. God mukena etu pacl se inge.

E yohk sesuwohs lasr in pacl nukewa efin kut tia forlah suk God ac lulalfongi wen sefanna natul Jesus Christ. Jesus El fahk, “Nga fahk na pwaye nu sum: sie mwet el fin tia sifil isusla, el koflana liye Tokosrai lun God (Jon 3:3).” Ma paye uh tuku yurin LEUM GOD mukena. Kut srui kaksakin LEUM GOD lah kut ne sesuwohs in moul lasr uh, El seseslah ke pakoten ac lungse kut nukewa oana El lungse wen sefanna natul. Kut nukewa mwet kol ac tol lun God, lela tuh kut in fahkelik kahs Lal tu in wangin mwe ongaiyac nu sin mwet nukewa faclu.

Israel, nga ac filikomla fuka? Nga ac siskomla fuka? Insiuk ac tiana lela ngan oru ouinge! Lungse luk nu sum arulana ku na pwaye. Sifil kaksakin LEUM GOD ke lungse yohk Lal ac ke misa ac moulyak lal Jesus Christ tuh kut nukewa suh lulalfongi in El fah eis moul ma patpat. Paing mwet nukewa ac God bless!

Thursday (1/14) Sifac: Sukohsohk In Nguhn

Kunokon

By Victor Melander

Thursday January 14 2016
Sifac: Sukohsohk In Nguhn
Mwe Read: Galatia 5:16-25

Victor Melander

Mwe read lasr u sifwilpac tuku in akesmakinye kut tu kut in tuh na ku ke lulalfongi lasr u. Fwinne Ngun lun GOD oan in kut, kut srakna soena kutanglac moul se kut isuslac kac uh.

Tuhkuhn Paul el fwak kahs in kahiyuk lal ke pusren letter se inge, ke sripen luti lun mwet luti kikiap. El akkalemye nu selos ke luhman moul lou su tia kahreni su oasr in kut. Moul in Ngun. Ac Moul in ikwe. Ikwe lain Ngun. El akkuteyac arulana kalem ke luman moul lou inge. Lac sie ac pwen kut na ke mwe sruf su lain akwuk LUN GOD su pwen kut lac na ke kapur. Ac fwac wangin usru in togusai LUN GOD; Ngun lungse pwen kut nah ke moul ma patpat. Sulelac in ukwe ikwe kut fwac putatyang ne ke kapur. Ukwe Ngun kut fwa ais moul ma patpat, ac sukosok.

Paul el kalem ke munas lasr nu ke ikwe pa sis el fwak: Komwos in fwafwasryusr ke Ngun… Kut etu lac wangin mah upac Sihn GOD. Jesus El fwak; Nga pah Inkacnek, Paye ac Moul. Suk Leum ac Mwet Lango lasr Jesus El mukena pah ku in use ku nu sesr in lain moul in ikwe lasr u.

Wednesday (1/13) Sifac: Oaru Nuhke Ma Pwacye

Kunokon
By Dcns. Havelyn Tosie

Wednesday January 13 2016
Sifac: Oaru Nuhke Ma Pwacye
Mwe Read: Psalm 119:25-32

Dcns. Havelyn Tosie

Psalm 119 kalem mu pa loes oemeet ke book in Psalm u, tia kalem la su sumusla u tusruk motkoeyuk mu ma lal Ezra (the Priest) simla tukun sifwil musaiyuk lun temple u. Onkakinya u lumeyuk nuke moul lasr fin fwalu, mwet se ma sumusla inge, kapsra moul lal, la el oana mwet sac nu fin fwalu, su tia ma sel, panang el enenu kasru in kol forfor lal panang el kapsra moul lal nuke sie met forfor (traveler) su ke sie met forfor el forfor, el enenu lan orekma kin road map in kasru fufasryusr lal. Ouinge el lumala koano u fal nuke moul lasr fin fwal se inge. Kas lun God ku Bible mutal lun God El oana sie compass/roadmap in kolkut ke moul in fufasryusr lasr fin fal se inge. Panaang mwet se ma sumusla psalm soko inge akkalemye la moul lasr u cluttered with rule books, simla oinge tusruk God mukena pa a ku in ase inkanek ku ma sap kut in akos, a oayapa EL (God) inmasrlosr in len nukewa in moul lasr in kasre kut nuke ma paye su kut enenu in oaru nuka, a yorosr kais sie pa kut in asang yok pal lasr in eis LEUM GOD a in oaru nuke ma paye a akos ma sap lun God in oiya nukewa. Mwe luti wowo fallana in guide ikut ke mutawaak lun yac sasu u, kut in asang pal saok lasr a oaru nuke ma paye oana ke Leum God EL oaru in long mwe siyuk lasr...

Tuesday (1/12) Sifac: God Oaru Sac

Kunokon 

By LM Tolenoa Kilafwakun

Tuesday January 12 2016
Sifac: God Oaru Sac
Mwe Read: Psalm 89:24-29

LM Tolenoa Kilafwakun

Kulo kaksakin God Fulact Lasr ke moul wowo kut pulakin, ac ke oaru ac kulang Lal in srack nekikut ke kahs moul Lal in nawekut nu ke sie moul in finsrak, moul mislac ac moul engan yorol.

Psalm 89 ma lal meet palu Ethan. Elsie sin mwet sritacl Mwe On in Temple. Sollac sin mwet Levi ye masap lal King David. Mwe nunak lasr uh, Psalm 89: 24--29, "Wulela lun God nu sel David." Leum God El kaskas nu se Ethan mwet Palu, lan fahk nu sel David ma nukewa su Leum God El ac fah fahkak nu sel..2Chronicles 7:8--16. Su Ethan el oru oana ma God El sapkin. El fahkang kewa ma God El fahk lan tahfeacng nu sel David ke wulelah lun God nu sel David. God El ac tufah tia tilokinyac kasru Lal nu sel King David oacna ke God El oru kasru lal nu sel King Saul ah.God El oayapa wulela mu El ac tufah karungin fwil nu ke fwilin tulik natul David. Tokosra lun Israel ac tufah akwuki Ku ke pana Futac lal King David.

Paye ac Oaru lun Leum God ke wulelah Lal akkalemye ke Jesus Christ lah El tuku ke Line lal King David su ac tufah wangin saflaiyenTokosrai Lal. Lung Kulang ac Pakoten lun Leum God su El wulela kac nu sel David kut with pac ipeisi kac ac pulakin ke Christ. Lungse Kawil ac Oaru lun Leum God kalem ke wulela Lal in Isaiah 9:1-7., " Sie Tokosra nu ke pacl fahsru uh", Leum God El oralla wulela Lal in Isaiah ke ma su ac fah tuku ke fwilin tulik natul David. Kalem lungse kawil ac oaru lun God in karungin wulela Lal ke pacl loes su kalem ke Luke 2:11..."isusla lun tulik Jesus." Psalm 89:4...sie sin mwet in fwil nutum ac fah tokosra in fwil nukewa ku pacl nukewa. Nga fah akiyac tu tokosra lom in oan ne tok su ac tufah saslah liki sie meoa nu ke sie meoa ac liki infacl Euphrates nu ke saflaiyen Faclu...Psalm 72:8. Tokosra Lal ac fahfasrelik nu yen loessulla. El pa sifen Church, su pa manol, el pa sang kuyen moul nu ke mano,el pa wounse, akmoulyeyukyak omeet liki misa, tu in El pa omeet in manukewa...Colossae 1:18. El mwet loh oaru su Leum fin Tokosra nukewa,Simmla fin nuknuk Lal ac finyepal Ese inge " Tokosra lun tokosra uh, acLeum lun leum u."Rev. 19:16.

Isaiah 55:3...Leum God El pang ke sie pusra fusrasr --"Mwet luk porongoeyu ac fasru nu yuruk, fasru nu yuruk na ac fah oasr moul lowos, nga ac oru sie wukeacng incmasrlok ac kowos su wangin saflaiya, nga fah sot nu suwos mwe insewowo ma nga tu wulela nu sel David..

Wulela lun God nu sesrOaru ac Paye, Inge oasr wukela pac lun Leum God nu sesr ke sie moul mislac yorol. Kut in akilen lah akkalemyeyuk kalem in John 14:6..." Nga pa inkanek, paye, ac moul,wangin mwet som nu yurin papa fin tia ke nga. Kunacsr in sulala akwoyac inkanek lasr ke moul in lulalfongi lasr. Leum God El nawekutla tari ke sran Christ tu kut in wi ipeisi ke wolanna Lal nu ke moul ma patpat yorol. Su lela kut in moulkin moul nasnas, ac mutal in len nukewa akoo sikme lun Leum lasr Jesus Christ. Men fahk lah El ac tuku oana sie mwet pusrapasr.Kut ac koflah na in etu len sac ku hour sac ke tuku Lal.

Kulo ma lahp!!

TKilafwakun

Monday (1/11) Sifac: Sie Inse Nacsnacs ac Pwacye

Kunokon

By Dcns Tulpe Dizon

Monday January 11 2016
Sifac: Sie Inse Nacsnacs ac Pwacye
Mee Read: Psalm 51:6-12

Dcn Dany & Dcns Tulp Dizon

Kulo Kaksakin Leum God Ke El kolma moul lasr ne ke pal se inge.

Mwe lutlut lasr na ke Monday suc tuku ac luti kut ac fwak,"Sie Inse Nacsnacs Ac Paye." Suc me read lasr na ke me lutlut se Inge tuku in book lun Psalm. 51: 6- 12.

Psalm soko inge ma lal Togosra David. Kusen Psalm soko inge akkalemye ke sie pre in siyuk ke nunak munas. Suc tu sikyak tukun mwet pahluh Nathan el tu kaskas nu sel David ke tahfonglac lal yorol Bathsheba.David el arulana etu ke ma koluk lal sifana panang el pre nusin God in siyuk ke nunak munas.David el oayapa etu lah orekma suwos ac inse nasnas ac paye pa Leum God El lungse in pal nukewa ke moul lasr uh. El oayapa siyuk tu Leum God Elan oru tu insiacl in nasnas ac elan asang ngun sasu ac paye nu in el ac oayapa engan se tuku ke molela lun Leum ac insewowo in aksol.

Kaksakin Kas Lun God.

Sanri (1/10) Sifac: Muhtacn ac Pahyuck Se Ma Oaskuh Oemeet

Kunokon

By LM Quartus Esau

Sunday January 10 2016
Sifac: Muhtacn ac Pahyuck Se Ma Oaskuh Oemeet
Mwe Read: On lal Sol 6:4-12

LM Quartus Esau

Kuloh nusin Leum God ke ku in mano ma kut pulakin neke pacl se inge ac ke moul lasr kut paing moul sun year sasuc se inge. Paing kowos nukewa!

Me lutlut lasr u akkalemye ke soko on ma yuckyuck sin sie mukul (Solomon) nusin sie mutan suc el lungse. Ke on soko inge, mukul se inge akkalemye katoiyac ac oaskuiyen mutan se inge.

El kahto oana acn Tirzah ac Jerusalem. Kahtoiyen City Tirzah tuku ke insroan acn we. Fineol folfol, infacl loslos suc kakkak tiana tui ku finne insroan acn we arulana kato. Katoiyen City Jerusalem tuku ke muhsah puspus ma oreklac we, suc musah na yohk molo ac arulana kahto.

Aunsifacl sroalroal, ungung, srosro (wavy; bouncing) wihsel arulana fasrfasr ac tiacna fuluklac, ac likintupal srusrsrusra oana pomegranate u. Wangin sufas lun acn ke monin mutan se inge.

Lungse lal panang finne pus mutan kiacl, el sulela mu mutan se inge pa el lungse u ke sripen woiyacl ac kahtoiyacl.

On soko inge on ak-limekosr ke on onkosr ma Solomon el yuck in sang fwakak lungse lal nusin mutan se inge. Mwet Jew u elos lulalfongi mu on lal Solomon inge, ma sang luma lungse lun God nuselos.

Fwal nusesr mwet lulalfongi kahs ke on soko inge, in esam la lungse lun Jesus Christ nusin mwet lal arulana yok, pwanang El sacrifice moul lal ke ma koluk lasr.

Saturday (1/9) Sifac: Mukul ac Pahyuck Se Ma Oaskuh Oemeet

Kunokon

By Surleigh Y. Tara

Saturday January 9 2016
Sifac: Mukul ac Pahyuck Se Ma Oaskuh Oemeet
Mwe Read: On Lal Sol 5:9-16

Surleigh Y. Tara

Kulo nusin God ke sie pac mwe lutlut nusesr in akyohkye kalem lasr uh ke kahs se inge pa lungse. Kut fin orani kewa chapters alkosr(8) ac verses 117 ke On Lal Solomon, kut kuh in fwak muh koanon book se inge sramsram kihn “Lungse ke marut uh ma wolana suc fwal in akfulatyeyuck.” Lemlem se inge utuku nusesr kut in kapsru lungse lun Leum Christ nusin church nuke lungse lun mukul se nusin mutan kial. Church ku mwet lulalfongi uh ngwes akfulat lalos uh nusin Leum Christ suc ma oacpacna nusin mutan kian mukul se in ngwes akfulat lal uh nusin mukul tumal. Ke sripen lungse yohk se pa kupasreni mwet luo in ma se, pacnacng mwet sayac elos fin kisen siyuck ke mukul tuman mutan se, ac tufwa top wolana mukena pa e tuku ke inwalun mutan sacn. Pa inge lemlem se kut enenu in kalem kac, na kut fasr nu meet nuke mwe read se inge.

Mwe read se inge mutawauk ke mwet kawuk elos kisen siyuck nusin mutan kian mukul se pa verse 9 an. Elos siyuck lac efu el fwak la mukul tumal uh in wo liki na elos ngi ac. Siyuck se inge tia aksrikyacten suc ma kut ku pa in readi lac oasr akilenye selos ke wolana lun mutan se inge.  Na pa verses (vv10-16) tokoh inge akkuteya top lun mutan se inge. El topuk in fwak wolana suc ma el akilen ke mokul tumal. El mutawauk in sramsramkin wolana ke finsrohuhl nuke insifal nuke pacna wolana ac kuiyen paol nuke oaskulana lun nial ac oayacpac nuke acn el oasr we. Na el aksafye in fwak ke kahs wolana ac emem suc ma fahlac ke inwaclul.  Fwak lun mutan se inge akkalemye yohkiyen akfulat lal nusin mokul tumal. Pa inge kutu wolana-iyen top lun mutan se nusin mwet kawuk suc ma kisen siyucki ke mokul tumal.

Kisen siyuck se inge ku pac in tuku nusik ac kom. Mwet sayac elos fin kisen siyuck nusik ac kom ke Leum Christ, meah top lasr uh? Ku kisen siyuck inge mwe aksrikyaten ke sripen mukuikui lasr uh tia fwakack nusin mwet uh lac oasr sunak ke oru lasr uh? Kuh elos akilen akfulat lasr nusin Leum Christ ke mukuikui ac akfasryeyacn alu lasr uh? Ku top lasr nusin mwet uh akkalemye akfulat lasr ke alu lasr uh?  Pa inge kutu mwe siyuck nusesr sifana meet liki kut srike in eis kalem lasr ke mwe lutlut se inge.  1 Peter 2:11 fwak, “Ouinyen moul lowos inmasrlon mwet selulalfongi uh enenu in arulana wo, elos fin mau akkolukye kowos ac fak mu kowos mwet orekma koluk, elos ac akilen orekma wo lowos uh, ac kaksakin God ke Len se El ac tuku uh.” Paye lac mukuikui lasr uh pa e fwakak lac kut mwet fuka se.

Mwet uh fin akilen wolana lun lungse in sie sin sie, ma inge ac tufwa sang nuselos nunak in kisen siyuck in wi etu ke lungse se inge. Pa inge pacl fal se ma kut mwet lulalfongi uh ku in eis tafwela ke Lungse wolana se sin Leum Christ inge suc ma e tufwa use moul ma patpat nuselos su enenu. 

Thursday (1/7) Sifac: Mwet Shepherd Ne Tok Ma Pahtpaht Sac

Kunokon

By Hanna Alokoa

Thursday January 7 2016
Sifac: Mwet Shepherd Ne Tok Ma Pahtpaht Sac
Mwe Read: John 10:22-30

Hanna Alokoa

Jesus el akilen la yok sulalalfongi lalos met in pal sac ... Panang el akasmakinyelos la El pa Met Shepherd.

El fahk oinge, " sheep nutik porongo pusrek, Nga etaclos a elos fasr tukuk. Nga sang moul kawil nuselos a e tufah wangin sie kuin tulakunuloslac lkiyu. Saflaiyen mwe read se inge fahk mu " Nga ac Papa Ma sefanna "...

Kut enenu in porongo pusren Mwet Shepherd lasr, in akos a fasr ke Lungse Lal in pal e nukewa. Meyen elos su Papa El sang nusel, elos saok liki ma nukewa.

Kut sheep natul ac El pa Met Shepherd lasr . Ke sripac se inge, nga ac kom enenu in etu in long ac akilen pusren Mwet Shepherd lasr, su pa Leum Christ.

Wednesday (1/6) Sifac: Mwet Shepherd Wo Sac

Kunokon

By LM Skipper Ittu

Wednesday January 6 2016
Sifac: Mwet Shepherd Wo Sac
Mwe Read: John 10:7-15

LM Skipper Ittu

Sifil paing kowos Mwet Lulalfongi wiasr Kosrae ac fin facluh nofon. Kulo kaksakin God Fulat, suc panang oasr sie pac yac kut in sifil alutluti ke Kahs moul ac utuftuf Lal. Sifac se lasr nuke Wednesday se inge fahk muh "Mwet Shepherd Wo Sac"; oasr in John 10:7-15. Kuhsahl John Mwet Sap pa inge. Mwe Kasru se inge sikyak ke Period Akonkohsr luhn Jesus, suc pangpang Period in Luti Judea, ac oasr Fahsr Luo kac--sie meet liki Kufwen Lohm Nuknuk ac sie tukin Kufwen Kisalah. In pal se inge Jesus El tuku nuh Jerusalem in oru luti lal. Jesus El luti ac fahk lah El pa mutunoa nuke sheep uh, ac elos nukewa suc tuku meet elos mwet pisrapasr sulallal, ac sheep uh tiac porongulos. El oayapac Mwet Shepherd wo, suc akola in misa ke sheep uh. El tia orekma in eis molo, ac El tia pac kainglac liki sheep uh ke wolf uh tuku. El etu sheep natul, ac sheep natul etal, oana ke Papa El etal. Mwe kasru se inge lutikut in sensenkakinkut liki Mwet Luti kuh Alu Situhuh, suc oasr yorosr misenge, srike in eiskutlac liki Mwet Shepherd Wo ac Pwaye sefana lasr, Jesus Christ. Tuh in El mukena, a tia kutena sayac, kut fah eis moul ma patpat!

Tuesday (1/5) Sifac: Mwet Shepherd Fas Sac

Kunokon

By LM Tolenoa Kilafwakun

Tuesday January 5 2016
Sifac: Mwet Shepherd Fas Sac
Mwe Read: John 10:1-6

LM Tolenoa Kilafwakun

Kulo kaksakin God Fulat lasr ke kulacng Lal kut pulakin ke moul misla ac moul wowo. Ac oayapa ke Mwe lutlut wo El supwama in ahkkeye kut ke mutun year sasu se Inge.

Mwe lutlut se Inge, Jesus el oru sie pupulyuk ke sie meet Liyacacng Sheep. Su tungal, "Karunginyen moul in Ngun, ku moul muhtal lun meet lulalfongi su muta fin masap, Ku moulkinna akwuk lun Judaism. Ku moulkinna lulalfongi lalos sifanna.

John 10: 1.....fahk oinge, mwet se ma tia utke motonoac nuin kalkal lun sheep uh, el sie meet pusrapasr sulallacl." Meet phsrapasr sulallacl--- mwet oinge uh elos su moulkin akwuk lun Judaism, ku moulkin lulalfongi lun mwet Jew inpacl soo, su elos tia ma tuku sin Christ me. Jesus pa motonoac lun sheep uh, motknoac se inge tia ma nu sin mwet sulosollac mukena lun God in utyak nu loac, a ma pac nu sin mwet lun God nukewa in wipac utyak ac tifoki kacl.

John 10: 2.....Mwet se ma utke motonoac el mwet liyacacng sheep. " Jesus El sifacna fahk lah El pa motonoac nu ke sheep uh. Kutena mwet su utyak kacl ac fah moulla. In Jesus mwet uh fah ilyak ac illac, ac konacack moul mislac yorol.

John 10: 3.....fahk lah, mwet liyeacng motonac El ikasla mktonoac nu sel. Sheep natul uh akilen pusracl ke el pangnolos ke inelos, ke el usaclosme nu likin kalkal uh, el fahsr meet ac sheep uh fahsr tokol, meyen elos etu pusracl. Fahk pac lah oasr pac kutu sin sheep u tia wi muta in kalkal seinge, su pa Gentiles...Orekma 11: 18 ----Inge God El sang pac nu sin mwet Pegan uh elos in ku in auliyak ac eis moul.Nga enenu in usaclosme pac elos fah long pusrek, ac elos nukewa fah u sefanna yurin mwet shepherd se fanna. Ke sripen sakseng el orani kain in mwet luo inge nu kd mahno sefanna ac folokonolosme nu sin God.

John 10:4.....ke el usa losme nu likinkalkal uh,. El fahsr meet ac sheep u fahsr tokol men sheep uh elos etu pusracl. Sheep nutik uh porongo pusrek, nga etaclos ac elos eteyu ac fahsr tukuk. Men moul na paye last u pa Christ,ke El ac sikme kut ac fah oacyapa welul sikme acwi ipeis ke wolana Lal.

John 14:6.....Nga pa inkanek, ac paye, ac moul; wacngin mwet som nu yurin Pahpah fin tia ke Nga!

Kuloma lulahp ke kahs in moul kut eis ke pacl seinge in tukeni alutluti kac.Kaksakin God tu Lung Kulang Lal oan Ma Pahtpaht..

Klo malahp
T.Kilafwakun

Monday (1/4) Sifac: Sie Muhtacn Fas

Kunokon

By LM Robert Kilafwasru

Monday January 4 2016
Sifac: Sie Muhtacn Fas
Mwe Read: Soakas 31:10,11,20,25,26

LM Robert Kilafwasru

Sifil kaksakin lungse yohk lun Leum God nusesr nukewa. Paye kulang lal nusesr tiac tui panang El ase pac nusesr in sifiil sie sin sie ke kahs mutal Lal.

Soakas soko inge el sramsramkin yohk ke ohiyen sie mutan fas. Sie mutan suc ma akilenyuck ke kain ohiyac wowo puspus. El lulafongiyuck sin mukul tumal, kulang nusin mwet sukasrup ac enenu, el mutan kuh in mano ac akfulactyeyuck se, ac kahs lal uh kulang ac lalmetmet. Ma inge nukewa asr sin mutan se inge ac weang pac ma wo pus sayah. Pus na pacl kut sifacna nunku mu mutan se el tiacna ku ke ohiyac pus. Tusruk akkalemyeyuck in Soakas soko inge ke kuh in orekma ac pah in orekma lun mutan se inge.

Ke mutacwack in book Soakas, el akkalemye lah Sangeng sin God pa mutawaak in etauk.( Soakas 1:7) Ak-acsmakinye kut kais sie in esam lah lalmetmet lasr uh wacngin sripac fin ohiyac lasr uh tiac wo ye mutun Leum God. Panang ke sahflaiyen book se pacna inge, el sramsramkin ohiyac wowo lun sie mutan na fas suc ma upac in koneyucyak. Oacna ke kalem ke mwe read se inge, ohiyac wowo lun mutan se inge fin kupacsryang nuke sangeng ac sunakin God, ac mwe insewowo na yohk nusesr.

Kut fin kapsru moul lasr uh nuke mutan se srumunyuck inge, fal kut in lutlutkin ac in suk in wi moul kihn ohiyac wo lal inge. Ohiyac wo lasr uh kut enenu in ahkyokye in sang kulansupu God in akyohkye wolacna Lal.

Sanri (1/3) Sifac: Mukul ac Pahyuk se, Mutacn ac Pahyuk Luo

Kunokon

By Rev. Takeo Likiaksa

Sanri January 3, 2016
Sifac: Mukul ac Pahyuk se, Mutacn ac Pahyuk Luo
(One Groom, Two Brides)
Mwe Read: Genesis 29: 15-30

Rev. Takeo Likiaksa

In oana facsin in pacl sac, mukul se enenu in sang sie mwe sang nu sin sou se ma el ac pahyukyak nu sin mutacn se. Ouiya se inge ma in akfalye ke mutacn sacn ac som liki sou lal an. Wangin mwe sang Jacob elan sang pwacnacng el insese in orekma ke lusen yac itkosr lal Leban, uncle lal. Tu Leban el tiana fahk pa sie facsin lun an we ma Jacob el tiana etu. Facwsin se inge pa enenu tulik mutacn mahtu in marutla met liki mutacn fusr wiacl an.

Ouinge, Jacob el orekma ke lusen yac itkosr in pahyukyak sel Rachel. Ke kiacpweyukla el, na el insese in sifil orekma yac itkosr elan ma pahyukkyak sel Rachel. Ke sripen lungse yok lal Jacob nu sel Rachel, kalem mutweng lal Jacob, yac itkosr toko ah arulana fototo nu sel Jacob.

Kut esam sramsram kacl Jacob lah el oracle kikiap se pac nu sin tamulel se lal ah, ac inge folokyang pac nu sel. Kut mwetu, kuh pac in kaliya mutahsr nuke orekma sesuwos lasr kut oru pac nu sin mwet sahye.

Finne kiacpweyukla Jacob, tu el srike na in karungin ip kunacl kac uh. El esamul Rachel, wi pac plan lun God nu sel. Pa oracle sifac se inge fahk ke mukul se akola in pahyuk nu sin mutacn luo.

Saturday (1/2) Sifac: Paing Kom

Kunokon

By Surleigh Y. Tara

Saturday January 2 2016
Sifac: Paing Kom
Mwe Read: Genesis 29:9-14

Surleigh Y. Tara

Mwe luti se inge sramsram kin mwet tolu ac oru lalos.  Mwet tolu inge pa Rachel, Jacob, ac Laban. Mwet se mwet kut in loang nuke uh pa, inse pusisacl lal Rachel in kasru liacng kosro nutin papa tumacl. Ke sripen inse pusisacl lal Rachel pacnacn sang nunak suwos elan tia mekin kin kain in orekma se inge uh. Finne oasr mwet kulansap lalos uh el suk pacna in kasru. Tukin na el konac-ack peng se kacl Jacob, na el sulaklak kasruk in som nu yurin papa tumal in suklakin ma sikyak inge.

Akluo an pa kalem ikacklah nusel Jacob nuke inse muhlahlah in akkalemye nunak suwos ac lungse nusin mwet wiacl. Tukin Jacob el konaack la suc Rachel uh, el mutawaack in kalem ke sripen fufasryucsr lal nu in acn se inge. Ke el akilen ma inge, el akolah in tu kulansapel Rachel ke mwe enenu lal. Yok engan lal suc ma el akkalemye nusel Rachel.

Na aktolu an pa paing lal Laban nusel Jacob. Tukin el eis kahs sel Jacob, el tia kisen siyucki ma sikyak inge uh el esacl nu in loom sel. Inkaiyen pacl uh, mwet uh e oasr ahlohloh lalos ke kain in pacl se inge, tusruk ma nukewa akfasryeyuck oana ke akwuk lun God.

Mwe lutlut se inge luti kuht ke inse pusisacl in akfasrye kulansap lasr uh lac oana sie kain in orekma ma kut oru ke inse paye ac suwos. Ma inge e tufwa akfasrye kolyuck ac akwuck lun God nusin mwet Lal. Akosten lal Rachel, Jacob, ac Laban ase nusesr kut in wi akilen ke akwuck lun God lac ma God El sapkin uh e tufwa fasr nu meet ac ma kunasr up pa in tia kisensiyucki, tusruk kut in fasr na ke ma suwos ac paye.

Kulo ac Happy New Years nu suwos kewa.

Friday (1/1) Sifac: Leum God El Oasr

Kunokon

By Lipan Welly

Friday January 1 2016
Sifac: Leum God El Oasr
Mwe Read: Genesis 28:15-22

Lipan Welly

Paing kowos kewa mwet wiyuck. Fal lacna in wi kaksakin God fulactlacna ke moul wowo El acse nusesr in sifil pac eis kas Lal ke pacl se pac inge.

Mwe lutlut se lasr inge sikyak ke pacl se Jacob el som kuh fasr liki acn Beersheba in som nu Haran (Gen 28:10). Ke el totolah ke fufasryucsr lal, el eis sie yot ac elongack ac eis monglac lal in sie acn. Ke el motullac, el mwemwe muh el liye nien fan se tuyak faclu yak ac sun inkusrao (Gen 28:12).

Ac Leum God El kaskas nusel ac olela nusel tuh El ac fa sang fwilin tulik natul tuh in puhs oacna pohk fin facluh (Gen 28:14) ac El ac fa loangel yen nukewa el som nu we. Fukah wolacna iyac kuht fin ac oru fufasryucsr lasr nu yen kuht mwet sac nu we ac etu tuh asr mwet kuhlacna se in tu siskacsr ac akola in loange kuht yen kuht som nu we?

LEUM GOD El oacyac pac sang kas Lal nusel Jacob lah El ac fa folokonol lah nu in acn sac kuh acn se suc el ac fwac insewowo we. El oacyac pac wulelah nusel tuh El ac fwa welul nuke El oracla kewa wulelah Lal nusel inge. Jacob el akilen yen mutal se inge ac fahk tuh "Payena paye Leum God El oasr in acn se inge" ac akilenyac tuh acn na oal se pa inge (Gen 28: 15-16).

Jacob el toang na tukakek ke lotu se tokoh ah ac tulokonack yot se suc el ilung in akilenyac yen mutal se inge ac ukiyac oil in olive fin yot sac ac kisackungacng nusin God. El sang inen acn se inge Bethel, kalmac pa yen muhtal (Gen 28:18-19).

El oraclah sie wulelah nusin God tuh El fin welul ke fufasryucsr lal ac sang mongo nacl, ac oacyac pac folokonllah nu in facl sin papa tumacl na El ac fa God lal nutok ac el ac fa sang sie tafu singoul ke ma nukewa God El acsang nusel (Gen 28:22).

Lela kuht in etu ac lulalfongi tuh "LEUM GOD El oasr" ac akola in wi kuht ke yac sasuc se suc kuht ilyak nukac inge. Ac in usongyac nuh in kuht lulalfongi lasr Nusel tuh El ac fa wi kuht ke fufasryucsr lasr lah loes kuh fototo. Ac El ac fa oacyac pac wi kuht nu in facl se suc El akolah nusesr kais sie. Mwet wiyuck, lela nga kom in oru kulansap lasr in oa ye mutal ac etu tuh LEUM GOD fulatlana El oasr yen nukewa, pacl nukewa ac akolah nusesr in kasre kuht ke mwe siyuck lasr. Kulo ac Happy New Year!