Kunokon
by LM Driskell Jack
Tuesday April 28 2015
Sifac:Moul Suwohs Ye Mutun God
Mwe Read:1 Tokosra 2:1-4
 |
| LM Driskell Jack |
Mwe luti nu sesr misenge ke ‘Kahs in Kol’ natusr uh, akkalemye ke sie ouiyac na mwowo kut Papa in lutlut kac. Ouiyac se inge sikyak inmacsrlol Tokosra David nu sin wen natul, Soloman elan ku in pulaik, akos ma sap simla ke ma sap lal Moses, ac in moul suwohs ye mutun GOD Papa. El ouyepac akkalemye la efin sik ouige, ac sang mwo ouiyac nu sin sie wen natul, Soloman, elan kuh in mactuhack ke inkanek kawil lun GOD Papa, ac in ac sang pa mwo ouiyac nu sin fuhlin tulik natul.
Mwo ouiyac nu sin fuhlin tulik natul pa sikyak ke GOD Papa el ac sang ‘lalmwetmet’ nu sel Soloman (1 King 4:29); a sohl la inmacsrlon tulik natul Tokosra David in sacfuhnsuliyac orekma su el tuh finsrak nukac ac tia lehyukla nu sel sin GOD Papa, ke sripen fohkfok lun orekma lal. Finsrak na yok se lal Tokosra David ke yeac angnaul (2 Samuel 5:4) ma el kol an Israel ac Judah; pa in muhsac ela sie Tempul in nwanack ‘tuptup lun GOD Papa’ (1 Chronicle 17:1). Tusruktu, GOD Papa el suhpela Mwet sap Nathan elan akkalemye nu sel Tokosra David, “Tia kom pa mwet se ac musai sie tempul nu sik ngan muta loac”(1 Chronicle 17:4).
Mwet se ma GOD Papa El lela in musai Tempul se sel inge pa wen natul Tokosra David su pa kut etu muh Soloman; su GOD Papa El sang lalmwetmet nu se tari. Ke sripen yok tung lun insiyel Tokosra David ke sripen el arulana ke in ‘El pa musai Tempul se inge, oru,(ac sang nu sel, elan wuhli Moul Suwohs Ye Mutun GOD Papa nu sin natul in moulkin).
Tokosra David el ahkulen in pacl se ma kohsrkosr la nu sel elan akfahsryela fihnsrak yok se lal nu sin GOD Papa in muhsacehack tempul lal. Tusruktu,Tokosra David el etu la ma akwuki yurin GOD Papa; tia kuh in tahfongla. Ke sripac se inge, inmacsrlon tulik natul: (Amnon, Chileab, Absalom, Adonijah, Ithream) ke lusen yeac itkosr ma el muta Hebron (2 Samuel 3:2-5), Na natul pac fihn an Jerusalem,(Shammua, Shobab, Nathan, Soloman, Ibhar, Elishua, Nepheg, Japhia, Elishama, ac Eliphelet (2 Samuel 5:14-15); el etu insiyal la GOD Papa el ahkulen wulela lal nu sin sie sin wen natul inge, su pa Soloman elan ku in akulen fihnsrak yok se lal ma el kofla akfahsryela, meet liki el eis mongla lal.
Tokosra David el ouyepac akulenack la ke el moul in mwet, ac tahfongla ke ma pus, GOD Papa El srak wehlul ac srohokyac moul lal in karunganul. Ac ke pacl se el akulenack pakoten lun GOD, ac forla in fahsr ke inkanek paye ac Moul Suwohs Ye Mutun GOD Papa, pa mwo ouiyac itungyang nufin sie wen natul kel Soloman. Ke sripac se inge, sang nunak na ku nu sel Tokosra David, elan ku in orella sie wulwul na ku in sapkin nu sin wen natul in tia kufla liki inkanek suwohs ac paye lun GOD Papa Tumasr.
Kacpin mwe lutlut se nu sesr ke konokon se inge pa: GOD Papa el wi kut karingin kut pacl nukewa in moul lasr. Ac mwe luti ke moul lal David akkalemye la ke moul in mwet lal, yok tahfongla lal, oana nga ac kom. Tusruktu, Tokosra David el akuhlacnack, forla, lemtuhlahack kac nu sin GOD Papa. Kut ahkulen la ke pacl se ma Tokosra David el moul in mwet ke kuh ac lungse lal sifacna, arulana pus ongoiyac nu sel. Ke pacl se el forla ac kupacsyang in kuh nu sin GOD Papa, pa kalem ke mwo ouiyac ma sikyak nu sel ku tulik natul Soloman ac fuhlin sruf natul ma wi kol Israel ac Judah.
Mwe lutlut uh luti kut Papa uh, in ku in sismouk, pusisel in nunak in sackuhnla pacl lasr in orella wulwul kuh lasr nu sin tulik natusr. Finsrak yok san pa elos in pusisel in suk moul kawil ke lungse ac pakoten lun GOD Papa nu sesr. Ma inge ac kasre kut in moul fal nuke fihnsrak lun GOD Papa nu sesr in moul suwohs in karingin kut.
Kulo ma lulap ke mwe lutlut mwo tuku in kasre kut kewa!
LM Driskell J. Jack
No comments:
Post a Comment