Monday (2/29) Sifac: God Oaru

Kunokon

By Dens. Sepe Kilafwasru

Monday February 29 2016
Sifac: God Oaru
Mwe Read: Genesis 15:1-6

Dcns Sepe Kilafwasru

Mwe read se inge akkalemye ke sie wulela lun God nuhsel Abraham. Abram el sie su yok lalalfongi lal in God. El filiya lalalfongi lal in God mweyen el etuh lah God El God oaru se.
In pal se inge, Abram el oasr ke matwac mahtuh lal, tusruk wangin tulik nahtuhl. Leum God El sikyang nuhsel in sie arruma ac fwak nuhsel ohinge:”Abram, nikmet sangeng. Nga afwa lihsrihng kom liki mwe sensen, ac sot nuhsum sie mwe usru luhlahp.” Abram ke el long, el topuk a fwak, mwe mea usru san nuhsik ke wangin tulik nuhtik uh, mwet sefana ac is usru luk uh pa Eliezer, mwet kulansap luk. Na Leum God el sifil fwak nuhsel, Eliezer elac fwa tia usru ma lom, a wen se nuhtum sifacna a fwa mwet usru lom. Leum God El pacnuhllah nuh lukunum ah ac fwak nuhsel lan ngwetack nuh inkusrao ac srihke lan oaklah itu uh, tuh tulik nahtuhl afwa puhs oana itu uh.

Abram ke el luhng ma inge, el tiana ahluhluh. El tiacna srihke lan oaklah itu uh. El filiya lalalfongi ka, mweyen el etu lah wangin tahfonglac ke kahs luhn God. Ke srihpac se inge, Leum God El oackuhllah sie mwet suwohswohs. Ma inge ahkpayeiyuck tok ke elos illac liki an Egypt, pisaclos arulana puhs.

Mwe lutlut se inge kahsrekuht kut in etu lah God El God oaru se. El ahkfalye ac ahkpayeye wulelah Lal pal nukewa. Pwanang fal kut in filiya lalalfongi lasr in kas Lal.

Deaconess Sepe Kilafwasru

Sanri (2/28) Sifac: Ohiyac Mahtuh ac Finsrak

Kunokon

Rev. Takeo Likiaksa

Sunday February 28 2016
Sifac: Ohiyac Mahtuh ac Finsrak
Mwe Read: Leviticus 23:33-43

Rev. Takeo Likiaksa

Ohiya mahtu se inge pa ke akfulatyeyen sie kuhfa ma Leum God El oakiya nu sin mwet Israel elos in akilen. Na sripac ac finsrak lun kuhfa ku ohiya inge, pa in luti kais sie mwet in sie sou in akilen akwuk lun God ac ma El oru wo nu selos. Oayapa ke elos ac akfahsrye ma inge, elos enenu pac in esam karunginyuk wowo lun Leum God nu selos.

Ke pacl ma elos oru ku ahkfahsrye ohiya mahtu lalos inge, finsrak uh pa elos in aksasuye acsang lalos nu sin Leum God. Nu selos mwet Israel in pacl sac, elos akilen len Sabbath ac oayapa oasr pac len 19 pa elos srelah in oru akfulat lalos inge. Oasr ohiya mahtu ku kufah itkosr (7) pa elos akfulatye uh wi pisen len in akfulat: 

Inen Kuhfa Pisen len in akfulat
1. Kuhfwen Ahlukela - len 1
2. Kufwen Bread Tia Akpulohl - len 7
3. Kuhfwen Kosracni - len 1
4. Pentecost (Kuhfa lun Week) - len 1
5. Kuhfwen mwe On (Ukuk) - len 1
6. Sie Len In Elah Ma Koluk - len 1
7. Kufwen Iwen Ahktuktuk - len 7

Nu sesr in pacl inge oasr pac len ma sriyukla in akfulatyeyuk. Kutu len inge pa January 18, February 2, Easter, June 6, July 20, August 5, August 21, September 8, Thanksgiving, Christmas ac birthday, ac kain in anniversary wi pac kutu len sahye. Sripac lun akfulat inge kewa pa in akilen kasru yok, ac karunginyuk lun Leum God nu sesr. Yok sripac lun kais sie len inge oru fal kut in wi akilen, akfulatye ac in wi pahtok nuke fisrak ma oru in akwuki kais sie len lulap inge.

Saturday (2/27) Sifac: Stephen ac Fuhfahsryucsr Sac

Kunokon

By Dcns Niokong Yukiwo

Saturday February 27 2016
Sifac: Stephen ac Fuhfahsryucsr Sac
Mwe Read: Orekma 7:30-42

Dcns Niokong Yukiwo

Mwe read se inge akkalemye sramsram se lal Stephen nusin uh in mwet se pangpang Sanhedrin.  Stephen el fwak lac yac 40 sahflah lal Moses ac pa God El siklac nusel suc Bible uh fak ke sahk fihrihr soko. Sramsram soko inge kut ku in readi ke Exodus suc ma tulik nutin Israel som liki acn Egypt nu in ac mesis ah. Na ke sramsram se lal Stephen inge, el srike in akkalemye ma sikyak nusel Moses in pulan pacl se inge. Ma suc ma God El ikacslah nusel Moses finol Mt. Sinai suc akkalemye ip luo.  Sie pa ma fwakyuckyak ke mutal lun God ac ak luo an pa God El sulallah Moses tuh elan pa mwet kol se lun Israel suc ma tukin 400 ma elos muta in kohs fin acn Egypt.

Fwakack se lal Stephen nusin mwet Sanhedrin inge, el ke elos in wi kalem kac yen mutal lun God pa ip se meet ke mwe read se inge. Tafeyacn v33 akkalemye ouinge, “Esla fahluk lom an, tuh acn se kom tu we inge acn mutal se.”  Sripac se inge uh ma ke lulalfongi lun mwet Sanhedrin inge, acn mutal sefanna uh oasr Jerusalem suc ma wangin mwet sahyac kuh in wi ilyak ac akfulat.  Yen ma mutal lun God uh pa acn ma God El sulaclah in oasr we. Tia acn ma elos nunku ma mutal uh. Ke sripen mutal lun mwet uh arulana sufal nuke mutal lun God.  Ke ma inge, God El sulacllah Moses elan pa mwet kol se lun tulik nutin Israel inge. Moses long pang lun God uselos me liki acn Egypt na elos tuh pa elos srangesr lohngol.


Ip se ak luo an pa, God El sulacllah Moses. Tulik nutin Israel elos muta in kohs fin acn Egypt yac 400 suc ma God El na fwak nusel Abram (Genesis 15:13) lac sie pacl God El a fwa akksukosohkyeloslac.  Mwet kol se ma God El sulacllah inge pa Moses suc ma el moleloslac ac kohlolosllac liki ac Egypt orek mwenmen ac ma sakirik. Tusruktu, elos tuyak ac lain mwet kol se inge. Yohk tohrkaskas lalos nekepacna in alu nuke ma srolacllah ke kasru lal Aaron. Mwet se ma God El supama in loangolollac liki kohs, elos tuyak lain. Ke sripen tia long kas suc ma kalem ke ma koluk lalos, pacnang God El tu ngetlah luhkelos.

Kut fin loang nuke mwe read se inge. God El supaclma Moses in loangoellah tulik nutin Israel, tusruk elos tuyak in lainuhl. Ke lungse yohk lun God, El supama Wen sefanna natul in pa Mwet Lango se, ac elos unilyac. Pa inge tafonglac lun mwet uh ke sifacna utuck etu.  Mwetu sang facsin ac akwuck lalos sifacna in pa kol kulansap lalos nusin God suc ma use kasrkuhsrak lun God. Mwe enenu se uh pa, kut in epahsrlah ac siyuck ke nunak munas sin God kut in muh fwasr ke kolyuck ac akwuck Lal. Kolyuck ac akwuck lun God pa enenu in fwasr meet liki ma nukewa ke moul lasr uh.

Dcns Niokong Yukiwo 

Friday (2/26) Sifac: Jesus ac Fuhfahsryucsr Sac

Kunokon

By Lipan Welly

Friday February 26 2016
Sifac: Jesus ac Fuhfahsryucsr Sac
Mwe Read: John 3:14-21

Lipan Welly

Srui na yohk in sifil wi mwet nukewa ke pacl se inge ac kaksakin LEUM GOD ke moul mwo. Paing mwet nukewa ac God bless!
Kut readi ke (vv14,15) lah, John el srike in oralla sie picture na kalem kut in liye lah Jesus El enenu na in misa. El lumuh oana ke Moses el tuh srupusrak serpent bronze soko fin sak soko in an mwesis ah, in ouiya sacna Wen nutin Mwet el fah sripsripyak (v14). Kut kuh in kapasriac v14 ke mwe read lasr uh nuke Oekyuk 21:8-9 in liye akwuk ma LEUM GOD El na akoo nu sin mwet lulalfongi nu kewa. 

Oekyuk 21:8-9; LEUM GOD El fahk nu sel Moses elan orala soko serpent osra, ac likiya mutun soko sak ah, tuh kutena mwet su ngalnguli fin ngetak nu kac, elos fah moul ac tia misa. Ouinge Moses el orala soko serpent ke bronze ac likiya fin soko sak. Na kutena mwet su ngalnguli, elos ac ngetak nu ke serpent bronze soko ah, ac moul. Kut kuh in lumuh nusesr misenge lah kut nukewa ngalnguli pac. Ke sripen ma sikyak lin Ima Eden kut kewa fototo lac ke moul lasr uh. Enenu senna kut nu kewa in ngetak liye Jesus Christ fin sakseng ac lulalfongi lah El misa ac moulyak in moli kut lac. Wangin innek saye, Jesus Christ pa inkanek soko fanna nu ke moul ma patpat.

Tuh elos nukewa su lulalfongi in el elos fah ku in ilyak nu ke moul sasu wangin saflaiya v15. Tuh God El lungse faclu ouinge: El ase Wen sefanna natul, tuh elos nukewa su lulalfongi in El fah tia misa, a elos fah eis moul ma pahtpat v16. Tuh God El tia supwama Wen natul in tuh nununku faclu, a tuh faclu in eis moul kacl v17. 

Arulacna akketeyuki kalem ke verse inge kewa lah LEUM GOD El ke mwet nukewa in moul ke sripen El lungse kut nukewa. Akwuk lun God sang molela nu sin mwet nukewa su lulalfongi in El.
Oasr akwuk lun faclu misenge ma sang lusrong akwuk lun God. Mwet uh misenge arulacna focus yohk nu ke ma koluk lun mwet ac sriklac pacl in akkalemye lungse yohk lun LEUM GOD. LEUM GOD El ke kut nukewa in eis moul ma patpat. El tia tuku in nununke kut uh El tuku in use moul ma patpat. Oasr pacl in nunuku su El mukena pa ku in akfahsrye. Inge na pacl in fahkelik ke lungse yohk lun LEUM GOD nu faclu nofon. Efin pacye kut moul kin lungse yohk lun God, ac wangin pacl in tui in fahkak ke moul ma patpat se inge. 

Akwuk Lal mukena pa wo. Kut mwet uh fototolac. Nature lasr uh pa suk in wo nusesr liki mwet ngiac. Bible uh luti nusesr kut in lungse mwet tulan lasr oana kut lungse kut sifacna. God El etu fototo lac lasr kais sie ac lungse yohk mwet nukewa. Oasr finsrak yurin LEUM GOD. Kut enenu na in forlah ac suk moul ma patpat su LEUM GOD mukena pa ku in use nusesr. Verse singoul onkosr pa eteyuk emeet fin faclu, Tuh God El lungse faclu ouinge; El ase Wen sefanna natul, tuh elos nukewa su lulalfongi in El fah tia misa, a elos fah eis moul ma pahtpat. 

Sifil wi mwet nukewa in kaksakin LEUM GOD lasr ke akwuk El akiac nuser kewa. Yurin LEUM GOD oasr moul ac misla. Efin kut fasr lukel e fah oasr ongaiya na yohk kut e pulakin. Oasr acn asor El akolah nu selos su tia lulalfongi ke Wen natul. Nunak munas tia tui in fahkak lungse yohk Lal nuser in pacl nukewa. Tia tui pac in pray tuh faclu in forlah ac suk Jesus Christ misenge. Paing mwet nukewa ac kaksakin God in pacl nukewa. God bless!

Thursday (2/25) Sifac: Esam Fuhfahsryucsr Sac

Kunokon

by Kavika Abraham

Thursday February 25 2016
Sifac: Esam Fuhfahsryucsr Sac
Mwe Read: Deuteronomy 8:1-11

Kavika Abraham

Moses el sifil ahkasmakihnye tulik nutin israel inge, tuh elos in oaru in akos masap ma God el sang tuh elos in fahsr kac elos in ma u kuh in wi ilyak nu in facl se suc Leum God el wulela kac.Fahk pac muh elos in tuhfah esam kolyuck wowo lun God nuselos panang elos kuh in fasr sahslah yen mwesis ke yac 40 som lah.In mwe read se inge srumun pac lah Leum God el oru oiya upa nukewa in srikalos in fahkack ma oan insialos.El oru oinge ke sripen el ke elos in etuh lah elos tia moulkihn bread mukena u elos moulkihn pac yohk kas lun God.

Oinge lela nu sik kom in etuh lah masap lun God paye ac suwohs ,fal nga ac kom in arulacna ahkfulatyacl ac sunakuhnuhl.Fine oiya upa fuka el oru nu sesr ke moul lasr u,kut in esam lah el oru ma inge in ahkasmakihnyekut lah kut tia moul in mwet mukena u kut moulkihn yohk kas mutal lal.

K.Abraham

Wednesday (2/24) Sifac: Fuhfahsryucsr Sac Wetoklac

Kunokon
By LM Skipper Ittu

Wednesday February 24 2016
Sifac: Fuhfahsryucsr Sac Wetoklac
Mwe Read: Deuteronomy 1:29-33

LM Skipper Ittua

Sifwil paing mwet wiasr, tumasr, ac natusr Kosrae ac sahyen acn Kosrae, yohk mwet wiasr in luhlahlfongi; Kaksakin God!!! Sifac se lasr ke Wednesday se inge fahk muh "Fuhfahsryucsr Sac Wetoklac," oasr in Deut.1:29-33; Moses el sruhmuhn ke wetoklac luhn Mwet Israel meet liki elos utyak nuh Fuhlan Wuhleacng kuh Canaan. Elos wetoklac ke sripen fahk luhn Mwet kalngeyuck ma som nuh Canaan ac fohlohk tuh sruhmuhn ke yohk, fokoko, ac kuh luhn mwet we. Ohinge, Mwet Israel inge arulana sahngeng, finne Joshua ac Caleb tu na kuh, ac Leum God El wuclelah kuhtanglah lalos fin Mwet Canaan inge. Moses el kafwelos in tiac sahngeng tuh Leum God Elac weluhlos oacna ke El ohruh ke fahsruh lalos Egypt mwe, suc kahlem ke sru in e se ke fong, ac sru in puhkuhnyeng se ke len. Kasrekut in tiac pac wetoklac ke fuhfahsryucsr kuh orekma Lal kuht kais sie kuhlacnsuhpuh. Tuh El wuhlelah pac in wi kuht pacl, len, ac acn nuhkewa.

Tuesday (2/23) Sifac: Fuhfahsryucsr Sac Muhtacwacack

Kunokon

By LM Tolenoa Kilafwakun

Tuesday February 23 2016
Sifac: Fuhfahsryucsr Sac Muhtacwacack
Mwe Read: Exodus 3:1-6

LM Tolenoa Kilafwakun

Sifil Pac kaksakin God Fulat lasr ke karunginyuk wowo ke moul lasr ac ke kahs in Moul El sifwil pac Supwacma in karunginyuk moul in lulalfongi lasr in pacl inge. Paing kowos pac nukewa su ac wi kut ke mwe lutlut se inge..Koacl mwe read se inge sikyak ke Pang lun Leum God nu sel Moses Sisken Eol Mutahl Saini. Fahk lah ke pacl se inge Moses el karunginyuk sheep ac nacni nahtul Jethro, Pahpah tuman mutan koacl, Su fahk pac lah Jethro El oayapa Mwet Tol Fulat se pac lun Acn Midian. in mwe read uh ahkkalmye lah Lipufan lun God sikyak nu sel Moses ke sie Ee firir Infulwen sak srisrik soko. Usrnguk sel Moses in liye lah ee sac firir Infulwen sak soko ah a sak srisrik soko ah tenna firirlac. Oinge Moses El kalukyang in liye, " Na El long pusren God panglol in ee sac, sucel fahk oinge, nga pa inge," Na Leum God El fahk nu sel oinge," Tuna insacn!, Sahruklah fahluk lom an meyen kom tu fin fok mutahl.Nga pa Leum God lun Pahpah mahtu tomom. Nga God Lal Abraham, God Lal Issac ac God Lal Jacob. Fahk lah Moses El afinyac Mutahl arulana sangeng in ngetacng nu sin Leum God....Mwe nunak u tuku nu sesr in akilen lah communications lun God nu sesr uh ac sikyak pac ke unexpected ways ku sources..su kalem ke El sramsram nu sel Moses ke ee firir sac.kut in loacng ahkwoyac in akilen pacl se God lac sramsram nu sesr uh. Kut in oayapa moulkin ahkosten ac pusisacl ke pacl God El sramsram nu sesr ac oayapa in pacl nukewa kut oru kulansap lasr nu sin God. Pa inge pacl se Leum God El panglol Moses nu ke Fuhfahsryuer lun Israel nu Facl in Wuuleacng......kulo nu sin God ke mwe lutlut wo tuku in luti kut ac ahkkeye moul in lulalfongi lasr kais sie....kulo malahp.....tk

Monday (2/22) Sifac: God Luhn Fuhfahsryucsr Sac

Kunokon

By Dcns. Tulpe Dizon

Monday February 22 2016
Sifac: God Luhn Fuhfahsryucsr Sac
Mwe Read: Psalm 68:5-10

Dcns. Tulpe Dizon

Kaksakin Leum God Fulatlana ke moul wolana lasr nukewa. Ac in pain mwet nukewa pac.

Psalm soko inge ma lal David ac el akkalenye ke soko on in kutanglah lun Israel.Oana ke sifac uh fwak muh "God Lun Fufasryucsr Sac." David el akkalemyelah God se ma on kinyuck inge pa God se ma kolla tulik nutin Israel ke fuhfahsryucsr lalos liki acn Egypt in som na Canaan.God suc muta in temple Mutal El nunku ke tulik muhkahimtacl .Oayapa El karuhnguhnacng katinmas.El pana pa kolla mwet kapir nuke sukuhsuhk ac engan. Oayapa El pa supu af nu fwalu ac El pana pa sang kahsruhp nusin mwet suhkahsruhp.

Mwe kasruh nusesr uh pa God se pana inge pa ac kol kut ke fuhfahsryucsr lasr fin fwalu se inge.

Sanri (2/21) Sifac: Sie Muhtacwacack Nacsnacs

Kunokon

By LM Quardus Esau

Sunday February 21 2016
Sifac: Sie Muhtacwacack Nacsnacs
Mwe Read: Leviticus 16:11-19

LM Quardus Esau

Sifilpac wi kowos in kaksakin God Fulat lasr ke moul lasr kewa. Paing kowos! Sifac lasr nuke Sunday fwak mu, “Sie Mutwawaak Nacsnacs”.

Me read se inge sramsram yokna ke sie lwen lulap lun mwet Jew suc kalem ke “Lwen in Eela Ma Koluk” ku “Lwen in Aknasnas”.

Lwen se inge akfulatyeyuck ke lwen ak 10 ke malem ak 7 ke calendar lalos. Pa inge pacl se Leum God El sapkin mwet Israel in oakiyac tu in lwen in aknasnas lalos liki ma koluk lalos nukewa. Ke lwen se inge, mwet Israel ac mwet sac ma muta yorolos in lalo ac tiac oru kutena orekma. Elos in akmutalye len se inge (Leviticus 16:33,34; Hebrew 9:7).

In oiyac lalos ke aknasnas, mwet tol fulat el enenu in uniyac soko cow mukul. Cow soko inge mwe kisac ke ma koluk lal ac oayapac sucu lal. Srahn cow soko inge mwet tol el ac usack nu in Acn Mutal Na Mutal ac sang aksroksrokye kafa ac mutun Tuptup in Wuleang lun God. Mwet tol el enenu pac in uniyac nacni soko in mwe kisac ke ma koluk lun mwet u. Srahn nacni soko inge ac orek oapana ke srahn cow soko ah. Utukyak nu Acn Mutal Na Mutal, ac sang sroksroki kafa ac mutun Tuptup in Wuleang u. Ke mwet tol fulat el oruh oiyac inge, el aknasnasyela ma koluk lal sifana, ma koluk lun sucu lal, ac ma koluk lun mwet u.

Tukun safla orekma lal Mwet Tol lun lohm u, na el tifoklac ac fulela nacni soko ma srisrilac in usla ma koluk lalos nukewa nu yen mwesis.

Misenge, kut tiac sifil enenu srahn kosro in pa sang aknasnasye kut liki ma koluk lasr u. Christ, suc Mwet Tol Fulat lasr, El aknasnasye kut nukewa liki ma koluk lasr, ke srahl sororla fin sakseng Lal. Oinge in wi Sie Mutwawaak Nacsnacs, nga ac kom enenu in fasr in ma lungse lun Christ pacl nukewa, ac akyokye lulalfongi lasr in El.

Saturday (2/20) Sifac: Mwe Kisac In Ahknacsnacsye Ma Koluk

Kunokon

By Surleigh Y. Tara

Saturday February 20 2016
Sifac: Mwe Kisac In Ahknacsnacsye Ma Koluk
Mwe Read: Leviticus 16:1-10

Surleigh Y. Tara

Mwe read se inge mutawauk ke akkalemyeyacn ma sikyak ke chapter 10 suc ma sramsram kin misa lun mwet tol luo. Mwet tol luo inge elos ma natul Mwet Tol Fulat, Aaron. Ke sripen elos tia akos mwe sap lun God nuke mwe kisac, panaacng use kasrkusrak sin God mwe ac El supama e fihrihr in onweloslac. Na pa God El fwak nusel Moses elan fwak nusel Aaron elan tuku ke pacl fal nuke Acn Mutal Na Mutal. Aaron el fin tia akos ma inge el ac tufwa misac pac oana tulik mokul luo natul, Nadab ac Abihu, ah.

Aaron el enenu in aknasnasyeyullah meet liki el ilyak nu in Acn Mutal Na Mutal. Pa inge ma God El sap kin nusel in akfasrye meet liki ma nukewa. Aaron elan use soko cow fusr in mwe kisac in afunlah ma koluk ac soko sheep mukul in mwe kisac fihrihr. Cow fusr soko inge ma elos in orekmaking sra kac in sang tuli mwe etauk nuke mwe loang lalos.  Kalmeyen tultuliyacn sra inge ma in sang afunlah ma koluk lal Aaron meet el utyak nuke Acn Mutal Na Mutal.  Na sheep mukul soko inge ma in itukyang nuke etauk lun mwe loang se in fihrfihr in muh use fohloh keng se nusin God. God El fin insewowo ke mwe kisac inge, na Aaron el tufwa kuh in utyak nu Acn Mutal Na Mutal.  

Meet liki na Aaron el ilyak nu in Acn Mutal Na Mutal se inge, el enenu elan yihlac ac nokomack nuknuk loeloes se.  Nuknuk se inge, ma in nukumyuck nuke Acn Mutal Na Mutal se inge mukena. Pa inge pacl se in yac se ma Mwet Tol Fulat el ku in ilyak in Acn Mutal Na Mutal in siyuck nunak munas ke ma koluk lal Aaron meet na tufwa tulik nutin Israel.  God El oacyacpac fwak tulik nutin Israel elos in sang lukwe nani ac. Elos in susfa lac piac kac sin nacni lukwe inge e kisackinyuck ac soko in supeyucklac in us ma koluk lun mwet Israel in som loes liki acn ma mwet u muta we. Tukin ma inge akfasryeyucklac na ma koluk lun mwet Israel fwa kuh in nunak munasiyucki. 

Nu sik ac kom in nunku lac Leum Christ El misac ke ma koluk lasr. Ke sripac se inge, kut tia enenu in akfasrye oana ke tulik nutin Israel inge oru.  Ke lung kulang lung God, nga kom misenge ku in prue ac siyuck nunak munas ke ma koluk lasr. Kut enenu pac in kalem kac lac God El God Mutal se pacnacng kulansap lasr Nusel uh enenu in yohk suhnak lasr. Enenu kut in aknasnasyelah insiacsr meet liki kut akfasrye kulansap lasr nu Sel. Kut fin tia akos ma inge, e tufwa yohk macta ke se akosten lasr.  Kulansap lasr nusin God uh enenu in tia fihlweliyuck. Kut enenu in sang insiacsr kewa ke ma kunasr.  Lelah tu akwuck ac kolyuck lun God in moul in kais sie sin sie. Tu ma inge in mwe insewowo ye mutun God Fulatlana.

Thursday (2/18) Sifac: Ahkoo ac Ahknacsnacs

Kunokon

By Kavika Abraham

Thursday February 18 2016
Sifac: Ahkoo ac Ahknacsnacs
Mwe Read: Exodus 30:1-10

Kavika Abraham

God el sapkihn nu sel Moses tuh elan muhtacwack ahkoo sie loang ma ac kisackihn mwe kweng muhkena,fahk muh elan tuhfah orekmakihn sahk acacia in pa kisackihn mwe kweng. Lusacn loang se el ahkoo inge enenu in inch 18 lusac ac 18 sralacp,ac fulat la an in inch 36.  Leum God el fahk nusel Moses muh loang se inge ma e kisackihn kuh ahknacsnacyelah ma koluk lal Aaron ac Wen natul.Ke sripen ahkola wowo lal Moses panang ma koluk lalos ingan ahknacsnacsyeyuklac.

Ma nu sik kom u pa kut in etuh in ahkolah moul lasr u met liki pang lal tuku nusesr.  Wo in ahkoo ac ahknacsnacs moul lasr u ke pacl lula ma utuck u nu sesr inge tuh kut in tia pihlesruh moul lasr u.

K.Abraham

Wednesday (2/17) Sifac: Ahknacsnacs Ahksahfyeyucklac

Kukokon

By Dcns Havelyn Tosie

Wednesday February 17 2016
Sifac: Ahknacsnacs Ahksahfyeyucklac
Mwe Read: Rome 3:21-26

Dcns Havelyn Tosie

Kulo kaksakin sie pal wowo ma sifwil tuku nu sesr kais sie, ke mwe luti nu sesr len na len. Mwe luti u oana kalem ke sifwa an, "Ahknwacsnwacs Ahksahfyeyukla" - tu moul lun met Israel ku met jew in pal soh, oana ke ma sap lalos, elos orekmakin srahn kosro - tu in mwe aknwacsyelos nuke moul, oinge, tu ke Jesus Christ, ke sripen pakotwen yoklana Lun God nu sesr, El supama Wen saok se fanna natul, tu lan ase srahl in ela ma koluk lasr kais sie, tu moul lasr misa tari, tu ke sripen misa lun Leum Lasr, kut moul. Kalmekin tu wen nutin God el aksafyela aknasnas ke srahn kosro, A tu lalalfongi ke En Wen,a Ngun, kut in akyokye in kut tu kut fwa moul...

Tuesday (2/16) Sifac: Srihsrngiyucki Nuhke Ahknacsnacs

Kunokon

By LM Tolenoa Kilafwakun

Tuesday February 16 2016
Sifac: Srihsrngiyucki Nuhke Ahknacsnacs
Mwe Read: Hebrew 3:1-6

LM Tolenoa Kilafwakun

Kulo kaksakin God Fhulat ke moul wowo kut pulakin, ac paing kowos nukewa su ma ac wi lolngok ac alutluti ke mwe read se Inge.  Ke fus se na omeet ke mwe read se inge, Bible English uh fahk muh" Holy brothers and sisters," Muhtal ac nasnas lun mwet lun God. Yok kalmeyen polo kahs se inge nu ke mwe nunak ke mwe read se inge. Mwe nunak yok ke mwe read se Inge, in liksreni na loacng nu ke oiyac muhtal lun God ke ma pwaye. Leum God El tuh srihsrngilyac Moses ac sang nu sel sie Kunokon na yok," Moses lan ku in musaheack Mwet lun God" su pa kalem ke tulik nutin Israel. Elan moleloslah liki moul in keok lalos in facl Egypt, lan ku in kololoslac nu ke facl in wuleacng, lan ku in tahfeacng akwuk ac masap lun Leum God nu selos, elos in ku in karihngin Fuhlat ac Mutahl lun God, elan ku in karungin Israel nu ke wulelah lun God ke tuku lun Christ.

Aaron el srihsrsrihsr sin Leum God lan Mwet Tol Fuhlat lun God nu in Loom Nuknuk Muhtal sin God. Elan ku in oru Alu nu ke kain in Ahkfulact nukewa lun Israel nu sin God. Elan oru pac Alu in ahknasnas ye mwet uh ke ma koluk lalos nu sin God. Men Leum God El ke elos in nacsnacs ac muhtal ye mutun God.(Leviticus 11:44,45) Christ El srihsrngiyuki sin Leum God in tuku oru orekma lal Facluh oana Moses, tusruk tu Christ El fuhlat lukel na Moses, ke sripen El tuku in tu musahi mwet lun God ke oiyac nukewa ke Ngun lun God. Su El tuku in tu ahknasnasyela ma koluk lun mwet uh ke srahl saok, ac musahi Temple muhtal lun God Faclu, Su El pa yot in sroasrik ac kut mwet uh pa yot in musah ke foundation se inge.( 1Peter 2:5 )

Christ El Srihsrngiyuki sin God tuku ke kewana Mwet Sap ac Mwet Tol Fuhlat. El tuku nu Faclu ke luman mwet a El God. El tuku in tu ahknasnasyela ma koluk lun mwet uh ac nekkutlac ke oiyac muhtal lun God. ( Galetia 5:22,23 ) Su ke srupen El mwet Tol Fuhlat, El tu oayapa kisac kin moul Lal sifacna in molela moul lun mwet uh nu sin Leum God.( Hebrew 7:25 ).

Inge Christ El muta oasr ke Lacpo Lacyot sin God Inkusrao su fahk kalem in Hebrew sie fus tolu an.
Mwe read uh ikacsla nusesin akilen pang lun Ngun nu sesr Hebrew 12:23 ke sie invitation, " Kowos tuku nu ke tukeni engan se lun un mwet pangpang Wounse nutin God, su inelos simlac tari Inkusrao, kowos tuku nu yurin God su nununku mwet nukewa, ac nu yurin Ngunin Mwet Wo su ahksuwosyeyuklac tari. Kulo kaksakin God Pahpah ke kahs in moul kahs muhtal Lal in sang karungin kut ke moul in lulalfongi lasr.

Kulo ma lahp
T.Kilafwakun

Monday (2/15) Sifac: Ahknacsnacs Wolacna

Kunokon

By Dcns Sepe Kilafwasru

Monday February 15
Sifac: Ahknacsnacs Wolacna
Mwe Read: Hebrew 2:10-17

Dcns Sepe Kilafwasru

Book se inge (Hebrew) simla nuhsin mwet Jew, kuh mwet Hebrew su forla mwet Christian ac pulakin kalyei na yok nuhselos ke pal se inge.

Mwe Read se inge akkalemye wolana lun God, su kalem ke Jesus Christ. God El oru tu Jesus Christ el fwa arulana fulat kesripen keok lal. Ke lung kulang lun God, Jesus su misa ke ma koluk lun mwet nukewa, inge akfulatyeyuck El ke sie tefuro lun wolana ac sunak kesripen misa su El keok ka. Keok Lal pwanma mwet puspus in wi ipeis ke wolana Lal. 

El aknasnasye mwet uh liki ma koluk lalos, elos nukewa su aknasnasyeyuckla, elos pangpang tulik nutin God oana Jesus sifana. Ac El tia mwekin in pangnolos mwet wial kuh tulik wial.
Kesripen mwet inge su El pangon “tulik wial” elos orekla ke ikoac ac srah, Jesus el orekla in oana elos, moulkin moul in mwet, tuh ke misa Lal, elan kuh in kunaoslah kuh lun devil, su asr kuh la fin misa.

Jesus El eklac nuhke moul in ikoac, in keok ac misa, pulakin ohiya nukewa ma mwet uh pulakin, lan kuh in oana sie mwet tol su oaru ac pakoten nuhsin God, tuh mwet uh in kuh in eis nunakmuhnahs ke ma koluk lalos. A oayapa elan kuh in kasrelos su srifeyuk mweyen el wi pa srifeyuk ke mwe srifwe lun falu.

DEACONESS SEPE KILAFWASRU

Sanri (2/14) Sifac: Kaksak Ke Sie Kosracni Na Yohk

Kunokon

By Rev. Takeo Likiaksa

Sunday February 14 2015
Sifac: Kaksak Ke Sie Kosracni Na Yohk
Mwe Read: Leviticus 23:15-22

Rev. Takeo Likiaksa

Sie inmsrlon kuhfa ma Leum God El oakiya ac sapkin mwet Israel elos in akilen ke lusen moul lalos pa ke Kufwen Kosrani. Sripa lun kuhfa se inge pa mwet Israel elos in folokweni nu Jeusalem ac oru aengani lalos ac in esam na koko wo lun Leum God nu selos, ac oru kaksak lalos nu sel, ac eis pacl lalos in aholla ouiyen moul lalos. 

Pacl ma elos in oru kuhfa se inge pa elos in oackla week fon itkosr tukin Sabbath elos oru kosrani lalos, len lumngaul tukin Kufwen Alukwela, pa mwet inge in tukweni oru akfulat lalos
Kufwen akfulat se inge pa in sang sie pac kisac sasu ke wheat, kais sie sou in sang lukwac loaf in bread manmanlah ke yeast, ac fahko se mwet ke kosrani lalos. Wi mwe sang lalos in ellah ma koluk lalos nu sin Leum God.

Kutu pac ma enenu elos in oru pa in tia orekma, tia kosrani in imac lalos tia pa imon imac lalos. Ac akfulat se inge in orek ke lusen len se. Yok sripac lun akfulate se inge in akilen orekma lun Leum God nu selos, ac elos in oru ke nunak paye ac ke insialos ac kaksakunul ke Kosracni lalos.
Kuhfa se inge lumweyuk nuke tuku lun Ngun Mutahl ac akwuki ku mutwacwacack lun Church. Wen nutin God moulyak liki inkulyu ke fahko se mwet, ac el muta fahlu len angngaul wi mwet tumal lutlut ac.

Tukun len angaul inge, el fahk lah enenu elan som lukwelos ac som nu yurin Papa tumal. Toko, el fah supama akwoyeack pa ke Ngun Mutal, in kasrelos. Na mwet tumal lutlut elos in tia som liki acn Jerusalem. Pa tukin len singoul fa Ngun Mutal tuku tu falyang nuke sie pacl in akfulat ma mwet Jew nukewa enenu in tukweni nu Jerusalem nuke akfulat lalos. Na kuhfa se inge pa Kuhfa lun Week se inge. Pa sifac uh fahk ke “Kaksak Ke Sie Kosrani Na Yok.”

Saturday (2/13) Sifac: Ke Sahflahiyac, Kuloh

Kunokon

By Surleigh Y. Tara

Saturday February 13 2016
Sifac: Ke Sahflahiyac, Kuloh
Mwe Read: Fwackyuck 11:15-19

Surleigh Y. Tara

Ke pacl se na ma ukuk akitkosr inge sikyak, mwe keok upac ke macta sin God motkeyuck in okwoklac nufin faclu. Ma upac inge tia sikyak uh, pusra lulap puspis tuku in kasrao mwe in akkalemye sikme lun Tokosrai lun God.  Kunaosyuck lun faclu pa motkeyuck in sikyak ke pulan pacl se inge ke sripen ma akkalemyeyuck ke ukuk onkosr suc ma sikyak ke Chapters 8,9, ac 10 ac. Na ke sripen takinyen ma upac sikyak inge, pacnacng motkeyuck na mu ma na upac nuke kunahoslah lun faclu se pa e tufwa sikyak, tusruk lung kulang lun God langoelah ma inge in tia sikyak. Ke ma inge, oatui lun Tokosrai lun God sikyak ac El Leum God suc ac tufwa kol faclu in pulan pacl se inge.

Kut kalem kac la number itkosr (7) akilen fohnlah sin God me. Na ukuk lun rappa se inge pa akilenye lac ma nukewa in aksafyeyuckla sin God.  Wen Nutin God pa sulosolla in leumi faclu ne tok ma patpat (Daniel 7:13).  Pacl se inge pa Leum Jesus El folok wi mwet Lal in kol faclu ke pulan yac 1000 se. Mwet nukewa fin faclu elos e tufwa faksufi in akfulatye ac alu nusin Leum God Kulana.  Tokosrai lun faclu e tufwa wangin kuh la in lain Tokosrai lun God. Faclu nofon ac ma nukewa loac ac tufwa kolyuck sin Leum Christ.

Ac tufwa pac oasr lain ac kasrkusrak lun mutun facl ac mwet kol faclu. Elos inge ac tufwa wangin ku la in akfasrye ku lalos. Mutun facl nukewa e tufwa ituklac ku la ke sripen elos e srike in tuyak lain God, tusruk macta lun God putatyang nu faclos ac e tufwa wangin ma elos ku in oru in lain kaiyuck lun God. Pacl se inge, ku nukewa itukyang nusin Leum Christ suc ma El pa Mwet Kol Fulatlana in pacl se inge a ne tok ma patpat.  Mwet koluk nukewa e tufwa pulakin foloksak lun God ke orekma koluk su ma elos akfasrye nusin tulik nutin God.  Keok mukena pa e sikyak nuselos in pulan pacl se inge ke sripen pa inge pacl in nununkeyuck nusin mwet koluk in oana ke mwet palu elos palyei ke pacl somlah ah.

Pacl se inge ma kolyuck lun Leum Christ sikyak, elos suc akos akwuck ac kolyuck lun Leum elos ac tufwa pulan wolana suc ma wuleukyang nusin tulik nutin God. Pa inge saflaiyen keok lun mwet lulalfongi. Pulan wolana ma ac tufwa sikyak nusin faclu ac kasrao e kapsreyuckeni ke sripen engan lulap lun God nusin mwet uh.  Yohk na elos suc akos kolyuck ac akwuk lun God. 

Friday (2/12) Sifac: Ahkyohkye Kuloh

Kunokon

By Kenye Belcourt

Friday February 12 2016
Sifac: Ahkyohkye Kuloh
Mwe Read: 2 Corinth 4:7-15

Kenye Belcourt

Kisen letter akluo lal Paul nu sin Church Corinth pa inge, su el akkalemye kena yok lal in akwoyela alein inmasrlolos.

El fwak oinge nu selos, Lela kut in sang kulo nu sin God tu kut ma sefana yurin Christ ac el kol kut in kutangla pal nukewa. Wolana lun God nusin mwet nukewa kulansupal pa Ngun, su use kalem nu sesr in fahkak ke Jesus Christ. Ke sripac se inge nunak lasr u tiacna munasla, manosr fwinne mutawaack in munaslah, ac moul in Ngun lasr u aksasuyeyuk len nuke len. Pal puspus ak-keokyeyuk kut, tusruktu kut tiacna kunausyuklac, kutu pal u kut alolo, tusruk kut tiacna fuleak, kalyeiyuk kut, kut tiacna mukanimtacl lah,ac finne anwuk kut, kut tiacna misac. Ac ke sripen asr lulalfongi yorosr, panang kut etulah Leum God, su akmoulyauk Leum Jesus ac el ac fwa oayapa akmoulyekutyak yurin Jesus, ac eis kut nukewa nu ye mutal. Ac ke ac puseni mwet suc eis kulang Lun God,ac fwa oayapa puseni pray in sang kulo lalos, nuke Wolana Lun God.

Na Lela nu sesr in Ahkyokye kulo ac kaksak lasr nusin Leum God ,tu paye lung Kulang Lal ac Fah wi kut netok ma patpat.

Thursday (2/11) Sifac: Finne Fuhkah, Kuloh

Kunokon

By Victor Melander

Thursday February 11 2016
Sifac: Finne Fuhkah, Kuloh
Mwe Read: Rome 7:14-25

Victor Melander

Mwe read lasr uh akkalemye nuh sesr lac Christian se oasr moul in ikwac ac moul in Ngun. Piyac kac moul se kom, nga, kut oasr ke uh. Kut liye lac fwin wangin ma sap ma koluk el sikyahk. Kut etu lac kut fwin moul kihn ikwac suh lain ma sap ac Ngun. Kut oapana sie mwet mah kukakunyuklac nah ye ma koluk. Ac ke sripen kut kukakunyuklac na ye ma koluk, kut oana sie mwet kupur. Ke sripen kut oana sie mwet kapur ye ma koluk kut fwinne srunga oru ma koluk, tusruk tu ke sripen kut mwet kapur ye ma koluk kut oru ma koluk. Moul in ikwe ac moul in Ngun ahmahin pacl nu kewah. Pahsis kut enenu nah in sulelac moul lasr in arulana sumat. Kut fwin sulelac kut in tingtingi ke Ngun kut fwac kutanglac ma koluk ac moul in ikwe. Kulo ma lulap ke pacl lasr uh.

Wednesday (2/10) Sifac: Ke Ma Nuhkewa, Kuloh

Kunokon

By LM Skipper Ittu

Wednesday February 10 2016
Sifac: Ke Ma Nuhkewa, Kuloh
Mwe Read: Ephesus 5:15-20

LM Skipper Ittu

Sifwil paing kowos ke Inen Leum lasr Jesus Christ! Sifac se lasr nuh ke Wednesday se inge fahk muh "Ke Ma Nuhkewa, Kuloh," oasr in Ephesus 5:15-20. Kuhsahl Paul nuh sin Mwet Luhlahlfongi ke Church Ephesus pa inge. Elos in sang kulo ke ma nuhkewa nuh sin God. Elos in liyacung moul lalos tuh elos in lahlmwetmet ac oruh ma luhngse luhn God pacl ac len nuhkewa. Elos in nwacnwaclah ke Nguhn Muhtahl, ac tiac ke mwe sruhi kuh wain, Elos in kahskahs nuh sin sie sin sie ke psalm ac on muhtahl. Elos in oacyacpac onkackin psalm nuh sin Leum ac kaksakuhnuhl ke insiaclos nohfohn. Kahsrekuht in oacyacpac sang kuloh nuh sin God ke ma nuhkewa. Lah tuhkuh wo kuh koluk nuh sesr, kuht in lahlmwetmet in esam lah oasr sripac luhn God ke ma nuhkewa. Fahkack kulo lasr nuh sin God ke ma nuhkewa kahlwem yohk ke orekma kuh moul lasr!

Tuesday (2/9) Sifac: Kuloh Ma Nuh Sin God

Kunokon

LM Tolenoa Kilafwakun

Tuesday February 9 2016
Sifac: Kuloh Ma Nuh Sin God
Mwe Read: 1 Chronicle 17:16-27

LM Tolenoa Kilafwakun

Kulo kaksakin God ke moul wowo kut pulakin ye karunginyuk ac pahkotwen ke lungse kawil Lal. Kulo ke kulacng ac oaru Lal.El srack na Nekkut kais sie ke Kahs in moul Lal in ahksuwosye inkanek lasr ke moul in lulalfongi lasr.

Mwe lutlut se Inge fahkak ke"Sie Pray in sang Kulo ac Kaksak lal David nu sin Leum God". Mwe read uh fahk lah David el som nu in Lohm Nuknuk Muhtahl sin God ac oru Pray lal we nu sin Leum God, tukun Nathan Mwet Pahluh el tu fahkak kahs lun Leum God nu sel.Su Leum God El tu sap Nathan lan fahk kewa wulelah lun God nu sel David ke ma su God El ac tuhfah oru." Leum God elah tufah oru elan pwengpweng oacna sie mwet kohl fulactlacna fin Faclu,El ac tufah karungunuhl liki mwet lokoalok lal nukewa. El ac fah oru tuh in asr tulik nahtul, El ac tufah oru tu sie sin wen nahtuhl in fah tokosra su El ac fah karungin tokosra lal in Ku, su el pa ac musahi sie Temple nu Sel, ku nu sin God.El ac fah oru tuh Fitac lal inleum ma patpat su El ac fah Pahpah Tumal ac el ac fah Wen Natul..su pa Christ Jesus.Su El ac tufah Tokosrai ma pahtpaht ac fah wacngin sahflaiyen m Lal."

David el akilensuwowos, oaru, pwaye, ac lung kulacng lun Leum God nu sel , Oinge el oru pray in sang Kulo ac kaksak lal nu sin God in ahkfulactyacl ke sruii lulahp lal ac kaksak ke ma wolana puspus ac mwe insewowo el pulakin sin God me su el fahk kalem ke fus 16-19 an. David el pray ac kaksakin God ke sripen pwaye lah wacngin sie God oacna El, El mukefanna pa God moul, God kulacng, God pahkotwen ac pwaye su molelah Israel liki moul in kohs lalos ln acn Egypt ac oraclos tuh elos in mwet Lal. Pwengpweng lun God Fuhlact akilenyuk wi orekma Usrnguk ac ke molela Lal nu sin Israel liki inpoun mwet lokoalok.El oayapa pray ac kafwe sin Leum God Land ahkpayeyei wulela Lal nu sel ke tulik natul. Leum God lan filiyac insewowo Lal nu faclos. Elan ahkpayeyei Tokosrai lalos ke fail nukewa ac Fitac lal in fah tokosra ac in fah wacngin saflahiyentokosrai Lal.

Kusen pray lal David ingeel ahpusisaclyacl sifahna nu sin God. El liksreni na ahkkalemye pusren Kulo ac Ksksak lal nu sin God. El oayapa akilen mweinsewowo su el ac sou lal pulakin sin God ac wulela nukewa lun God nu sel su ma ac fah tuku tokol.David el sruii ac kulo kin decisions lun God nu sel ac sou lal, Yok sruii ac kulo lal David ke Wulela nukewa lun God nu sel, El pray ac ahkfulactye akwuk fulact lun God nu sel.

Sahp pus pacl kut silahklahklac in pray ac siyuk ke kasru, liki in sang kulo ac fahkak kaksak meet liki in siyuk ke mwe enenu. Kut seacsmak ke pacl pus in oru ksksak lasr nu sin God ke insewowo kut pulakin Len nukewa. Lela pacl lasr uh in kaksak ac sang kulo nu sin God Pahpah men El WO Ac Lung Kulang Lal Nu Sesr yoklacna
Kulo nu sin God Pahpah ke Kahs in Moul tuku inahkasmakye kut ke moul in lulalfongi lasr kais sie ke Len nukewa. Nga lulalfongi lah mwe nunak uh tuku in karihngin kut misenge. Sahp kut fahfahlac ln tilac akilen kulang ac oaru lun God Pahpah nusesr oinge mwe nunak uh tuku in tu ahkacsmakye kut in akilen God Pahpah in ma nukewa in moul lasr "In pacl wo ac in pacl koluk".

Kulo ma lahp
T.Kilafwakun

Monday (2/8) Sifac: Kaksakin Leum God

Kunokon

By Dcns Tulpe Dizon

Monday February 8 2016
Sifac: Kaksakin Leum God
Mwe Read: Psalm 147:1-11

Dcn Danny & Dcns Tulpe Dizon

Kaksakin kulang lun Leum God nu sesr ac oayapa ke me lutlut wolana Lal nu sesr. Me lutlut nu sesr ke Monday(02-08-2016) suc tuku in luti kut ac fwak "Kaksakin Leum God." Psalm: 147:1-11 suc pa me read se akuteya nu sesr ke sifac se lasr inge. Psalm soko inge el soko psalm ma simla in ku in Kaksakin Leum God.Kaksak el tuku ke oiyac puspus.Kom ku in kaksakin God ke sramsram lom,ke pray lom,ku finne on lom.Psalm soko inge el akkalemye ke kaksak ma fal in orek nu sin Leum God ke pusren on suc kas kac inge kaksakin Leum God ke orekma usrnguck Lal,ma El akfasrye fin fwalu.Kewana oiyac ma mwet uh oru in akfulatyacl,suc pa inge luman kaksak ma God El insewowo kac uh.Ke sripa se inge panang kut fin lungse Kaksakin Leum God na kut in akfulatyacl ac lulalfongi ke lungse kawil Lal.

Sanri (2/7) Sifac: Ahkolah Nuhke Kuhfwen Ahluhkelah

Kunokon

By LM Quartus Esau

Sunday February 7 2016
Sifac: Ahkolah Nuhke Kuhfwen Ahluhkelah
Mwe Read: Exodus 12:1-14

LM Quartus Esau

Leum God El nuna tu akkalemye nusel Abraham la fwilin tulik natul ac mu muta in kohs ke sie acn ma elos mwet sac nu we ke lusen year 400 (Gen.15:13). Tusruktu, tukun ma nukewa Leum God El ac fwa aksukosokyelosla ac kalyei mutunfwal se ma sruokolosi inge.

Me read se inge akpayei fwak se lun Leum God nusel Abraham inge. Ac inge El akola in molela tulik natul liki kohs lalos. Pacl se inge, Moses ac Aaron pa kol tulik nutin Israel. Leum God El sramsram nuselos a fwak ma elos enenu in oru in akola nuke molela lulap se inge.

Ahkoeyen Kufen Alukela se inge pa kalem ke kais sie sucu in akola soko kosro (sheep ku nacni) fusr ma matwac oasr ke year se ac wangin mas ku ma koluk ke mano. Ke lwen ak singucul akosr ke malem se inge, elos in uniyac kosro soko inge, sang srah kac mosrwela sru lukoac ac acn lung ke srungul ke lohm nukewa ma kosro inge ac mongolac we. Elos in akmolyela kosro inge ac mongo kac, wi mahsrik mwen ac bread tiac pulohl. Akmolyeyen ikoa inge in fonna manman wina sifa, niac, ac kainfoko. Elos in tiac kang fin takmwek ku pohel. Kutena ma lula in isisyak ac tiac oan nuke lututang tok ah.

Leum God El oayapa sap elos in nuknukyang, falukyang, ac akola sikacl lalos nuke tifoklac lalos liki fwal Egypt. Pa inge ohiyen ahkolah lun tulik nutin Israel nuhke Kufwen Ahlukelah se emet lalos.

Me read u tafela in akkalemye ke oiyac ma sikyak ke fong se inge, la Leum God El fwasr sasla fin acn Egypt ac onwelah wounse mukul nukewa sin mwet ac kosro ma wangin srah akilenyac motonoa in lohm se. Lohm nukewa ma oasr akucl in srah se inge kac, Leum God El fwasr aliki ac tiana oru kutena ma nu se.

Srahn Jesus pa me akucl lasr nuke moul ma patpat. Elos nukewa suc wi lulalfongi ke me akucl se inge ac fwa oana tulik nutin Israel in pulakin sukosokla liki me keok ac kohs lalos; a elos nukewa suc tiacna lulalfongi ke me akucl se inge, ac fwa oana mwet Egypt in wowoyak ke pusren tung ke pacl se mulat lun God tuku. Lela kut in wi akoo Kufen Alukela safla lun God, tu pacl se El tuku in wangin tung ac asor yorosr.

Saturday (2/6) Sifac: Ke Tuhlihk Notuwos Uh Siyuck

Kunokon

By Lucilla S. Talley

Saturday February 6 2016
Sifac: Ke Tuhlihk Notuwos Uh Siyuck
Mwe Read: Joshua 4:1-7

Lucilla Talley

Ke Joshua el kol tulig nutin Israel tuku sun infwal Jordan Leum God el sap elos in wis tuptup lun God ac tui infulwen infwal uh Ouinge Leum God el tulokinya fwasr lun kof u.Na elos fwasr alukela Ouinge Leum God el sap Joshua elan sulala kais sie mwet in kais sie sruf singoul luo in srukwak kais sie yot infwal Jordan in welulos nu yen elos ac akwuki we kuh muhta we Na in oana ke sifwa lasr uh fwak ouinge Ke tulig nutuwos uh siyuk la mea kalmen yot singoul luo inge na kowos in topuk fwak la ku lun Leum God akmisyela infwal Jordon ne ke mwet nukewa ac oayapa tuptup lun Leum God utyak liki infwal uh ac sun layacnah.

Lela nusesr in akkilen kuh yok lun God. El mukena ku in ase nusesr kutanglah ke pacl ma upac siskyak. Kut enenu in filiyac in mwe asmakin nusesr, pacl se ma kut sun mwe kutanglah ke moul lasr uh, kut in esam lac kuh lun God pa akfasrye kutangla inge in sikyak. Ma kunasr in tafeacng nusin mwet nukewa weang lulig natusr ac nutin natusr ke kuhlacna lun God. Ouinge kut wi kalem kac ke Leum God el supama wen kulo se fannanatul in tuku misac ac molikutla liki ma koluk lasr ac acse Ngun Mutal lal in kol kut tu kut nukewa su lulalfongi in El fwa eis moul ma patpat.

Friday (2/5) Sifac: Kahs In Kahsruh Ipsrihsrihkiyucki

Kunokon

By Lipan Welly

Friday February 5 2016
Sifac: Kahs In Kahsruh Ipsrihsrihkiyucki
Mwe Read: Oekyuk 9:1-4, 13

Lipan Welly

Ma se meet, srui yohk in wi mwet nukewa in sang kulo lulap nu sin LEUM GOD ke moul wowo kut pulakin. In oana pacl nukewa paing mwet nukewa ac God bless.

Mwe lutlut se inge sifil akesmakinye kut ke akwuk ma LEUM GOD El oakiac nu sin tulik Israel (Ex 12:14:20). Oana ke mutawaek in chapter 12 ke Exodus, LEUM GOD El kaskas nu sel Moses, ac fahk, Malem se inge kowos fah oru tuh in malem se emeet ke year nu suwos. Sang akwuk inge nu sin mwet Israel nukewa: ke len aksingoul in malem se inge, kais sie mukul enenu in sulela soko sheep fusr ku soko nani fusr nu sin mwet in lohm sel in mongo kac (Ex 12:1-3).

Exodus chapter 12 luti kut ke awkuk ma LEUM GOD El oakiac nu sin tulik natul (Israel) ke elos e som liki an Egypt. Akwuk se inge El oakiac in sang molela wen se emeet nutin tulik Israel inge. Kut etu lah akwuk se inge tiana eteyuk sin mwet Egypt (Ex 12:29-30) oru wen se emeet wi kosro soko emeet natulos misa. Pa inge akwuk se ma oakia “Kufen Alukela”: tulik nutin Israel inge in mosrwela sru lukwa ke mutunoa, ac acn lucng ke mutunoa, ke lohm nukewa ma kosro inge ac fah mongola we (Ex 12:7). Kosro inge: sheep ku nani fusr enenu in year se matwac ac in wangin ma koluk ke mano. LEUM GOD El molela wen se emeet nutin tulik Israel inge ke sripen srah El liye ke lohm selos “El Alukela, Passover”.

Mwe lutlut se inge mutawaek ke tukun year se ma tulik nutin Israel inge tu som liki acn Egypt. LEUM GOD El kaskas nu sel Moses yen mwesis Sinai ke malem se meet lun year se akluo ( Oekyuk 9:1). El fahk, “Lela mwet Israel in liyaung Kufwen Alukela ke pacl pakiyuki nu kac (v2). Malem se emeet ke calendar lun mwet Hebrew (Nisan/Abib) pa March-April ke calendar natusr uh. LEUM GOD El fahk tulik Israel inge in sulelah kosro soko inge ke len aksingoul ac na ke eku in len aksingoul akosr elos in fah uniya ac sang srah ah mosrwela sru ke lohm selos. Len se emeet ke month ke Hebrew calendar mutawaek ke infulwen calendar natusr uh (March 15-April 14=Abib). Kowos e som liki Egypt ke len se inge ke malem se meet, malen in Abib (Ex 13:4).

LEUM GOD El na mutawaek in akkalemye lung kulacng Lal nu sin mwet Israel inge ke elos muta in mutacnfacl Egypt. El tuh na oakia wulela Lal nu sel Abraham la tulik natul ac fah mwetsac in sie facl su tia facl selos. Elos e fah mwet kohs we, na ac fah arulacna orek elos koluk, ke lusen yac angfoko (Gen 15:13).

Mwe lutlut se inge fahk: ke eku in len aksingoul akosr ke malem se inge, kowos fah liyaung fal nu ke ma sap ac oakwuk nukewa nu kac (v3). Ke ma inge Moses el fahkang nu sin mwet uh elos in akfulatya Kufwen Alukela (v4). Kahs in Kahsru Ipsrihsrihkiyucki pa sifwa na misenge uh oasr in Oekyuk 9:1-4,13.

Kut liye ke mwe lutlut se inge lah LEUM GOD El ke mwet lal in akos akwuk Lal. God El fahk nusel Moses elos in akfulatya Kufwen Alukela ac fahk nu sin tulik natulos lah mac kalmacyac nuselos. God El molela wen se emeet nutin tulik Israel inge ke sripen akos lalos: elos mosrwela sru ke lohm selos ke srah ke kosro year sie mwatwe ac wangin ma koluk kac. Akwuk se inge akkalemye lah LEUM GOD El na mutawaek in oru akul Lal lah sie pacl, Wen sefanna natul e tuku moli kut lac. Jesus Christ El tuku tari misa ac moulyak in akpacyelah ma nukewa ma LEUM GOD El wulela nu sin mwet nukewa. Efin kut forlah liki ma koluk lasr ac eis ma LEUM GOD El oakiac nu sesr ke Wen sefanna natul, kut e fah moul.

Lulalfongi ke misa ac moulyak lal Jesus Christ pa e sang moli kut lac nukewa. Oana ke mwe lutlut se inge fahk ke Kufwen Alukelah, mosrweyuklac lun sru ke lohm sin mwet ma kosro inge mongolac we pa molela wen se emeet natulos. Srah orekma kin yuk ke lohm sin mwet inge pa fahkak ke Sral Jesus ke El misa fin saksing, ac moul yak kom ac nga in eis moul ma patpat. Sifil paing mwet nukewa ac LEUM GOD Elan wi kut nukewa sanno tuku Lal. God Bless!

Thursday (2/4) Sifac: Mwe Keok Ke Locust

Kunokon

By Hanna Alokoa

Thursday February 4 2016
Sifac: Mwe Keok Ke Locust
Mwe Read: Exodus 10:12-20

Hanna Alokoa

Mwe read u srumun ke mwe keok akalkosr su Leum God El supama nufin an Egypt ke pal in srou lun tulik nutin Israel.

Ke sripen upa lun insial Tokosra in fulela tulik nutin Israel, panang Leum God El supama mwe keok ke locusts in afunla fin an u a fin sahk u, su fahk mu sralsrallah ke matoltoliyan un locusts u. Kangla fokin saku nkewa...

Tokosra el solaclma Moses a Aaron a siyuk elos in prue nusin Leum God lalos in esla mwe misa se inge lukel...tu ke sripen likekelacna lun insial panang mwe keok inge in putati facl a mwet lal in an Egypt.

Moses el som a prue nusin Leum God. A ke ku lun God, El supama sie eng in oklah nofon locusts u nuin Meoa Srusra. Tia siefanna locusts u lulah.

Leum God El sulpana akupaye insial Tokosra in fulela tulik nutin Israel.

Mwe lutlut u luti kut in etu la Leum God pa lela ma u in sikyak; ac El pac pa tulokinya ma u in tia sikyak u. Ku nukewa asr Sel .

 

Wednesday (2/3) Sifac: Mwe Keok Ke Loang

Kunokon

Dcns. Havelyn Tosie

Wednesday February 3 2016
Sifac: Mwe Keok Ke Loang
Mwe Rwad: Exodus 8:20-29

Dcns Havelyn Tosie

Sifwil kaksakin kulang lun God su sifwil ase moul lasr ke malem sasu se inge, Sie sin sie wowo ke Kas lun God, Kaksakin a Fal tu kut in tukeni eis in mwe lutlut nu sesr kais sie. Mwe lutlut u srumun ke sap lun God nu sel Moses, lan ku in tafwela pusral nu sel tokosra Pharaho. God El nuna etu (omnicient) nunak lal Pharoah a el ke konaak pa usyan akostwen lal Moses, su ma sumusla u fwakla, Moses el nuna srisrngiuki kalem la el pa e kolla tulik nutin Israel liki kohs lalos. Panang pal puspus tokosra el kiapelos, ne oinge, Leum God el sapkin Moses lan sifwil sonol tokosra, tu elan fulela met lun God(tulik nutin Israel) inge. Tukun sap lun God inge, ma inge srakna tia lela yurin tokosra lun an Egypt, ouinge God el sifwil akkeokyalos ke loang, su mwe rid u akkalemye la, God el sifwil nwacklah an we ke loang finne loom sin mwet lal a infohk in an we, ma inge sifwil akkeokye nunak lal Pharaho(tokosra) Ouinge, tokosra el panglol Moses a Aaron, nuke kisa lalos, tusruk, Moses el fwak oinge la, elos a misa, elos fin a oru mwe kisa inge, ke sripen mwet lal Egypt elos tia lungse a elos a tanglalos nuke elos a misa. Moses el sifwil kafwe tu tulik nutin Israel in som nu yen mwesis u in oru mwe kisa lalos we. Ke mwe rid inge (Joshua 24:15 a Isaiah 7:15-16 a John 5:39) akkalemye la asr sulala nuke akos ku seakos. su God el ne etu mac asr yorolos, ke oru lal Moses a Pharaoh, tusruk kena a lungse Lal nu sin mwet lal, el sulalla Moses lan tafwela pusral ke sripen akosten lal. La fuka ma oiya ma kut kais sie oasr ka, lela kut in orekmakin inse akostwen lasr in kol kut nuke finsrak lasr oana ke Moses oru, a el kafweang na in akos ma Leum God el sapkin nu sel.... Pa ingan koanon Wednesday 2/3/16 - Sifwa: Mwe Keok ke Loang - Book: Exodus 8: 20-29 akkalemye

Tuesday (2/2) Sifac: Kuhfwen Ahluhkelah Sahflah Luhn Jesus

Kunokon
By LM Tolenoa Kilafwakun

Tuesday February 2 2016
Sifac: Kuhfwen Ahluhkelah Sahflah Luhn Jesus
MwecRead: Matthew 26:20-30

LM Tolenoa Kilafwakun

Kuloh kaksakin God Fulat ke moul wowo kut pulakin ac ke mwe lutlut wowo suc tuku in karihngin kut ac akacsmakinye kut ke moul in lulalfongi lasr kais sie.

Mwe read uh srumun ke kufen ahlukelah saflah lun Jesus wi mwet tuhma lutlut 12 lal. Fahk lah ke elos tikeni in oru alu ke akfulatyen kufwen Alukelah/Passover lalos, lah efuh elos in akilen kufen alukelah,kufwa se inge - akasmakinyen pacl se Leum God el uniyac won sense tulig ac kosro nukewa nutin Egypt. Ac ahlukelah lohm nukewa sin mwet mwet Israel ke sripen akucluh lohm nukewa sin Israel ke srahn lamb. Suc pacnacng Israel in sukosoklah liki kohs lalos in acn Egypt. Ke elos mongo ke kufwen alukelah Jesus el fahk ke verse 21 an oinge " payena na nga fahk nusuwos sie suwos e tukakinyuyak"., Asor insiaclos ke kas lun Jesus, tusruk tu ma inge nukewa ma ke akwuk fulact lun God. Ke pacl se inge Jesus el akfahsrye sie tepu nuselos. El orekmakin bread ac wine ke tepu soko lal Inge. El eis bread sang kuloh kac, sang nusin mwet tumal lutlut ac fahk" kowos eis ac mongo ma inge monuk". El sifil eis cup sang kuloh kac,sang nuselos ac fahk " ma inge srahk lun wuleacng suc ukiyuklac in eelah ma koluk lun mwet puspus".

Jesus el established kufwa lun leum in ahollah kufen ahlukelah ke sripen elac kihsac kihn moul lal in molelah mwet facluh. 1 Corinth 5:7b bread ke kufwa lun Leum pa "monin Leum". Suc musahllah fin sakseng ke sripen mwet uh. Ke kut eis bread se Inge, kut wi akupahsri nuke monin Leum. Ku kupahsryang nuke monin Leum. Srahn Leum molikutlac liki moul sukawihl lasr ac folokinkut nu ke moul in finsrak uurin God pahpah. Bread el akkalemye lah kut mwet nuhtlah nuke moul. Na ",Cup of Wine", engan kin insewowo lun God nusesr, ku fahk pac muh " the Cup of Blessing". Cup of blessing nanack kewa insewowo lun God nusin mwet u wi akupahsri wowo lun God nusesr. (Kut tiac sifil Gentile). Kacl Adam kut lie cup in mulat lun God. Revelation 14:10 Jesus el nihm cup in mulat lun God ke sripen mwet uh. John 18:11 suc srahn Christ sulpacna nawellah sie cup sasuc suc pahngpahng " the cup of blessing" insewowo ac molelah nusin mwet facluh. Psalm 116:13, wangin saflah lun cup of blessing. Elos nukewa suc nim ke cup se inge elos mwet nuhtlah nusin God ke srahn Christ. Fahko ke sahk vine ke cup lun leum oacyacpac akkalemye ke srahn Christ,sororlah fin sakseng ke sripen mwet uh. Lelah kuht in akilen lah Jesus el kisackin moul lal nusin mwet uh oacna soko lamb. Srahl sororlah aknasnasyelah ma koluk se fwalu ah, ac oayacpac el aksukosokyekut lah liki misac nuke moul.

Kuloh ma lulahp ke kas in Moul lun Leum God in Kol moul lasr kais sie.

Kuloh ma lulap,
TKilafwakun

Monday (2/1) Sifac: Tuhlik Fuhsr Jesus Ac Kufwen Ahluhkelah

Kunokon

By Dncs. Sepe Kilafwasru

Monday February 1 2016
Sifac: Tuhlik Fuhsr Jesus Ac Kufwen Ahluhkelah
Mwe Read: Luke 2:41-49

Dcns Sepe Kilafwasru

Ke akwuk lun God nuhsin mwet Jew, kais sie mukul nukewa enenuh in som nuh Jerusalem in alu nuhsin Leum God, ac oruh akfulat lalos ke Kufwen Alukela, Kufwen Kosrani, ac Kufwen len Aktuktuk.

Mwe read lasr uh akkalemye lah pal se inge, elos oruh Kufwen Alukela lalos. Kufwen Alukela uh ma in akasmakinyalos ke pal se God El onelah won sese nuhtin mwet Egypt nukewa ah ac usaloslac mwet Israel liki kohs lalos in an Egypt.

In pal se inge, Jesus el yac 12 matwac. El wi parents lal uh som nuhke Kufwen Alukelah se inge in an Jerusalem. Ke tari kufwa uh, elos folok nuh yen selos, tiana etuh lah Jesus el tiana welulos folok. Ke elos etaak lah el wangin inmasrlon mwet uh, elos sifilpacna folok nuh Jerusalem. Fwaklah, tukun len 3, elos fwa konalak in temple uh. Temple Court se inge pengpeng in an Judea nofon, an in lutlut se. Pa inge an se ma Paul el tuh lutlut sin mwet luti se we pangpang Gamaliel. Ke pal elos oruh akfulat lalos ke Kufwen Alukela uh, mwet luti, mwet lalmetmet ac fulat lun mwet Jew elos ac oruh pa toeni lalaos in lutlut, pwacpa, ke mwe sramsram inmasrlolos. Ke Jesus el muta inmasrlolos inge, el kisen siyuck ac topuk pac kisen siyuk lalos, ac elos arulana lut ac fwefwelac. 

Mwe sramsram ke topic na popular se lalos in pal se ingan pa tuku lun Messiah. Suc elos arulana sano ac etu muh apkuran me pal in tuku lal.Ke elos konalak, Mary Nina kial el siyuck sel, Wen efu kom kuh oruh ohinge nuh sesr? Kut fosrngalah in suk kom.

Jesus el topuk ac fwak, Ya komtal tia etuh tuh fal ngan muhta in lohm sin Papa tumuk? Elos tiana kalem ke ma El fwak inge, tusruk Jesus el akos ac weluhlos som nuh Nazareth, an selos. El ne etuh lah Papa napaye tuhmacl uh pa God inkusrao, el tiana pilesruh parents lal in moul in ikoa. El welulos som ac muhta ye kolyuk lalos ke lusen yac 18.

Mwet lun God, mwet lalalfong, enenuh in karingin ac oruh ma kunalos nuhsin God a nuhsin mwet wialos. Kewana ke moul in ngun ac moul in ikoa. Pa inge pal se emet Jesus el akkalemye lah el wen nutin God Fulat.

Deaconess Sepe Kilafwasru