Tuesday (6/30) Sifac: Loacng NukeMwe Enenu Lun Mwet Ngiac

Kunokon

By LM Driskell Jack

Tuesday June 30 2015
Sifac: Loacng NukeMwe Enenu Lun Mwet Ngiac
Mwe Read: Job 31:13-22

LM Driskell Jack

Greetings from Des Moines, WA! Ngan eis pacl uh, in kaksakin GOD Papa Tumasr ke el kulang ac pakoten nu sesr in sifwil ahse nu sesr in wi moul ke len misenge uh, Tuesday, June 30, 2015. Misenge, kut wi ahkuhlen kuh lun GOD Papa Tumasr ke ma mwowo puspus El ahkohla nu sesr in kacsre kut ke muhtehngacsr ac kacsrpacsr la kut oasr Washington, California, Georgia, Kosrae, ku oana sie an ma kut moul in ak tuktuk weh. Paye la arulana yok na paye lungse lun GOD Papa nu sesr nukewa. Nwe oasr news koluk kut long misenge, tusruktu, ma inge kut kuh in eis misla pacl se kut prue ac siyuk ke kacsru yurin GOD Papa Tumasr. Na mwe kacsru nu sesr misenge pa akkalemyeyuk ke Kahs in Kol natusr an, ke kahs English fahk muh 'Attention to the Needs of Others. Mwet kulansap lasr ke Committee All su kacsre kut ke 'Kahs In Kol' luhngasla ke kahs lasr, 'Loang Nuke Mwe Enenu Lun Mwet Ngiac'. Mwe read kacsre kut, oasr ke buk lal Job, sapta 31, fus 13 nuke 22.

Mwe read se inge, (Job 31:13-22), el sramsram safla lal Job nu sel Bildad, Zophar ac Eliphaz. Mwet tolu ma akkalemyeyuk inge, kawuk lal Job, su tu tuku nu yorol in kacsrel ku 'ah-eh-ngani' yorol ke pacl se ma Job el muta in ma uhpac sik nu sel ke sucu lal ac mwe kacsrup lal su ihtukla luhkwel. Ke kawuk tolu lal Job inge som nu yorol Job, elos som in sang kas in kacsru nu sel. Na tok kutu, elos forla, ac muhtewehack in fahk nu sel Job la ma inge mwetan ma koluk el ac sucu lal orella pa sis sik ouinge nu selos. Bildad el fahk in (Job 8:4), "Sahp oasr ma koluk tulik nutum ah tuh oru lain God, Pwanang El sang kaiyuk fal nu selos." Zophar el fahk in (Job 12:14), "Sisla ma koluk ac ma sutuu liki in lohm sum." Ac Eliphaz el fahk, "Kaskas wel, Job. Kom kaskas wel!(Job 15:2). Ke puhsra na kuh, Eliphaz el fahk, Mo, ma ke sripen arulana yokla ma koluk lom;(Job 22:5). "Kom tuh srunga sang kof nimen mwet su totola, Ac sranga pac sang mwe mongo nu selos su masrinsral. Kom tuh orekmakin ku lom ac wal lom In eisla can uh nufon. Kom tia falkin lah kom tia wi kasru katinmas, A kom oayapa pisre ma lun tulik mukaimtal, ac oralos koluk(Job 22:7-9).

Kut fihn ihkweyac sramsram lun kawuk tolu lal Job lung inge, kut kuh in ahkuhlen la, som in ah-eh-ngani lalos, tu forla, elos sramsram in Mwet ke ma koluk elos fahk nu sel Job mu pa mwatan ma el puhtatyang nu kac. Tusruktu Job el ahkulen la suloal la nunkeya selos (Bildad, Zophar ac Eliphaz). Meyen, Job el sie Mwet suwoswos ye muhtun GOD Papa Tumasr. Oana ke ahkulen lun sie Mwet Pahlu Ezikiel, El fahk la ke etu lal, Noah, Daniel ac Job pa tolu sin Mwet el etu muh orekma mwo lalos kuh in ahkuhlenyuk ke pacl in nununku nu selos(Ezekiel 14:14).

Kut fihn lohang ak mwoyac nuke ouiyac se ma mwet kawuk tolu lal Job, mutehwehack kac, elos tu srike in som nu yorol Job in akkalemye la elos ahkulen ma uhpac ma el puhtatyang nukac. Elos som in kacsrel. Kalmac pa, elos liacten in ahkulen ma Job el tu puhtatyang nu kac; tusruktu, elos tu tilac sramsram in kacsrel Job, ah elos fohrang in fahk mu ma uhpac ma el puhtatyang nukac; mwatan orekma lal su tia suwos. Pa inge sie elya ac ouiyac lasr ke moul in Mwet lasr uh. Kut lungse kacsru, tuhsruktu, kut tiana ahkikuti in loang nuke ma kut oru ku fahk uh la ma tuku ke ouiyac mwo ke etu lasr ke ma Simusla ke Kahs lun GOD Papa Tumasr; ku nunak na lasr. Finsrak yok uh pa kut in sifwil loang nu sin Mwet wiyesr in konwack na paye enenu lalos uh meet, fah kut liye la kacsru fuhka elos enenu sesr uh. Nga fahk ouinge, meyen arulana mwo ouiyac se ma kawuk tolu (Bildad, Zophar, ac Eliphaz) orella nu sel Job inge. In som kacsrelos ma puhtatyang nuke enenu. Tusruktu, pa kut kalem kac la Job el sramsram ke mwe lutlut se inge, in akkalemye la kut fihn tia lohang akmwoya nuke kacsru ma kut akfahsrye nu sin mwet enenu; kacsru lasr ku pac in ekla mwe lohkaclok kuh mwe puhrakack. Pa sis kut enenu in arulana liacten ac sismouk in fuhfahsryusr lasr in ahkuhlen la su mwet enenu kuh Mwet ngiac ma sramsraminyuk ke mwe lutlut se inge.

Su Mwet Ngiac? Pah nuke mwet lilu ac lulu, mwet kulansap sacye, mwet sukasrup, katinmas, tumunmas, tulik mukaimtal, mwet masrinsal, mwet enenu nuknuk in nuhkum, ac elos pac ma mwet wiyesr kutasrik nu se. Pa ingan kutu Mwet ngiac ma Eliphaz el akkalemye nu sel Job mu el tiana kacsru. Ac nu sik kom misenge, oasr Mwet ngiac pac ma nga kom enenu pac in lohang nu se. Yok enenu nu sesr, (kut ma oasr in kulansap misenge), su wi tahfuh ke Kas Mutal lun GOD Papa Tumasr. Enenu se inge pa in wi lacsrkackin kas mutal lun GOD Papa Tumasr nu sin wiyesr, tumasr, kiyesr ac elos nukewa ma enenu in lutlut ke GOD moul sefanna ma kut alu nu se, ah su kut lacsrkackin kahs mutal lal ke sra-buk se lun 'Kahs in Kol' misenge. Finsrak yok se ingan pa akkalemyeyuk ke (Orekma 2:38), "Peter el fahk nu selos, "Kais sie suwos enenu in forla liki ma koluk lal, ac baptaisla inen Jesus Christ, tuh ma koluk lowos fah eis mwe kite lun God ke Ngun Mutal."

Kulo ma lulap nu sin GOD Papa Tumasr ke kut ku in wi epeis ke sie Mwet kulansap suwoswos ye mutal, pa nukel Job.

GOD bless you all!


LM Driskell J. Jack 

Kosrae-Seattle Congregational Church

23254 25th Avenue South
Des Moines, WA 98198

(206)592-1736

(206)946-0937

alukosraeseattle@gmail.com

Monday (6/29) Sifac: Orekma Wo Nu Selos Su Akkeokyeyuk

Kunokon 

By Deaconese Tulpe Dizon

Monday June 29 2015
Sifac: Orekma Wo Nu Selos Su Akkeokyeyuk
Mwe Read:Job 29:7-17

Deaconese Tulpe Dizon

Kaksakin Leum God ke moul lasr, suc kut nukewa pulakin fahfahsruh ne ke pacl se inge.Oayapa kulo ke kas Lom na sesr ke pal se inge. Mwe read se inge srumun ke koanon sramsram safla se lal Job nusin mwet kawuk tolu lal. Job el akkalemye lah pacl nukewa el srike lan oru ma suwos ac paye , pa kalem ke orekma wo lal nu sin mwet sukasrup, tulik mukaimtacl, katinmas, ac oayapa mwet sac.

Pa inge un mwet ma kut enenu in loang nu se in kasru uh. Ke kut oru oinge kut orekma wo nu selos Suc Akkeokyeyuck. Mwet su ma tia loang nu selos, mwet inge elos pangpang mwet sulallal.

Sunday (6/26) Sifac: Israel Srangesr Folok Nu Yuruk

Kunokon

By LM Quartos Esau

Sunday June 28 2015
Sifac: Sie Len In Tuhng ac Eoksra
Mwe Read: Amos 8:1-6, 9, 10

LM Quarto Esau

Book lal Amos kitakatwelihk nuhke ip yohk tolu. Ip se met an pa in Sapta 1-2, suc sramsram yohk ke pusra in sensenkakin oalkosr ma ituckyang nusin mutunfwal oalkosr a (Syria; Philistia; Tyre; Edom; Ammon; Moab; Judah; ac Israel). Ip akluo oasr in Sapta 3-6, suc sramsram yohk ke nuhnuhnkuh luhn God ma akola nusin mutunfwal Israel; ac ip ak tolu oasr in Sapta 7-9 suc sramsram yohk ke aruruma limekosr ma ikackla nusel Amos.

Kais sie sin aruruma tolu met lal Amos inge akkalemye ke kai ma Leum God El akola in sang nusin mutunfwal Israel. Aruruma se met an ma ke un locust na lulap se ma kanglah mah ac sra nukewa fin acn uh. Amos el kwacfe sin God in tiac sikyak, na God El ekulla nunak Lal. Aruruma se akluo a ma ke Sie E lulap ma furreak meoa uh ac oayapa acn uh; Amos el sifilpac pray siyuk in tiac sikyak, na Leum God El ekullah nunak Lal. Aruruma aktolu ma ke soko ah in aksuwos ma Leum God El sang aksuwosye soko pot ma kihlac suc akkalemye la mwet Lal kihlac oana pot soko inge. 

In me read lasr u, Leum God El sang sie pac aruruma nusel Amos elan liye suc kalem ke Sie Fohtoh in Fukunsahk. Oasr ip yohk tolu pa mwe read se inge akkalemye nusesr in akilen. 

Ip se met an, Fohtoh in Fukunsahk Se, verses 1-3;

Ip se akluo an, Ma Koluk lun Mwet Israel, verses 4-6; ac

Ip se aktolu an, Kaiyuck nuhsin Mwet Israel, verses 9, 10. 

Ke ip se met inge, Leum God El sang nusel Amos elan liye in sie aruruma ‘Sie Fohtoh in Fukunsak’. In fohtoh se inge, fukunsahk inge mwesrlah. Leum God El fwak nusel Amos la, fukunsak mwesr inge ahkkalemye la pacl in nununku lun God fototome. Ac ma ac sikyak ke lwen in nununku sac ac tuku pa tung, ke sripen mwet puspus ac fwa misac.

Ip se akluo an, Ma Koluk lun Mwet Israel. Pusren Leum God tuku nu yorol Amos in akkalemye ma koluk ma mwet Israel elos srakna oru. Mwet kasrup elos kunaoslah mwet sukasrup, elos oruh nununku sesuwos nusin mwet enenu, elos kutasrik nusin mwet munas. Kutu pac ma koluk ma mwet Israel elos oru pa, alu ac akfulat lalos ke malem sasuc, ku lwen Sabbath, elos oruh tiac ke inse paye lalos, a ke na lumah. Kalem ke elos salka lwen lulap inge in tari safla, elos in mu forang nuke kuka lalos. Mwet inge oayapac oruh inkanek na kutasrik ke kuhka lalos. Elos kihluckunack molin ma yorolos, kukakin ma tiac wo ke molo na yohk, ac moli mwet sukasrup in mwet kohs lalos. 

Ip safla sacn, Kaiyuck nuhsin Mwet Israel. Leum God El sifana fwak la, El ac kai mwet Israel ke sripen likeke ac seakos lalos. Oinge, El ac oruh fwalu in lohsrlah ac sang asor lulap nusin mwet Israel. Kalmac pa, Leum God El ac sang kaiyuck na upac nusin mwet Israel suc ac pwacnwang in oasr tung ac asor lulap ma elos pulakin. 

Kut ku in kapsru mwe lutlut se inge nuke moul lasr misenge u. Ke sripen, moul lasr u tiacna eklac nuke moul lun tulig nutin Israel in pacl soh. Elos srike in akfalye alu in malem sasuc lalos, ku akfulwatyeyen lwen Sabbath, tusruktu elos tiana oru ke nunak ac inse paye lalos. Elos oayapa orala inkanek na kutasrik nusin mwet munas ke mwe kuka lalos. Ma inge fwin oasr yorosr, mwe lutlut u pangon kut, kut in silaklak nawelah met liki pacl u mwesrlah, Leum God Elan tiac oru kaiyuck Lal nusesr oana ke El oru nusin tulig natul. 

________________________________________

Kunokon

Sunday, June 28, 2015

Sifac: Sie Lwen in Tuhng ac Eoksra

Book: Amos 8:1-6, 9, 10

Me lutlut se inge akkalemye ke sie aruruma ma Leum God El sang nusel mwet palu Amos elan liye. In aruruma se inge, Amos el liye sie fohtoh in fukun sahk. Fukun sahk inge fukunsak mwesr suc akkalemye ke lusen pacl ma mwet Israel elos oru ma koluk ac seakos masap lun God. 

Inmasrlon ma koluk puspus ma mwet Israel elos oru, mwe read se inge akkalemye la elos oru koluk nusin mwet munas, elos suk in kunaosla mwet sukasrup, alu lalos ke malem sasuc, ac akfulatyeyen lwen Sabbath selos elos tiac oru ke nunak paye ku inse paye lalos.

Oinge Leum God El sap Amos elan fwakang kaiyuck ma El akola in oru nuselos. Tu ke lwen in nununku se inge ac sikyak, mwet Israel ac muta in asor lulap. 

Me lutlut wowo in akesmakinye kut in esam la, oasr lwen se ac mau tuku. Lwen se inge ac sie lwen in engan nusin mwet ma oru ma lungse lun God, ac ac fwa sie lwen in asor nusin mwet ma tiac oru ma lungse lun God.

Saturday (6/27) Sifac: Leum God El Fah Esam Tafongla Lalos

Kunokon 

By Deaconese Niokong Y. Tara

Saturday June 27 2015
Sifac: Leum God El Fah Esam Tafongla Lalos
Mwe Read: Jeremiah 14:1-10

Deaconese Niokong Y. Tara

Ma se mwet nga sang kulo nuh sin Leum God Fuhlahtlana ke kulang lal a pahkotenwen lal nu sesr kais sie. Nga simis mwe lutlut se inge, tia in luti nu selos su a fwa wi ridi u, a kut in tukeweni a lutlutti ka.

Mwe lutlut se inge fwahk ke kahs lun Leum God nu sel Jeremiah mwet pahluh. Jeremiah el sie mwet pahluh na yok, kuhtuh ma el palye inge, el moul na lie ke pahl se sikyak ah. Ke pahl se pac na inge Leum God el fwahk nuh sel ke ma ah sikyak nu sin mwet Juda a Jerusalem.

Leum God el a sang kai nuh selos ke sripen seahjos lalos. Juda el muta in asor, a mwet lal u ona in fohk u elos arlana asor. Ac Jerusalem el wowoyak in suk kahsru. Mwet fwuhlaht lalos u, suphalah mwet kuhlahn sap lalos in ut kof, elos som nuke nien kofuh ac koflah in konoahk kof, elos arlana asor.

Mwet orek ima elos arlana supar meyen wangin af in fwal selos, oinge infohku poholah, a imah lalos koflah kap mwo. A kosro deer in imah u elos aswelah ma nahtuh. A sisal som liki, meyen wangin mah nahlos. Ac oayapah donky lemnak elos koflah konoah ahk ma nahlos.

Mwet Juda a Jerusalem elos puhlakin ma upa nuh selos. Elos wowoyak nuh sin leum God ah fwak, a koluk lasr fwinne fal in liskuhtlah Leum God, Kasre kut oahna ke kom wuhlema. Kut forlah liki kom pahl puhs, kut orekma koluk lain kom. Tuhsruk kom mukena pa mwe fwinsrak lasr. Etweyahk lah kuht mwet lom, kom na pa ku in molikuhtlah. Efuh kuh kom oahna sie mwet sac nu sesr. Tusruhk Leum God el esam na tahfongla lalos.

Painge ma Leum God el fwahk ke mwet lal kowos lungse in kahengla liki yuh, ah tiac liahahng oiyowos. Sifwana, nga tia insewowo selos, nga fwah esam ma koluk lalos, ah kalye elos ke orekma koluk. Elos oru, painge kuty kahs lal Jeremiah mwet pahluh el fwakahk nuh selos.

Na in oiyah se pac na inge nuh sesr in paht inge. Kut fwin fwahsr liki mwe luti, kuh oruh ma lungse lasr sifahna, Leum God el afwah use pac kuht in kuh pah in puhlakin kaiyauk lal. A kut fwin forlah liki ma koluk a auliak in suk Leum God el a fwah nunak munas nuh sesr ac ak insewowo ye kut.

Deaconese Niokong Yukiwo Tara.

Friday (6/26) Sifac: Israel Srangesr Folok Nu Yuruk

Kunokon

By Lipan Welly

Friday June 26 2015

Sifac: Israel Srangesr Folok Nu Yuruk

Mwe Read: Hosea 11:1-7

Lipan Welly

In wi mwet nukewa pac in oru kaksak lasr nusin God Fulatlacna lasr ke mwe insewowo pukanten kut liye ac pulakin ke moul lasr. Kut enenu na kut in tuku na Yorol ac fototo na Yorol in pacl nukewa. Moul lasr uh enenu na in ma Nusel. 

Ke Israel el tulik se nga lungse el ac pangnolma liki Egypt oana ke el wen nutik (v1). Ke pus na pacl nga pang nu sel, puseni pac pacl el forla likiyu (v2). Kut oasr ke Quarter (4th), saflah i yen Kahs in Kol ke year misenge: Mwet Palu Lun God Kwafe Ke Nununku Suwohs. Mwet palu Hosea el tuh sollac sin God elan fahkak ke suwoswos Lun God nusin tulik nutin Israel (Norhtern Kingdom). Oana ke mwet palu Amos el oru nuselos kut nofon lutlut kac fahsru ke mutun month se fahsru. Som liki God ac alu nuke god lun Canan (Baal) use lemta na yohk sin God fulatlana lasr. Elos som liki masap akwuki elos in fahsr ke tukun elos tuku liki acn Egypt. 

God El orekma kunul mwet palu Hosea wi mutun kial (Gomer) in fahkak aklalfon lun mwet Israel inge oana ke Gomer el aklalfonyal Hosea. Hosea el fahk tia inse paye lun mwet Israel inge nusin God oana ke mutan kial sifanna oru nusel. Week luo somla kut lutlut kac lah God El tia ku in kiapeyuklac. Tia sie fenna kuh in use nunak lalfon lalos sang in aklalfon ye God Fulatlana lasr. Hosea el liye ke moul lal sifenna nuke mutan kial ac ke orekma sesuwos lun mwet Israel. Wangin ma e fah wiklac liki God. Satan el oasr yorosr in pacl nukewa in oru kikiap lal nusesr. Kut tia ku in kalweni ma tulik nutin Israel inge oru. Elos tia lohng kahs lun God su Hosea el tafuh nuselos uh elos sremla na ke moul sukusok lalos. 

God El fah tiana mulkunla: pa sifwa lulap lasr ke week se inge. Ma koluk ac seakos lun tulik Israel inge e fah tia mulkinyukla sin God. Mweun ac fah sukela mwet luk mweyen elos oru na lungse lalos sifacna (v6). Elos sruasrala in forla likiyu (v7). Mwe pakomatu na yohk se pa inge sin God Fulatlana lah in mwet na Lal sifacna uh elos forlah lukel. Elos mulkunlah God lalos uh ac elos forlah alu nuke god saye. Israel nga ac filikomla fuka? Nga ac siskomla fuka? Insiuk ac tiana lela ngan oru ouinge, Lungse luk nu sum arulana ku na pwaye. Ke sripen lungse yohk lun God nuselos El kifuhs mwet Lal in folok na yorol in pacl nukewa.

Kut nofon mwet koluk. Nga e fahk lah nga pa koluk emeet: kosro, kikiap, rapku, kaskas koluk lain God, insefulat, nga suk in wo nusik na mukena, nga nunku yohk keik sifacna. Nga arulana suk in folokin ma koluk mwet uh oru nusik. Sriklac lungse ac sriklac nunak munas luk nusin mwet oru koluk nusik. Ke lungkulancg Lun God nusik mah inge kakasrik na srikeni. Ku lun God ac lungse yohk Lal pah innek soko kut enenu in moul kin inge na uh. Lungse Luk nu sum arulana ku na pwaye (v8): Jesus El tuku akpayeilah lungse yohk Lun Papa tumacl nusesr nofon. El tiana tuku in judge i kut uh El tuku in akpayeilah mah simlah ku srumunyuk sin mwet palu inge lah Papa tumal Lungse kut nofon. Lungse yohk Lal pa: kut nofon. El ke na kut nofon in moul. 

Use ma koluk nukewa na yorol, wnagin ma ku in wiklac ac moul kin mah Wen natul, Jesus El oakiac nusesr nofon. Mwe lutlut se inge kalem; tulik nutin Israel inge som liki God ac elos sun kaiyuk na upac na selos. Suk Jesus inge na ac eis moul ma patpat ac forlah liki mah wangin sripac lun faclu. Muta ke akwuk suwos Lun God, su Jesus mukena pa ku in use nusesr kewa. Kulo kaksakin God ke El sifil pac akesmakinye kut nofon lah wangin mwet ku in kiapeyal oana ke mutan kial Hosea oru. Pacl na wowo lasr nofon in folok na yorol ke pacl se inge ke inse pwaye. Kulo ac paing mwet nukewa. Nunak munas kampare pray kesr nofon kut nofon enenu God ke pacl inge.

Thursday (6/25) Sifac: Ma Koluk Lun Israel Fah Kunausyukla

Kunokon

By Deaconese Havelyn Tosie

Thursday June 25 2015

Sifac: Ma Koluk Lun Israel Fah Kunausyukla

Mwe Read: Hosea 10:1-8

Deaconese Havelyn Tosie

Hosea , wen natul Peeri, sie met palu lun Leum God, su tu luti tokosrai lun Israel, a el palu tokol Amos, in pal se ma arulana yok lokaok we, a meet liki musalla lun an Samaria in ya 721 bc. su sapkinyuk tu lan payuk sel Gomer, sie mutan koluk (sie srikasrak nu sel Hosea tu lan payukyak sel); su el tia fwasr ke wulela a inse paye lal a el sisulla; na panang Hosea el lumu oru lal (Gomer mutan 

kial) nuke oiya lun tulik nutin Israel ke sripen:

A.  Elos tia porongo Leum God, a alu nuke ma srulala 

B.  Elos oanana met takusrkusr inmasrlom mutun fwalu;

C.  A elos kaskas lusrongtwen, wulela kikiap a moulkin nununku sesuwos

Kena lun Leum God pa tulik nutin Israel in forla liki kolik lalos a alu nu sel mukena; oana ke kalem ke mwe rid an, mwe kasrup lalos a ma koluk nukewa lalos a fwa kunausyukla. Kena lun Leum God nu sesr met u pa kut in akos a sokol ke srakna asr pal....kalem ke Hosea 11:8-9; El lungse kut a el kena kut in moul...a el nu wulela nu selos in pal soh a oayapa nu sesr misenge.

Wednesday (6/24) Sifac: Pacl In Kalyeiyuk Tuku Tari

Kunokon 

LM Skipper Ittu

Wednesday June 24 2015
Sifac: Pacl In Kalyeiyuk Tuku Tari
Mwe Read: Hosea 9:5-9

LM Skipper Ittu

Sifwil paing kowos nukewa. Sifa lasr nuke Wednesday se inge fahk muh "Pal In Kalyeiyuk Tuku Tari," oasr in Hosea 9: 5-9. Pusral Mwet Pahlu Hosea nusin Mwet Israel, suc muta ye kolyuk lun Acn Assyria ac Egypt pa inge. Ke sripen elos fahsr liki Wulela lun God nu selos ac alu nusin god sayac, elos oana sie mutan kosro, in oana ke elos tuh oru in Acn Gilbeah ah. Oinge, elos ac koflana akfulatye Leum God; kutu selos ac utuklac ac pukpuki in Acn Egyp ac ma sacok lalos ac musahllah. Elos in etu lah pacl in kalyeiyuk tuku tari tuh elos in eis mwactwacn orekma koluk lalos . Elos finne srungacl Mwet Palu Hosea ac fahk muh el lalfon ac wel, elac sikalani in akasmakinyaclos ke lungse lun God. Sifac se inge kasrekut in esma lah Leum God Elac kai ma koluk nukewa, fal nuke pal sel sulala!!!

Tuesday (6/23) Sifwac :Kosrani Pakah

Kunokon

By LM Tolennoa Kilafwakun

Tuesday: June 23 2015
Sifwac :Kosrani Pakah
Mwe Read :Hosia 8:7--14

LM Tolennoa Kilafwakun

In sifwil pac oraclla pusrenkaksak lasr nusin El su Fulact liki nukewa ke moul wowo, karunginyuk wowo,ac ke pacl wowo. Su El ase nu sesr in sifwil pac tukeni in alutluti ke kahs mutacl, kahs in moul, ac kahs in molelah nu ke sie moul in finsrak nu ke moul ma patpat yurin God..

Mwe read lasr u sikyak ke pacl se Acn Samaria Capital lun Northern Kingdom,ku ke kutu pacl el karungin kewana acn Israel. Ke pacna pacl se inge, Jeroboam el tokosra lun Israel.Ke sripen fosrngah lal in ituklac wal lun toko lukel,sin met in sou lal King David, ku sel Reoboam sifana. Oinge el tilokinyac met Israel in tui te suul pac fahsr orek Kisac
Jerusalem nu sin God Papa. Ac el oralla god lal ke ma sroloaclah gold fachk mu pa inge god lalos u su usaclosme liki facl Egypt , su el oayapa oralla acn in alu Fineol u, ac sulacla met tol lal in orekma ke iwen alu inge, su tia ma ke sruf lun Levi, ku tia ma srisrsrisr sin God Papa.., 1King 12 :26-31,..Lah mac liye lun Leum God kaclos......
El liye mu I srael oana soko loaf in flao ma mollac na tafu," men elos mwet lun God a elos payuk sin met sac ac moulkin their evil ways, Nunal lalos ac oiyac lalos wacngin akilenyen God Papa ".Fahk pac lah akupasri lalos nu sin mutunfwacl sayac akmunasyela kuiyaclos, Su elos pang nu sin mutunfacl sahyac ac moli nu selos in kasrelos, Tu Leum God El ac fah sanh kai nu selos men elos facsr liki inkacnek lalos nu sin God Moul ac tuyak laenul.....Hosea 7: 8--13

Leum God el lain Israel ke alu lalos nu ke ma sroloaclah su El fahk oinge""Mwet lokoalok luk pa tuhwi fin acn sik oacna eagle u"".akkalemye ke pacl se ac meuniyuk Israel sin mutun facl na ku se ac elac usacloslac nu in sroo. Elos finne mu elos mwet lun God, elos etu ke God,; Nga srunga orekma lalos ke elos sang silver ac gold lalos oracllah ma sroloaloah ac alu nu kac. Nga tia lungse cow mukul gold mwet u alu nu kac in city Samaria"NGA AC SOANO NE NGAC,ELOS IN SISLAH ALYALU LALOS NU KE MA SROLOACLAH INGE ??""

Elos tahknelik Eng u na elos ac kosracni PAKAH, ""Akalemye lah moul lun Israel, moul in lulalfongi lalos oana facsr lun eng u,elos tiana nunkeack ac nunkaclah.silaklak lac kutu nunak lalos inakilen la elos pa Leum God El orekmkin in srulun instument se lal nu sin mwet u.elos in kasru inkanek lun mwet u nu sin God. Ke elos fahsr liki inkanek lalos nu sin God inge, kaiyuk lun Leum God nu selos ac tuku ke sie oiyac na uppa.Su pa kalem ke meuniyuklac elos nu in sroo, (captivity).moul ,alos fahk pac mu oana sie tup fokelik wacngilac sripac.acelos oacna donkey lemnak forfor wel, kalmackin mu wacnginla akilenyaclos sin Leum God,ac wangin ku lalos sifana,ac fah wacngin akilenyaclos sin mutunfaclu.
Ke elos akpusye loang in alu in sislac ma koluk lun mwet u, fahk lah makoluk lalos wi pacna yokelik, elos pilesru pac mwe luti lun Leum God..elos eis me luti inge mu tia ma nu selos a ma nu sin mwet sahyac. Su ma Leum God el sang elos in moulkin ac sang luti mwet u. Mwe kisac lalos nu sin God El tia insewowo kac, me Leum God El ahkola lan oru kai
Lal nu selos El ac tufah esa losyang nu in poun met lokoalok lalos in kutangulosla ac esukack city selos, ac usacloslac nu in sroo..

Lela kut in etu pac lah ma sroloaclah u pa pac fungulkut misenge inge,Misenge mwet u suk mwe insewowo in sang ahkinsewowoye moul in ikwac.LeumGod el nacklah faclu wo ac fahl nu ke mwe enenu lun sie mahno, Kut srollah kutusrik in tia falkin ma su Leum god el ase in karungin sie mahno.A kut sislac pacl sacok lasr ac ku lasr in ahkkemkatuyekut sifacna nu ke inkanek lasr sifacna.Ma Sroloaclah el tuku ke ma nukewa su ma oan ye mutasr.Pus na pacl masroloa lah inge, su pa kut eis mu ma wo lun faclu nacklah insiuk ku nunak luk ekoslahacn sin Ngun lun God nu ke nunak luk. Pus na pa l nga suk enenu luk ac sou luk ke len na fon se, lotutang nu ke eku, mulkunlah in suk kahs lun God ke len sacn.
Lela kut in ku in akilen la mac wo ac fal ngan oru ac moulkin ke kais sie len.Men El akiyac plan lal nu ke moul lasr oasr yorol. Lela kut in ku in nahwu moul lasr misenge men kut tia etu pacl lac pacngon kut kais sie.Aksahfye fahk ke mwe read u,luti kut in etu lah kut tahknelik srik, kut ac fah kosrani ke ma yok,kut orallah ma koluk srik,God Fulact lah kai kut ke ma yok,ku uppac.
Kulo ke mwe lutlut wo su tuku in akasmakinye kut ke moul lasr, in karungin kut liki mawo lun Faclu.....

Kulo ma lulahp

Tolenoa Kilafwakun
4801Wrightsboro RD
Grovetown GA 30813
tkilafwakun@gmail.com

Monday (6/22) Sifac: Sie Sracl In Lohng Kahs Lun God

Kunokon

By Robert Kilafwasru

Monday June 22 2015
Sifac:  Sie Sracl In Lohng Kahs Lun God
Mwe Read: Amos 8:11-14

Robert Kilafwasru

In wi pac kaksakin Leum God ke ma wolacna puspus El ase nusesr nukewa. Ke kut kuh in sifil pulakin lung kulang Lal pacnang kut sifil pac sie sin sie ke kahs wolacna Lal.

Mwe read se inge ak-kalemye ke kalyeiuck nusin mwet Israel. Leum God el tuh sang kain in aruruma nusel mwet palu Amos. Inmasrlon aruruma inge, asr sie sin aruruma inge ma Amos el lie sie fohtoh in fokinsak. Fohtoh in fokinsak se inge El ak-kalemye ke “Mesrlah’’ lun pacl uh. Kalmackin nuke len se ac tufah ma uh tuku ke God elac fah sang kalyeyuck nusin mwet Israel ke sripen koluk lalos. Ke verse 2 ke chapter 8 ke mwe read se inge, God el sramsramkin “ pacl saflah lun mwet luk, mwet Israel in summa, Nga fah tiac sifil ekulla nunak luk ke kayaelos.’’ Ke len se inge ac tuku uh, wacngin na wacngin ma ac tulokinyac nununku suwoswos lun God.

God elac fah kai mwet Israel ke “Sie Sracl In Long Kahs Lun God.” Fahk muh, Pacl se ac fah tuku ke nga fah supacma sracl nu fin acn uh. Mwet uh ac fah masrinsral, tuh tiac nu ke mwe mongo. Elos ac malu, tuh tiac nu ke mwe nim. Elos ac masrinsracl ac malu nuke kahs in luti sin Leum God. Elos ac fah suk kahs lun God yen nukewa ac elos ac fah tiac konaack. God elac fah sruokyac kahs lal lukelos nukewa. Finne mukul fusr ac mutan fusr suc kuh in mano ac tufah wacngin pac kuh lalos in sokak kahs lun God. Sracl in long ke kahs lun God ac sang keok nu selos ac elos ac tufah tiac moliyucklac ke sripen kahs lun God alukelos lac tari.

Lela nusesr nukewa in luti ke mwe read se inge. Kut in tiacna pilesru in porongo kahs lun God ke srackna asr pacl lula lasr in fufahsryucsr lasr fin falu se inge. God el filiyac kahs mutal Lal in bible uh kut nukewa in lutlut kac in sang kasre kut ke moul in lulalfongi lasr. Kut in oyacpa orekmakin kahs lal in fahkack wolacna lal nu sin mwet wiacsr nukewa. God el kena tu kut in seseslah ke kahs wolacna Lal, a kut in tiac sun keok ke len lun Leum ac fah tuku.

RKILAFWASRU

Sunday (6/21) Sifac: Kasrup Sukawil

Kunokon

By Rev. Takeo Likiaksa

Sunday June 21 2015
Sifac: Kasrup Sukawil
Mwe Read: Amos 6:4-8, 11-14

Rev. Takeo Likiaksa

Amos el tafwela kahs in akesmak lal nu sin kewana mwet Israel ac Judah ke ouiyen moul lalos. Mwe read uh fahk la elos moul insraelak motoko mu ma nukewa elos oru wangin elya kac. Mwe kasrup ma elos esla sin mwet kwacoh ac enenu, elos insewowokin ma inge wi mwe mongo yuyu nwaclos. Moul insrahelak lalos oru elos in kinacla on ac yuk on lalos ke elos oananla ke mwet muta wowo in lohm selos.

Wangin na nunak in elya lalos ke ma ac sikyak nu selos, pa oru elos in onon srisrik ke elos eis mwe nimnim ac alu nuke ma srolala lalos. Ac tia paht elos ac utuklac nu in srou, ac elos ac fah tila sifil pula moul insewowo ma elos moulkin.

Wanginla insewowo lun Leum God ke ouiyen moul lalos, wanginla pac akinsewowo lun God nu selos ma na ke sripen ouiyen moul lalos. Wanginla akilenyen God ac ku Lal selos, a elos fungfungla nuke ku lalos sifacna.

Oru lalos inge oru Leum God elan akola sie mutunfacl sahyac in tuku esla acn selos, ac mutun facl se inge pa Assyria, tu pa inge kaiyuk lun Leum God nu selos.

Sifac lasr uh fahk mu “Kasrup Sukawil”. Kut oasr e oyac ke mwe nunak ac mwe read lasr uh. Lela nu sesr in tia fungfungla nuke mwe kasrup lasr, ku lasr, ac mwe insewowo ma oasr yorosr. Ma inge nukewa ma lun God ac el ase ma inge kut in orekmakin in kasre kut ac kasru pac elos su oasr enenu la. Esam ma wo lun faclu ma lusrongten, ma na nuke kitin pacl. Pa pac oru in fwack mu kasrup sukawil.

Saturday (6/20) Sifac: Mwet Wo Elos Kulang

Kunokon

By Surleigh Tara

Saturday June 20 2015
Sifac: Mwet Wo Elos Kulang
Mwe Read:Psalm 37:14-22

Surleigh Tara

Mwe read se inge ma King David el sihmihs nusel King Solomon in sang etacack nusel.  In pacl se inge matwacl King David el oasr ke year 70 suc muh kuht kalhlem kac la el mahtuh oh in pacl se inge.

Sim lal King David inge akkalemye nusel King Solomon in etuh lah muikui koluk uh e tufwa wangin sripac.  El sramsram nukac kuhfan mwe meun nutin mwet e tufwa kuhnahos elos lac sifacna ke sripen elos srike in kunaoslah mwet suhkahsrup ac mwet enenu. 

Ke sripen Leum pa esang karinginyuck ac kolyuck nu selos, wangin na sripac in pus ma luhn mwet koluk.  Meyen finne pu ma lun mwet wo, Leum God pa e fwa oruh in wo nusin mwet wo.  Akos lalos nusin Leum God pa use karinginyuck sin Leum God nuselos. 

Akinsewowo suc ma tuku sin God me e tufwa sang mwe srui puspus nu selos.  A elos suc tia akos ke akwuk lun God ac tufwa pula ma upac puspus weang misa nu selos.  Elos e oayapc pulakin selngawiyuck nuke moul lalos. 

Akos lasr nusin God uh yohk liki ma lun facluh suc ma e pwen muhtuhn mwet. Kuht efin oru wo nusin sie sin sie, kuht e tufwa pulakin pac ke woiyen oru lun mwet sahye nusesr. Ac kuht e tufwa kuh in pulakin pac mwe insewowo yohk.

Friday (6/19) Sifac: Ekulla Insiuk Liki Rapku

Kunokon

By Lipan Welly

Friday June 19 2015
Sifac: Ekulla Insiuk Liki Rapku
Mwe Read: Psalm 119:31-38

Lipan Welly

In sifilpac wi kowos mwet nukewa in oru kaksak lasr nusin God Fulatlana ke moul wowo lasr nofon ke pacl se inge. Paing mwet nukewa ac God Elan wi kut nofon ke moul lasr.

Kut kalem ke lah buk in Psalm oasr psalm 150 nofon kac, oralla pa buk se ma loes emeet ke Bible uh. Kut etu pa tari lah Psalm 119 pa loes emeet efin kut compare i nuke sapter saye ke Bible uh. Takin yen Psalm soko inge oakwuki fal nuke alphapet lun Hebrew su oasr ke leta 22. Oasr line alkosr (8) nuke leta se ke alphabet lun Hebrew (8x22=176 verse) tu oralla psalm ku sapter se inge pa loes emeet. Oakwuk se inge orekla tuh in fisrasr nusin mwet Israel in esam ma simlac ke psalm soko inge. Elos in tia mulkunlah.

Psalm soko inge nikin yuk lah suh simusla uh tusruk tuh motkeyuk muh sie na sin mwet inge pa simusla; David, Ezra ac Daniel meyen elos kewa sun ma upac nuke moul lalos sifacna pa nuke: akwuk sulalel lun mwet nu selos, sramsram sutuu ku koluk orek kaclos, elos kalyeiyuk ke moul lalos ac oayapa moul in fosrnga ac elyah elos pulakin. Pa oru sie sramsram yohk ke psalm soko inge pa kalyeiyuk ku elya yohk ma sun mwet lulalfongi lun God. Mwet se simusla inge moul kin moul na keok ac upac tusruktu el etu lah suwos ac sukosok uh tuku ke kahs lun God pa ke Psalm 119:89-91.

Sie moul elya ma srumunyuk inge pa moul in rapku. Kut lohng tari sramsram ke buk lal Amos ke week sac fasru lah el liye moul in sulalal lun mwet Israel inge. Elos suk na in wo nuseltal mukena ac tia kasru mwet su arulana enenu ku sukasrup. Kut liye sie pre ke me read se inge siyuk sin Leum God elan luti kalmen ma sap lal. Aketeya ma sap lom nu sik ac nga fah akos; Nga fah liyaung ke insiuk nofon (v34). Oru tuh nga in lungse akos ma sap lom, yohk liki na tuh nga in kasrup (35). Mwe kasrup ku lusrongten ku use elya na yok ku oralla rapku su tia wo sin God.

Kut nofon etu la Jesus El liki ac nofon ma Lal inkasrao ac tuku in luman mwet se in moli kut lac nofon. El oru ke lungse yohk ac pakoten Lal su enenu kut mwet lulalfongi nukewa in moul kin. God El etu enenu lasr nukewa, El use fahl tari pa nuke pakoten Lal nusesr nukewa tuh kut nofon in eis moul ma patpat. Efin kut suk ma sayen moul ma patpat se inge na pa e use rapku lasr kais sie ac moul fosrnga wangin sripac; elya sutuu ma satan el sang akfosrnga i kut kais sie. Orekma Lun God fahl tari nusesr nukewa, lela Jesus elan kol moul lasr ac lela kut in muta ke muteng sano tuku Lal. Kut nofon enenu in wi pre ke psalm soko inge ke len nukewa sano tuku Lun Leum. Kulo na ma lulap nsuin God ac sifil paing mwet nukewa.

Thursday (6/18) Sifac: Karingin Liki Kain In Rapku Nukewa

Kunokon

By Victor Melander

Thursday June 18 2015
Sifac: Karingin Liki Kain In Rapku Nukewa
Mwe Read: Luke 12:15-21

Victor Melander

Karingin Liki Kain In Rapku Nukewa
Pain kowos kewa. Nga lungse sifwilpac sang kulo na sin GOD ke moul lasr kewa. Ac oayapac ke mwe luti na wowo se utuku nasesr in sifwil pac akesmakinye kut ke moul lasr u. Mwe luti lasr u pa kalem ke mwe read lasr na mesengi u:
 
“Ac El sifilpa fahk nu selos nukewa, ‘Liyaung ac Karingin kowos liki kain in rapku nukewa, mweyen moul na pwaye lun sie mwet tia ma ke ma su oasr la, el finne arulana kasrup. Na Jesus El fahk nu selos pupulyuk se inge: ‘ Pasr mwet kasrup se su acn lal uh oswe kain fokinsak na wowo. El mutewauk in sifacna nunku in el, ‘wangin acn in nwanak fokin ima nukea luk inge we. Mea na ac oru uh?’ Na el sifacna nunku mu, ‘pa inge ma nga ac oru: nga ac kunausya lohm in filma luk nga ac musaela pac kutu in yohk liki, yen nga ac filiya fokin ima ac ma kuk nukewa we. Na nga fah fahk nu sik sifacna, wo nu sum! Ma puspis ma lom ilusyukyak oan, yolyak in akfalye enenu lom nu ke yac puspis fahsru un, inge kom mongla na, mongo, nim ac akinsewowoye kom sifacna!’ A GOD EL fahk nusel. ‘Kom wwet lalfon! Ofong, moul lom ac fah itukla liki kom; na ac lun su ma inge nukwqa ma kom elosak?’ Na Jesus el fahk nu selos, ‘Pa inge ma ac sikyak nu sin mwet su elosak mwe kasrup nu selos sifacna, ac tia kasrup ye mutun GOD uh.”
 
Nga ke kut liye lac efu ku ke pupulyuk seing Jesus El pangon sie mwet kasrup lalfon, mweyen: el lungse mah kasrup lal yok. El lungse mah kasrup lal yok liki GOD. El tia nunku ke mwe inge ac. Ke sripen yok mwe kasrup lal oru el pangon mu el tia enenu GOD.

El lalfon mweyen el lungse mwe kasrup lal yok. Nga lungse akkalemye nusuwos la wangin na paye ma kuluk ke kasrup u kut fwin liyal Abraham el kasrup (Genesis 13: 2) Abraham el arulana kasrup ke seep, nani, cow, ac oayapa silver ac gold. David el kasrup, Solomon el kasrup. Kut fwin oru kasrup u yok liki GOD pa koluk.
 
Kut fwin koflac in fulelac mah kasrup lasr u. Pa kut luti ke mwet kol fusr se el kofla in fuleak mah kasrup lal na sin Christ (Mark 10: 17-22). Sis pac pange tia kalme pa kut in fueak nufon mah kasrup lasr na kut fwa ku in kulansupu Christ. MO! Jesus el srikacl mweyen El etu nunak lal. (Matt 6: 21). “Tuh yen ma saok lowos oasr we, nunkowos ac oan pac we.”
 
Mwe kasrup u pal nakewa ac srikeyuk kom. (Proverbs 3: 8, 9) “Kom fin oru ouinge, ac fah akkeye monum, ac sot ku nu sum. Akfulatye LEUM GOD ke mwe sang lom nu SEL ke mwe kasrup lom, ac nien wain lom ac fah kahkkakla ke wain.”
 
El lalfon mweyen el losrlac ke mwe kasrup lal el mulkunlac GOD. El tiana esam lac manukewa ma LUN GOD. (Psalm 50: 10-14). “Kosro nukewa insak uh ma nutik, ac oayapa cow su muta fin tausin inging. Won lemnak nukewa ma NUTIK ac ma moul nukewa in imae. NGA fin masrinsral, NGA ac tia siyuk sum ke mwe mongo, mweyen faclu ac koano nufon ma LUK Ya Nga kang ikwen cow mukul uh, ku nom srahn nani uh? NGA GOD Fulatlana! Pa inge mwe kisa ma NGA enenu sum. In sang kulo ke insiom, ac in akfale ma kom wulela kac.”
 
Mwe luti se inge sifwil pac tuku na yorosr in akesmakinye kut in tia oana mwet kasrup lalfonse. Kut esam la ma nukewa ma lun GOD. Kut enenu in sang kulo na SIN GOD pal nukewa. Kut in esam in tia lungse mwe kasrup yok liki GOD (Matt 6: 33). “A kowos in nunku meet ma nu ke Tokosrai LUN GOD ac ma lungse lal, na EL ac fah asot ma inge nukewa nu suwos.”

Wednesday (6/17) Sifac: Fahkak Christ Ke Ngunin Nunku Kac Sifacna

Kunokon

By LM Skipper Ittu

Wednesday June 17 2015
Sifac: Fahkak Christ Ke Ngunin Nunku Kac Sifacna
Mwe Read: Philippi 1:12-20

LM Skipper Ittu

Paing kowos nukewa. Sifac lasr nuke Wednesday se inge fahk muh "Fahkak Christ ke Ngunin Nunku Kac Sifacna," oasr in Philippi 1:12-20. Kisen akasmak lal Paul nusin Mwet Christian ke Church Philippi pa inge. Elos in etu na pwaye ke sripen fahkak kuh orekma lalos uh, lah ma in akleumye Christ, a tia ma ke ngunin nunku kac sifacna (kuh tia ma in akwoyalos). Elos in esam ke kalmen moul lalos fin faclu, suc pa in wi fahkak ke Pweng Wo ke Christ. Lah misa kuh moul, elos in insewowo in oru fahkak (orekma) lalos tuh Leum Christ Elan akfulatyeyuk. Lutikut in wi etu ke sripasr kais sie fin faclu, ac kut in pulaik in oru nuke wo lun Christ, a tia nuke wo lasr sifacna.

Tuesday (6/16) Sifac: Eis Yohk Ke Nununku Sesuwohs

Kunokon

By LM Driskell Jack

Tuesday June 16 2015
Sifac: Eis Yohk Ke Nununku Sesuwohs
Mwe Read:Soakas 16:1-11

LM Driskell Jack

Pain kowos nukewa ma utyak in wi kut ke sie mwe lutlut na mwowo nu sesr nukewa. Sifac kacsrekut nuke wik na fon se inge fahk ouinge, “LEUM GOD EL KWASE INSE FULAT”.

Sie ouiyac ma BIBLE MUTAL natusr uh ahkuhtehyac ke ‘inse fulat’ pa kalem ke sramsram ke ‘Tower Se In Siti Babylon’. Fahk ouinge in Genesis 11:4, “Na elos fahk, “Inge kut ac musaela sie siti ac sie tower ma ac sun can inkusrao, inesr in mau ku in pwenpeng, ac kut in tia musaleik nu fin faclu nufon.” Ke sripen GOD Papa El ahkuclen la fulat insiyelos, “Ouinge LEUM GOD El akfahsryeloselik nu fin faclu nufon, ac elos tila musai siti sac (Genesis 11:8).

Mwe read se lung inge, akkalemye nu sesr la, mwe fihnsrak lalos tiana sikyak meyen arulana fulat insiyelos. Sie ouiyac ma akkalemye fulat lun insiyaclos pa sikyack ke elos tiana sackuhnla yurin GOD Papa ma elos fihnsrak nukac meet. Paye la arulana pukanten ma kut finsrak nukac ke moul in Mwet lasr uh; tusruktu, kut enenu in prue nu sin GOD Papa ac siyuk elan wi kut kac, meet liki kut srike in akfahsrye. Sripac yok san pa kut in tia orella mu oasr ku lasr sifacna. Kut in asmak la GOD Papa pa orekutlla ac orella ma nukewa; ac El orekmakinkut Mwet uh, ac pangon kut facl nuke lemlem lal(Genesis 50:20). Meet liki kut isusla nu faclu, El nu etu pac tari lusen moul lasr nuke pacl se ma El ac fah pangon kut. El etu ke muteweack ac nuke saflaiyen ma nukewa faclu.

GOD Papa El (alpha), suh etu muhtehwehack lun nunak lasr, ac El ouyapac (omega), su etuh pac la ehfuhkac saflaiyac pac. Lela nu sesr in fahk kas se inge, ‘Efin ou lungse lun GOD Papa!’ Kut in asmak la wangin na paye ku lasr sifacna. Ke sripac se inge, lela nu sesr in prue ac pang nu sin GOD Papa nuke ma nukewa ma kut fihnsrak nukac. Kut in tia pacngon mu oasr ku lasr sifacna, in tia filang in sramsram mu oasr ma kut ku in orella ke ku lasr sifacna.

Sripac yok se ma kut enenu in sackuhnla ma nukewa meet yurin GOD Papa, pa Elan oasr in kut ke mukuikui lasr in muh paye uhsyac. Meyen El fihn oan in kut, kut tia ku in moul suhfacl ku sesuwos. Kut ac sessesla ke fahko lun ngun (lungse, engan, misla, mongfisrasr, kulang, orekma wo, oaru(Galatia 5:22), pwenang ac uhpac in oasr ouiyac sesuwos sesr in aklalfonye mwet wiyesr. Efin ac sik ouinge, insewowo lun GOD Papa ac oan fihn ma kut finsrak in akfahsrye. Ah arulana uhpac kut in mukuikui in kuhtahsrik nu sin Mwet efin fahko lun ngun sessesla in kut. Ouyapac, fihn GOD Papa El oasr in orekma lasr, ac kut mukuikui fal nuke oakwuk Lal, ma nukewa ma kut siyuk Sel, ku in sik facl nuke akwuk lal.

Kut arulana enenu kacsru sin GOD Papa, meyen oasr pacl kut ku in tahfongla in nunak mu kut ku in ohkacnla ma uh nu sin GOD Papa Tumasr. Tusruktu, pa inge mutehweyen tahfongla in nunak lasr uh. Kut tia ku in kiacpu GOD Papa Tumasr. Ke lulalfongi lasr in Jesus Christ, lela kut in arulana pwaye in nunak lasr, mu top nuke ma nukewa oasr yorol. Ma inge sik ke sripen yok pakoten ac lungse lal nu sesr. Oana ke akkalemyeyuk nu sesr in James 1:18, “Ke lungse lal sifacna El oswekutla ac ase moul nu sesr ke kas pwaye lal, tuh kut fah oana fahko se meet inmasrlon ma orekla lal nukewa.” Kas pwaye lal, nunu oasr ke mutehweyen ma nukewa. “Meet liki orekla faclu, Kas el nuna oasr yurin God, ac el oapana God(John 1:1). Ke sripen suwoswoslana Lal, na tukin Jesus El baptaisla ah, el otyak liki kof uh. Na ikakla an inkusrao nu sel ac el liye Ngun lun God oatume oana sie wuleoa ac tuhwi fac. Na sie pusra inkusro me fahk, “El inge Wen kulo nutik, su nga insewowo kacl(Matthew 3:16-17). Mwe read inge, akkalemye lupan lungse lun GOD Papa nu sesr in supehma Wen kulo natul in molikutla.

Mwe finsrak nu sesr in tia srike in eis yohk ke nununku sesuwos, su tuku ke inkanek kutahsrik ac nunku ke ma ac mwo nu sesr sifacna. Ma inge pa mwe lutlut se inge akkalemye mu ma koluk, ku suhfacl ma kut enenu in leksrenik na lohang nukac. Piyac ma suhfacl lasr inge: Pa in pwepah ke kuh lun nunak lasr sifacna (tia ahkulen ke GOD Papa Tumasr), in ehyenseh koluk (pwepah suhfacl nu sin Mwet ke kas kikiap ac sramsram lihsrongten ke mwet wiyesr kuh tumasr), suhk in kuhnacosla inkanek lun Mwet, kuh in orekmakin mwe paun suhfacl ku ouiyac kuhtahsrik. Ma inge kewa, ku in uhse kacsrpacsr, tusruktu tia kawil. Mwe kacsrup se ma kut ku in eis yohk kac, su tuku ke inkanek suwos pa ke Jesus Christ ac ke ma suwoswos lal. Pa inge ouiyac se ma kut enenu in fungyang nukac; pa inkanek pwaye ac suwoswos akkalemyeyuk ke inkanek lun Leum Jesus Christ.

In eis ke moul suwoswos ac kawil se inge, kut enenu in ahkulen lupan lungse kawil lun GOD Papa nu sesr ke Wen kulo natul. In tuhlehkutla liki ma sufal lasr, lela kut in lemtuhlahack, la kut Mwet, ac moul lasr puhtatyang nuke ouiyac sesuwos pacl nukewa. Kut in lemtuhlahack la ma mwo kut oru, tia apkuran nuke suwoswos ac ahkohsten lun Wen kulo natul. Tia ke ma mwo nga kom orella, tu ke ma mwo ma Wen kulo natul akfahsryela fihn sakseng in ahse finsrak nu sesr nuke moul ma patpat. Ke moul lasr fihn faclu, Mwet uh nununkehkut ke ma sufal lasr. Pacl pus mwet uh tia nunakmunas nu sesr ke ma sufal lasr. Tusruktu, yurin GOD Papa, El ke kut in kuhpacsyang nu Sel ac aksohl, El ahkohla in nunakmunas nu sesr pac ke nununku sesuwos lasr. Pwenang, pacl se kut kuhpacsyang nu SEL, kut eis yohk ke ma mwolana ac suwoswos lal sum wo liki ma kut eis yohk ke nununku sesuwos lasr nu sin Mwet wiyesr.

Kulo ke mwe lutlut mwowo su tuku ke pacl se inge in kacringin kut, in tia eis yohk ke sripen nununku sesuwos lasr Mwet uh ac in eis ke ma mwolana ke suwoswos lun Jesus Christ su ahse nu sesr finsrak nuke moul kawil ac nuke moul ma pahtpat.

LM Driskell J. Jack
Kosrae-Seattle Congregational Church
23254 25th Avenue South
Des Moines, WA 98198
alukosraeseattle@gmail.com

Monday (6/15) Sifac: Sessesla Ke Inse Rapku

Kunokon 

By Deaconese Tulpe Danny

Monday June 15 2015
Sifac: Sessesla Ke Inse Rapku
Sifac: Luke 11:37-42

Deaconese Tulpe Danny

Kaksakin Leum God Fulatlana lasr ke moul lasr nukewa ac ke kas in luti Lal na sesr.

Mwe read se inge srike in akkalemye ke kas lun Jesus nu sin mwet uh, in sensenkakonolos liki mwet Pharisee.Yokna nuke luman moul lalos. Ac me read uh sikyak ke sie mwet Pharisee tuh sollacl Jesus elan welul mongo.Na lulalfongi lun mwet Pharisee pa elos in wihn wihnlac met fwa mongo. Ke Jesus el tia oru oana ,mwet Pharisee sac lut kac. Oinge Jesus el fwak muh kowos mwet Pharisee uh oaru in ohllah acn lihk ke cup ac ahluh in mongo lowos uh,a insiowos seseslana ke suhlalal ac ma koluk. Kalmac pa elos sesesla ke inse rahpkuh. Leum el fwak mu wo elos in sang ma oan in cup ac ahluh lalos nusin mwet suhkahsruhp. Na ma nukewa ac fwa nasnas na selos. El oayapa fak muh kowos akfalye sie tahfuh singucul ke me sang lowos nu sin God a kowos pilesruh nununku suwos ac lungse nu sin God. Fal kowos in oru ma inge ac tia pilesru ma sahyac uh.

Mwe read se inge tuku in luti kut in sensenkin oru lasr in tia oana oru lun mwet Pharisee. Kut in tia oru luhmahsr in wo ye muhtuhn mwet uh, A insiacsr tia wo. Meyen God El etu insiacsr pal nukewa. Lela kut in sang mwe kahsruhp in cup ac ahluh lasr nu sin mwet suhkahsruhp. A kut fin sruokyac tia share oacpa kut in rahpkuh.

Deaconese Tulpe Dizon

Sunday (6/14) Sifac: God El Tiac Ku in Kiapweyuklac

Kunokon

By LM Quartus Esau

Sunday, June 14, 2015
Topic : God El Tiac Ku in Kiapweyuklac
Book : Amos 5: 14, 15, 18-27

LM Quartus Esau

Meet liki ngac tufwa oru kasru srisrik luk nuke mwe lutlut se inge, nga lungse sang kuloh kaksakin God ke moul wowo ac kuh ma El acse nusik in wi kowos sie sin sie ke kas mutal lal ke pacl se inge. Kuloh pac nusel ke akwuck wowo ma El oaki, tu in oasr sie ohiyac ma mwet lulalfongi ac ku in tukeni alutluti ke kas lukmac Lal ke website se inge.

Nga engan pac in orala paing wowo luk nusin mwet nukewa ma wi orekmakin KahsInKol.com in akyokye mwe luti ma oasr yuruwos tari ke kais sie lwen ku week; wi elos nukewa suc acsang pacl saok la in wi mokle project se inge; ac yok nusin sie suc Leum God El sang nunak se inge nu se in ku in tulokonack ac akfasrye oana ke sikyak oinge. 

Sifwa kasreyen Sanri, May 14 fwak mu “God El Tiac Ku in Kiapweyuklac”.

Kas in sensenkakin lal mwet palu Amos nusin mutunfwal Israel tutafla in me read se inge. El pangnolos in auliyak liki ma koluk lalos ac in Suk Leum God. Tu elos fin suk Leum God, elos ac fwa moul. Elos fin tiac suk Leum God, Leum God  El ac fwa putati oana sie e nu fwaclos ac esukulosyak.

Mwe read se inge oasr ip yohk akosr kac:
(1) Ma God El Kena
(2) Lwen lun Leum
(3) Pang nuke Nununku
(4) Sulkakinyen Kaiyuk lun God

 (1) Ip se meet an: Ma God El Kena mutunfwal Israel in oru. (Amos 5:14-15)
•    Mwet palu Amos el akkalemye la mwet Israel enenu in suk in oru ma wo ac ma suwohs ac tiac oru ma koluk. Moul lalos ac orekma lalos enenu in akenganye God in pacl nukewa; Elos in srunga ma koluk ac lungse ma wo. Nununku lalos in suwohs ac paye. In wangin nununku kutasrik ku kikiap nusin mwet muna, mwet mukaimtacl, ac mwet sukasrup. Elos enenu in akkalemye na pwacye la elos ke auliyak liki ma koluk lalos, na saap Leum God Kulana El ac tufwa kasrelos ac akinsewowoyalos.

(2) Ip se akluo an:  Lwen lun Leum (Amos 5:18-20)
•    Mwet palu Amos el srike in akuteyac ke Lwen lun Leum lah: Fwalu ac tufwa losrla ke lohsr madoldol ac wangin kalem la, finne kutusrik na kalem, ac wangin; Ac fwa oana ke sie mwet kaengkin soko lion twe sun bear soko; ku Ac oana ke sie mwet el utyak nu in lohm sel, a wet pwasin ngalsilyac. Akkalemye la Lwen lun Leum ac tuku, Me fosrnga, ongaiyac, mwe lokoalok lulap ac tufwa sikyak ac wangin sie ku in kaengkunlah.


(3) Ip se aktolu an: Suk/Pang Nuke Nununku (Amos 5:21-24)
•    Leum God El akkalemye la El srunga ac El tiac kucnkucni kufwa mwet Israel elos oru ke pacl in alu lalos. Ku finne kisac lalos, El ac tiac eis. On lalos, elos in tulokinyac ke sripen El tiac lungse long. Leum God El akkalemye oinge meyen mwet Israel elos ne oru ma inge nusin God, alu lalos, kisac lalos, on lalos, - a elos sikaleni  na in orek ma koluk ac alu nusin god sayac. Oinge El akola in oru nununku Lal nu selos.

(4) Ip safla sacn: Sulkakinyen Kaiyuk lun God (Amos 5:25-27)
•    Mutunfwal Israel forang in alu nuke god sutuu ac ma sroloala me elos orala, oinge Leum God El ac tufwa esaclosyang nuh sin mutunfwal sayac elos in mwet srouh lalos.

Mutunfwal Israel srike in akfalye kufwa lalos nusin God, ku mwe kisac lalos, ku finne yuck on wowo lalos nusin God. Tusruktu ke sripen moul ac oiyac lalos tiac fwasr ke ma lungse lun God, pwanang God El fwak mu, ma inge kewa El tiac lungse. El sapkin elos in tui ke oreyac, mweyen wangin sripac ac El akola in sang kaiyuck nuselos.

Fuka moul lasr misenge u? Yac kut suk in oru ma wo ac ma lungse lun God in pacl nukewa?  Yac akfulat, alu lasr, on lasr, kut oru ke inse pwaye nusin God? Yac moul lasr lwen nukewa akkalemye ke ma lungse lun God?

Lela kut mwet lulalfongi in sifil loang  nuke moul lasr kais sie. Kut in wi suk in oru ma wo ac tiac suk in oru ma koluk; nununku lun God in mu tiac putati nu yorosr.

Nga kulo nusin God ke sie mwe lutlut wowo ma El acse nusik in wi lutlut kin. Nga etu la nga tiacna fwasr fwal nuke ma lungse Lal, pwanang El acse nusik ngan wi tafela ke me lutlut u.

Kuloh!

Saturday (6/13) Sifac: Nga Etu Tafongla ac Ma Koluk Lowos

Kunokon

By Surleigh Tara

Saturday June 13 2015
Sifac:Nga Etu Tafongla ac Ma Koluk Lowos
Mwe Read: Amos 5:7-13

Surleigh Tara

In tahfela na mwe lutlut se ke Friday ah. Suc ma akasmakinye tulik nuhtin Israel elos in forlah liki ma lungse lun facluh ac in suk God.

Na sifac se nuhke mwe luti ke Saturday ahkkahlemye lah God El etuh ma nuhkewa suc ma sikyak ke sripen kolyuk Lal oru ma inge kuh in sikyak. Kuh se elos puhlakin ke keok lalos e tufwah furokinyucklac nuke mwe insewowo kuh engan inmasrlolos. Ke sripen ma koluk elos oasr kac oruh elos forlah lain ma wo mwet sayac oruh.  Elos oayacpac akkeokye mwet suhkahsrup pa in pisraclah mongo naclos.  Ke sripen puhsiyen ma koluk elos kuhahnahoslah, elo puhtatyang nuke moul keok ac kacoh. Ma koluk puspus suc ma sikyak inge elos fulelah sikyak ac oacyacpac elos oru na eyeinse lalos nukac.  Elos finne etu ke ma sufal sikyak inge, wangin nunak lalos in aksuwosye.

Ma sikyak sufal inge God El kohpohtule. Ke kuh lun God, El mukena pa kuh in furoklah ma koluk inge in mwe inswowo mukena nuselos.  Tusruk elos enenu in akilen ma inge ac forlah in suk akwuk and kolyuk lun God. 

Kuht efin loang nuke mwe lutlut se inge tu na fwal na upe nusesr ke sripen ma sikyak in pacl inge uh.  Kuht liye muh mwe aksruksrukye se pa in oru ma wo kuh in sang kulang nuselos suc enenu.  Kuht akihlen pus ma koluk sikyak inmasrlosr sifwana mwet Christian, uh kuht tiac aksuwos ye ke sripen asrui kuh kupasr lasr nusin elos suc ma putatyang nuke ma koluk inge.  God El use pacl se lasr inge kuht kewa in forlah liki eyeinse lasr nuke mwe pacr lun faclu ac in suk in aksuwosye ma tia fal ac tia wo suc sikyak inmasrlosr pe ngana len.  Kuht efin oru in oana lungse kuh akwuk lun God, kuht ac tufwa pulakin insewowo ke moul lasr ke pacl inge.

Friday (6/12) Sifac: Suk Leum God ac Kowos Fah Moul

Kunokon

By Lipan Welly

Friday June 12 2015
Sifac: Suk Leum God ac Kowos Fah Moul
Mwe Read: Amos 5:1-6

Lipan Welly

In oana pacl nukewa nga e wi mwet nukewa in akilen God fulatlana lasr ke ouiyac wowo kut nofon pulakin ke pacl se inge. Moul lasr uh e wangin saflah kac efin kut lulalfongi ac moul kin mah simlac ke John 3:16. Paing mwet nukewa ac Leum God elan wi kut nofon ke moul lasr.

Likkeke lun tulik nutin Israel inge arulana taklac kalem ke buk lal Amos. Ke sapta limekosr Amos el sifil kalweni srunga yohk ke orekma koluk lun tulik Israel inge ke soko on in asor. Amos el ne akkalemye lah acn Israel el ac fah tiana sifilpa tukakek (v2) mwet inge motko siena. Mwet palu Amos el asor yohk ke likkeke lun mwet inge ac etu lah elos sifacna pikin acn in misa lalos sifana.

Akkalemyeyuk ke verse ak tolu lah siti lun acn Israel supwala mwet in meun lalos ac inkaiyalos misa, mwet na puh folok. Kut ku in liye lah misa ac asor na yohk pa Amos el liye ac pulakin lah e sikyak nusin tulik nutin Israel inge efin elos tia forla liki likkeke lalos.

Pacl se inge arulana yohk mislac ac kasrup lun acn Israel (Northern Kingdom). Jeroboam II el pa tokosra in pacl se inge su eteyuk tari lah el sie tokosra na koluk su alu pac nuke god saye. Amos el etu lah mislac ac kasrup lun acn Israel inge e tia an paht ke sripen elos tia fahsr tukun God paye.

Bethel, Gilgal ac Bersheba (v5) acn tolu inge nofon orekmakinyuk nuke alu nusin god saye. Bible uh fahk lah sie pacl ah acn tolu inge tu orekmakinyuk nuke alu nusin God fulatlacna lasr. Bethel su kahs Hebrew se kalmac pa “loom sin God” (Genesis 12:8), Abraham el tuh oralla mwe loang se we in akfulatye God. Amos el liye forla lun acn Israel ac sifil akesmakinyalos lah LEUM GOD El fahk “fahsru nu yuruk, ac kowos fah moul (v4).

Sifwac se lasr inge arulana kalem tari lah moul ma patpaht uh tuku ke acn se sefanna, God mukenna. Misenge, facluh suk in moulkin mislac ac kasrup su tia tuku sin God me oana ke Amos el liye nuke tulik nutin Israel inge. Mwe mislac ac kasrup lasr mwet Christian uh pa akkalemyeyuk ke Galatia 5:22, a fahko lun Ngun pa lungse, engan, misla, mongfisrasr, kulang, orekma wo, oaru, pusisel, sifacna leum fac.

Suk LEUM GOD, ac kowos fah moul. Kowos fin tia sokol, El fah putati oana sie e nu fin mwet Israel. E sac fah esukak mwet in Bethel, ac wangin sie fah ku in konela (v6). Verse se inge enenu na kut in moulkin ac orekmakin in sang akesmakinyekut kais sie wi tulik wiasr ma srakna muta ke sukosok lalos sifanna. Wangin mwet ku in kainglac liki mah God El akoo nusesr nofon. Misenge pa wo emeet kut in suk God ac eis moul ma patpaht. Sifil kaksakin God ke me lutlut El use in sang akesmakinyekut nofon.

Thursday (6/11) Sifac: Akos Wo Liki Kisac

Kunokon

By Victor Melander

Thursday June 11 2015
Sifac: Akos Wo Liki Kisac
Mwe Read:1 Samuel 15:17-23

Victor Melander

Nga sang kulo ma lulap na sin GOD ke moul lasr ke kut ku pac in sifwil oasun ke mwe luti na wowo se GOD EL sifwil pac ase na sesr kut in we pac luti kac. Nga kulo na sin GOD ke sripen lungse lowos na SEL ac na ke KAS LAL kowos tia tutulac in readi KAS wolana LAL. Kut fwa mutewauk: sifac lasr na mesengi u fwak mu: Akos Wo Liki Kisac. Kut ku in koneak sifac se nge ke fus 22 an ke 1 Samuel sapta 15 an.

Yeac 400 metliki ma simlac seinge, GOD EL tu orala olelac se na sel Joshua: EL ac onela mwet Amelekites. Exodus. 17: 8 “Mwet Amalek tuku ac mweun nu sin mwet Israel in acn Rephidim.” Fahsru na ke pal lal tokosra Saul. GOD EL sung na sel tokosra Saul ma ellan oru (15:1–5) Samuel el fahk nu sel Saul, “Nga pa mwet se LEUM GOD EL supwama in mosrwe komla tuh kom in tokosra lun mwet Israel. Inge, Porongo ma LEUM GOD Kulana EL fahk. 2 EL fah kai mwet Amalek ke sripen mwet mutu lalos tuh aklokalokye mwet Israel ke elo tuku liki facl Egypt. 3 Fahla ac mweuni mwet Amalek ac kunaosla ma lalos nukewa. Nikmet filiya kutena ma. Uniya mwet nukewa: mukul, mutan, tulik srisrik, tulik fusr, oayapac cow, sheep, camel ac donkey.” Deut. 25:17–19 “17 Esam ma mwet Amalek tuh oru nu suwos ke kowos tuku Egypt me. 18 Elos tiana sangeng sin GOD, ac elos tuku tukuwos ke pacl kowos totola ac munasla, ac onela mwet nukewa su fahsr tok ah. 19 Na ke LEUM GOD lowos EL asot nu suwos facl sac, ac oru kowos in onela mwet Amalek nukewa, tuh in wangin mwet sifil esamulos. Nik kowos mukunla! ”

Amalek elac tufana ac ais mwetah ke ma olelac LUN GOD na sel Abraham, Gen. 12:3 “… NGA ac selngawelos su selngawi kom.”
Saul el som mweuni mwet Amelekites. El uniya mwet nukewa: mukul, mutan, tulik srisrik, tulik fusr, cow, sheep, came ac donkey. Sel el pangon mu el som oralac ma GOD EL sap kin na sel. 1 Samuel 15: 13 “…Nga akos na ma sap lun LEUM GOD.” Efu GOD EL eslac tokosrai lukel?

1 Samuel 15: 14-16 “Na Samuel el siyuk, ‘Na efu nga lohng pusren cow ac pusren sheep?...’ma mwet luk elso use yurin mwet Amalek me. Elos srela sheep wowo ac cow wowo tu elsos in kisakin nu sin LEUM GOD lom.” Ma se met Saul el sesuwos; ac ma koluk lal el sang oleyac mwet lal.

Mea mwe sap LUN GOD na sel Saul? Fus 17-19 “…LEUM GOD EL mosrwekomla tu kom in tokosra lun Israel, ac EL…sapkin nu sum tuh kom in kunausla mwet koluk, mwet Amalek….in mweunelos nwe ke na kom onellosla nufon.”

Ke ma Samuel el fwak inge kut a mwutko mu Saul el ac liyac tafonglac lal ac siyuk yuk nunakmunas inge na. Mea el oru? El srakna lafukin fus 20-21 “Saul el fahk, ‘Nga akos LEUM GOD, Nga som oana EL supweyula, ac nga usalu Tokosra Agag…Tusruktu mwet luk elos tia onela sheep ac cow wowo…” Sap el tia na kalem ke la mea;“onellosla nufon.”

Ke sripen yok lunge lal Samuel na sel togosra Saul ac kitin pal lulac lal tal inge, Samuel oru Bible study se. Fus 22-23 “Samuel el fahk, ‘Pia kac ma GOD El lungse uh: akosten, ku mwe sang ac mwe kisa? ‘Akos wo liki mwe kisa’ Porongo wo like sheep fact (fat). Orekma lain GOD, koluk oana alu nu ke ma sruloala, Ke sripen kom lain ma sap lun LEUM GOD, EL oayapa lain lom, ac sisla wal in tokosra liki kom.” Kut kewa alu na sin GOD se fana. Tu na ku ke lulalfongi lowos an. GOD EL lungse kom.

Wednesday (6/10) Sifac: Sesseslana Ke Wosounkas ac Ma Koluk

Kunokon

By LM Skipper Ittu

Wednesday June 10 2015
Sifac: Sesseslana Ke Wosounkas ac Ma Koluk
Mwe Read: Matthew 23:23-28

LM Skipper Ittu

Kusahn kai lun Jesus nusin Mwet Sap lun Mwet Jew ac Mwet Pharisees pa inge. Jesus el panglolos Mwet Wosounkas, ac we nu selos ke sripen elos fahklah ma uh, a wangin ke orekma kuh moul lalos. Elos akfalye in sang sie tafu singucul ke ma lalos, sang mahsrik in akyuye mongo naclos, a elos tia moulkin nununku suwos, pakoten, ac inse pwaye. Elos srengack ke won srisrik putatai nuke kof nimaclos, a elos okomla camel na fon soko. Jesus el fahk oinge in kalmakin lupan nikin (lalfon) lalos ke sripen elos koflana akilenack orekma in luhkuh (wosounkas) lalos inge. Elos oayapa aknasnasye likihn cup ac aluh lalos uh, ac loac uh sesseslah ke funmwet ac sulallal. Elos oana pac sie kulyuk sroallah fasrfasr luhkuh, a loac uh sesseslah ke sri ac ma kulawi. Sifac se inge kasrekut in arulana pwayelana ke orekma in Christian lasr; kut in tia oana Mwet Pharisees inge--wosounkas--kaskas na ke wihs, a wangin ke orekma lalos.

Tuesday (6/9) Sifac: Ku Kowos Ku In Kiapuh God?

Kunokon

By LM Tolenoa M. Kilafwakun

Tuesday June 9 2015
Sifac:Ku Kowos Ku In Kiapuh God?
Mwe Read:Job 13:7-12

LM Tolenoa M. Kilafwakun

Ma se meet ngan wi pac oraclla pusren kaksak lasr nu sin God ke moul wowo ac ke pacl wowo El ase nu sesr kut in wi ipeis ke kahs mutal kahs in moul Lal.Kulo pac ke pacl wo luk kom in tukeni alutluti ke kahs mutal ke fahko lun ngun su ma kom ac nga ac eis moul in insewowo kac nuke moul ma patpat yorun God.

Nga lulalfongi mu sramsram ke moul lal Job, apkuran in tulik na mwet mahtu ku in sramsram kac. Sie sramsram mahtu in Bible mutahl srumunyuk yok ke moul Pusisacl acMongfusracsr lal. Eteyuk Job ke ke moul lal lah el suwoswos ye mutun God Pahpah ac oaru lal in in sikalenina Alu ac karungin inkacnek lal ke moul in lulalfongi lal.Luun pacna mwe read se inge, Leum God El insewowokin moul suwoswos lal Job pacnacng God El esaclacng nu inpacol setan lan srikacl ke moul in lulalfongi lal. Oinge setan el srikacl ke mwe sruf luo ( 2 ).
- Mwe sruf se meet; ............ke sripen Job el insewowokin mwe kasrup lal,su setan el fahk mu kahsrup lal

Inge pa oru el suwoswos ye mutun God u, Leum God El sap el esla kewa mwe
Kasrup lalJob inge, su asr thousands kain in kosro natul wi mwet orekma lal
tulik natul, ac loom sel.
Ma inge finne sikyak nu sel Job,el tiacna fuleack lulalfongi lal nu sin Leum God.
- Mwe Sruf se akluo : .........Srikeyuk Job ke mwe keok nu ke mahnol,su itukyang Fahf in nackla mahnol in

Ahkkeokyacl. Ke Job el pula keok na uppac lal ke mas lun mahno lal, finne
Mutacn kiacl kacfwel lan fuleack lulalfongi lal," elan selngawi God lan mu tari
Misa."  Su top lal Job nu sel el fwack oinge,Ke God El ase ma wo, kut insewowo kac.Na efu kut in tokaskas El fin ase ma uppac nu sesr.Job el ne pula keok na uppa ke mas lun mahno lal el tiana torkaskas lain God Pahpah.Tusruk tu el selngawel sifacna ke keok lal ke oiyac luo.

-Selnga se meet.....el selngawi pacl se el srimetack ah, mu el insewowokin na lan wacngin liki na lan asr
Tu pacnacng lan pula keok na uppac ke mas lal.

-Selnga se ahkluo.el fahk mu el funu misac na eke pacl se el isusla ah lukun wo liki na lan moul.

El ke Leum God Lan akkalwemye nu sel lah efu ku arulana uppalac mwe ongaiya nu sel inge ku el pula mu wangin ma koluk ku sufwal lal a el muta in ongiya lulap. El finsrak kin mu Leum God lan tarisang monglac nu sel lan tari esla moul lal.Ke kutu pacl ke Job el muta in munas in mahno lal oasr mwet kawuk tolu lal tuku in tu akkeyacl, su elos tia akkeyaclack a elos akkeokyaclack. Ke sripen elos tuku sramsram nu sel ke liye lalos sifacna, a tia ma tuku sin God me. Su elos liye mu...

-oasr ma koluk lal Job pa pacnacng lan pula ongaiyac na yok ac muta in keok.
-el fin tiac fahkack ma sufwal lal lah muta na in keok lal, men mwe keok nu sel inge arulana uppaclaclac
-sie pusra inge kahslah in fahk mu, Keok lal Job inge ma in sang musahelack ku ma in ahkpahyacl.

Oasr pac advices lalos nu sel,su elos fahk oinge; elan som fahkulack sifahna nu sin God,lah ellac keok ne ngac, elan som ahknacsnacsyella ac ma sufal in sou lal nu sin God...
Lah mac top lal Job nu selos, el fahk mu elos in tui ke orekma tia paye tia suwos laltacl nu sel inge, elos in tia fahk kahs in ahkkolukyacl,el pula el srackna suwoswos nu sin God su wacngin ma sufwal lal akkolukyacl. Su el sifacna eis pacl lal in lolngok sin Leum God lah mac nununkeyuk el kac u, in tu pacnacng lan arulacna pula keok, men el sifacna pula lah wacngin ma sufwal lal in ahkkeokyacl.

Job el lain kawuk tolu lal inge in siyuk lah efu ku elos ku in kikiacp in kahskahs? Yac elos pahngon elos "KU IN KIACPU GOD"???. Yac elos pahngon God El insewowo ke kahs lalos u..Leum God ellah tufwa kaelos ke sramsram lisrongten lalos..Sramsram nukewa lalos wacngin sripac men tia ma sin God me a ma na selos..

Ke Job el sramsram tari Leum God el fahkack Ku ac Lalmwetmwet Lal nu sel Job su Job el arulacna auli ac mekin yok ke ma el oru ac kahs lal yemutun Leum God..Leum God El ahkkalwemye toasr Lal nu sin kawuk tolu lal Job inge ke sripen kahs lalos tia paye, tia ma sin God a ma selos sifacna, Oinge El sapkin elos in use mwe kisac lalos ke 7 cow mukul ac 7 sheep mukul nu sel Job na Job lan oru pray in ahkinsewowoyacltahl nu sin Leum God. Oinge elos oru oacna ma Leum God El sapkin nu selos..Ke God El sang ku nu sel Job,El folokonacng mwe kahsrup lal ke pal 2 yok liki meet, wi tulik natul.

Mwe nunak ke mwe read u luti kut ke moul suwoswos ac paye ye mutun God.Leum God El orahlla mwet , u in Lumahl ( in His Nature ). Su enenu kut in moulkin Ngun lun God, kut in arulana akikuti ackwoyac ke moul lasr, ke liye lasr, nunak lasr, ke orekma lasr,ke kahs lasr and etc...kut enenu kut in moulkin mutacl ac pwaye y mutun God kke moul in ikwac lasr men El ngeti na ne insri u su, "KUT KOFLA NA IN KIACPU GOD" Ke ma nukewa su oasr yorosr.

Kulo ma lulahp ke mwe lutlut wo kahs lun God kahs moul su tuku in sifil akacsmakinye kut ke moul in lulalfongi lasr kais sie, kulo pac ke God Pahpah El srack nekkut ke kahs Lal in nahwekut ke moul in lulalfongi lasr nu ke moul ma pahtpaht yorol........

LM Tolenoa M. Tolenoa,
Augusta, GA,
Member ke Walung Congregational Church, Kosrae

Monday (6/8/) Sifac: Mwet Lalfon Elos Fahk, “Wangin God”

Kunokon

By Robert Kilafwasru

Monday June 8 2015
Sifac:Mwet Lalfon Elos Fahk, “Wangin God”
Mwe Read: Psalm 14

Robert Kilafwasru

Engan in sifil lie wolacna lun Leum God nusesr nukewa. Ke pacl wowo ma el ase nusesr kais sie in sifil aetui ke kahs mutal Lal.

Psalm soko inge ma lal togosra David ke el lie lupan ohiyac koluk lun mwet lokoalok lal. Mwet inge elos muta na in lungse lalos. Elos moulkin moul sesuwos ac oru kain ma koluk nukewa. Elos suk in ak-kolukye ac ak-fosye inmasrlon mwet pusisel, moulkin ma elos pisrelah , ac elos oacyapac sulelah in tia prue nisun God.Ma ingena kewa oekyucla mu oiyac koluk. Ac mwet nukewa ma oru oiyac inge elos mwet lalfon ke elos tiac akos Leum God. Ke Togosra David el lie ma inge kewa, el prue nusin Leum God tu elin tufah kutangla mwet inge. Verse 5 an akkalemye mu elos ac fah muta in sahngeng lulahp meyen Leum God el welulos na suc aksol.

Lalfon se ma sikyak ke mwe read se inge el kalmackin nuke orekma in pilacsr lasr mwet uh. Lalfon meyen kut sulacla in pilesru ma lungse lun God. Kut etu tari ke ma Leum God el lungse kut in oru, a kut pilacsrelah. Kut sang moul in ikoac lasr uh in fahsr met liki moul in ngun. Oacna ke kalem ke mwe read se inge , fahk mu elos pisrapasr ac ak-kolukye mwet pusisel.Mwet inge elos etu tari masap singuol (Exodus 20:2-17 )ma Moses el tu sang nusin mwet matu lalos, a elos pilsrelah ke sripen moul in lungse lalos.

Mwe read se inge lutiyuc yohk in ohiyac luk sifacna. Kulansap luk nusin Leum God, nga fototo lac ke pacl pus. Nga luti ke lungse , a srackna oasr srunga yuruk. Nga ke sang etauk nusin mwet ngiac, a nga srahngesr long mwe luti paye lun Leum God nusik. Nga luti ke moul suwos, a nga rahpkuh in lom sin mwet wiuck. Nga luti mwet luk sifacna in sensenkin moul in kosro, a nga orekma in kosro in lom selos. Nga fin srike in oacklah kewa pacl nga fototolac ke moul luk, ac mwe asor na yohk. Nga finne tiac fahklah ke pusrek muh nga pilesru lungse lun God tusruktu ohiyac lalfon luk inge kewa fwakak kac. Meyen ke nga tiac moulkin akwuck lun God uh, ma koluk nukewa ac sikyak. God mukena pa innek paye. Ac ma wo nukewa ac tuku yorol me. (Deuteronomy 28:2 )

Lela in mwe luti nusesr kewa, kut in lalmetmet in suk lungse lun God a kut in tiac lalfon in kalweni na ma koluk lasr. Soakas 26:11 fahk oinge,” Sie mwet lalfon suc kalwenina in oru ma lalfon el oacna soko kosro ngalngul ma sifil folokla ac kang woht lal.”


Kulo kaksakin God in ma nukewa!
RKilafwasru

Sunday (6/7) Sifac: Nga Fah Tia Tulokinya Kaiyukac:

Kunokon

By Rev. Takeo Likiaksa

Sunday June 7 2015
Sifac: Nga Fah Tia Tulokinya Kaiyuk
Mwe Read: Amos 2:4-8

Rev. Takeo Likiaksa

Tukin Tokosra Soloman el misa na Tokosrai lun Israel kitakatwelik nuke ip luo. Sruf lun Judah ac Benjamin orala Southern Kingdom (Eir -Judah) kolyuk sel Rehoboam sie wen natul Soloman. Ac sruf 10 saye ah orala Northern Kingdom (Epang -Israel) ye kolyuk lal Jeroboam.

Kaiyuk lun God som nu sin kewana mwet lokwalok lun mwet Israel ac Judah ke sripen ma koluk elos oru nu sin mwet lal. Leum God El oayapa kai mwet Judah a Israel ke sripen elos tia akos masap lal. Elos oayapa alu nuke ma srula.

Mwe read se inge akkalemye kaiyuk lun God nu sin Israel:
1. Elos kukakunla mwet sukasrup in mwet kos (Deutronomy 15: 7-11; Amos 8:6)
2. Sesuwos orekma lalos nu sin mwet sukasrup (Exodus 23:6; Deutronomy 16: 19
3. Elos kosro – (Deutronomy 20: 10-11
4. Esla ma lalos mwe akpaye – Exodus 22: 26,27; Deutronomy 24:6,12,13)
5. Alu nuke god sutuu - Exodus 20: 3-5

Amos in mwe read se inge el sramsram nu sin mwet fulat (upper class). In pacl sa oasr uh luo. Sie u an kasrup na kasrup ac sie u an sukasrup na sukasrup. Na oru lun mwet kasrup inge pa orala in oasr kahs se mu - mwet kasrup elos kasrupi ac mwet sukasrup elos sukasrup lah. Elos esla mwe kasrup lun mwet sukasrup ac akkolukyalos.

Kut liye lah wangin pakomuta lalos nu sin mwet kwacoh mwet munas ac mwet sukasrup. Elos esla ma nukewa lun mwet ouinge lukwelos elos finne tia enenu. Akkalemye nunak in nunku kac sifacna lalos. Elos tia akilen ku lun God.

Ouiyen mukuikui ac oru lalos pa oru Leum God elan fahk ke sifac lasr u – “Nga Fah Tia Tulokinya Kaiyuk”

Wo kut in eis mwe lutlut u in akesmakye kut ke nunak ac oru lasr nu sin mwet uh. Esam God el lungse mwet nukewa oana sie. El tia suk ke wal, karup, ku pengpeng. Ke ma inge wok u in sifacna karungin kut liki kaiyuk lun God, a kut in eis mwe insewowo ke pacl se tok.