Saturday (10/31) Sifac: God Ahksukohsohkye Sac

Kunokon

By Surleigh Y. Tara

Saturday October 31 2015
Sifac: God Ahksukohsohkye Sac
Mwe Read: Orekma 12:12-18

Surleigh Y. Tara

Nga wi pac engan in tahfwela kunokon se pac inge ac ke lung kulang lun God nusesr kewa pacnacng kuht moul ac kuh pac in wi kuhlansap.

Paye lac wangin sie mwet kuh in kisen siyucki kuh ac usrnguck lun God uh.  Ke mwe read se ing, God El supanma lupufacn se in ikasuhluhl lah Peter liki prison.  Kuht kahlem ke mwe read se inge, suc ma tahfweyen Kunokon nuke Sanri, lac lupufacn se pacnuhl Peter ne kac el sun lukunum ke prison na el wanginlac. Sie ma kuht in kalem kac uh pa, ke Peter el tufoki liki kapur lal, el tia som suk in akfasrye lungse lal sifacna, a el som suk yen ma mwet lulalfongi toeni ac prue we.

Kuht ku in lulalfongi lac ke sripen prue lalos ke mwe read se inge pa ikacsuhlluhllah Peter.  Elos orekmaking kalem suc ma God El acsang nuselos in wihklac liki mwe kohs suc ma kuh in puhtat nuhfaclos. God El use nusesr ip lasr in orekmakin kahlem suc El fihliyac nu fasr in kuh in kahingkihn mwe keok ma sikyak nusesr. Pa kuht akilen ke mwe read se inge lah, akwuk lun God uh tahfema nusesr in pulakin wolana tuku ke akosten. Meyen ma wowo mukena pa tuku sin God me ac kuht enenu in sifacna liyacng mukuikui lasr uh in kaengkihn mwe keok ke acn kuht oasr we.  Ke mwe read se inge, mwet Christian inge elos etu in kahingkihn mwe ahk kohs in tia putatyang nufaclos ke pulan pacl se elos tupan lung kulang lun God ac sikaleni na im prue in suk God ke pacl elos oasr in ma upac.

Kuht enenu in kalem kac lac, ma nukewa kuht fuhleacng nusin God. Finne ouinge, kuht fin akilen ma upac, kuht in kahingkihn paye lac God pa use kalem inge nusesr in akilen ma upac su ma e sikyak nusesr. Kalmeyen fwak se inge uh pa, mwet lulalfongi uh in tia orekma in lahlfon. Fin kuht akilen lac oasr mwe kohs e sikyak nusesr uh kuht na muta na tia kahingkin.  Paye lah God pa use kahlem nusesr in sang loangwe kuht liki ongaiyac. 

_________________
Henry, Matthew (2010-07-27). Matthew Henry's Concise Commentary on the Bible - Enhanced Version (Kindle Locations 34988-34994). Christian Classics Ethereal Library. Kindle Edition.

Friday (10/30) Sifac: God El Molellah Paul

Kunokon

By Kenye Tulensru Belcourt

Friday October 30 2015
Sifac: God El Molellah Paul
Mwe Read: Orekma 27:14-25

Kenye Tulensru Belcourt

Kulo ac Kaksakin God ke kulang ac karinginyuk lal nu sik meet liki pa nga tafela kas in luti lal nu sesr kewa.

Me lutlut se Inge sikyak ke pal se Paul ac kutu met kapir itukyang nu in oaku in welul Captain Julius som nu Rome in tu nununkeyuk Pual ye mutun Togosra Fulat we. Akkalemye pa la Paul el sensenkin me fosrnga yok ke fwasr se Inge nu sel Julius tusruk el tu porongo ma met us oaku fwak nu sel u. Ke elos oayak, eng na upa su elos Tia ku in kisrung sikyak, elos fuleak eng u patkakunulos, ac oayapa tolah pa kutu kanon oaku. Ke Len na pus elos Tia liye fwat ku itu u ac met u wanginla fwinsrak la. Tusruk ke lalalfongi yok lal Paul nu sin God el étu in pray ke ma upa nukewa inge. El tuyak inmasrlolos fwak tu lupufan lun God Tuku nu yorol tu élan Tia sangeng, ac fwa wangin sie selos fwa tuhla moul la. Ac ke kulung lun God nu sel Paul, el molela met nukewa fwin oak soko inge. Ac ke ma Inge Lela nu sesr in akkeyekut in lalalfongi ac moniyuk in kulansap nu Sin God, tu paye ela fwa wi kut ac molikutla in Oiyac nukewa. Kulo.

Thursday (10/29) Sifac: God Oaru Sac

Kunokon

By Victor Melander

Thursday October 29 2015
Sifac: God Oaru Sac
Mwe Read: Daniel 6:25-28

Victor Melander

Ke kut luti ke moul lal Daniel. Kut liye lac el sulallac sel tu élan mwet kulansap oaru a paye na sihn GOD lal suh GOD paye seh. Wangin mah kuh in fwasr met liki GOD lal fwin ne king Darius.
Ke sripen lulalfongi lahl na sin GOD ac pulesru oakwuk lun togosra Darius. El sisilac na ke luf lun lion. Ne oinge GOD EL tia sisullac EL molelac like luf lun lion. Ke sripe sie inge. Togosra Darius el oralla ma sap lal na sin mutunfacl nukewa. Pusren ma sap lal fwak: “Mwet nukewa in sangeng ac akfulatye GOD lal Daniel.” Pusren kas lal togosra Darius nu sin GOD lal Daniel, “EL sie GOD moul, ac EL fah LEUM nwe tok…”
 
Kom ke oana Daniel; Matthew 5:16 “Ouinge, kowos sang kalem lowos in tolack ye mutun wet uh, tuh elos in ku in liye orekma wo lowos, ac kaksakin PAPA tomowos su inkusrao.”

Wednesday (10/28) Sifac: God El Molellah Daniel

Kunokon 

By LM Skipper Ittu

Wednesday October 28 2015
Sifac: God El Molellah Daniel
Mwe Read: Daniel 6:19-24

LM Skipper Ittu

Leum God Elan kaksakinyuk ke lusen moul lasr. Paing kowos kewa! Sifac se lasr ke Wednesday uh fahk muh "God El Molellah Daniel," oasr in Daniel 6:19-24. Mwe lutlut se inge srumun ke karinginyuck wowo lun Leum God nusel Daniel ke sisiyang el nuh in sie luhf in lion. Fahk lah tukin sisiyang Daniel, Tokosra Nebuchadnaser el koflana in motullac ke fong uh oru el sa na som nuke luhf uh ke lotutang tok ah. El panglol Daniel ac siyuk lah God lal molellah liki lion uh. Daniel el topokuhl ac kena tuh in loes moul lal Tokosra. Daniel el oayapa fahk lah God El molellah ke sripen El etu lah wangin ma sufal lal. Ohinge, Tokosra Nebuchadnaser el enganak ac sap in amacyak Daniel, ac in sisiyang nofon mwet ma ahkkolukyacl nuh in luhf uh. Ke sisiyang mwet inge, mahnolos soenna sun kapihn luhf sac a kotkotweyucki tari sri kaclos uh. Kasrekut in tu kuh ke ma pwaye luhn God, finne kuht puh in fufahsryucsr lasr ac mwet uh akkolukye kut. Tuh Leum God El fah wi kut ac aksukosokyekutlac kuht fin mutana ke ma pwaye!

Tuesday (10/27) Sifac: Mwet Shepherd Se Su Sifil Folokonak

Kunokon

By LM Driskell Jack

Tuesday October 27 2015
Sifac: Mwet Shepherd Se Su Sifil Folokonak
Mwe Read: Psalm 80:1-3,7,17-19

LM Driskell Jack

Psalm 80: Psalm sie inge ma lal Asaph. Oasr Psalm 150 ke BIBLE natusr uh. Oasr akkalemye la singaul-luo (12) sin Psalm inge, simla sel Asaph. Asaph el sie Mwet eteyuk ke ON (musician), su Tokosra David el sang ku lulap lal (major responsibility) la in wi fohsrngackin ON ma eneneyuk ke lom nuknuk (Tabernacle) ma elos alu kac. Asaph el ma nutin Papa se pangpang Berchal (ke sruf lun Levi. ON ku Psalm ma Asaph el sumusla inge Onkackinyuk ke pacl se ma Tokosra David el sifwil folokonma ‘tuptup lun GOD’ (ark of Covenant) nu Jerusalem. Akkalemyeyuk in (1 Chronicle 16:4), “David el sulela kutu mwet in sruf lal Levi tuh elos in kol alu lalos nu sin LEUM GOD lun Israel, ac elos on ac kaksakunul ye mutun Tuptup in Wuleang.” On soko lal Asaph inge pa pac akkalemyeyuk in (1 Timothy 3:16) ouinge, “Lela Leum sifacna, su ase misla lasr, elan asot misla nu suwos in pacl nukewa ac in ouiya nukewa. Leum elan wi kowos nukewa.”

The Shepherd Who Restores: Scriptures (Psalm 80:1-3, 7, 17-19
Psalm 80: 1 – “Porongekut, O Shepherd lun Israel, Lohng kut, kom su kol un sheep nutum; Kom su muta lucng liki posohksok lun cherub.”
- Porongekut, O Shepherd lun Isarael, su pa akkalemyeyuk ke ma Simusla in (Psalm 23:1), “LEUM GOD El mwet shepherd luk; Wangin ma nga ac kena kac.”

- Akkalemyeyuk ouinge ke ma Simusla, “Orala sie mwe afyuf ke gold nasnas, inch angngaul limekosr lusa ac longoul itkosr sralap. (18) Orala luo cherub ke gold tuktuki. (19) Sie in oan tafu ac ma se ngia oan tafu. Cherub inge in orekla ipin na mwe afyuf sac. (20) ac in ngetani nu sie fac, ac posohksok laltal in elakelik ac afinya mwe afyuf sac.” (Exodus 25:17-20)
o Lumehyukla Cherub inge ke ahteh lun Cherubim. Cherubim ku cherub inge ma na mutal oana lipufan, oasr posohsok kac, su fahkak Wolana lun God. Tusruktu, fulat ac oan lung liki cherubim (cherub), LEUM GOD Papa Tumasr in kusrao, su fulat liki nukewa.
Psalm 80: 2 – “Fahkkomyak nu sin sruf lal Ephraim, Benjamin, ac Manasseh. Akkalemye ku lom nu sesr; Fahsru ac molikutla!
- Su Ephraim, Benjamin ac Manasseh? Ephraim ac Manasseh ma natul Joseph ac Benjamin pa sruf safla fihn an Israel ke sruf singaul-luo (12) ma sramteak an Israel. Ma Simusla akkalemye in buk lal Joshua ke BIBLE MUTAL natusr uh, “Joshua el fahk nu sin sruf lal Ephraim ac Manasseh Toto, “Pwaye kowos arulana pus ac ku. Fal in pus liki ipin can se na lowos” (Joshua 17:17).
- Efu kuh tu arulana sohlla sruf (Ephraim, Benjamin ac Manasseh)tolu inge? Meyen, elos pah fahsr tuhkin lom nuknuk (Tabernacle) sa, ac elos pac pah fohtoto nuke an ‘tuptup lun GOD’ oan weh ke pacl elos fahsr yen mesis kuh ke pacl in tuh rounehla lom nuknuk ke pacl in alu lalos.
- Ma Simusla fahk in (Isaiah 51:9), “LEUM God, ngutalik ac kasrekut! Orekmakin ku lom ac molikutla; Orekmakin oana ke kom tuh oru in pacl oemeet ah. Kom pa tuh pakpakilya Rahab, wet lulap soko meoa, nu ke ip srisrik.”
- Su Rahab se inge? Tia Rahab se ma akkalemyeyuk in (Joshua 2:9). Rahab se inge ‘ineh’ se ihtuhkyang in akkalemye sie mwe lohkaclok lain GOD Papa Tumasr. Ma Simusla akkalemye in (Job 26:12) ouinge: “Ku lal uh pa kutangla meoa uh; Ac ke usrnguk lal El kunausla Rahab—ma sulallal soko ma muta inkof uh.”
o GOD Papa Tumasr El akkalemye kuh lal ke ouiyac uhsrnguk ke kuh lal. Kut ahkuhlen kuh se inge, ke el pakpakiya ‘Mea Srusrac’ (Red Sea), tulik natul in kuh in sasla weh. Kuh Lal muhkena kuh in mohli kut la.
Psalm 80: 3 – “Folokinkutme, O God! Akkalemye pakoten lom nu sesr ac kut tufah moulla.”
- Ma Simusla akkalemye in Isaiah 1:26 ouinge: “Nga fah sot mwet nununku ac mwet kasru su ac fah oana elos su tuh kol kowos in pacl oemeet ah. Na ac fah pangpang Jerusalem sie siti suwoswos ac pwaye nu sik.”
Psalm 80:7 – “Folokinkutme, O God Kulana! Akkalemye pakoten lom nu sesr, ac kut tufah moulla.”
- Pang ak luo lalos pa inge. Oana ke elos akkalemye ke (fus ak tolu).
- Elos enenu in etu la meet liki GOD Papa el folokunuslos nu yorol; elos enenu in forla liki ma koluk lalos.
- Ma Simusla akkalemye in (Deuteronomy 28:15), “Tusruktu kowos fin seakos LEUM GOD lowos, ac tia oaru in liyaung ma sap ac oakwuk lal nukewa ma nga asot misenge, mwe selnga inge nuikewa ac fah tuku nu fowos.”
Psalm 80: 17 – “Sruokya ac karingin mwet su kom sulela inge, Mutunfacl se su kom oru in arulana ku.”
- Mutunfacl se inge ah fihn tuhlokyak in ku, Mwet lal ma El sulela el enenu elan karingin. Pa kalem in (1 Samuel 16), ke GOD Papa El suhpella Samuel elan liki ‘blessings’ lal in kol an Israel ac Judah. “Samuel el eis oil in olive ac mosrwella David ye mutun tamulel lal. In kitin pacl ah na ngun lun LEUM GOD tuku ke ku nu facl David ac welul in len sac fahla. Na Samuel el folokla nu Ramah” (1 Samuel 16:13).
- In Psalm 89:21, akkalemye ouinge, “Ku luk fah welul pacl e nukewa, Ac ku luk fah oru elan ku.”
Psalm 80: 18 – “Kut ac fah tia sifil forla liki kom; Karinganang moul lasr, ac kut ac fah kaksakin kom.”
- In akkalemye lupan kaksak lalos, Mwet kol lalos, David el orani mwet mweun ma wo emeet in an Israel ac elos folohkohnma ‘Tuptup in Wuleang lun GOD’. Elos ahkuhlen pac la ke pacl se ‘Tuptup lun Wuleang lun GOD’ oasr yorolos, mwo ouiyac sik pac nu selos tu elos in kaksakin GOD Papa.
Psalm 80: 19 – “Folokinkutme, O LEUM GOD Kulana! Akkalemye pakoten lom nu sesr, ac kut tufah moulla.”
- Ma Simusla akkalemye in (Psalm 89: 28) “Nga fah karingin wuleang lu nu sel, Ac wulela luk fah welul new tok.” Pa inge Wulela Lun GOD Papa Nu Sel David, su sohlla Tokosra suh mosrwella ke mwe akmusra mutal.

In oana ke akkalemyeyuk lung inge: GOD Papa Tumasr in Kusrao El akkalemye kuh lal in sang kuh nu sel Moses in kohlla tulik natul liki an Egypt. Elos tohfokla som ke Mea srusra (Red Sea) ac yen mesis. Elos us Tuptup lun GOD Papa Tumasr wehlulos su akkalemye la GOD Papa El wehlulos oana ke sie sruen puhkunyeng ke len ac sie sruen eh ke fong in karinganulos. Elos Likeke, forla liki ma sap ac finsrak lun GOD Papa nu sin tulik natul. Ouinge, elos sun ongaiyac puspus. Pa ke pacl se Tokosra David El kohlohlos in sifwil folohkonma ‘Tuptup lun GOD nu yorolos; elos sifwil akkulahnak kuh kawil lun GOD Papa. Pa Asaph el sumusla Psalm se inge in pang nu sin GOD Papa Elan nunakmunas sifwil fohtoto nu yorolos in tulohkonolosyak nuke misla pwaye. Misla pwaye se inge pa elos ahsro ke pacl ma elos suhn oungaiya puspus ke pacl elos forla liki kohko lun GOD Papa. Ac nu sesr ma kulansap misenge, fahko lun kalem yoros pacl se ma oasr lungse, engan, misla, mongfisrasr, kulang, orekma wo, oaru, pusisel, sifacna leum fac.
Kulo ma lulap nu sin GOD Papa ke sie mwe lutlut mwo in sifwil akasmakinye kut la kut fihn suhn ongaiya ac ouiyac elyac, kut in etu la kasru kawil tuku yurin GOD Papa muhkena.
GOD Bless You All,

LM Driskell J. Jack
Kosrae-Seattle Congregational Church
alukosraeseattle@outlook.com

Monday (10/26) Sifac: Yot Se Ma Molelah

Kunokon 

By Deaconese Sepe Kilafwasru

Monday October 26 2015
Sifac: Yot Se Ma Molelah
Mwe Read: Psalm 18:1-9

Deaconese Sepe Kilafwasru

Psalm soko inge Psalm in kaksak lal David nu sin Leum God su molel-lah liki inpaol Togosra Saul ac liki met lokoalok lal. Motkoeyuick mu el samusla ke pal se el mahtuhoh a munosla pulakin mislac lal ke karunginyuck wo Lal in pal el pulakin ma upa. Ke el ngetlah liye lupan kasruh ac kuh sakuhrihk lun God ma El oru nu sel ke year puspus somla, El Kaksakin God. Pa Kalem ke kusen on soko inge, El fwak mu;
Leum God EL eot kuh luhk a nien wihklac luk, El God luk a me loeyuk luk. Ke nga muta yorohl nga moul, El lisringyu oana sie me loeyuk El moliyula liki met lokoak luk.
Me fosrnga lun misa apinyula a noa lun kunaosten toki nufuk. Me kwasrip lun kalyuk sruokyuwi.
In ongaiya luk nga pang nu sin Leum God ac El kahsreyuc. In temple Lal, El long pusrek, porongo pusren tung in kafwe luk. Fwalu rarrar a kusrusryak meyen el kasrkusrak.
Pa inge kutu kahs ma David el tu onkakin nusin Leum God ke El molel-lah ac sang kutangla fin met lokoalolc lal a oayapa togosra Sau sucl tu sukin anilyac.
Karunginyuk lun God nusin met lal uh fwa wangin lainyac. El kasru met Lal in pal nukewa ac in oaiya nukewa.

David el luma karunginyuk lun God nu sin met lal uh ke ouiya pus ma a ku in loange kut liki kutena me lokoalok ma ac akkolukye kut ke moul in lulafongi lasr uh.
El Fwak mu karunginyuk lun God uh oana;
1)Sie eot ma tia ku in mokleyukla sin kutena su suk in akkolukye kut.
2)El oana sie nien wukla su met lokoalok tia ku in ukue inkanek nu kac
3)El oana sie mwe loang ma kosrekutla liki met lokoalok lasr.
4)Ac el me molela lasr in pal upa, El tower fulat ac nien wukla ku.
Ma inge lutikut in etu la inkanek sefanna ma ac ku in molikutla ku loangekut liki evil ku ma koluk ma tuku in akkolukyekut ke moul in lalafongi lasr uh pa in suk God ku pang nu sin God ke inen Jesus Christ tu El pa yot in molela a nien wukla ku lasr in pal in ongaiya.

Deaconese Sepe Kilafwasru

Sunday (10/25) Sifac: Luhlahlfongi Ke Nguhn

Kunokon

By Rev. Takeo Likiaksa

Sunday October 25 2015
Sifac: Luhlahlfongi Ke Nguhn
Mwe Read: Orekma 11:1-18

Rev. Takeo Likiaksa

Sie pac mwe lutlut na wowo ke molela lun God nu sin mwet nukewa. Oana ke kutu ma Sumusla uh fahk lah yurin God, mwet nukewa oana sie, lah mwet Jew ku Gentile, kuh lah tun fukah lun mwet se ku el tuku oya. Na ma yok kac uh pa molela lun God tuku nu sin mwet nukewa, mutacwacack yurin mwet Jew, God el sulalosla a lotwelos Ma Sap lal elos in ma luti ke molela nu sin mwet nukewa.

Na oru ke Peter el srumun ke moul ekla lal Cornelius, mwet nukewa lut, tusruktu, tukin elos long kewa sramsram lal Peter, na elos fah forlah kaksakin God. Fal nuke sifac lasr uh, “Lulalfongi Ke Ngun.” Mwe luti nu sesr uh pa kut salac pacl pus in orala nunak lasr ke kut tia etu na paye sripa ku ma kalem uh.

Tu God el nuna wulela ke Ma Sumusla mu El ac mwe luti lal ac sun mutunfal nukewa, mutawacack kacl Abraham (Gen. 12:3; 18:18) Ku kalem yok ke kas lal Malachi –“Ke pacl faht uh takak nwe ke pacl faht uh tili, mwet in mutanfacl nukewa faclu elos sunakinyu.”(Malachi 1:11)

Fus 16 an, akkalemye pac lah mwet luti lun Jesus ma pac nu sin mwet nukewa. El luti in Samaria (John 4:1-42). Ku finne in an Gerasenes pusna mwet Greek we (Mark 5: 1-20) Ac el oru pac luti lal in Rome (Luke 7: 1-10).

Fahk uh pa Ngun Mutal lun God oru pac mwe luti lal in sun pac mwet Gentiles, su kut wi pac insewowokin ke kut ku in wi ipeis ke kulang lun God.

Saturday (10/24) Sifac: Pahngpahng Mwet Christian

Kunokon 

By Deaconese Niokong Yukiwo

Saturday October 24 2015
Sifac: Pahngpahng Mwet Christian
Mwe Read: Orekma 11:19-26

Deaconese Niokong Yukiwo

Nga wi pac kaksakin God fulat lasr ke karunginyuk lal nusesr in pal nukewa, a oayapa ke moul lasr. Mwe lutlut se inge fwak ke kutu sin mwet lulalfongi in an Jerusalem kaengelik ke sripen kalya se tu sikyak nu selos ke tuh anwuki Stephin a, kutu som a luti nu sin mwet Jew sayen an Jerusalem, a kutu som nu antioch a luti nu sin mwet pegan ke peng mwo ke Jesus, mweyen ngun lun Leum welulos, orun mwet puspis forla nusin Luem. Ke peng kalos sun church in an Jerusalem, elos supalla Barnabus su arlana sessesla ke ngun, ke Barnabus el som, el lie lac God el akinsewowo yalos, el akkeyalos elos in arlana oaru a paye nu sin Luem. Tukin ma inge Barnabus a Saul muta yorolos ke lusan year se, a luti ke kas lun God in church antioch, mwet puspis tuku long ke luti lalos. Ān antioch pa mwet lulalfongi u mutawacack in pangpang mu mwet Christian. A ma nu sesr u finne oasr ma upa nusesr kut in esam in pray nusin God siyuck elan ku in akkweyekut in mutwacngla ma sikyak nu sesr uh.

Thursday (10/22) Sifac: Mwet Sac Elos Eklac Mwet Luhn Kuhsrao

Kunokon

By Victor Melander

Thursday October 22 2015
Sifac: Mwet Sac Elos Eklac Mwet Luhn Kuhsrao
Mwe Read: Ephesus 2:11-22

Victor Melander

Mwe insewowo na sesr mesenghi ke sripen Luhngse luhn Leum lasr Jesus suh kut tia kalem keh ke El misa kehsr ke pacl kut mutah in lohsr mutah ke oakwuk lun fwalu. Kut Gentile pangpang mwet tia kosrala. Su ohwawah lac kut, kut mwet tia etu ke GOD Mutal ac paye. Kut oana sie moul lun kosro su wangin moul ma patpat lah. Su wangin fwinsrak lah.
Ac ke wolana Luhn GOD EL supama Wen sefana Natul in tu misa kesr in eslac ma koluk lasr. Ouinge kut su lulalfongi ke Jesus Christ tu Elan Leum ac Mwet Lango lasr. Kut ilyak na ke Sucu LUN GOD. Ke mainge kut ilyak na ke moul ma patpat.

Wednesday (10/21) Sifac: Sie Top Fihsracsr

Kunokon

By LM Skipper Ittu

Wednesday October 21 2015
Sifac: Sie Top Fihsracsr
Mwe Read: 1 Peter 3:13-18

LM Skipper Ittu

Sifwil kaksakin Leum God Fulatlana, suc fallana in sunakin in lusen moul lasr; paing kowos nukewa! Sifac se nuke Wednesday inge pa "Sie Top Fihsrasr," oasr in I Peter 3:13-18; Kuhsen kafwe lal Peter ke letter se meet lal nusin Mwet Christian ke churches Pontus, Galatia, Cappadocia, Asia, ac Bithynia pa inge. El kafwelos in arulana moniuk in oru wo finne akkolukyeyuk elos. Elos in tia sangeng sin kutena mwet kuh fosrnga ke kutena ma ke sripen Christ, suc muta insialos, Ela fah langelos. Fin oasr siyukyen finsrak lalos ke Christ uh, elos in top ke sie top fisrasr ac sunak. Elos in moul nasnas na, suc pwacnacng tuh mwet akkolukyelos fah mwekin. Wo elos in keok ke sripen orekma wo, a tia ke orekma koluk lalos. Tuh Christ, suc misa ke mano, ac moulyak ke Ngun Elac fah sang lacnen orekma wo lalos. Scripture se inge kasrekut in nwekutlac ke Kahs Muhtahl Luhn God, tuh pwacnang ke kisrucngyuk kuht ke lulalfongi lasr, El ac kasrekut in use top fisrasr in langoekut. Kuht in tia orekmakin etu lasr sifacna, ac kuht in yield nusin Ngun Mutal, suc muta insiasr in kasrekut. Tuh top lasr finne kolkutlac nuke misa, Christ Elac fah sifwil akmoulyekut in oacna ke God El oraclah nusel!

Tuesday (10/20) Sifac: Kof Nuh Sin Nuhkewa

Kunokon

By LM Driskell Jack

Tuesday October 20 2015
Sifac: Kof Nuh Sin Nuhkewa
Mwe Read: John 4:3-14

LM Driskell Jack

Kaksakin GOD Papa Tumasr ke kut moul sun len na kacto se misenge inge. Ac in fahk pac kulo ke sie mwe lutlut in luti kut in kuh in ahkulen yok sripa lun Mwet nukewa ma wi kut moul fihn facl se inge. Kut in tia muh muhtunfacl lasr uh muhkena pa yok sripa uh, kuh mwet lasr uh pa yok sripa uh; tu in kuh in ahkuhlen mwet nukewa wiyesr.

Mwe lutlut ma tuku in luti kut misenge uh sramsram ke ouiyac se ma Jesus, Wen nutin GOD Papa, el akfahsryela ke pacl se ma Mwet Jews ac Mwet Samaria tia ahsuhpahngi. Arulana loes inmacsrlohlos ah elos tia kuh in tuhkehni mukuikui. Ac ouiyac inge orella ahsikuhli na yok inmacsrlolos. Na elyac yok se inge pa, nuke forfor lun Mwet ma somla Judea nu Galilee ku Galilee nu Judea, elos enenu in fahsr sasla Samaria. Ouiyac se inge oana ke Mwet Utwe enenu in somla ke mura Malem elos ahfin stosa kacsusr nu Tofol, Lelu ku nu Tafunsak/Walung. Ku oana ke kom muta Tafunsak, enenu na in stosa somla ut Malem la nu Utwe. Inkanek se fanna saya ma Mwet Judea ma som nu Galilee ku in oru pa in ut Perea, siskacn infacl Jordon, elos fihn tia lungse ut Samaria tu oasr elyac sik nu selos.
Ac meac sripa yok ke ahsikuhli lalos uh (Mwet Jews ac Mwet Samaria)? Ma inge ma ke sramsram matu ke moul lalos. An Samaria el eteyuk muh arulana pus mwet ma ‘mixed blood’. Ke pacl se ma an Israel (Northern Kingdom) su capital la pa Samaria tu puhtatyang nu in poun an Assyria (ke sroh se meet lalos); oasr na suhnun Mwet Jews tu sruhu ac elos muta weh su kupacsryang nu sin kutu Mwet weh in orella fahko sasu (mixed blood), suh kut ah fahk mu ‘Tahfun Mwet ke sra lun Mwet Jews’. Pa ma Simusla akkalemye la “Tokosra Fulat lun Assyria el uhse mwet in siti Babylon, Cuth, Ivvah, Hamath, ac Sepharvaim, ac oakelosi in siti lun an Samaria, in aolla mwet Israel s som nu in sruoh. Elos utyak nu in siti inge ac oakwuki we”(2 Tokosra 17:24). Na sripac yok se inmacsrlohlos inge pa, Mwet Jews fahk muh Mwet Jews fihn an Samaria, tia Mwet Jews nap aye, elos ‘Tafun Mwet Jews’.

Ke sripac se inge, tuh orella nunak oasrngak se lun Mwet Jews nu sin Mwet Samaria. Nunak oasrngak se inge tu sikyak pac in pacl se ma (remnant – Mwet Jews ma tu srouh fihn an Babylon); folok nu fihn an Jerusalem in sifwil muhsachehak (rebuild –Temple) suh elos sruhnga Mwet Jews fihn an Samaria in wi kacsru. Pa akkalemyeyuk ke ma Simusla, “Mwet lokoalok lun mwet Judah ac mwet Benjamin logngak lah mwet su foloko liki sruoh elos sifil musai Tempul lun LEUM GOD lun Israel. Ouinge elos som nu yorol Zerubbabel ac sifen sou uh ac fahk “Fuhlela kut in wi kowos musai Tempul. Kut alu nu sin God se na kowos alu nu se an, ac kut nuna orek kisa nu sel oe in pacl se Tokosra Fulat Esarhaddon lun Assyria el tuh supwekutme in muta yenu ah nwe misenge”(Ezra 4:1-2).

John 4: 5-6 – Na el sun sie siti srisrik in Samaria pangpang Sychar, ma apkuran nu ke ipin an se ma Jacob el tuh sang lal Joseph, wen natul . Ma Simusla akkalemye in Genesis, la “El molela ipin an sac sin fwilin tulik natul Hamor, papa tumal Shecheim, ke ipin silver siofok”(Genesis 33:17). Akkalemyeyuk la Jacob el sang nu sin wen natul an se inge ke ma Simusla an ouinge, “Nga sot nu sum ach Shechem—an se ma wo fohk we uh, su nga tuh eisla sin mwet Amor ke mweun luk. Nga tia sang an we nu sin tumulel wiom”(Genesis 48:22).

Na pa ingan an se ma elos welul Jesus teh elos tui in eis mongla lalos ke sripen elos ulla ke sripen loes lusen fahsr se lalos Judea mwe nu Sychar (su motkehyuk muh oasr ke lusen len luo). John 4:7-8 – Sie mutan Samaria el tuku in ut kof, ac Jesus el fahk nu sel, “Ase nimuk kutu kof an.”(8. Mwet tuma lutlut elos som tari in moul mongo in siti uh.) – Tia na akkalemyeyuk inen mutan se inge. Ouyapac akkalemyeyuk in John 4:18, “Kom tuh payuk sin mukul limekosr, ac muku se kom muta yoro inge tia ma tomom. Kom kaskas pwaye nu sik.” Ke sripa se inge, mutan Samaria se inge, el srike in (avoid human contact); kalmac pa elan som utkof ke pacl se ma el etu mu wangin mwet ke luf in kof sa. Nuke pa (geographical location lun luf in kof), oasr pac luf in kof sisken an weh fihn pa nuke luf in kof Ain Asker ku Ain Defne ke an Balata. Pacl se pa ma mutan Samaria se inge som in ut kof inge, el sa liki pacl ma mutan uh muta som ut kof uh, meyen el sruhnga in oasr mwet ke luf in kof sa ke pacl se el som utkof uh.

Pa ingan pacl se ma el ohsun nu sel Jesus, ac Jesus el fahk, “Ase nimuk kutu kof an”. Ouiyac se inge, akkalemye la Jesus el siyuk ke kacsru, la El mahlu. Fahk ac siyuk ke kacsru se lal Jesus inge, oru elos muhtehwahek in sramsram; su kut akkalemye la in pacl se inge, Mwet Jews (Jesus) ac Mwet Samaria (Mutan se inge), ihkacsla inmacsrlon mutunfacl luo inge.

John 4:9 – Mutan sac fahk, “Kom sie mwet Jew, a nga mwet Samaria se—na fuka tuh kom ku in ngusr kof sik kom in nim?” (Mwet Jew tia ku in orekmakin ahlu ma mwet Samaria orekmakin.) In pacl se inge, mutan Samaria se inge arulana lut (surprised) la Mwet Jew se in sramsram nu sin Mwet Samaria se, wi kackin la mukul se in sramsram nu sin mutan se; su facsin lalos lain na uhpac. Yok liki nukewa, mutan Samaria se inge oasr sramsram na koluk kacl (reputation lal elos liye oana sie mutan kohsro). Kacinin mwet inge, Mwet Jew uh arulana kacse kuh tia susackin. (Srisri inmacsrlon Mwet Jews ac Mwet Samaria in pacl se inge oana in pacl se ma Mwet fahsrfasr (White) ac Mwet Sralsral (Black) elos nunak oasrngak nu sin sie sin sie. “Mwet Jew tia ku in orekmakin ahlu ma mwet Samaria orekmakin.)”

John 4:10-11 – “Jesus el fahk, “Kom tia etu ke mwe sang ma God El akoo in sot nu sum, ac kom tia pac etu lah su siyuk mwe nim sum. Kom funu etu, kom lukun siyuk sik ac nga sot nu sum kof in moul.” Jesus, Wen nutin GOD el ahkuhlen lupan munas se lun mutan Samaria se inge. El kofla sa kaclem kac la Jesus el srike in ahsang nu sel ke ‘Kof In Moul’, ma elan eis, nim kac, ac in tia sifwil mahlu. Ac mutan Samaria se inge tia pac etu in pacl se inge la Jesus tu Messiah pa el sramsram nu se inge. Oru top lal ouinge, “Leum se, wangin mwet ut kof lom, ac lufin kof se inge loal. Kom ac eis kof in moul an fuka?

John 4:12 – “Jacob, papa matu tumasr, pa kuknak lufin kof se inge ac likiya nu sesr, El, ac wen natul, ac un kosro natul nukewa elos nim kof kac. Ya kom pangon kom yohk lukel Jacob? Luhkuhn puhsren mutan Samaria se inge uhpac kutu, meyen el pacngon mu Mwet se ma el sramsram nu se inge, aksrihkyeten nu sin Papa matu tumaclos su pa Jacob. Tusruktu, ke sripen lungse lun GOD Papa Tumasr, El suhpwema Wen kulo se fanna natul inge in tu molikutla. Pa akkalemyeyuk pac ke ma Simusla in (1 Corinth 12:13), Ouinge, kut nukewa baptaisla ke Ngun sacna nu ke mano sefanna—kut finne mwet Jew ku mwet sayen mwet Jew, kut finne mwet kohs ku mwet sukosok; ac God El okoama Ngun sefanna nu in kut nukewa.”

John 4:13 – “Jesus el topuk, “Kutena mwet su nim kof se inge fah sifilpa malu,”. Kof se ma Jesus el sramsram kac ke fus se inge pa kof lacsrkackinyuk ke luf in kof lal Jacob, su elos oasr siskac in pacl se inge. Mwet uh enenu kof in nim pacl nukewa ke moul in mano lasr, tusruktu ac tia tui malu uh. Tusruktu, ke kut read ke ma Simusla in John 6:35, “Nga bread in moul. El su tuku nu yuruk fah tiana masrinsral. El su lulalfongiyu fah tiana malu.”

John 4:14 – “a kutena mwet su nim ke kof se ma nga fah sang nu sel, ac fah tiana sifilpa malu. Tuh kof se ma nga fah sang nu sel ac fah ekla sie unon in kof in el, su ac fah sang nu sel kof in moul, oayapa moul ma pahtpat.” Pa akkalemyeyuk in (John 7:38), “Oana Ma Simusla fahk, ‘Kutena mwet su lulalfoni keik, unon in kof in moul fah sororme liki insial.”

KUNOKON: Kunokon se inge luti kut la tuhkin yeac puspus ma oasr ahsikulli inmacsrlon Mwet Jews ac Samaria, Jesus, wen kulo se fanna nutin GOD Papa el ihkacsla elos in ma se fanna in Christ Jesus. Ke el sang kof in moul nu sin sie mwet koluk (mutan Samaria) se inge, el akkalemye la El tia srela in oru mwo nu sin nukewa. Lupan lungse se lun GOD Papa nu sesr inge, pa wen kolu se fanna natul inge akkalemye nu sin mutan Samaria se ma som ac fahkack ke pweng wo nu sin mwet lel. Ke kut mwet lulalfongi eis ke kof in moul se inge, kut eis Jesus Christ in mwe ihweh kup lasr. Oasr ma puspus ma ac fuhngul kut ke moul lasr faclu, tusruktu Jesus el akkalemye ke ma Simusla, “Nga fahkot nu suwos ma inge tuh in oasr misla yuruwos ke kowos kupasrme nu sik. Ke kowos muta faclu kowos ac keok. Tusruktu kowos in pulaik na! Nga kutangla faclu tari!” Ke Mwet Jews srike in fasr sasla ‘Samaria’ elos etu la ac oasr elyac. Ke kut muta fihn facl se inge, akwot nuke moul ma patpat yurin GOD Papa Tumasr in kusrao, ac oasr pac ma ac fuhngul kut. Tu kut fihn kupasryang nu sin Leum GOD, Papa Tumasr in eis ke ‘kof in moul’ se inge, kut ac kutangla pac mwe sruf nukewa nu sesr in oana ke Jesus Christ Wen nutin GOD el kutangla ac fahk, “It is Finished!” Kulo kaksakin GOD Papa Tumasr ke sie mwe lutlut in akkeyekut ke moul in Etawi Christ lasr fihn facl se inge. Thank you JESUS!

GOD Bless You All,

LM Driskell J. Jack
Kosrae-Seattle Congregational Church
alukosraeseattle@gmail.com
(206) 946-0937

Monday (10/19) Sifac: Sie Kahlem Nuh Sin Muhtunfacl Puhspuhs

Kunokon

By Deaconese Tulpe Dizon

Monday October 19 2015
Sifac: Sie Kahlem Nuh Sin Muhtunfacl Puhspuhs
Mwe Read: Isaiah 49:5-7

Deaconese Tulpe Dizon

Arulana falana nga in wi kowos in Kaksakin El Suc Fulatlna ac lela kut mwet nukewa in etu in eis me Lutlut Lal nukewa ac etu pac in moulkihn.Tu Kas Lal Paye ac Suwos in pal nukewa.

Mwe read se inge tuku ke kas in palu lal Isaiah ke sie kalem suc a tufwa sie kalem nusin mutunfacl puspus. El akkalemye ke Israel su kalem mu mwet solla lun God pa kalem se inge ac tuku we uh. Kalem se inge pa Jesus Christ suc ac tufwa tuku in kulansupa God ac oayapa in acse molelah nusin mutunfacl puspus. Ke el ac tuku uh togosra ac fisrak nukewa fwa epasr nu sel a akfulatyel in oana ke ma Leum God el wulelah kac. Kalem se inge pa Jesus ac mutunfacl puspus pa elos nukewa su lalfongi ke Leum Jesus Christ.

Sunday (10/18) Sifac: Peter El Oruh Sie Pac Ohiyac Sensen

Kunokon

LM Quartus Esau

Sunday October 18 2015
Sifac: Peter El Oruh Sie Pac Ohiyac Sensen
Mwe Read:Orekma 10:24-38

LM Quartus Esau

Sifwa: Peter El Oruh Pac Sie Ohiyac Sensen
Book: Orekma 10:24-38

Kuloh nusin God ke moul ac pacl wowo ma se meet. Paing kowos nukewa!

Me read se inge akkalemye ke lulalfongi ku ac pulaik lal Peter in tafela kahs lun God nusin sie Gentile finne oasr masap ku akwuck ma sraclihk mwet Jew liki mwet Gentle.

Tafema na me read luo ke Thursday ac Friday ah, Peter el som nu yorol Cornelius oana ke el soloacl. Ke Peter el sonol Cornelius, el akilen la sucu ac mwet kawuk lal Cornelius wi pac muta acn sel tapnul. Oinge el akesmakinyelos ke masap ku oiyac lun alu lun mwet Jew ma liksrenina lain asruoki ku aengani lun mwet Jew ac Gentile. Ke sripen aruruma se ma ituckyang nusel Peter ah, panwang el fwak la finne oasr masap oinge, tusruktu God El ikasla elan liye la mwet nukewa oana sie.

Pulaik in fwakak lal Peter fwal nusesr in lutlutkin. In wangin alolo ku tafu luo lasr in fwakak ke kahs lun God, in lohm sesr, in Church lasr, in Etawi lasr, in Orekma lasr, acn sesr, ac nu yen loes liki acn sesr.
________________________________________

Sunday School/Etawi

October 18 Peter El Luti Mwet Gentile Orekma 10:24-38
Text: Orekma 10:34, 35
________________________________________
Lessn Background:
Meet liki Jesus El sowack nu inkusrao a, El akkalemye nusin Mwet Tumal Lutlut la, elos ac fwa mwet loh ke orekma Lal in Jerusalem, Judea, Samaria ac yen losula fwalu. Mwet Tuma Lutlut elos tiana akilen kalmen fwak lun Jesus la elos ac enenu in tafela Gospel nusin mwet Jew ac oayapac mwet Gentile. Mwet Tuma Lutlut lun Jesus elos liye mwet Gentile mu elos mwet fokfok suc ac ku in akkolukye moul lalos ac aksensenyelos ke lulalfong lalos.

Orekma 10 akkalemye ac akpayeye kas lun Jesus ke fwasrelik lun Gospel. In me read se inge, oasr aruruma (vision) luo ma sikyak nusin mwet luo, Cornelius (Orekma 10:1-6) ac Simon Peter (Orekma 10:9-16). Cornelius el sie Centurion lun solse Rome. Cornelius el muta Caesarea ac Peter el muta Jopa, oasr miles 30 lusen acn luo inge. Akkalemyeyuck moul lal Cornelius u la el sie mwet suwoswos. El oayapac sie mwet sangeng sin God ac akfulatye God. Ac el arulana akfulatyeyuck sin mwet Jew (10:22). Oinge God El supwala sie lipufan Lal in fwak nusel Cornelius elan sapla soloacl Peter (10:3-8).

Pacl se inge Peter el muta Jopa. Sie lwen ah el fanyak in pray fin lohm el muta kac. Pacl se el pray inge el arulana masrinsracllah (10:9, 10). Pa inge pacl se ma aruruma (vision) se ke kahot sac kukinyucki inkusrao me nusel (10:11). Kahot sac sessesla ke kain in ma orahkrahk. Kuhtuh ma orahkrahk inge fohkfohk ac tiac fwal elan kang in oana ke akkalemyeyuck in Leviticus 11. Pacl tolu pusra se inkusrao me fwak nusel Peter mu elan “uni ac mongo” (Orekma 10:13, 16). Peter el srangesr kang ma inge, ac el fwak lah el soenna wi kang ma fohkfohk oinge u (10:14). Pusra sac fwak mu elan tiac nunku mu fohkfohk. Fin ma God El orala, ku in mongo (10:15).

Peter el srakna suk la mea kalmen aruruma sac a mwet lal Cornelius ah sonol. Elos fwak nusel sap soko ma Cornelius el supu nu yorol ah ac ma ma sikyak in pwanang elos som sokol. Oinge Peter el insese in welulos som.

Content
I. Oru Ma God El Fwak (verses 24-26)
Peter el akos ma God El fwak nusel in aruruma sac (10:20). El wi mwet utuck sap lal Cornelius som nu Caesarea. Ke elos sun inkucl sel Cornelius, Peter el liye la, mwet kawuck ac sucu lal Cornelius kewa tukeni nu lohm sel Cornelius ah tupnal.

Cornelius el liyel Peter ac putati in alu nusel. Tusruktu Peter el akkalemye nusel mu mwet sena pa el, ac el tiana enenu in akfulatyel oinge. Oinge el tulokinilyac Cornelius elan te alu nusel.

II. Sramsram Nuselos in Tukeni sac (verses 27-29)
Ke masap lun mwet Jew ac oiyac lun alu lalos, mwet Jew tiac lela in aengani yurin mwet Gentile. Oinge ke Peter el utyak ac liye mwet lal Cornelius inge, el akkalemye nuselos ke masap se inge. El tafela in fwak la finne pa inge oiyac lalos, tusruktu God El ikasla nusel elan ku in liye ac etu la, mwet nukewa oana sie. Elan tia pangon mu kutu mwet uh fohfohk ac elan tiac srelah lah suc el ku in aengani yoro. Na pasis el tiac alolo in som nuke ngusr lal Cornelius nusel.

III. Aruruma sac Sifil Srumunyuck (verses 30-33)
Peter el nuna long tari sin mwet utuck sap lal Cornelius a la meac sripen solsol lal nu yorol Cornelius, tusruktu el ke long na sel Cornelius. Oinge Cornelius el tafu ma ma sikyak nusel ah. (liye verses 30-33)
IV. Ma Pwacye u Akilenyuckyak (verses 34-38)
Peter el akpayeye lah God El tiac srelah mwet se mwet se. El oruh mwet nukewa oana sie oana ke El akkalemye ke vision se Peter el liye ah.

Ip safla se inge akkalemye ke sramsram lal Peter nusel Cornelius ac mwet in lohm sel. El fwakak nuselos ke oiyac ma akenganye God, el sramsram nuselos ke Kahs lun God ac ke moul pengpeng lun Jesus Christ.

V. Application
Ku srisrik, etu srisrik ma oasr yorosr kais sie ke pweng wo se inge, in tiac wuklac yorosr a kut in usaclihk nuselos suc ac enenu ac lungse wi eis ku long kac.

VI. Closing
Kuloh ke moul ac pacl wowo lasr in sifil alutluti ke me lutlut se inge. Finsrak lulap tu Ngun Lal in tufwa akyokye nu sum.

Friday (10/16) Sifac:Peter El Oruh Oacna

Kunokon

By Lipan Welly

Friday October 16 2015
Sifac:Peter El Oruh Oacna
Mwe Read: Orekma 10:17-23

Lipan Welly

Sifil wi mwet nukewa in oru kaksak yohk lasr nu sin LEUM GOD fulatlana se fanna lasr. Lela God Ngun Mutal Elan wi kut kais sie in pacl nukewa ke moul lasr. Paing mwet nukewa.

Kut enenu na in liye akwuk ma LEUM GOD El oru nu sel Peter tuh elan akolah nu ke kulansap ku Orekma lun sie mwet Sap. Ke kolyuk lun Ngun Mutal, mwet su fahsr tukun Jesus in pacl oemeet ah elos tuh fahkelik Pweng Wo ke Jesus “in acn Jerusalem, ac in acn Judea nufon, oayapa Samaria, ac nu in mutunfacl nukewa fin faclu Orekma 1:8.”

Jesus El ngetang nu sel ac fahk, “Kom pa Simon wen natul John, tusruktu ac fah pangpang kom Cephas, ine ke kas Aramaic.” Ine se inge oapana Peter “Petros na Greek”, ac kalma pa “eot” Jn 1:42. Oasr kais kutu pacl ke Bible uh pangpang pac el Simon Peter, Matt 16:16. Simon Peter el ma Bethsaida (Jn 1:44) in acn Galilee ac ma wiacl pa Andrew, Matt 10:2. Peter el mwet patur se welul Andrew, James ac John, Lk 5:7.

Kut kalem ke pac lah Peter, James ac John pa fototo emeet (inner circle) nu sel Jesus su kalem ke Mk 5:37. Elos welul pac Jesus ke El ekla ye mutalatal: saromrom mutal oana faht uh ac nuknuk lal arulacna fasrfasr pikapakla, Matt 17: 2. Ke pray lun Leum Jesus El uselos kewa pa nu in acn se pangpang Gethsemane, Matt 26:37. Kut ku in liye lah akwuk lun Jesus nusel Peter arulacna kalem “Ke ma inge nga fahk nu sum, kom pa Peter, su kalmac uh pa ‘eot,’ ac fin eot se inge nga ac fah musai church luk; na finne misa, tia pac ku in kunausla, Matt 16:18.

Kut kuh in liye pac lah oasr munas lal Peter. Na Jesus El fahk nu sel Peter, “Pwayena nga fahk nu sum, meet liki won uh ac kahkla ofong, kom ac lafwekinyu pacl tolu, Matt 26: 34.” Na Peter el fahk, Nga fuhlak lah nga kaskas pwaye! God Elan selngawiyu nga fin kikiap! Nga tia etu mwet sacn!” In pacl sacna won kahkla, Matt 26:74. Na Peter el esamak kas ma Jesus el tuh fahk nu sel: “Meet liki won uh ac kahkla, kom ac lafwekinyu pacl tolu.” El tufokla liki acn sac, ac tung arulana upa Matt 26:75.

Kut liye akwuk usrnguk ac lung kulang lun LEUM GOD lah Peter, mwet se na ma lafwekin LEUM GOD pacl tolu, el tuh oru mwe luti lal ke len in Pentecost su oasr mwet tausin tolu tu forla wi u sac (Orekma 2:41). Kut liye pac ke ku lun Ngun Mutal lah Peter ac John tuh akkeyelah sie mwet ul ke mutunoa nu in Temple, Orekma 3:2.

Mwe lutlut se lasr inge mutawaek ke Peter el srakna suk lah mea kalmen aruruma se inge na mwet ma Cornelius el tuh supu ah Konauk lohm sel Simon, ac inge eltal tu ke mutunoa v17. Peter el srakna suk lah mea kalmen aruruma sac, ke Ngun Mutal fahk nu sel, “Liye, mwet tolu pa suk kom inge v19. Ke ma inge, kom akola ac tufoki welultal som. Nimet fosrnga—nga pa supwaltalma uh v20.”


Mwe lutlut se inge kapsreni na Thursday nu ke Sunday ke chapter singoul nofon ke week inge. Ip srisrik se nu ke len misenge uh pa Peter el oru oacna ma sapkin yuk nu sel. LEUM GOD el aksuwosye ac akko ye kut nofon kais sie in oru kulansap lasr nu Sel: in fahkak Pweng Wo nu ke mutun facl nukewa fin faclu. Peter el akola ke Ngun Mutal sikyang nu sel elan fahkak ke Pweng Wo se inge.

Pa inge moul lasr mwet Christian misenge, kut in akkola in kulansupu LEUM GOD lasr in pacl nukewa ac in acn nukewa. Kut enenu na in porongo ac etu pang lun LEUM GOD nusesr kais sie. Pukanten mwet tia lulalfongi ac moul kin Pweng Wo se inge: lah Jesus el misa ac moulyak ac el esla ma koluk nukewa lasr kais sie su lulalfongi in El. Kut sifil mutawaek na in loom sesr ac sou lasr fahkak ke Pweng Wo se inge misenge. Kulo kaksakin LEUM GOD lasr ke ma nukewa El use kut insewowo kin ac sifil paing mwet nukewa. God Bless.

Thursday (10/15) Sifac: Peter El Nuhkanlah

Kunokon 

Deaconese Havelyn Tosie

Thursday October 15 2015
Sifac: Peter El Nuhkanlah
Mwe Read: Orekma 10:1-16

Sifwil kaksakin God ke pal wowo El sifwil ase nu sesr, kut pula na paye karinginyuk Lal nu sesr.
 

Deaconese Havelyn Tosie

Sikyak lun mwe lutlut u, tukun sowak lun Leum a ke fasrelik lun pweng wo nu an apunla Medterranean la nu Rome. Verses 1-16 - kalem ke sie met kol lun an Rom su ekin Cornelius...ke sripen orekma wowo a lalalfongi yok lal, panang lipufan lun God sikyang nu sel in sie ararama... sapkin lan supala met kulansap lal in sonol Simon Peter, akkalemye la, ke met inge som, Peter el liye sie ararama, oana in kaot se kukuinyuki in kusrao me a kain in kosro lemnak nukewa oan loa, Leum God El sapkin lan uni kosro lemnak inge a kang, Peter el srahngwesr ke sripen akwuk in pal soh lun met Jew, Livticus 11: akkalemye ke kain mongo ma srisrila elos in tia kang, ouiya se inge sikyak pal 3 na folokyak a Peter El Nuhkanla" - el srakna motko la mea kalmen ararama lal, Ngun Mutal akkalemye nu sel, "Liye met 3 suk kom, akola tifoki welultal - oana ke Lupufan lun Leum sikyang nu sel Cornelius, a fwk "God El akola in topuk mwe enenu lom... Cornelius el ekin Centorian se a el kol un mwet meun lun an Rom... Peter el som oana ke NgunMutal akkalemye nu sel. Ke Verse 15 akkalemye oinge " Nimet nunku mu kutena ma a sufal in mongo, God el fin fwak mu ku in mongo" - mwe nunak yok kut in lutlut kin ke oiya lasr kais sie, kut in te srela oana sie met ku oana sie lalalfongi, kut nukewa orekmakin lalalfongi lasr ke en Christ a kut in tia srela oana sie, mu wo ku koluk, God el kena tu kut nukewa in sie sin sie wi lalalfongi lasr a in ma se fanna in Christ. mwe luti wowo in sifwil kasrekut ke usyan orekma lasr kais sie, a in sie sin sie wowo ke en Christ

Wednesday (10/14) Sifac: Leum Luhn Len Sabbath

Kunokon

By LM Skipper Ittu

Wednesday October 14 2015
Sifac: Leum Luhn Len Sabbath
Mwe Read: Matthew 12:1-8

LM Skipper Ittu

Kaksakin Leum God ac paing kowos nukewa. Sifac se lasr nuke Wednesday se inge fahk muh "Leum Luhn Len Sabbath," oasr in Matthew 12:1-8. Scripture se inge srumun ke Jesus, wi Mwet Tumal Lutlut lal, fahlac ke sie imac in corn ke sie Len Sabbath ac Mwet Tumal Lutlut elos olelah kutu corn inge ac mongo kac. Ohinge, ke kutu sin Mwet Pharisee inge liye, elos multikihn siyuk sin Jesus lah efu Mwet Tumal Lutlut orekma ke Len Sabbath. Jesus el topkolos ac srumun kacl Tokosra David ac mwet mweun lal, ke elos mongo ke bread kisayang nusing Mwet Tol uh. Kuh ke Mwet Tol uh orekma na ke Len Sabbath. Oacyapa ke moul lun Mwet Tumal Lutlut. Ma inge kewa akkalemye lah molela moul lun mwet uh, yohk liki masap uh. Tuh Leum God el oraclah Len Sabbath in len in monglac nusin mwet uh. Ac God El tiac oraclah mwet uh nuke Len Sabbath, a Len Sabbath orekla ke sripen mwet uh. Mwe luti se inge lutikut in etu orekma fal in orek ke Len Sabbath in oana ke Jesus el oru inge.

Monday (10/12) Sifac: Luhngse Luhn God Kuhtanglah

Kunokon

By Deaconese Sepe Kilafwasru

Monday October 12 2015
Sifac: Luhngse Luhn God Kuhtanglah
Mwe Read: Rome 8:31-39

Deaconese Sepe Kilafwasru

Leta lal Paul nusin met in church Rome pa inge. EL sim in akkalemye  Ohiyac fal met Christian in etu ac mulkin in fwakak lulalfongi lalos ke Christ.
 
Molela lun God ke Jesup Christ el me sang nu sesr met uh in aksuwosye kut nu ye mutun God. Mwe sang se inge tuku nusesr ke kulang lun God mukena a tiac ke orekma wo lasr lais sie. Lupan lungse se inge fwakak kalem ke misac lun Christ fin Saksin.
Mwe read lasr uh akkalemye yohk kutanglah lasr in El su lungse kut yohk. Fine God, El tiacna srukyac Wen natul sifacna a El kisakunulma kacsr. God El lungse elos nukewa suc lulalfongi ke Christ. El fwak mu elos met sulacla lal, ac fwa wacngin kutena ma fwa sreloslac liki lungse lun Christ. Tiac misac ku moul, tiac lipufan, tiac kutena ku inkusrao, tiac ma oan inge, kuh ma a fwa tuku, tiac ma on lung liki fwalu, ku ma on ten liki fwalu. Wacngin sin ma oreklac nukewa ac fwa kuh in Sri kut lac liki lungse lun God.
 
Lela kut in tiac nunkuh mu lungse lun God u tiac ku in moli kut lac Meyer kut met koluk. God El tiac srisri,El tuku ke sripen met koluk. Lela pac kut in tiac nunku muh lungse lun God uh ma  nusin kutu na sesr, a nusin nukewa. Mwe read lasr uh akkalemye ke sie wulela ma arulacna me insewowo nusin met lulalfongi in etu la ma upac fine tuku nusesr God El tiac na siskutlac. El wi kut pacl nukewa in kasre kut meyen El lungse kut. Lungse lun God kasre kut in kutanglah ma upac nukewa ma tuku nusesr. 

Deaconese Sepe Kilafwasru

Sanri (10/11) Sifac: Luhlahlfongiyucklac Saul

Kunokon

By Rev. Takio Likiaksa

Sunday October 11 2015
Sifac: Luhlahlfongiyucklac Saul
Mwe Read: Orekma 9:19-31

Rev. Takio Likiaksa

Moul ekla lal Saul kalem ke me read se inge. Mwet in pacl se inge kalem ke moul matu lal, oru ke Saul el srike elan luti ke en Jesus, oru oasr na alollo lun mwet u. Kalem ke fahk lalos – Ku mea tia mwet se ma srike in uniya mwet lulalfongi in Jerusalem ah pa inge. Ac mea el tia tuku in sruokya pa mwet lulalfongi ac usalosla nu Jerusalem. Ouiya inge pa sikyak ke mwe read se inge.

Tusruktu, kut akilen usrnguk ac oru lun God ke moul lasr mwetu. Leum God el akilen kuiyen nunak lal Saul oru el lumahlla elan orekma kunul in fahkak ke Jesus ac ke Gospel. Pa fahk la tukun na el eis liyacten lal, na el tia esla pal lal in som fahkak ke en Jesus ac ke moul lal (Saul) sifacna in fahkak moul ekla ac moul sasu ma Leum God el oru nu sel.

Fal nuke sifac lasr nu misenge uh, “Lulalfongiyukla Saul.” Paye, oasr mwe kutong, kahs in sufan, a selalalfongi ac nuna sikyak ke kut oru orekma ma Leum God el ase nu sesr. Tusruktu, kut fin ac lohacng nuke ma inge ac ku in akmunasye kutla nuke lulalfongi lasr uh.

Wo ac fal kut in eis oru lal Saul in kasru moul in fahkak lasr ke Jesus ac ke Gospel.

Saturday (10/10) Sifac: Ohiyac Luhn God Uh Siena

Kunokon 

By Deaconese Niokong Yukiwo

Saturday October 10 2015
Sifac: Ohiyac Luhn God Uh Siena
Mwe Read: Orekma 9:10-19

Deaconese Niokong Yukiwo

Kulo nusin God ke nga kuh pac in wi luti kas lal oayacpa moul lasr kewa.
Mwe lutlut se inge fwak ke upaclac nusin mwet christian in acn Jerusalem, mweyen mwet Jew elos tia lungse mwet lulalfongi in luti ke miss lun Jesus a moulyak lal oayapa elos fwak muh Jesus el wen nutin God. 

Paul, pal se inge el srakna pangpang Saul, el wi pac arlana aksangengye mwet Christian, el wi srike in onelosla, Saul el eis ku sin mwet tol fulat, elan som nu Damaskus a use mwet ma alu nu sin Leum Jesus, nu Jerusalem in ak kosye yukwe, el srakna fwasr inkanek nu Damaskus, oinge Leum Jesus el sikyang nu sel ke sie kalem, a fwak, Saul! Saul! Efu kom ku kalyeiyu, a Saul el siuk, su kom an? A Leum el fwak nga Leum Jesus suc kom kalyei, tuyak fālā na in city uh. El som nu in city uh el tia ku in liye kutena ma len tolu, tia pac mongo ku nim, tukin ma inge.

Leum el sikyang in sie ararama nu sel Ananais, sie mwet arlana yok lulalfongi lal in an Damaskus, akola fwala nu ke inkanek soko pangpang suwos. Kom a sun loom sel Judas, kom siuk ke sie mwet suc pangpang Saul ac Ananais el fwak, Leum mwet puspis fwak ke mwet se ingan, ke ma koluk puspis el oru nusin mwet lom, el oayapa tuku nu inge ke ku suc itukyang nu sel sin mwet tol fulat in sruokya mwet nukewa alu nu sum, na Leum God el fwak fwālā Nga sulala elan kulansapeyu, ā oru tu inek in eteyuk sin mwet pegan ac togosra oayapa mwet Israel. A nga a fwa akkalemye ma nukewa el a keokin ke sripuk, na Ananais el som a filiya paol fin sifwal a fwak, Saul malik Leum Jesus suc sikwot nu sum inkanek u, el supweyu tu kom fwa ku in sifil liye a in sessesla ke ngun mutal. In pal sa na Saul el sifwil liye a el kui tuyak baptais la

Friday (10/9) Sifac: Ohiyac Usrnguck Luhn God

Kunokon 

Lipan Welly

Friday October 9 2015
Sifac: Ohiyac Usrnguck Luhn God
Mwe Orekma 9:1-9

Lipan Welly

In oana pacl nukewa, srui kaksakin LEUM GOD lasr ke moul in misla ac akwuk na wo El oru nu sesr nofon. Wangin misa yurin LEUM GOD. Ohiyac Luhn LEUM GOD uh usrnguck.

Nga finne sie mwet su fahk kas koluk kacl in pacl meet, ac sie su akkolukye ac kalyei orekma lal. Tusruktu God El pakoten nu sik mweyen nga oru ma inge in nikin, ac in selulalfongi luk, 1 Tim 1:13. Nga kalyei mwet ma fahsr ke Inkanek sasu se inge, ac pus selos misa. Nga kapriya mukul ac mutan ac siselosyang nu in presin, Orekma 22:4.

Kut lutlut ke lah Saul el wi akkeye in anwuki Stephen. In len sacna, mwet lun church in acn Jerusalem mutawaek in pula mwe akkeok na upa nu selos. Mwet lulalfongi nukewa, sayen mwet sap uh, fahsrelik nu in acn nukewa Judea ac Samaria, Orekma 8:1.

In pacl se inge, Saul el tiana fuhleak in aksangengye mwet lulalfongi lun Leum Jesus, ke el suk inkanek in onelosla . El som nu yurin Mwet Tol Fulat v1 ac siyuk in orekla kutu leta nu sin mwet ke iwen lolngok in acn Damascus, in akkalemye sripen som lal, tuh fin oasr mwet el konauk in acn we su wi u se pangpang Mwet Fahsr ke Inkanek lun Leum, elan ku in sruokolosi, mukul ac mutan, ac usalosme nu Jerusalem v2.

Ohiyac usrnguck Luhn LEUM GOD kut liye ke mwe lutlut se inge, lah ke sripen mwe akkeok na upa orek nu sin mwet lulalfongi Lal, elos mutawaek fahsr som liki acn Jerusalem. Mwet lulalfongi ma fahsrelik elos fahkak ke Pweng Wo yen nukewa elos som nu we, Orekma 8:4.

Ke Saul el tuku apkuran nu ke siti Damascus, sie kalem sarmelik inkusrao me ac apnulla v3. El putatla nu infohk uh, ac lohng sie pusra fahk nu sel, “Saul, Saul! Efu kom ku kalyeiyu?” v4. Na el siyuk, Leum, su kom an?” Na pusra sac fahk nu sel, “Nga Jesus, su kom kalyei v5. Tuyak ac utyak nu in siti uh. Na ac fah fwackot ma kom in oru v6.”

Saul el sie mwet na kalem pac ke ma sahp lun mwet Jew ke sripen el lutlut kac, su kokoh sel mwet luti Gamaliel. Elos kewa na arulacna eteyuk sin mwet Pharisee ke sripen etu lalos ke ma sahp. Leta itukyang nu sel Saul elan orekma kin fin acn Damascus akkalemye lulalfongi yohk lun Mwet Tol Fulat kacl.

Jesus El sikyang nu sin mwet se ma kalyei upac emeet mwet lulalfongi in acn Jerusalem ac ekulul lah elan mwet se ma fototo emeet in oana El. Inkanek sasu soko ma Saul el kalyei upac emeet ah pa sikyang nu sel ke fahsr lal na Damascus. Wangin sie mwet suwohs ye mutun God, Rome 3:10.

LEUM GOD mukena pa kuh in aksuwohs ye kut kais sie. Efin LEUM GOD El wangin in moul lasr uh kut e oana Saul in orekma lasr uh, kalyei ma Lun God. Jesus El misa in moli kut lac nofon meyen kut nofon mwet koluk. Wangin Suwohs yurin mwet uh ne kena Jesus El utyak nu in moul lasr kais sie. LEUM GOD mukena pa finsrak lasr uh. Kut nofon enenu na in fungyang liki na meet ah nu sin LEUM GOD ac sang nofon lulalfongi lasr uh nu Sel. Sifil paing mwet nukewa ac God Elan wi kut nofon kais sie.

Thursday (10/3) Sifac: Ohiyac Wolacna Luhn God

Kunokon 

By Victor Melander

Thursday October 8 2015
Sifac: Ohiyac Wolacna Luhn God
Mwe Read: Luke 11:30-37

Victor Melander

Mwet Jews iktokeni in lohng luti Lal Jesus, elos siyuk sie mwe akul lulap, Queen of Sheba ac mwet Nineveh, mea se tu arulana yok seltal u. Ke Queen of Sheba el long ke Lahlmetmet lal Solomon el lulalfongi tuku ke yen loeles in long sel sifana Lahlmetmet lal Solomon. Lahlmetmet lal Solomon nufon tia fwal na ke Lahlmetmet lal Jesus. Mwet Nineveh long fwakak lal Jonah ac forlac auliyak. Mwet Jews inge long luti paye Lal Jesus, su Solomon ac Jonah tia apkuran nake, Tusruk elos tia lulalfongi ac upac in forlac.
 
Lelac tu in tia mwe lut se nasesr in liye lupan sulalalfongi lun mwet falu. Ac oayapac kutu sesr su pang pang Christian. Lelac kut in sang kulo na sihn GOD ke ohiyac Wolacna LAL in we pac ipesis ke mwe sang lulalfongi su EL use na sesr. Ac Jesus Christ ke El tuleh kut la liki mwe kapur lasr.

Wednesday (10/7) Sifac: Ohiyac Muhtahl Luhn God

Kunokon 

By LM Skipper Ittu

Wednesday October 7 2015
Sifac: Ohiyac Muhtahl Luhn God
Mwe Read: 1 Peter 1:16-19

LM Skipper Ittu

Paing kowos nukewa ke Inen Leum lasr Jesus Christ. Sifac se lasr nuke Wednesday se inge pa "Ohiyac Muhtahl Luhn God," oasr in I Peter 1:16-19. Peter el simuhslah letter se meet lal inge ke yac 65 AD nusin Mwet Christian ke churches Pontus, Galatia, Cappadocia, Asia, ac Bithynia. Ke scripture se inge, el kafwelos in moul fal nuke ohiyac muhtahl luhn God ac in suhnakuhnuhl. Elos ac sun keok in oacna ke Christ el sun. Tuhsruhktuh, keok elos puhlakin inge, tiac apkuhran nuhke engan ma pahtpaht, suc ahkolah nuh selos. Elos in arulana tu kuh ke moul in luhlahlfongi lalos. Elos in moul in muhteng, mislac, ac insacnweacng nuke sahflah, in oacna ke Christ El oru. Elos in tiac sifwil folok nuke moul koluk ac wangin sripac luhn mwet mahtuh lalos meet ah. Mwe luti se inge kasekut in etahi ohiyac muhtahl luhn Christ. Tuh ke Christ muhkena, kuht fah kuh in puhlakin ohiyac muhtahl luhn God, ac ahkwot in eis kuhtanglah oana ke Christ el puhlakin.

Tuesday (10/6) Sifac: Ohiyac Luhn God Yohk Luhlahlfongiac

Kunokon

By LM Driskell Jack

Tuesday October 6 2015
Sifac: Ohiyac Luhn God Yohk Luhlahlfongiac
Mwe Read: Psalm 112:1, 2, 6-9

LM Driskell Jack

Ngan pain kowos nukewa tulik nutin GOD Papa Tumasr. Sie fahk lun Wen Nutin GOD Papa Tumasr ke pacl se ma Setan el srike in srihfacl: EL tohpohkul ac fahk, “Tuh Ma Simusla uh fahk pac mu…”(Matthew 4:7). Na pa inge sie sripa yok ma nga kom tuhkeni kac misenge in sifwil lutlut ke Kahs Mutal lun GOD Papa Tumasr in kacsre kut in Ohiyac LAL ac in Lulalfongel in ma nukewa.
 
Misenge, kut eis kacsru nu sesr ke Psalm 112. Psalm sie inge (kuh ON soko inge) akasmakinye kut in esam la oasr ma mwowo ku mwe insewowo puspus ma kut kuh in eis ke kupacsryang lasr nu sin GOD Papa Tumasr in Kusrao. Mwe asmak ke Psalm soko inge, ma in akkehyekut ke nunak lasr ac ke ohiyac lasr ma kut oasr kac in tia munasla in fahsr ke ma El sapkin nu sesr in ku in moul oana tulik natul.

Ke kut ehkin tulik natul, kut oana sheep nutin sie Shepherd mwowo ma etu sheep natul. Oana ke akkalemyeyuk in gospel lal John, “Nga mwet shepherd wo. Nga etu ma nutik ac ma nutik eteyu, Oana ke Papa El eteyu, ac nga etu Papa. Ac nga engan in sang moul luk ke sheep nutik. Oasr kutu pac sheep nutik su tia muta in kalkal se inge. Nga enenu in usalosme pac. Elos fah lohng pusrek, ac elos nukewa fah u sefannala, yurin mwet shepherd sefanna”(John 10:14-16).

Ke sripen lungse kawil lun GOD Papa Tumasr in Kusrao, pwenang el akkalemye kut in likiyac lulalfongi lasr Sel. Ke fus se meet ke Psalm se inge, akasmakinye kut la arulana pukanten sripac mwowo ma kut ah puhlahkin ke sripen kut fongyang ac kupacsryang nu Sel (Psalm 112:1).
Nuke fus se ak luo ke Psalm se inge, fahk ke Sie ohiyac ma kut ac ahkuhlen ke kupacsryang lasr nu Sel pa akkalemyeyuk in (Soakas 25:13) su akasmakinyekut la “Elos ac fah kapkapak, A fwil natulos ac fah usrui facl selos.” A facl selos pah Israel, sap Jerusalem su Temple lal Soloman muhsaiyukla weh in akkalemyeyuk la GOD Papa Tumasr el oasr yorolos.

Ke kuh ac lalmwetmet ma GOD Papa El tu ahsang nu sel Tokosra Soloman, kut ahkuhlen oana ke akkalemyeyuk in (Soakas 3:16-17), “Lalmwetmet uh ac akloesye moul lom, akkasrupye kom, ac oru in sunakinyuk kom. (17) Inkanek lun lalmwetmet uh ac mwe engan nu sum, a kol kom nuke moul in misla. Pa ingan wuhlela se ma Psalm se inge akasmakinye kut kac uh; la ac “Oasr mwe kasrup ac sunak, wo ouiya ac kapkapak yorok in kitala”(Soakas 8:18).

Pa ingan finsrak yok se ma kut kuh in sun ke kut oasr ke ohiyac lun GOD Papa. Pa fus se ak onkosr (Psalm 112:6) akkalemye “Sie mwet suwoswos el fah tu na ku, El esamyuk in pacl nukewa.” Ke sripen kapkakpak yok lal, el sang mani lal in kasru mwet, ac tia eis laesla kac, Ac el tia lela mwet in moli nu sel tuh elan fahk kas kikiap lain mwet wangin mwata (Psalm 15:5). Ke kut kupacsryang nu sin GOD Papa Tumasr, kut Filiya mwe fosrnga nukewa yurin LEUM GOD, Ac El ac fah lohahngeh kut; tu El tiana lela mwet suwoswos in kutangyukla (Psalm 55:22).

Ke sripen kut tia kuh in kutangyukla ke sripen orekma suwoswos lasr yeh mutun GOD Papa Tumasr, pwenang ke pacl se oasr ma koluk ku pweng koluk, lulalfongi lasr yurin GOD Papa Tumasr ahse ku in nunak nu sesr in tuh na kuh. Ke kut read ke fus ak itkosr (Psalm 112:7), kut ohyacpac eis ke fahkak ke (Psalm 56:4), “Nga lulalfongi God, ac tiana sangeng; Nga kaksakunul ke wulela lal nu sik. Mea mwet ac oru nu sik.”

Pa inge sripa yok oru kut mwet lulalfongi enenu in kupacsryang nu sin kut in oasr luhlin poh kuh Lal. Lela nu sesr in kaksakunul, ac fulatlana lal in Kusrao, oayapa kof su oan lung liki kusrao (Psalm 148:4). In oana ma Simusla uh fahk, “El sang yok nu sin mwet enenu”(2 Corinthian 9:9). Na kut fin nunku ke ma inge nukewa, mea kut ku in fahk? God El fin wi kut, su ku in lain kut? (Rome 8:31).
Kulo ma lulap nu sin GOD Papa Tumasr ke lungse lal nu sesr nukewa. Ke sripen lungse se lal inge, el uhse ohiyac mwowo ac kawil lal ke ma Simusla lal in BIBLE MUTAL natuhsr in mwe ihwehkup lasr in lulalfongel in ma nukewa kut oasr kac misenge.
 


GOD Bless You All,





LM Driskell J. Jack
Kosrae-Seattle Congregational Church
alukosraeseattle@gmail.com

Monday (10/5) Sifac: Ohiyac Suwohslacna Luhn God

Kunokon

By Deacon Danny & Deaconese Tulpe Dizon

Monday October 5 2015
Sifac: Ohiyac Suwohslacna Luhn God
Mwe Read: Psalm 18:20-30

Deacon Danny & Deaconese Tulpe Dizon

Kulo kaksakin God Fulatlana lasr ke moul lasr na kewa ac kulo pac ke Kas Wolana Lal na sesr. Kas Lun Leum God na sesr nuke Monday(10/5/2015) se omeet ke mahlem sasuc se inge suc fwak muh"Ohiyac Suwoslacna Lun God" ac ahkuteyucki nu sesr in book lun Psalm 18, verse 20-30.  Psalm soko inge akkalemye ke soko on in kutangla lal David, el sie sin mwet kulansap lun Leum God.  Kusen on soko inge akkalemye ke oiyac lun God lah El suwos pal nukewa.  Elos nukewa su oru ma suwos God El fwa sang lacnen orekma lalos. David el sie mwet ma arulana akos ac karuhnguhnacng masap lun God nukewa.David el fwak pa mu oiyac lun God uh kom fin oaru nu sel El fwa oayapa oaru nu sum.El lungse moul suwos,moul nasnas, ac inse pusisal. El pa acse kalem, El pa acse ku in lain mwet lokalok, ac El oana sie mwe loeyuck nu selos nukewa suc suk molela Sel.  Ma nukewa God El oru uh suwos, ac Kas Lal fal in Lulalfongiyuck. Lela kut nukewa in sifil long ke Kas Lal ac in Moul Kihn Kas Lal.

Saturday (10/3) Sifac: Tu Ahkolah

Kunokon

By Surleigh Tara

Saturday October 3 2015
Sifac: Tu Ahkolah
Mwe Read: Orekma 8:26-40

Surleigh Tara

Ma se met, kulo nusin God ke moul lasr kewa ac in wi pac paing kowos kewa.  Nga wi pac arla engan in kasru mwe lutlut nuke week nge uh.

Kunokon se inge akkalemye ma sikyak ke supeyukla lal Philip nuh yen mesis ac. Pacl puspus God El pangon mwet in kulansap.  Pacnacng, kut enenu in akolah in tia etu mukena uh in kuh pac in wi fahkack ke Kahs Lal pacl nukewa, yohk nuke acn suc ma kuht fuhfahsyucsr nuhwe. Wangin sripen nunak in mekin kuh srunga in sramsram nusin mwet sahyac.  Pus pacl God El ac use kain in mwet nuke acn kuht oasr we. Ke sripen moul lun mwet uh yohk sin God pacnacng El pang nusin kais sie sin mwet lulalfongi in akkfasryelah lungse lal nu selos suc tuhlac in moul.

Mwe read se inge luti kuht in kalem kac lac, inkaiyen mwet karuhnguhnack mwe orekma kunalos uh, enenu in eis pacl in monglac ac in loang nuke enenu lalos kuh ma in sang kasrpaclosyak sifanna met; pacl se inge pa elos in nackuhloslac ke mwe luti in sang kasreang ma elos oasr kac.  Pa sis, ke kuht readi Kahs lun God, pus pacl enenu kuht in tui ke read uh ac sifanna siyuck lac meah kalmeyacn ma sumuslah se inge ac oayacpac in orekmakin lungse lun Leum God in pa sang kihfucs nunak nuke top lasr uh.  Kuht readi la eunich se Ethiopia inge el kalem nu paye ke mukuikui lun Ngun Mutal suc nackuhllah ke kahlem sin God me.  Ke sripen el suk ac tia suk mukena, el oacyacpac siyuk ke kasru. Ke sripac se inge, el eis ke mollelah sin God.  Ma inge kewa tia kuh in sikyak fuhunnuh el tia readi kuh tia suk ke kasru sin God.

Ma nusesr uh pa, kuht in tia tui in suk ke etac-ack ke mwolana ac ke lung kulang lun God. Efin ne fungulyuck kuht, kuht enenu na in kompare ac kacfeacng in prue ac suk in readi Kahs lun God.  Ma inge nukewa e tufwah ahkyohkye lulalfongi lasr ke God Papa, God Wen, ac God Ngun.  Kuht finne tia kalem ke ma kuht readi ke Kahs lun God, kuht enenu na in siyuck na siyuck ne kena God El use Ngun Mutal in ikacsla kuht in kalem ke kalmeyacn ma sumusla. Ke Kuh Lun God, mwe siyuck lasr kewa ke ma kuht tia kalem kac, e tufwak ikacklah oana ke God Papa El wulelah nusesr. Esam lah, Leum God El asang kuh lun Ngun Mutal nuh sin sie sin sie suc ma suk tuh kuht kewa in orekmakin ac pulakihn insewowo ke Lung Kulang Sin God me in ahkoe kuht nuke ma suc e fwa tuku.

Thursday (10/1) Sifac: Tu Ke Puhlaik

Kunokon

By Deaconese Havelyn Tosie

Thursday October 1 2015

Sifac: Tu Ke Puhlaik

Mwe Read: Orekma 13:52;14:1-3

Deaconese Havelyn Tosie

Sifwil kaksakin kulang lun God nu sesr, ke akwuk wolana Lal El sifwil ase pal lasr in akyokye kas mutal Lal. Book in Orekma fwakak kalem ke orekma lun met sap, tafwema sramsram ke pweng wolana ma Luke el sumusla. Ma yok ke book se inge fwakak ke oiyan mutawaak lun moul in Christian, in akpayei wuleang lun God nu sin met Jew in pal soh. Fwakak kalem in Orekma 13: verse 47; Pusren God nu sel Paul a Barnabus "Nga akikomi tu kom in sie kalem nu sin met Pegan" tu fwalu nofon fwa moliyukla. Mwet Pegan long pweng wo yurin God, elos engan a kaksakin God.

Orekma 13:52 nuke 14:1-3, fwakak ke pal se Paul a Barnabus oru luti lalos in iwen lolngok lun met Jew, mwet puspus sin met jew a gentiles(pegan) forla a lalalfongi. Tusruktu met Jew ma tia lalalfongi ke Jesus, elos sukok sripa in lain met sap inge. Ouinge elos pirik nunkalos met kol, met pegan u elos in forla liki luti inge. Elos mutawaak in kwaselos, Ne oinge, Orekma 14: 3, akkalemye la met sap u muta we pal na loes se a oru fwakak lalos, oana ke sifwa an fwk u "TU KE PULAIK" ke sripen Leum God El sang ku nu selos in orek mwenmwen a ma usrnguk. Ma inge akpayei ma elos fwakak la kulang lun God u paye. akkalemye pa la, fin asr lain ke fwakak lalos, an nukewa elos som nu we, elos in osrokla kutkut ye nialos in akkalemye la elos lain met in sac...mwe luti wowo in in kafwekut ke lalalfongi lasr ke Jesus, tu el mwet lango se fanna, a kut in tu ku a pulaik wi lalalfongi lasr kais sie.

Mwe rid se inge sikyak ke pal se Paul a Barnabus oru luti lalos in an Iconium in iwen lolngok lun met Jew, pus selos forla in wi lalalfongi tusruk, ktu sin met Jew ma tia lalalfongi ke Jesus elos suk matalos, puruk nunak lun mwet forla a met kol in an we...tusruk ke sripen Kuh ma Leum God el sang nu selos, elos sisla pal na loes in oru luti lalos in akpayeye wuleang lun God la paye. Elos kafweang in oru luti ke pweng wo, oana ke sifwa an fwk u "Tu ke Pulaik" . Jesus sifwana el fwak ouinge, ke kowos oru luti lowos a asr lain yowos, kowos tuyak a osrokla kutkut ye niowos a fwasr lukelos, kalmeya pa in kalem selos la elos lain acn inge. Mwe luti wowo nu sesr in tu ku a pulaik in fwakak ke pweng wo wi lalalfongi lasr in kisrung mwe kisrung nuke kulansap lasr kais sie, fwin oinge nokomang nuknuk lun lalalfongi in sang kisrung ma inge nukewa...